Close
Faqja 3 prej 4 FillimFillim 1234 FunditFundit
Duke shfaqur rezultatin 21 deri 30 prej 39
  1. #21
    i/e regjistruar
    Anëtarësuar
    10-08-2008
    Postime
    1,280
    Taksirati i Kosovës

    Flaka Surroi


    Publikuar: 07.10.2012 - 15:50

    Tentimrevolucioni i Bacës Kupë duket se vjen paksa i vonuar... po ta kishte pasur guximin ta thoshte këtë pas zgjedhjeve të vitit 2007, gjendja politike dhe ekonomike në Kosovë do të ishte shumë më ndryshe – nuk do të udhëhiqej nga bosët, ndjekjen e të cilëve e kërkon tash ai

    Para një kohe, në fahun postal të redaksisë kishte ardhur një zarf plot broshurash të gjelbra, të titulluara “Mjetet e informimit”. Imazhi i një xhamie me katër minare në prapavijë, nuk ma la asnjë dyshim se ky do të ishte një pamflet propagandues, dhe nga kureshtja mora ta shfletoj. Pjesa e fundit e libërthit përmbante edhe “kapitullin” e emërtuar “70 shenjat e kiametit”, pra shtatëdhjetë elemente që do të duhej të na jepnim të kuptonim se kësaj bote po i vinte fundi.S’munda pa i lexu që të gjitha – disa syresh nuk i kuptova fare (shqipja e paqartë nuk ndihmohej shumë nga “përkthimi” arabisht i asaj që është synuar të thuhej), disa që i referoheshin femrës më shkaktuan neveri, disa më bënë të qesh dhe disa vetëm konstatonin atë që tashmë e dimë të gjithë... Në vijim, po i veçoj disa nga “shenjat e afrimit të kiametit” (në versionin origjinal pa ndërhyrje lekture) -- kur njeriu/njerëzit: marrin ryshfetin; kur ngritin lart ndërtesat; kur lëkurat e egërsirave i shndërrojnë në kolltuqe; kur e veshin mëndafshin; kur i mohohet e drejta e njeriut të drejtë; kur përhapet prostitucioni; kur shkurorëzimi bëhet i lehtë e i shpeshtë; kur i besohet tradhtarit; kur nuk i besohet besnikut; (...) kur shiu pakësohet për shkak të gjynaheve të njerëzve; kur fëmija bëhet dëmsjellës; kur udhëheqësit degjenerohen; kur ministrat bëhen gënjeshtarë; kur besnikët bëhen tradhtarë; kur të diturit bëhen mizorë (...) kur ftohen këngëtarët (që të këndojnë nëpër raste të ndryshme); kur lejohet muzika dhe instrumentet muzikore; kur nuk praktikohen ligjet e sheriatit; kur gruaja e shoqëron burrin në tregti; kur gratë shalojnë kuajt (me siguri këtu është për qëllim mjeti transportues çfardo qoftë ai); kur gratë bëhen si burrat e burrat bëhen si gratë (...) kur shtohen forcat e rendit (policia); kur burrat veshin kurora (...) kur pasuritë tuaja do t’i marrin më të këqinjtë në mesin tuaj; kur do të bëheni mendjemëdhenj; kur do të merreni me këngë e muzikë; kur do të vritet i pafajshmi që të hidhërohet shumica me vrasjen e tij; (...) kur do të bëhen mashtrime në kandarë dhe çështjet tuaja (pushtetin) do ta marrin mendjelehtët...



    Kur e lexon njeriu gjithë këtë listë, e nëse është besimtar, nuk ka sesi të mos konstatojë se Kosovës tashmë i ka ardhur dita e kiametit – nëse jo për faktin se gratë shkojnë në tregti me burrat, apo se në Kosovë ndërtohen shumëkatëshet pa kurrfarë kriteri, apo se dasmat bëhen me muzikë, dhe të zhurmshme bile, apo edhe se dikush angazhohet të këndojë, pavarësisht se për këtë kryen shkollë – atëherë për shkak se në Kosovë merret (e edhe jepet besa) ryshfeti me të madhe; ministrat rrejnë e bile-bile edhe veshin mëndafsh (të ndonjë firme me nam dhe mundësisht sa më të shtrenjtë). E megjithatë, ja ku jemi, po mund të bisedojmë për këtë që po na ndodh, duke qenë dëshmitarë të shkatërrimit të një shteti, të cilin po e mbysin ende pa u rritur dhe duke konstatuar se kiameti nuk ndodhi, porse me këta politikanë, Kosovën e ka zënë taksirati.

    Në dy javët e fundit patëm rastin ta dëgjonim kryeparlamentarin tek e thoshte një gjë të cilën që të gjithë, pos partisë në pushtet, e thoshin prej kohësh – se institucionet e Kosovës nuk kishin legjitimitet (në fjalët e Krasniqit “nuk kishin legjitimitet të plotë”), ngase kishin dalë nga votat e vjedhura. Dhe po të mos e kisha rezervën për faktin se z. Krasniqi megjithatë ka pranuar të bëhej kryetar i Kuvendit të votave të vjedhura si në këtë mandat, ashtu edhe në të kaluarin, do ta shpallja heroin politik të vitit – sepse doli në institucionin të cilin e drejton, për t’ia thënë Kosovës edhe njëherë, se ata që ishin të ulur në kolltukët e Kuvendit ishin hajna të votave, ani që fjalimin e mbajti në kohën kur kryeministri dhe shefi i tij i partisë nuk ishte në sallë. Mund të ketë qenë koincidencë, por ja që kjo është një gjë shumë indikative.

    Por, fjalimi i Krasniqit shkoi shumë më larg sesa vetëm konstatimi i vjedhjes së votave. Në fakt paraqiti rastin e parë ku një zyrtar i lartë dhe aktiv i PDK-së po fliste me autoritet për manipulimet zgjedhore, por edhe për hajnitë e tjera që janë kryer në Kosovë nëpërmjet procesit të privatizimit – për dështimin e të cilit akuzoi ama bash secilën qeveri të Kosovës, duke harruar, megjithatë, t’i emërojë fajtorët kryesorë: bosët e të gjitha partive që kanë mbajtur pushtetin që nga vitit 2001, pa përjashtime.

    U ndal më së gjati në rastin e Ferronikelit – supozoj se logjikshëm i dhemb më së shumti, ngase ky ka qenë i vetmi burim normal të ardhurash për shumë njerëz në trevën nga vjen ai vetë. Për ata që kanë kujtesë të shkurtër e mbase edhe mungesë informatash, mbase duhet treguar se Ferronikeli ishte ndërtuar në kohën e socializmit, aq shumë të përbaltur nga struktura e hajnave të votave në Kuvend, të cilët përnjëherë janë bërë edhe ekspertë të ekonomisë dhe njohës të trendëve të rritjeve ekonomike nëpër Amerikë Latine e më gjerë.

    Tha se Ferronikeli tash po i ofronte popullatës vendore vetëm helm, por nuk bëhet plotësisht i sinqertë për të thënë se përderisa atëbotë partia e tij kishte organizuar protesta kundër privatizimit të Ferronikelit, pas një kohe shumë të shkurtër dhe jo fort qartë për cilat arsye, pos që mund të supozojmë financiare, e ndërroi pllakën për t’i bindur njerëzit të hiqnin dorë nga protesta dhe për t’i bindur se shitja do të ishte gjë e mirë për Drenicën. Tash mund të thotë se këtë manovër e ka bërë shefi i tij pa pyetur kë, por fakti qëndron se partia kurrë nuk reagoi as ndaj këtij ndërrimi qëndrimi.

    Mirëpo, gjatë fjalimit të tij në Kuvend, e tha edhe një diçka që është tepër indikative dhe që në kushte kur ka gjyqësi të mirëfilltë, do ta shndërronte potencialisht atë në subjekt hetimi të menjëhershëm. Gjykoni edhe vetë: “Ne tani, pas rastit të ‘Grandit’ po e dimë se kush ka ose kanë qenë sekserë apo sekserët që kanë kërkuar milionat, por kush është bosi i kësaj gjullurdie? Dikush tani mund ta akuzojë të ndjerin, Dino Asanaj, por ai nuk ka qenë aq i fortë, nuk ka pasur asnjë bodigard, ai zor të jetë bosi. Kush është bosi i vërtetë, këtë duhet ta tregojnë hetuesia, prokuroria dhe gjyqësia”.

    Kur dikush, me post kaq të lartë edhe partiak e edhe shtetëror thotë për dikë se “ai nuk ka mundur të jetë bosi, ngase s’paska pasur truprojë”, po del se ai e di se kush është bosi dhe se ai bos nuk ecë i vetmuar. E dyta, që në fjalinë e parë e konstaton si fakt të pamohueshëm një akuzë që është bërë nga dy njerëz që kanë qenë të përfshirë në një blerje jo fort të pastër të një aseti gjatë privatizimit, e ku njëri nga ta, duke mbajtur postin e dytë në rangimin e Ekzekutivit, tash është nën hetime, për shkak se dyshohet të ketë falsifikuar dokumente. E treta, për Asanajn thotë se ai “nuk paska qenë aq i fortë” ani që të gjithë privatizimin e kishte pasur nën kontroll, dhe se në atë post kishte ardhur me dëshirën e shefit të z. Krasniqi, e supozoj edhe me pajtimin e udhëheqjes partiake, pjesë e së cilës është ai. Pra, ai lë të nënkuptohet se ai e di se kush është bosi, porse detyrën e zbulimit ia “delegon” gjyqësisë, të cilën në fund pak a shumë e quan mashtruese. E meqë e di, ai e ka një obligim moral ndaj atyre qytetarëve që iu vodh vota, dhe ka obligim ligjor për shkak të përgjegjësisë politike që ka në këtë post, që të tregojë se kush është bosi e që gjyqësia të merret me të, para se të vijë koha në të cilën njerëzit të cilëve u është mbushur kupa do të mund ta merrnin drejtësinë në duart e veta.

    Nga fundi i fjalimit të tij kërkoi nga Evropa dhe Amerika që të ndihmojnë në ndërprerjen e privatizimit në këtë formë të paleverdishme për Kosovën. E tmerrshme, apo jo? Që dikush i huaji të ndihmojë që shqiptarët të merren vesh mes vete edhe atëherë kur janë anëtarë të së njëjtës parti. E tmerrshme, për shkak se të gjitha vendimet kryesore politike dhe ekonomike në Kosovë janë marrë duke u thirrur në “këshillën e miqve ndërkombëtarë”. E tmerrshme për shkak se ndihma amerikane dhe evropiane në këtë aspekt mund të kushtojë me diçka jomateriale (apo ndoshta edhe materiale ), siç janë negociatat për veriun. Si në treg – ata neve një favor, ne atyre dy, për shkak se vetë tregojmë se nuk dimë të ndërtojmë shtet. Sepse po të dinim, nuk do të na bënte vaki që kryeparlamentari të na deklaronte edhe këtë për fund: “Kjo legjislaturë është dalë nga zgjedhjet e vjedhura. Institucionet kanë dalë nga ato zgjedhje dhe si të tilla nuk e kanë legjitimitetin e plotë për të privatizuar pasurinë publike, prandaj nuk e kanë as të drejtën për të privatizuar për interesin më vital të kombit (...)”.

    Institucionet që nuk kanë legjitimitetin e plotë për të privatizuar pasurinë publike, pra nuk kanë legjitimitet për të vendosur as për negociata, as për ndryshimet kushtetuese, e as për reformën zgjedhore – a i bie kjo kështu? I bie pra, se nuk e kanë të drejtën të vendosin për popullin, që për pasojë shpien drejt zgjedhjeve të reja në kushtet kur sërish mund të vidhet vota dhe ku sërish mund të dalin institucione jolegjitime. Dhe problemi më i madh se nuk po shihet që dikush ta ketë formulën për të dalë nga ky rreth vicioz. Të cilin më së shumti interes ka që ta mbajë gjallë shefi i kontestuar i zotit Krasniqi, duke na çuar në zgjedhje të reja, pa përfunduar reforma zgjedhore, të cilën duhet ta miratojnë organet jolegjitime.

    Absurde, apo jo? Për Thaçin jo, ngase tash duket se ka ardhur në pikën kur e ka humbur shumicën në Parlament për shkak të fërkimeve të brendshme dhe një çarjeje jo pak të rëndësishme brendapatiake; ka ardhur në pikën ku është fare e paqartë lidhja eventuale me AAK-në që varet nga kthimi apo jo i Haradinajt nga Haga dhe në pikën kur partnerët e koalicionit një nga një po mbarojnë para gjykatësve të EULEX-it, për shkak të shkeljes së ligjit.

    Në mungesë të respektimit të demokracisë ka instaluar sistemin e ri të “pauzës parlamentare” dhe ikjes nga seancat ku mund të mbivotohet – natyrisht, duke ia lënë kopilin te dera e shefit grupit të vet parlamentar (i cili madje deshi ta qiste përjashta kryeparlamentarin për shkak se pati guximin t’ia lexonte Rregulloren e Kuvendit), përderisa vetë Thaçi, në formën e engjëllit, paraqitet në mbledhje të Qeverisë duke marrë vendime për rritje rrogash e pensionesh. Kështu, vetes ia jep një argument të fortë para zgjedhjeve që do të mund të shpalleshin kur më së paku mund ta presim – se ka mbajtur premtimin nga zgjedhjet e shkuara për rritje rrogash e pensionesh, pavarësisht gjullurdisë (që në Prizren i thonë gjurullti) që ka shkaktuar në të gjitha sferat tjera të jetës në Kosovë.

    Do të ketë mësuar shumë nga këshilltarët e tij hebraikë, të cilëve u janë paguar shumë para – i lëviz pionët e vet mirë nëpër tabelën e shahut. Përderisa Kuvendin e bllokon me “tërheqje taktike”, pas mbledhjes së Qeverisë, e lë ministrin e Financave ta mbajë konferencën me një humor bajat e pa shihje dhe përfundimisht i jep instruksione njeriut të vet në Presidencë që të merret me përgatitjen e terrenit të bisedimeve për veriun. Për ata që e kanë huqur deklaratën e djeshme të këshilltarit kryesor të kryetares Jahjaga, Ramush Tahiri, ja çfarë ka thënë: “Në veriun e Kosovës nuk ka institucione kosovare, prandaj strukturat serbe të pushtetit, pavarësisht se ne i quajmë paralele, janë megjithatë legjitime, ngase janë zgjedhur nga populli që jeton atje.”

    E cili do të jetë hapi i ardhshëm? Që pala kosovare të bjerë në nivelin e bisedimit me përfaqësuesit e krimit të organizuar në veri dhe me eksponentët e politikës nacionaliste të Beogradit atje e të diskutojnë një temë që nuk ka nevojë të diskutohet – por e cila temë zgjidhet me urdhrin nga Evropa për tërheqjen e prezencës së Beogradit nga komunat veriore të Kosovës. Pikë.

    Na ka zënë taksirati, sepse na udhëheqin injorantët e shantazhueshëm. Kështu, tentimrevolucioni i Bacës Kupë duket se vjen paksa i vonuar. Po ta kishte pasur guximin ta thoshte këtë që e thotë sot pas zgjedhjeve të vitit 2007, gjendja politike dhe ekonomike në Kosovë do të ishte shumë më ndryshe, sepse nuk do të udhëhiqej nga bosët, ndjekjen e të cilëve e kërkon tash.



    flaka@koha.net

  2. #22
    i/e regjistruar Maska e Antiproanti
    Anëtarësuar
    28-07-2011
    Postime
    6,033

    Post

    Kështu (s)fliste Jakup Krasniqi

    Nëse Jakup Krasniqi e ka pasur guximin qytetarë e parlamentarë të thotë se "institucionet e Kosovës kanë dalë nga vota e vjedhur", apo këtë e ka bërë krejt me pahir, ose për shkak se i janë "rrezikuar" pozicionet që i ka, ai duhet të mos rrijë as edhe një minutë në krye të këtyre institucioneve. Ai duhet që urgjentisht të japë dorëheqje


    Si "bume" ka shpërthyer në Kuvendin e Kosovës, njëriu, që për shumë vjet e ka drejtuar institucionin më të lartë të demokracisë ne vend, Jakup Krasniqi. Fjalimi i tij aty, në foltoren e Kuvendit, ka qenë i befasishëm edhe për shumicën e miqve të tij të cilët në muhabete "biz-bize", e thonin si me keqardhje: "këtë herë e bëri bezar Kupa". E kam takuar Jakup Krasniqin në zyrën e tij në Kuvend, menjëherë pas votimeve të fundit dhe e kam dëgjuar të më thotë: "më kanë vjedhur dhe më kanë sakatuar, por pavaësisht kësaj, nuk kanë mundur të më vjedhin aq sa për të mos fituar". Aty e pata kuptuar se Jakup Krasniqi nuk do të fliste kurrë për hajninë e votës, sepse ajo nuk e kishte goditur atë dhe ai kishe "fituar" dhe se në storjen e hajnisë së pretenduar të votës në zgjedhjet e fundit, ai do ta aplikone modelin "që një gjarpër që nuk më kafshon, jetoftë njëmijë vjet".

    Na jan' çartë zotnit' ndër veti...është njëra prej këngëve të folklorit shqiptar që gjithmonë ka shpjeguar shumë për karakterin e parisë shqiptare. Gjatë historisë shqiptare që nga koha e Skenderbeut e deri në ditët e sotme, gjithmonë ka pasur vrasës dhe të vrarë, patriotë e tradhtarë...

    Janë çartur ndër veti gjithmonë dhe çdo herë, më shumë se sa për interesat e atdheut, për pushtetin që do të duhej të drejtonte atdheun e përbashkët të vrasësve dhe të të vrarëve. Por çfarë ndodhi ndërkohë që pas kaq shumë vjetësh vendosi të flasë Jakup Krasniqi dhe, pse këtë qëndrim kaq të ashpër të tij, nuk e kishte as gjashtë e as gjashtëdhjetegjashtë muaj më parë...ose nuk e kishte që nga viti 1999 kur i hipi kalit të pushtetit? Nëse sot e kërkon emrin e Jakup Kasniqit me Google Search", deklarata më e përfolur e tij, në disa mijëra citime, del ajo që e kishtë thënë dy ose tre ditë më parë, se "Institucionet ose deputetët e Kosovës, kishin dalë nga vota e vjedhur".

    Pa e paragjykuar zotin Krasniqi për vërtetësinë e fjalës publike të tij, disa nga vrojtuesit e vëmendshëm, në këto dy ose tre ditë, i kanë bërë dy ose treqind pyetje krejt legjitime për shkëlqesinë e tij.

    Pse zotin Krasniqi nuk e kishin penguar "votat e vjedhura" që ai të zgjedhej Kryetar i Kuvendit të Kosovës?

    Ose pse nuk i kishte dhënë as pesë pare kur në vitin 2010, ai po me këto vota, të vjedhura ose hallall, kishte mundur të bëhëj President në detyrë i Kosovës?

    Apo pse zoti Krasniqi nuk tha e nuk foli sa herë që u zgjodh deputet i Kuvendit në katër legjislatura të tij?


    Është e mundur që njerëzit për një ose njëmijë arsye, të mos mund të flasin atëherë kur do të duhej, por nëse ata kanë vendosur të flasin, të paktën do të duhej t'i thonin arsyet se pse nuk kanë folur deri me sot.


    Nëse zoti Krasniqi ka pasur të dhëna dhe fakte për vjedhjen e votave, pse ato nuk i ka dorëzuar në prokurorinë e shtetit në kohën e duhur.
    Shkëlqesia e tij Jakup Krasniqi, në fjalimin si "bume" në Kuvendin e Kosovës, ka folur edhe për një tjetër hajni, që është shumë më e përhapur se sa "vota e vjedhur", duke qenë në të njejtën frekuencë me jo pak njërëz që iu dol "gaja mbas veshi" tuj folë e tij shkru për këto hajni. Kur do të mos e gjesh hajnin kurrë, gjithmonë i përgjithëson gjërat, siç kishte bërë vetë zoti Krasniqi në fjalimin e tij. Unë nuk e di se cila është prapavija e "shpërthimit të tij" megjitëse gazetat po shkruajnë se Jakup Krasniqi është në "luftë" me SHIK-un.


    Por realisht Jakup Krasniqi, ka shkuar më larg se sa "lufta me SHIK-un". Ai është në luftë të hapur me votën, derivat i së cilës është edhe ai vetë. Nëse Jakup Krasniqi e ka pasur guxmin qyetarë e parlamentarë të thotë se "institucionet e Kosovës kanë dalur nga vota e vjedhur", apo këtë e ka bërë krejt me pahirë ose për shkak se i janë "rrezikuar" pozicionet që i ka, ai duhet të mos rrijë as edhe një minutë në krye të këtyre institucioneve. Ai duhet që urgjentisht të japë dorëheqje. Posti i kryetarit të kuvendit, më shumë se gjithçka, është detyrë morale dhe nëse zoti Krasniqi do të vazhdojë të jetë aty ku është tani, edhe pas asaj që ka deklaruar "vetë dhe pa e mbajt askush", atëherë gjithë kësaj loje i vjen era "pis". Do të ishte krejt ndryshe sikur ta mbanim mend se " Kështu fliste Jakup Krasniqi", por në këto dhjetë e më shumë vjet e mbajm mend të ketë pasur tjera llafe. Por, për pushtet e ndër shqiptarë, gjithmonë ka pasur vrarës dhe të vrarë!!!
    http://www.zeri.info/artikulli/3/20/...akup-krasniqi/

  3. #23
    he he hee... Maska e halla mine
    Anëtarësuar
    05-01-2011
    Vendndodhja
    brojë
    Postime
    1,466
    Citim Postuar më parë nga Guri i Kuq Lexo Postimin
    Taksirati i Kosovës

    Flaka Surroi
    Citim Postuar më parë nga Antiproanti Lexo Postimin
    Kështu (s)fliste Jakup Krasniqi

    Muharrem Nitaj
    Keto dy shkrime jane pro hashimit. Qe Muharremi eshte argat i tij kjo dihet moti, tash edhe Flaka po i del ne ndihme. Qe te dy hedhin balte mbi Kupen.. Kush eshte me i interesuari ne kete periudhe qe te ndyhet, njolloset e shkaterrohet figura Kupes ne opinion..? Duke ule autoritetin e Jakupit.. edhe fjalet qe i tha kunder qeverise humbin çdo vlere.. dhe hashimi mund te vazhdoje masakren ndaj Kosoves dhe shqiptareve pa u merzit shume.
    Asnjë kompromis, kurr asnjëher.. deri n'apokalips!

  4. #24
    i/e regjistruar Maska e Antiproanti
    Anëtarësuar
    28-07-2011
    Postime
    6,033
    Citim Postuar më parë nga halla mine Lexo Postimin
    Keto dy shkrime jane pro hashimit. Qe Muharremi eshte argat i tij kjo dihet moti, tash edhe Flaka po i del ne ndihme. Qe te dy hedhin balte mbi Kupen.. Kush eshte me i interesuari ne kete periudhe qe te ndyhet, njolloset e shkaterrohet figura Kupes ne opinion..? Duke ule autoritetin e Jakupit.. edhe fjalet qe i tha kunder qeverise humbin çdo vlere.. dhe hashimi mund te vazhdoje masakren ndaj Kosoves dhe shqiptareve pa u merzit shume.
    OK...

    Por, pavaresisht faktit se Nitaj mund ta kete shkruar artikullin me ato qellime qe pretendon ti, kritika e tij eshte e drejte dhe e nevojshme. Sepse, nisur nga rendesia teper e madhe e problematikes se tematizuar per te tashmen dhe te ardhmen e Kosoves dhe qytetareve te saj, nuk mund te kete amnesti per askend nga ata qe kane qene dhe jane ose kane pranur te jene dhe prnojne te mbesin ne krye te struktuarave te kunderligjshme (ilegale) dhe kriminale te Kosoves.

    Natyrisht, nga kendveshtrimi i caktuar (joparimor) ti ke plotesisht te drejte te kritikosh edhe artikullin e tille edhe postimin e tij ketu. Nga ana tjeter, politikanet, udheheqesit aktual te Kosoves, shume prejt tyre, p....in mbi pothuajse cfardo parimi qe rrezkone, karriget, karrierat dhe kuletat e tyre...

  5. #25
    i/e regjistruar Maska e Antiproanti
    Anëtarësuar
    28-07-2011
    Postime
    6,033

    Post

    I zemëruari dhe i diskredituari


    I.

    Një valë akuzash po drejtohet kundër Jakup Krasniqit. Të thirrur e të pathirrur po shprehin mosbesim ndaj sinqeritetit politik të kryetarit të Kuvendit të Kosovës. Kritika e Krasniqit kundër devijimeve të pushtetit, kundër manipulimeve zgjedhore, kundër keqpërdorimeve të parasë publike, kundër privatizimeve që, siç po shihet, kanë qenë krejtësisht të pamenduara, madje në disa raste edhe mafioze, po kualifikohet si tepër e vonshme. Si çdo politikan i Kosovës, edhe Jakup Krasniqi nuk e ka pirë moralin me lugë të madhe. Sigurisht ka mundur të reagonte më ashpër në të kaluarën, sepse është ndër të vetmit në Partinë Demokratike të Kosovës (PDK) që nuk mund ta shantazhojnë grupet joformale dhe nëntokësore, të cilat, në fakt, e kontrollojnë këtë parti. Krasniqin nuk mund as ta frikësojnë.
    Një njeri që për disa ideale të rëndësishme ka bërë shumë vjet burg, një aktivist politik që merr guximin të dalë haptazi e të flasë si zëdhënës i Ushtrisë Çlirimtare të Kosovës (UÇK), derisa “shokët” e tij shesin trimëri nga ngrohtësia e hoteleve të Tiranës, do të ishte absurde t’i nënshtrohej diktatit partiak në rrethana krejtësisht të reja.

    Disa të tjerë, ish-shokë ideali të Jakup Krasniqit, i janë nënshtruar diktatit.
    Paramendojeni Hydajet Hysenin: dikur me megafon maje lisi si prijës demonstratash, sot në opinion nuk bie në sy me kritika e rezistencë kundër të keqes, por vetëm kur flet në kremtimin e ditëlindjes së diktatorit Enver Hoxha në Prishtinë. Paramendojeni Nait Hasanin: s’i frikësohej asnjë xhandari serb në vitet ‘90, e sot edhe zgjedhësit e tij duhet të pyesin veten: a është fare në parlament apo jo? Ka disa të tillë në Grupin Parlamentar të PDK-së, sepse shpesh pak pushtet, pak rehati financiare kanë ndikuar që të bëhen indiferentë ndaj problemeve të mëdha të këtij vendi. Për pjesën tjetër të parlamentarëve të Partisë Demokratike të Kosovës (PDK) nuk duhet humbur shumë fjalë: njihen botërisht si persona që në Kuvend janë futur me vota kryesisht të vjedhura ose të siguruara përmes blerjes së zgjedhësve.
    Disa prej tyre nuk do të ishin fare në parlament sikur të mos ishin përsëritur zgjedhjet në Mitrovicë – dhe kjo përsëritje ishte bërë edhe për t’ua “siguruar” votat, të cilat nuk i kishin marrë as në hambarin e madh të votave në Drenicë, as në Prishtinë. Grupi tjetër i deputetëve janë (ish-)anëtarët e orkestrës “humanitare” për dasma e varrime të quajtur SHIK, persona për të cilët pothuaj askush s’e flet një fjalë të mirë – dhe sikur të mos ekzistonte frika e madhe që e ka mbjellë regjimi i Hashim Thaçit në shoqëri, këta njerëz që kurrë nuk dalin në foltore të Kuvendit do të demaskoheshin brenda 24 orëve. Ata rrinë aty, në kolltukët e Kuvendit, për t’i treguar opinionit se janë padronët e vërtetë të këtij vendi.

    Para se të shpërthente në Kuvend, Jakup Krasniqi foli në emisionin “Rubikon”, ku e kapërceu rubikonin. Thelbësore në këtë intervistë për t’u mbajtur mend ishte ky konstatim i Krasniqit: “Shoqëria kosovare e ka një frikë për t’u shprehur, e ka një frikë për ta thënë mendimin e vet. Një gjë duhet ta dimë: forca kurrë nuk i ka mbajtur diktatorët dhe diktaturat, as nuk i ka krijuar. Frika lejon paligjësi, frika lejon që njerëzit të korruptohen, edhe moralisht, edhe politikisht, edhe financiarisht”. Për shumë kritikë të Krasniqit vlen pyetja: ku keni qenë vetë ju, si gazetarë, qytetarë të thjeshtë, njerëz të shqetësuar për fatin e këtij vendi, që nuk i keni denoncuar keqpërdorimet prej kohësh, që keni lejuar të mbillet frika? Çdo angazhim në jetën publike bart edhe rreziqet e veta, por nëse ekziston frika të thuhet e vërteta, atëherë së paku duhet të tregohet se heshtja është pasojë e frikës! Nuk është turp. Frika është ndjenjë njerëzore, vetëm të çmendurit nuk frikësohen.

    Por në vend se debati të përqendrohet në temën e frikës, në kulmin e aferës së hotelit “Grand”, ka medie në Prishtinë që nguten t’i thurin lëvdata njërit prej protagonistëve të involvuar, i cili është hiç më pak se zëvendës i Hashim Thaçit. Para se t’i vërsulen Jakup Krasniqit disa zëra publikë duhet ta pyesin veten: “Ç’kemi shkruar në 5-6 vjetët e fundit për problemet që po i përmend Krasniqi” ose edhe më radikalisht: “Ç’kemi bërë nga 12 qershori 1999 për t’i dalë përpara të keqes?
    Nuk është fshehtësi që për nga fëlliqësia disa gazetarë të çarshisë së Prishtinës nuk dallojnë shumë nga politikanët e korruptuar. Nuk është fshehtësi që jo pak aktivistë të shoqërisë së ashtuquajtur civile mezi presin ndonjë shpërblim nga pushteti. Nëse në këtë vend është arritur të instalohet frika, siç po lë të nënkuptohet kryetari i Kuvendit të Kosovës, atëherë nuk qenkemi larg periudhës së Aleksandar Rankoviqit, kur njerëzit frikësoheshin edhe prej mureve të shtëpisë. Krasniqi mund të duket tani si i zëmëruari i vonuar, por prej këtij zemërimi shoqëria e Kosovës nuk pëson dëm. Nuk është hera e parë që Krasniqi flet. Ka qenë mbase i vetmi prej zyrtarëve të lartë të PDK-së që protestoi kundër vjedhjes së votave në ditën e zgjedhjeve (12 dhjetor 2010); e ka kundërshtuar hapur zgjedhjen e një biznesmeni të dyshimtë dhe ish-emisari të presidentit rus Boris Jelcin në postin e kryetarit të Kosovës; ka kritikuar edhe të ashtuquajturën bashkësi ndërkombëtare, e cila për të realizuar qëllime afatshkurtra bashkëpunon me politikanë të shantazhuar që vendimet i marrin me mesazhe telefonike dhe në muhabete kafehanesh. Qytetarëve të Kosovës u duhen sa më shumë zëra që brenda sistemit flasin për ta. Këtë e tregoi edhe jehona e qëndrimeve publike të Krasniqit ditëve të fundit. Por si çdo politikan, edhe ai shumë shpejt do të matet sa i përket qëndrueshmërisë së deklaratave të tij. Nuk mjafton të thuhet “ekziston frika në shoqëri”, por duhet të emërohen shkaktarët e frikës! Pozitive gjithsesi është që Krasniqi po flet derisa është në pushtet, madje në krye të Kuvendit. Sikur të ishte jashtë politikës, i dëbuar apo i larguar nga partia, qëndrimet e tij vërtet do të dukeshin qesharake.



    2.

    Të tilla për shembull duken tani qëndrimet e ish-kryetarit të Kosovës, Fatmir Sejdiu. Si pensionist politik, i diskredituar nga një vendim i Gjykatës Kushtetuese, e cila - me apo pa të drejtë - e ka damkosur si shkelës të ligjit themelor, ai herë pas here paraqitet në opinion me mendime krejtësisht të shthurura. Fisnikëria e një politikani shihet edhe në mënyrën se si pajtohet me humbjen. Fatmir Sejdiu nuk është pajtuar me humbjen demokratike dhe po përpiqet të bëjë sa më shumë dëm, duke shpresuar se kështu mund të kthehet si triumfues i madh në skenën politike. Një shpresë e kotë! Dihet për politikanë të mençur, të cilët e kanë humbur betejën për kryetar partie kur madje gjatë kongresit, pa asnjë paralajmërim, janë ballafaquar me kundërkandidatë. I tillë ka qenë Rudolf Scharping-u i Partisë Socialdemokrate të Gjermanisë (SPD), i cili në vitin 1995 u rrëzua nga froni nga kolegu i tij partiak Oskar Lafontaine. Pas disfatës së rëndë Scharping atëbotë tha se SPD-ja tani e ka liderin e pakontestueshëm, i cili duhet të mbështetet pa asnjë dilemë. Natyrisht deri në kongresin tjetër. Fatmir Sejdiu nuk po pret asnjë kongres, por po përpiqet të manipulojë me njerëz, të cilët nuk e kanë problem t’i shërbejnë secilit usta politik, madje edhe duke ndërruar partinë më shpesh se këmishën. Sejdiu po luan rolin e viktimës dhe në një intervistë për gazetën “Kosova sot” foli edhe për “një fushatë të paprecedentë kundër personalitetit tim, madje edhe kërcënimet e grupeve të orkestruara edhe me djegien e selisë. Tellallë që thërrisnin për linçimin tim. (...) Fatbardhësisht, disa nga ata tashmë janë duke u hetuar për krime, shantazhe e kërcënime, që del se kanë qenë pjesë e një strukture të orkestruar. Tani i mbetet drejtësisë ta thotë fjalën e vet dhe realisht të shihen se kush janë ata dhe mbështetësit e tyre”. Si gjithnjë, edhe kësaj radhe ish-kryetari Sejdiu kultivon një gjuhë jokonkrete, me aludime, pa asnjë dëshmi. Një politikan serioz, që ankohet se po e kërcënojnë me djegie të selisë (cilës seli?), duhet patjetër ta njoftojë opinionin se kush janë kriminelët e dyshuar. Derisa ka qenë në pushtet s’është dëgjuar të flasë qartë kundër devijimeve të mëdha në politikë, tash sikur përpiqet të marrë rolin e apostullit moral. Këtu qëndron dallimi mes hipokrizisë së Fatmir Sejdiut dhe zemërimit të Jakup Krasniqit. Tash Sejdiu thotë se në Kosovë “ekziston një klimë tensioni dhe frikë”! Por kjo frikë ka ekzistuar edhe në kohën e kryetarit Fatmir Sejdiu, fatmirësisht jo e shkaktuar prej tij, por prej atyre me të cilët ai u shtri në një shtrat të përbashkët koalicioni, i cili shpejt rezultoi si shtrat Prokusti. Atëherë Sejdiu nuk ka folur kundër frikës, sepse vetë ka qenë i rehatuar, siç thuhet, me shtëpi e me katandi.

    LDK-ja është bërë pikë e pesë për shkak se prijësit e saj vuajnë nga egoja, të cilën e kanë më të madhe se trupin.
    Ekziston ndërkohë një pajtim në opinion se Isa Mustafa është lider i ngathët, por problemin duhet parë pak më gjerë: askush nuk mund ta reformojë një parti, e cila qe 22 vjet nuk afron, por ndjek e përzë njerëz. Askush nuk mund ta reformojë një parti që dominohet prej funksionarëve që nuk kanë ambicie për ndryshimin pozitiv të shoqërisë dhe përparimin e vendit, por vetëm për sigurimin e pak privilegjeve për vete dhe klanet e tyre. Nuk reformohet partia nëse brenda keni mashtrues, të cilët një pjesë të mirë të kohës e kalojnë duke sajuar intriga bashkë me strukturat nëntokësore të PDK-së. Qe më shumë se 20 vjet në LDK sillen vërdallë njerëz të njëjtë - pa ide, arrogantë, të tillë që kujtojnë se janë pronarë të partisë.
    Për shembull as Fatmir Sejdiu, as Nexhat Daci nuk e kanë ndarë partinë për çështje parimore, por për shkak të mendësisë totalitare dhe përjashtuese.
    Ky mentalitet ka ndikuar që LDK-ja prej një partie që dikur fitonte 78 për qind të votave të rrëzohet te 20-përqindëshi. Një aventurë e re përçarëse e Fatmir Sejdiut ka gjasa ta fundosë LDK-në te 10-përqindëshi i votave. E vetmja punë e hairit që mund ta bëjnë aligatorët e pangopshëm të LDK-së është sikur të pajtoheshin që Isa Mustafa të ishte lider transicioni, i cili me mbështetjen e të gjithëve do të përgatiste një pasardhës të denjë. Të tillë s’mund të jenë as Fatmir Sejdiu, as Sabri Hamiti, as Eqrem Kryeziu. Këta mund të jenë vetëm vazhdues të agonisë. Ose, nëse duan, ndihmës që në LDK të ndodhë një ndryshim jo vetëm i cilësisë së politikës, por edhe i gjeneratave udhëheqëse. Në PDK ndryshime pozitive zor se do të ndodhin, me gjithë përpjekjet nganjëherë qesharake të Hashim Thaçit për “prurje të reja”, të cilat u dogjën vetvetishëm dhe sot janë vetëm objekt humori nëpër kafehanet e Prishtinës. PDK-ja në periudhën afatmesme, për fat të keq, do të jetë – si deri më tani - parti që operon jashtë kornizës demokratike, andaj çdo parti që ka bërë koalicion me të është djegur. Kështu do të jetë edhe në të ardhmen. Por ka parti e politikanë joparimorë në opozitë, të cilëve u pëlqen puthja e Judës.

    http://www.koha.net/?page=1,9,118585

  6. #26
    i/e regjistruar Maska e Antiproanti
    Anëtarësuar
    28-07-2011
    Postime
    6,033

    Post

    Krasniqi: Rexhepi don ta burgosë edhe Presidenten
    (video)

    Kryetari i Kuvendit të Kosovës, Jakup Krasniqi, nuk ka pranuar të nisë seancën e sotme plenare, pasi forca të policisë, sipas tij, kanë hyrë brenda mjediseve të Parlamentit, si dhe e kanë “rrethuar” ndërtesën.


    Policia ka hyrë sot në mëngjes në hapësirat e Kuvendit, nuk e di me urdhër të kujt”, ka thënë kryeparlamentari Jakup Krasniqi, në hapje të seancës së Kuvendit të Kosovës.

    Kreu i Kuvendit ka tërhequr vërejtjen se Kosova i ka institucionet dhe pushtetet e ndara.

    Ia bëj me dije ministrit të policisë [Bajram Rexhepi] se Kuvendi udhëhiqet nga kryetari i Kuvendit... Një ministër nuk guxon të marrë urdhër që një njësit policor të hyjë brenda hapësirave të Kuvendit”.

    Drejtësinë nuk e bën Bajram Rexhepi që don me burgosë edhe Presidenten, edhe Kryetarin e Parlamentit, edhe krejt”, tha Krasniqi.

    Ai kërkoi nga kabineti qeveritar, kryeministri, ministri që mos t’i keqpërdorin ata djem që janë për të mbrojtur demokracinë, lirinë dhe për ta mbrojtur dinjitetin e institucioneve të Kosovës.

    Mos t’i përdorin ata djem e vajza për interesa private”, theksoi Krasniqi, i cili vjen nga e njëjta parti me kryeministrin Hashim Thaçi dhe ministrin e Punëve të Brendshme, Bajram Rexhepi.

    Krasniqi tha se me policë që kanë hyrë brenda, që e kanë rrethuar ndërtesën e legjislativit, Kuvendi i Kosovës nuk mund të mbajë seancën plenare.

    Kreu i Kuvendit dha një pauzë njëorëshe. “Unë dua që forcat që e kanë zaptuar Kuvendin të hiqen dhe vazhdojmë seancën pas një ore”. /gazetajnk/Zëri/

    http://www.zeri.info/artikulli/1/1/5...identen-video/

    Pushteti policior i katunarve kuisling!

  7. #27
    i/e regjistruar Maska e Antiproanti
    Anëtarësuar
    28-07-2011
    Postime
    6,033

    Post

    Rexhepi për kritikat e Krasniqit: Mos m’lodhni
    ...

    Rexhepi me nervozizëm është përgjigjur se nuk ka çka të komentoj.

    Nëse kam çka them thërras konferencë për media, mos më lodhni tash”, ka thënë Rexhepi.

    http://www.zeri.info/artikulli/1/1/5...-mos-m-lodhni/

  8. #28
    i/e regjistruar
    Anëtarësuar
    10-08-2008
    Postime
    1,280
    Citim Postuar më parë nga Antiproanti Lexo Postimin
    Rexhepi për kritikat e Krasniqit: Mos m’lodhni
    ...

    Rexhepi me nervozizëm është përgjigjur se nuk ka çka të komentoj.

    Nëse kam çka them thërras konferencë për media, mos më lodhni tash”, ka thënë Rexhepi.

    http://www.zeri.info/artikulli/1/1/5...-mos-m-lodhni/
    ----------------------
    Krasniqi: Qeveria me ministra rrugaçë

    Në Kuvendin e Kosovës sot pasdite ka pasur polemika të ashpra mes kryetarit të Kuvendit të Kosovës, Jakup Krasniqi dhe ministrit të Punëve të Brendshme Bajram Rexhepi.
    Menjëherë pasi që ministri Rexhepi e mori fjalën, filloi të akuzoi kryeparlamentarin për deklaratat e sotshëm në mëngjes, mirëpo i menjëhershëm ka qenë reagimi i Krasniqit, duke e lutur regjinë që t’ia ndërpres fjalën.
    Rexhepi i tha kryeparlamentarit se do të thërras konferencë të menjëhershme, ndërsa Krasniqi i tha “rruga e mbarë të qoftë”.
    Krasniqi para se ta mbyllë seancën, ka akuzuar Qeverinë se brenda saj ka ministra rrugaçë. “Keni pru ministra rrugaçë, ja pafshi hajrin”, ka thënë Krasniqi i nervozuar. /Indeksonline/

  9. #29
    i/e regjistruar Maska e Antiproanti
    Anëtarësuar
    28-07-2011
    Postime
    6,033

    Post

    Krasniqi ia mbyll mikrofonin Rexhepit, ndërpritet seanca

    Prishtinë, 18 tetor – Rifillimi i pasdites i seancës së sotme të Parlamentit të Kosovës përfundoi ende pa filluar mirë. Për fjalë u paraqit së pari ministri i Punëve të Brendshme, Bajram Rexhepi, i cili filloi me sulme kundër kryeparlamentarit Jakup Krasniqi. Ky pastaj urdhëroi regjinë që t’ia ndërpresë mikrofonin, gjë që edhe u bë.

    Pas këmbimit të fjalëve midis këtyre dyve, ndërhyri edhe kreu i grupit parlamentar të PD-së, Adem Grabovci, i cili “falënderoi” Krasniqin për qasjen e tillë ndaj ministrit Rexhepi dhe PDK-së. Grabovci tha se nuk ka kushte për vazhdimin e seancës përderisa ai i largon nga salla ministrat, kurse Krasniqi iu përgjigj: unë nuk kam faj që keni sjellë ministra rrugaçë se që PDK-ja duhet të kujdeset që të mos emërojë ministra rrugaçë.Ai tashti është dashur të japë dorëheqje”, ka thënë kryeparlamentari.

    Pas kësaj Grabovci ka kërcënuar Krasniqin me shkarkim, kurse Krasniqi i është përgjigjur me fjalët: “Mblidhi 80 nënshkrime dhe më shkarkoni”.
    Pas këtyre fjalëve, deputetët e PDK-së kanë braktisur punimet e seancës, kurse Krasniqi ka shpallur të përfunduar seancën e sotme shkaku i kuorumit, dhe ka caktuar vazhdimin e seancës për ditën e premte.
    http://www.koha.net/?page=1,13,119617

  10. #30
    i/e regjistruar Maska e Antiproanti
    Anëtarësuar
    28-07-2011
    Postime
    6,033

    Post

    KDI dënon dhunimin e Kuvendit të Kosovës

    Prishtinë, 18 tetor - Instituti Demokratik i Kosovës njoftoi se është duke i përcjellë me vëmendje të shtuar ngjarjet e fundit në institucionet e shtetit, veçanërisht në Kuvendin e Kosovës. Sipas KDI-së, rrethimi i Kuvendit me njësitë policore para fillimit të seancës plenare të së enjtes, si dhe prania e njësiteve të policisë brenda ambienteve të Kuvendit, është kundërkushtetuese dhe kundërligjore, si dhe cenon mbarëvajtjen e punës së institucioneve demokratike në vend.

    Prania e njësiteve policore brenda Kuvendit njëherësh jep mesazhe se demokracia në Kosovë është e rrezikuar dhe krijon imazhin e tendencave për instalimin e diktatit mbi institucionet legale të shtetit, siç është organi më i lartë në vend, Kuvendi i Kosovës”, thuhet në një komunikatë për shtyp të KDI-së.


    KDI më tutje vlerëson se ky veprim i organeve të rendit është në kundërshtim me Ligjin mbi Policinë. Ata citojnë nenin 8.2, ku thuhet se “me kërkesë të institucioneve të qeverisjes qendrore ose lokale, policia është e autorizuar t’ju ofrojë ndihmë në kryerjen e detyrave publike, kur ka arsye për të besuar se siguria e personit ose e personave që kryejnë detyra publike mund të rrezikohet për shkak të rezistimit të mundshëm ndaj veprimeve të tyre”.

    Sipas KDI-së, fjalimi i kryeparlamentarit Jakup Krasniqi dëshmoi se një ndihmë të tillë Kryesia e Kuvendit, përkatësisht kryetari nuk e kishte kërkuar dhe madje as që kishte ndonjë informatë kredibile se mund të cenohet siguria e personave që kryejnë detyra publike.

    Duke pasur parasysh të gjitha këto shkelje dhe me qëllim që të ruhet integriteti dhe pavarësia institucionale e bazuar në parimet e ndarjes së pushteteve, KDI vlerëson se kryeministri i vendit, në përputhje me kompetencat kushtetuese dhe ligjore që i ka, duhet t’i thërrasë vartësit e tij kompetent në përgjegjësi politike dhe ligjore ndaj ndërhyrjes dhe cenimit të integritetit të Kuvendit të Kosovës”, thuhet ndër të tjera në reagimin e Institutit Demokratik të Kosovës.
    http://www.koha.net/?page=1,13,119612

Faqja 3 prej 4 FillimFillim 1234 FunditFundit

Regullat e Postimit

  • Ju nuk mund të hapni tema të reja.
  • Ju nuk mund të postoni në tema.
  • Ju nuk mund të bashkëngjitni skedarë.
  • Ju nuk mund të ndryshoni postimet tuaja.
  •