Monumenti i Pavarësisë/ 35 mijë euro për fituesin, vendi akoma në diskutim
Në hyrje të Galerisë Kombëtare ndodhet një libër përshtypjesh ku qytetarët pasi të shohin pesë bocetat funaliste të Monumentit të 100-vjetorit të Pavarësisë që ende nuk është përcaktuar se ku do të vendoset, të kenë mundësi të japin përshtypjet e tyre vetëm pasi të jenë identifikuar me emër, mbiemër, që vërtetohet nga një mjet identifikimi zyrtar. Kjo është mënyra e përfshirjes së publikut në përzgjedhjen e bocetës fituese, vlerësim që do të merret në konsideratë dhe nga Komisioni Ndërshtetëror i festimeve të 100-vjetorit të Pavarësisë, i cili do të vërë vulën e fituesit. E fituesi do të ndahet nga ky konkurs me një shpërblim prej 35 mijë eurosh për punën e tij, që do të jetë simbol i 100 vjet të shtetit shqiptar. Pesë bocetet finaliste janë të artistëve Visar Obrija dhe Kai Roman Kiklas (Kosovë, Gjermani), Thoma Thomai Dhamo (Shqipëri), Jörg Plickat (Gjermani), Pjerin Kolnikaj (Shqipëri), Blerta Xhomo dhe Ilirjan Shima (Shqipëri). Për 10 ditë në këtë libër përshtypjesh do të mblidhen mendimet e të gjithë vizitorëve që do të hyjnë në GKA. Por çmimi prej 35 mijë eurosh nuk është e vetmja kosto e Monumentit të Pavarësisë. Fatura financiare do të përcaktohet pasi të jetë vendosur, nga Bashkia e Tiranës në konsulencë më Ministrinë e Kulturës dhe Komisionin Ndërshtetëror të Festimeve, sheshi se ku do të vendoset monumenti si dhe materiali që do të përdoret për realizimin e monumentit fitues. Disa prej artistëve finalistë bashkë me projektin e tyre për monumentin kanë sugjeruar edhe vendin se ku mund të vendoset monumenti, duke lehtësuar në një farë mënyre “barrën” e vendimmarrjes së tre institucioneve. Projekti që paraqet Visar Obrija dhe Kai Roman Kiklas (Kosovë, Gjermani) që në prezantim duket se e ka gjetur vendin ku mund të vendoset. Aty ku dikur ka qenë monumenti i diktatorit ata sjellin veprën e tyre, një vepër e frymëzuar nga banesa tradicionale shqiptare. Për të shprehur idenë e pavarësisë, ata sjellin një ndërtesë të hapur, e cila paraqitet si dy gjysma kubi, ku njëra gjysmë mban çatinë dhe tjetra platformën. Në faqet e brendshme anësore të monumentit do të ketë elemente të vizatuar me lazer si: ‘Deklarata e Pavarësisë’, simboli kombëtar i shqiponjës dhe figura njerëzore. Po kaq funksional për këtë shesh duket edhe modeli që propozon artisti shqiptar Thoma Thomai Dhamo, një vepër që frymëzohet nga imazhi i flamurit. Gjermani Jörg Plickat gjithashtu ka sjellë si propozim dy hallka të hapura zinxhiri që simbolizojnë çlirimin e popullit shqiptar, përbëjnë një monument që mund t’i përshtatet madhësive e hapësirave të ndryshme, duke e lënë të hapur zgjedhjen e vendit. Pra një monument të përshtatshëm për çdo lloj hapësire. Monumenti që propozon Pjerin Kolnikaj duket shumë i lartë për t’u vendosur në një shesh. Monumenti që propozohet prej tij, është menduar si një mbivendosje e 100 pllakave prej mermeri të bardhë. Por juria ka dhënë verdiktin e saj se dimensioni i këtij monumenti është në varësi të hapësirës publike që do t’i ofrohet. Ndërsa propozimi i dy artistëve shqiptarë Blerta Xhomo dhe Ilirjan Shima, që sjellin shqiponjën dykrerëshe, është po aq e përshtatshme për çdo lloj hapësire sa dhe boceta e gjermanit Plickat. Të 5 bocetat e përzgjedhur nga juria e konkursit ndërkombëtar për monumentin e 100-vjetorit të Pavarësisë janë përzgjedhur nga juria e ekspertëve mes 81 bocetave, ku 26 vinin nga Shqipëria, 13 nga diaspora, 8 nga Maqedonia e Kosova dhe 14 nga artistë të huaj.
MAPO
Modelet mund te votohen ketu
http://www.gka.al
Përgjigju Duke Cituar
Postuar më parë nga EuroStar1
Krijoni Kontakt