Arviziu : Islami dhe Demokracia se bashku drejt Perparimit.

[angmokio]

Si mund të kapërcehet hendeku mes botës Muslimane dhe asaj perëndimore? Ose me fjalë të tjera, a mendoni se feja islame dhe demokracia mund të bashkëjetojnë?

Absolutisht, jo vetëm mund të bashkëjetojnë, por të shohin përparim, lulëzim dhe përforcim të njëratjetrës. Duhet të ketë përpjekje më të mëdha për të promovuar mirëkuptimin dhe tolerancën. E përsëris, është e dhimbshme për Shtetet e Bashkuara, është e dhimbshme për mua, është e dhimbshme për shumë amerikanë, sepse siç tha edhe Presidenti dhe Sekretarja e Shtetit, SHBA- të u themeluan mbi bazën, ose më mirë, një prej themeleve tona ishte liria e fesë. Udhëtarët më të hershëm nga Perëndimi, për në SHBA po iknin prej persekutimit fetar. Dhe, që prej ngjizjes së SHBA- ve, kjo ka qenë një gur themeltar, një traditë e vendit tonë. Për këtë arsye, për mua, të kundërshtosh se SHBA- të janë kampione të lirisë, tolerancës e diversitetit fetar nuk është thjesht e gabuar; në fakt, është një fyerje. Në Shkrimin e Shenjtë ka një pasazh, është në Dhiatën e Re, mendoj tek Mateu. Me siguri është diçka që mund të gjendet edhe në Kuran apo në fetë e tjera të mëdha të botës. Është një pasazh shumë i thjeshtë, që thotë: " Lum paçebërësit, sepse ata do të quhen fëmijë të Perëndisë". Mendoj që përgjigjja e thjeshtë është që duhet të ketë më shumë paqebërës, më shumë njerëz të gatshëm të ngrenë zërin për tolerancën, sepse me këtë ka të bëjë besimi.

Myftiu i Shkodrës ka thënë se muslimanët janë ofenduar nga videoja. A ju shkakton shqetësim kjo dhe a është rritur niveli i sigurisë për shkak të këtyre deklaratave?

Në përgjithësi, në lidhje me pyetjet për sigurinë, praktika jonë e standarde është të mos komentojmë; ndërkohë, duhet të them që bashkëpunimi ynë me Policinë e Shtetit dhe autoritetet e tjera shtetërore është i shkëlqyer. Na janë përgjigjur si gjithmonë, në mënyrë mbresëlënëse lidhur me shqetësimet e rritura. Në mënyrë specifike, në lidhje me shërbesat, jo, nuk ka pasur ndryshim, asnjë ndryshim në masat tona të sigurisë. Në lidhje me Myftiun e Shkodrës dhe komentet e tij, në fakt, unë e njoh personalisht. Në të vërtetë, ishim ulur ngjitur në një darkë Iftari që shtrova pak javë më parë. Nuk kam biseduar me të që kur jam kthyer në Shqipëri dhe që kur kanë dalë videot, kështu që pres me kënaqësi të bisedoj me të për to. Kur ai thotë që ndihet i ofenduar, mendoj se është një ndjenjë që e kanë miliona njerëz, përfshi shumë amerikanë, edhe mua. Është një video ofenduese. Qëllimi i saj ka qenë të ofendojë dhe fyejë. Kështu që e kuptoj ndjenjën. Përsëris, shpresoj që ai dhe udhëheqësit e tjerë, në veçanti udhëheqësit muslimanë në Shqipëri, do ta përdorin këtë mundësi për të edukuar e informuar njerëzit, që mund të ndihen të çoroditur, që mund të pyesin: " Ç'do të thotë kjo?". Është e qartë që ai është një person shumë inteligjent dhe e kupton që kjo nuk ishte dora e Qeverisë së SHBA- ve, nuk ishte diçka e ardhur nga amerikanët e denjë. Është e rëndësishme që të vihet në kontekstin e duhur. Dhe, pres me kënaqësi të bisedoj me të mbi këtë çështje.

Gazeta Shqiptare

19 Shtator 2012

[angmokio]

Faleminderit Ambasador per kete mesazh miqesor dhe dashamires ndaj Islamit dhe Muslimaneve ne Shqiperi.

Ti je mik i Shqiptareve dhe vecanerisht i Muslimaneve ne Shqiperi.

Diplomate si ty ka nevoje Amerika dhe te tille i nevojiten dhe Shqiperise.

Shqipetaret e kane treguar tolerancen e tyre gjate shekujve dhe civilizimin e tyre dhe diteve te sotme pamvarsisht 50 viteve erresire ne komunizem.

Muslimanet Shqiptare kurrsesi nuk i mbeshtesin protestat armiqsore ne Libi e kudo tjeter. Islami eshte fe e Paqes dhe kundra vrasjes se njerezve te pafajshem.

Respekte dhe Mirenjohje!