Asambleja e PS-së Zbardhet plani i Ramës për zgjedhjet e 2013-s
Fernanda Cenko
Me masa të blinduara antimediatike dje kryesocialisti Edi Rama ka shpalosur planin e veprimit deri në ditën e zgjedhjeve. Në Asamblenë Kombëtare të PS, e cila është zhvilluar me dyer të mbyllura, kreu i PS nëpërmjet një video projektori dhe programit poëer-point ka mundur t’i bëjë një ekspoze planit të veprimit për organizmin e zgjedhjeve, duke nisur që nga lideri, deputetët, forumet e partive, kryetarët e bashkive, komunave, organizatave e deri te zgjedhësit.
Me skema dhe organigrama të pasqyruar në një ekran të madh të improvizuar Rama ka shpjeguar organizimin e strukturave, grupeve të punës si dhe të organizatave me anëtarë ose jo anëtarë të Partisë Socialiste që do të mbrojnë votën. Strategjia është ndërtuar në dy kolona, të cilat janë ato të vizionit e pikëpamjeve komunikative dhe organizimi. Katër janë çështjet ku do të fokusohet komunikimi me elektoratin, demokracia e re, ekonomia e re, shoqëria e re dhe integrimi. Në strategjinë elektorale të Partisë Socialiste janë parashikuar rrugët për shpalosjen e programit politik, rrugët për të ndërtuar koalicionet politike në prag të zgjedhjeve, mënyra sesi do të sillet opozita më e madhe e vendit me median, si dhe strategjitë për mbrojtjen e votës në ditën e votimit.
Një pjesë e rëndësishme e strategjisë është edhe ndërtimi i koalicioneve, për të cilat Rama mësohet të ketë thënë se ato do të ndërtohen në funksion të mirëqeverisjes së nesërme, duke mirëpritur kontributin e çdo force politike për t’iu bashkuar një koalicioni të gjerë opozitar. Rama ka shpjeguar sesi skema e organizimit do të nisë, fjala bie, që nga lideri i partisë te deputetët, tek Asambleja e deri te koordinatorët në terren dhe organizatat e partisë.
Gjatë mbledhjes me dyer të mbyllura Rama është shprehur se strategjia e hartuar prej tij do të pasurohet me ide të reja gjatë prezantimit në forume të tjera.
Listat
Kryesocialisti Edi Rama është ndalur edhe në një çështje tjetër të rëndësishme, atë të listave të zgjedhësve. Ai u ka kërkuar deputetëve dhe drejtuesve vendorë që të verifikojnë listat e zgjedhjeve dhe të merren kryesisht me votuesit e PS që kanë ndryshuar vendbanim pas viteve ‘90, por që gjendjen civile nuk e kanë ndryshuar. Pra, e thënë ndryshe, të gjithë votuesit socialistë larguar, pa ndryshuar gjendjen civile, duhet të kontaktohen, të këshillohen dhe ndihmohen për të zhvendosur Gjendjen Civile. Rama u ka kërkuar që nëpërmjet strategjisë së PS të miklojnë edhe qytetarët të cilët janë të luhatur, duke i kthyer në votues të PS-së. Po një procedurë e tillë, sipas porosisë së kryesocialistit Rama, do të ndiqet edhe për emigrantët. Ashtu si më 2009, edhe më 2013 Rama propozon që derë më derë duhet të prezantohet programi i PS, i cili duhet të votohet për të ardhur në qeveri. Duke folur në Asamblenë Kombëtare të PS-së, kryesocialisti Rama ka kërkuar zgjerim të koalicionit të majtë dhe forcim të raporteve me aleatët. “Duhet të forcojmë raportet tona me aleatët në bazën e partneritetit të drejtë me njëri-tjetrin. Ne duhet të shohim interesat e zgjedhësve dhe jo interesat e ngushta politike”, mësohet të jetë shprehur Rama. Kreu i PS në kontekstin e ndërtimit të koalicioneve tha se PS mund dhe do t’i fitojë zgjedhjet edhe pa LSI-në, duke marrë si shembull rastet e bashkive të Durrësit dhe Elbasanit, që në zgjedhjet e 2011-s u fituan nga PS, duke qenë kundërshtarë politikë me LSI.
Në përfundim të Asamblesë Kombëtare, e cila ka zgjatur më shumë se tri orë, sekretari organizativ Blendi Klosi u shpreh se “Diskutimi i Asamblesë u fokusua së pari në aspektin e komunikimit, përçimit të mesazhit të kësaj partie, për arsyet që ne do të paraqesim para elektoratit shqiptar pse duhet të votojnë Partinë Socialiste dhe Programin e saj “Për një Rilindje Shqiptare”. Së dyti, diskutimi u shtrua gjerësisht për aspektet organizative, pjesë e punës së vazhduar të partisë gjatë vitit në vazhdim, deri ditën e zgjedhjeve.”, u shpreh Klosi.
Replikat e kreut të PS me kryetarin për rolin e Liderit në strategji
Gjoni-Ramës: Nëse ne jemi kooperativë, ti je kryetari i kooperativës
Asambleja Kombëtare do të kishte shkuar dje fjollë, nëse nuk do ekzistonte debati mes kryesocialistit Edi Rama dhe deputetit Ilir Gjoni. Ky i fundit, duke vlerësuar strategjinë që Rama kishte sjellë në Asamble, sugjeroi që roli i liderit të mos përcillet tek elektorati si në kohët e tjera, ku çdo porosi e direktivë duhet të vijë nga lartë-poshtë.
Kryesocialisti Rama pas ndërhyrjes së Gjonit është përgjigjur se “Deputetët që s’mund të jenë të sigurt për t’u rizgjedhur, duhet të punojnë më shumë në terren dhe të mos fusin njerëz, por të punojnë. Duhet punuar në teren se s’mendon më kooperativa për ta.
Nga ana tjetër, Gjoni ka replikuar menjëherë se, “nëse ne jemi kooperativë, ti je kryetari i kooperativës”. Pas dy replikave të shkurta, situata është marrë nën kontroll, duke vazhduar diskutimi nga anëtari i Asamblesë, Servet Pëllumbi.
Debati Gjoni – Rama
Ilir Gjoni: E vlerësoj strategjinë që keni sjellë në Asamble, por kisha një sugjerim. Mendoj që roli i liderit të mos përcillet tek elektorati si në kohët e tjera, të mos bëjmë barriera, ku çdo gjë duhet të vijë nga lartë-poshtë.
Edi Rama: Deputetët që s’mund të jenë të sigurt për t’u rizgjedhur, duhet të punojnë më shumë në terren dhe të mos fusin njerëz, por të punojnë. Duhet punuar në teren se s’mendon më kooperativa për ta.
Ilir Gjoni (ngre tonin e zërit): Kujt i tregon kooperativën, se këta këtu janë burra të nderuar, po ke ndonjë gjë personale, flasim në mbledhjen e grupit. Por edhe nëse kjo është kooperativë, ti je kryetari i kooperativës.
Edi Rama (I ndërpret fjalën Gjonit): Ulu, Ulu.
Ilir Gjoni: Nuk ulem! S’më komandon ti mua kur të ulem…
Servet Pëllumbi: Do ta vlerësoja planin e strategjisë si pozitiv, por ajo që dua të them është se kërkohet unitet partie, por jo si në komunizëm, por bashkë dhe në kohezion në këto momente zgjedhje. Sa i përket atyre që deklarojnë nisma lëvizje në të mirë të së majtës, mund të them se ato janë lëvizje për socialistët, por jashtë socialistëve.
100 ditët e para të qeverisë Rama, rishikimi i kontratave të jashtëligjshme
Optimist për fitoren në zgjedhjet e përgjithshme të 2013-s, kryesocialisti Rama ka bërë me dije anëtarët e Asamblesë Kombëtare se në 100 ditët e para të qeverisjes së socialistëve do të bëhet rishikimi i të gjitha kontratave që ka lidhur qeveria Berisha. Partia Socialiste ka përsëritur dje qëndrimin për rishikimin e kontratave që janë nënshkruar gjate viteve të fundit mes qeverise shqiptare dhe investitorëve të huaj, por jo vetëm. “Ne do të rishikojmë të gjitha kontratat e partneritetit publik-privat dhe do të kërkojmë anulimin e të gjitha atyre marrëveshjeve që shkelin ligjin, në kushtet e konfliktit të interesit dhe në dëm të interesit të shqiptareve”, është shprehur Ilir Beqaj kohë më parë.
Grupi i punës për ish-të përndjekurit, raport në Asamble
Grupi i punës në PS për çështjen e ish-të përndjekurve politikë ka dalë me një raport që i është drejtuar Asamblesë Kombëtare. Duke i bërë një rezyme situatës së rënduar të grevistëve, grupi i punës ka konstatuar se “ka mangësi në zbatimin e ligjit sa i përket afateve në disbursimin e kësteve. Ligji 9831 i vitit 2007 parashikonte shpërndarjen e plotë të shumës së dëmshpërblimit me tetë këste brenda një limiti kohor tetëvjeçar. Kjo dispozitë është shkelur nga qeveria, pasi deri në vitin 2012 shumica e ish-të përndjekurve kanë marrë vetëm këstin e parë. Ndërkohë me amendimin që i është bërë këtij ligji në vitin 2009 parashikohet se për dëmshpërblimet nuk do të ketë afate kohore. Në gjykimin tonë ky amendim qartas krijon një pasiguri juridike për përfituesit e ligjit e për rrjedhojë jemi të mendimit se mendimi në fjalë mund të jetë antikushtetues”, thuhet në kërkesën e parashtruar në Asamble.
Nano? Pëllumbi: Lëvizje për socialistët, por jashtë socialistëve
Partisë Socialiste më shumë se strategjitë e shkruara elektorale për të fituar zgjedhjet e ardhshme parlamentare, i nevojitet unitet dhe kohezion mes vetë socialistëve. Ky ka qenë mesazhi që ka përcjellë dje ish-kryetari socialist i Kuvendit, Servet Pëllumbi, gjatë mbledhjes së Asamblesë. Faktikisht ndërhyrja e Pëllumbit mësohet se ka qenë më shumë për të zbutur situatën e tensionuar të krijuar nga debatet Rama-Gjoni, megjithëse ai ka shfrytëzuar këtë rast që në rolin edhe të një prej nga më të vjetërve në këtë forcë të japë disa mesazhe qoftë për drejtuesit e kësaj force, ashtu edhe për anëtarët e tjerë të Asamblesë. Kështu, mësohet se ka vlerësuar si të domosdoshme se përveç përgatitjeve elektorale, socialistët duhet të bashkohen për të mundur Berishën. “Do ta vlerësoja planin e strategjisë si pozitiv, por ajo që dua të them është se kërkohet unitet partie, por jo si në komunizëm, por të jemi bashkë dhe në kohezion në këto momente zgjedhje” – mësohet të jetë shprehur Pëllumbi në ndërhyrjen e vet. Më tej ai nuk ka lënë pa ironizuar edhe përpjekjet e ish-kryesocialistit Fatos Nano për krijimin e lëvizje të re politike në gjirin e së majtës, duke i konsideruar ato si jashtë opozitës. “Sa i përket atyre që deklarojnë nisma lëvizje në të mirë të së majtës, mund të them se ato janë lëvizje për socialistët, por jashtë socialistëve”, mësohet të jetë shprehur Pëllumbi.
Asambleja, Rama bllokon valët e celularëve
Frika e kopjimit të strategjisë elektorale, por edhe e rrjedhjes së informacionit nëpërmjet aparaturave të posaçme të teknologjisë së lartë, ka detyruar lidershipin socialist që për mbledhjen e djeshme të Asamblesë Kombëtare të merrte masa të forta sigurie. Përveç faktit se mediat nuk janë lënë të afrohen apo të futen në ambientet ku zhvillohej mbledhja e Asamblesë, drejtuesit socialistë kishin menduar që të mos linin asnjë mundësi për interceptimin e valëve, qofshin ato televizive, ashtu edhe ato të telefonisë celulare. Pothuajse të gjithë deputetët ashtu edhe gazetarët që e ndiqnin asamblenë nga jashtë ambienteve të sallës së madhe në kompleksin “Xibrak”, nuk kanë arritur ta kuptojnë fillimisht se ç’po ndodhte, pasi nuk mund të komunikonin me telefonat e tyre celularë. Vetëm kur ka mbaruar mbledhja është kuptuar, të paktën nga media, që të gjitha thirrjet apo SMS e dërguara anëtarëve të ndryshëm të Asamblesë kishin qenë të bllokuara dhe nuk kishin shkuar në kohë në destinacion. Sapo mbledhja ka përfunduar është parë dhe konfirmimi i dërgimit të SMS-ve në destinacionet përkatëse. Anëtarë të Asamblesë të pranishëm në mbledhje kanë konfirmuar se as ata vetë nuk kanë mundur të komunikojnë gjatë gjithë kohës që zgjati asambleja, duke bërë të ditur njëkohësisht se ndalimi i valëve ishte bërë nëpërmjet një aparature të posaçme zhurmimi, të cilën duket se Partia Socialiste e ka blerë tashmë dhe e përdor sa herë që ka mbledhje të rëndësishme. Kujtojmë këtu se të njëjtën aparaturë e përdori rreth dy muaj më parë PS edhe gjatë një mbledhje të grupit parlamentar në selinë e PS-së, megjithëse në atë kohë u fol se këtë gjë e kishin bërë përfaqësuesit e kompanisë celulare për shkak të një remonti në antenat që ndodhen sipër godinës së kësaj force. Por duket se blerja e një aparature të tillë tashmë është fakt dhe që ka qenë një veprim i detyruar i socialistëve për të shmangur përgjimet e pretenduara prej tyre nga selia e Ministrisë së Mbrojtjes.
Sot Kongresi i Gruas, Olta Xhaçka drejt kreut
Forumi i Gruas Socialiste do të zgjedhë sot kryetaren e saj të re. Pas një fushate përgatitore dhe zgjedhore në të gjithë vendin, ky forum do të mbledhë sot Kongresin e vet, për të votuar për drejtuesen e tij të re. Nga procesi i zgjedhjeve dhe i marrjes së kandidaturave për kryetar, mësohet se thuajse pjesa dërmuese e grave deputete por edhe disa figura me peshë në këtë forcë politike kanë qenë të propozuara nga baza. Por duket se sot në votim do hidhet vetëm emri i Olta Xhaçkës, kjo pasi me mirëkuptimin edhe të lidershipit të PS-së kandidatet e tjera janë tërhequr nga gara. Për të shuar çdo qejfmbetje, mësohet se Rama ka zhvilluar dje fillimisht pas Asamblesë një takim me të gjitha anëtaret gra të këtij forumi, ku u ka kërkuar atyre angazhim për mbarëvajtjen e Kongresit të sotëm, ndërkohë që pasdite ai ka mbledhur edhe një herë të gjitha emrat e propozuar për pozicionin e kryetarit të këtij forumi.
MAPO
Përgjigju Duke Cituar
Postuar më parë nga POKO
Krijoni Kontakt