Komunizmi: Shkaktar per degradimin e liqenit te Prespes.

[angmokio]

Komunizmi: Shkaktar per degradimin e liqenit te Prespes.



Duket si kallamishte, por ne fakt eshte liqen i mbuluar me kallamishte.


Përgjegjësi i Parkut: Shkak, një gabim trashanik i kohës së komunizmit
Liqeni, i mbuluar tërësisht nga kallamishte

Ekzistenca e liqenit Prespa e Vogël është vënë seriozisht në rrezik, për shkak të një gabimi të rëndë në menaxhimin e ujërave të tij. Alarmi vjen nga drejtues të Parkut Kombëtar të Prespës dhe një grupi shkencëtarësh gjermanë që prej kohësh kujdesen për dy liqenet e mrekullueshme dhe gjithë florën e faunën e parkut. Në një takim me mediat, të zhvilluar dje, ekspertët shqiptarë dhe gjermanë bënë të ditur tragjedinë që i është shkaktuar gjatë këtyre 30 viteve jetës ujore të Prespës së Vogël. E gjithë sipërfaqja ujore e pjesës shqiptare të këtij liqeni të mrekullueshëm rezulton tërësisht e mbuluar nga kallamishtet, të cilat normalisht zhvillohen në masë të reduktuar në pjesë të caktuara të liqenit. “Tashmë sipërfaqja e ujit është e mbuluar tërësisht nga kallamishtet e padëshiruara”, - thotë Olsi Duma, përgjegjës i Parkut Kombëtar. Se sa e rëndë është situata, mjafton të shihet sipërfaqja e liqenit që i përket Greqisë, e cila është tërësisht e pastër nga kallamishtet.

UJËRAT E DEVOLLIT

Përgjegjësi i parkut shpjegon, se dëmi kolosal i detyrohet një vendimi absurd të epokës së komunizmit, kur u pa e arsyeshme që Devolli të devijohej nga rrjedha e vet natyrale për t’u derdhur në Prespën e Vogël. Vendimi u vu në jetë rreth fundit të viteve tetëdhjetë, që do të thotë se për rreth 30 vite ujërat e tij u shkarkuan në Prespën e Vogël. Këto prurje jo të natyrshme për liqenin sillnin me vete sedimente, të cilat favorizuan rritjen e kallamishteve deri në pikën që ato kanë mbuluar tërësisht sipërfaqen e ujit. “Problemi është jo vetëm se këto sedimente janë vendosur tashmë përfundimisht në fund të liqenit, por njëherësh përbëjnë edhe ambientin e përshtatshëm për zhvillimin e kallamishteve”, - vazhdon Duma. Për momentin situata nuk shfaqet tepër e rrezikshme, pasi kallamishtet ofrojnë një habitat të mirë për speciet ujore. Problemi është se në harkun kohor të pak viteve mbipopullimi i ujërave me kallamishte bën që pjesa e “infektuar” të degradojë progresivisht, duke u kthyer në moçalishte e më pas në zonë mjaft problematike.

KORRJA E KALLAMISHTEVE

Tashmë administrata e parkut bashkë me ekspertët gjermanë po studiojnë masat që duhen marrë për pastrimin e ujërave nga pylli i padëshiruar i kallamishteve. Duma sqaron se po merret parasysh prerja masive e tyre, gjë që ka vështirësitë e veta teknike. Njëherësh po mendohet edhe një zgjidhje për trajtimin e masës së madhe të kallameve që do nxirren nga liqeni. Një mënyrë mjaft e mirë do të ishte konvertimi i tyre në lëndë djegëse, e cila do mund të përdorej shumë mirë nga banorët e zonës për ngrohje. “Kemi provuar thërrmimin e kallamave në ashkla të vogla dhe krijimin e masave të përshtatshme për djegie, por nuk na ka dhënë rezultat, pasi sobat që përdorin fshatarët e zonës nuk arrijnë t’i djegin masat e ashklave. Një zgjidhje mbase do të qe thërrmimi i tyre në ashkla më të mëdha përpara krijimit të masave për djegie. Gjithsesi, me rëndësi primare mbetet pastrimi i ujërave nga kallamishtet”, - shpjegon Duma. Një farë ngushëllimi vjen nga fakti se krejt ndryshe shfaqet gjendja e Prespës së Madhe. Falë një projekti të përbashkët disa vjeçar me fondin gjerman për zhvillim KfË, Prespa e Madhe, pas problemeve të shumta të shfaqura këto vite, po kthehet aty ku duhet të jetë: një mrekulli e natyrës.

Gazeta Shqiptare
20-10-2012

[EuroStar1]

Katastrofe

Nuk ka me as te burgosur politike per ta pastruar

[_MALSORI_]

keshtu bene me lumin drin duke e devijuar drejt bunes dhe sot edhe pak shi te bjere ne pelgun ujembledhes te drinit zona e nenshkodres permbyset..

[angmokio]

Prespa ndotet nga ujërat e zeza



Liqeni i Prespës ditë pas dite po shndërrohet në depozitë grumbullimi të ndotjeve që derdhen prej vitesh atje. Mungesa e kanalizimeve për ujërat e zeza në shumë prej fshatrave të komunës Pustec ka bërë që banorët të gjejnë si zgjidhje shkarkimin e tyre në ujin e liqenit, pavarësisht ndotjes dhe dëmit që shkaktohet.

Ata tregojnë se ujërat vërshojnë përmes fshatit në liqen, ndërsa i tremben ndotjes. “Ca kanalizime që ishin hapur më përpara u mbyllën. Kanalet u prishën nga rruga. Ujërat në fshat kalojnë në mes të rrugës dhe shkojnë në liqen”, thotë një prej tyre.

Komuna Pustec, një perlë e relievit dhe zonë turistike, përballë kësaj ndotjeje ngre shqetësimin se përveç banorëve, të cilët janë të ekspozuar ndaj një ndotjeje të tillë, kërcënohet edhe turizmi. Kanalizimet mungojnë pasi nuk ka investime dhe financime, çka ka bërë që projektet të mbeten në dosje.

“Ndotja e liqenit është shumë problematike. Vetëm dy fshatra kanë kanalizime, të tjerat jo dhe ujërat e zeza derdhen në liqen, duke shkaktuar një ndotje shumë të madhe”, deklaron Edmond Themelko, zyrtar i komunës.

Përballë këtij alarmi, prefekti i Korçës Ardit Konomi ka thirrur një mbledhje me aktorët përkatës për të gjetur një zgjidhje të problemit dhe për të mos lejuar agravimin e mëtejshëm të situatës.

“Ne kemi dy basenet e Ohrit dhe Prespës, që i kalojnë rëndësitë kombëtare. Atje janë identifikuar probleme të mëdha mjedisore, por edhe më të mëdha pasi kalojnë këtë problem, duke ndikuar në turizëm dhe në potencialet ekonomike”, thotë Konomi.

Problemi i mungesës së kanalizimeve, përveç komunës Pustec ku kërcënohet turizmi, është një shqetësim edhe për shumë fshatra të tjera të rajonit jug-lindor. / Top Channel

[OPARI]

po more po komunizmi i ka fajet e keni gjetur shkaktarin tani ,komunizmin e ka fajin qe fusha e korces po kthehet ne kenet perseri ,apo qe shkodra permbytet cdo vite,perse nuk permbytej ne kohen e komunizmit

[user010]

Vendimi u vu në jetë rreth fundit të viteve tetëdhjetë, që do të thotë se për rreth 30 vite...
Komunizmi iku ne 90-en perse duhet ti vihet faj komunizmit per deri sa ai nuk ishte ne jete per te korigjuar situaten.

"Gezohem" kur degjoj per gabime te nje qeverije, faktikisht me ka marre malli! E them per te bere pak "kontrast", sepse na mbyti mos interesimi.
Pas nje levizje te gabuar fshihen dhe disa te mire, si p.sh inisiativa, interesimi etj, sado qe rezultati mund te jet i gabuar.

Pas kesaj neglizhences haotike per mjedisin te ketyre qeverive pas 90-es ca e mire fshehet?

Nuk mbroj komunizmin, pasi ai ishte nje nga plaget me te medha per vendin, la njolla qe nuk do fiken lehte, por dhe keto te "mirat" e qeverive te sotme... lere mos e pyet.

Shpresoj te gjejn nje zgjidhje per kete problem dhe per problemete e tjera per mjedisin ne Shqiperi, e kemi masakruar krejt mjedisin pas 90-es! jemi ber si kafsh te egra, pa pik respekti dhe dhimbshurie. Secili ka mar nga nje arme e jepi me e vrar.