Këshilla mbi edukimin e fëmijës suaj

[sirena_adria]

Pse lojërat me ujë, rërë e baltë janë aq të shëndetshme për fëmijët; Mos kini frikë

Fëmija pasi ka filluar të ecë, nuk mund të qëndrojë në një vend për një kohë të gjatë. I vetmi element që e mban atë me orë të tëra “të lidhur” është uji. Ai mund të luajë deri edhe katër orë pa ndjerë mërzi.
Kësisoj, s’ka arsye pse prindërit të tremben nëse fëmija ftohet apo jo.

Përkundrazi, studimet kanë treguar se shumë faringite dhe trakeobronkite janë kuruar vetëm nëpërmjet lojës me ujë. Fëmija kur luan me ujin, çliron nxehtësi dhe për këtë arsye nuk “ftohet”.

Po kaq të shëndetshme janë edhe lojërat me rërë dhe baltë. Mund të mbani në ballkonet e shtëpisë mjete të mbushura me rërë apo baltë, që fëmijët të mund të luajnë edhe kur nuk janë në vendet me rërë apo baltë.
S’ka pse të trembemi që ata mund të bëhen “pis”.

Loja me këto elementë është shumë e fuqishme, sa nuk e lejon “pisllëkun” të shkaktojë sëmundje. Këto lojëra influencojnë në sistemin psikomotor, në zhdërvjelltësimin e duarve dhe në kombinimin e asaj që shohin, asaj që duan të bëjnë dhe asaj që arrijnë të bëjnë.


Bota Sot

https://www.botasot.info/life-style-...kini-frike-se/

[sirena_adria]

Këshillat që ju ndihmojnë të rrisni fëmijë të lumtur dhe emocionalisht të fortë

A është e vështirë të rritësh fëmijë të lumtur? Pas rolit të ri social të gruas vihet re prania e një fenomeni të ri që pothuajse mund të cilësohet si “sindroma e nënës së keqe”. Femra e sotme jo vetëm që aspiron të ketë një karrierë të mirë profesionale, të jetë e pavarur financiarisht, të ketë një partner që e kupton dhe një grup miqsh të besuar.

Brenda këtij rrethi kompleks ka edhe fëmijë. Njerëzit më të rëndësishëm në jetën e tij, për të cilët, në njëfarë mënyre, ka ndjesinë se nuk i kushton aq kohë sa do të donte. Pikërisht atëherë lindin dyshimet: “A jam nënë e mirë?”. Kjo ndonjëherë bën që gruaja të vuajë nga ajo që është quajtur sindroma e nënës së keqe.

Sot mëmësia ka pushuar së fokusuari ekskluzivisht tek figura e femrës. Rolet kanë ndryshuar dhe kjo është sigurisht pozitive. Megjithatë, figura e nënës vazhdon të konsiderohet një bosht jetik në prindërim. Si mund të rrisim fëmijë të lumtur në mes të kësaj shoqërie kërkuese, ku zakonisht nuk kemi gjithë kohën që duhet? Ne ofrojmë disa strategji që mund të ndihmojnë prindërit, edukatorët ose një nënë që gabimisht mendon se nuk është një “nënë e mirë”.


Këshilla për të rritur fëmijë të lumtur:

Ndihmojini të vendosin

Ne mund të mos jemi në gjendje t’u japim fëmijëve tanë aq kohë sa duam. Ndonjëherë nuk mund të arrijmë në shtëpi në kohë për t’i ndihmuar ata me detyrat e shtëpisë ose për të bërë një shëtitje së bashku. Nuk ka rëndësi. Gjithsesi, të mos i lëmë fëmijët të mbyllen në dhomat e tyre, të mos lejojmë që televizori, kompjuteri apo videolojërat të na “marrin” atë pak kohë që mund ta ndajmë në mënyrën më të mirë: të flasim. Ne mbajmë një bisedë të përditshme me ta me qetësi dhe afërsi. Kjo do t’ju lejojë të dini shqetësimet dhe dëshirat e tyre.

Nëse ata kanë një problem, le të mos ua zgjidhim, por të ofrojmë strategji dhe këshilla që ta bëjnë vetë. Për të edukuar fëmijë të lumtur, fillimisht duhet t’i bëjmë ata të përgjegjshëm, duke u dhënë mjetet me të cilat të përballen me problemet e vogla të përditshme.

Bëjeni me dashuri, kujdes, por duke u ofruar atyre autonomi. Nëse e kanë gabim, mos i fajësoni dhe mos i ndëshkoni.

Ndihmojini dhe mësojini se ka edhe dështime në jetë dhe se gjithçka duhet mësuar. Ata gjithashtu duhet të mësojnë të menaxhojnë konceptin e rëndësishëm të zhgënjimit.

Ofrojuni atyre autonomi brenda kufijve

Edukimi fillon nga momenti “zero” i lindjes. Të dy prindërit duhet të bien dakord se cilat udhëzime arsimore duhet të zbatohen, të përcaktojnë se çfarë do të lejohet, çfarë oraresh do të caktohen, çfarë do të ndalohet dhe çfarë do të negociohet.

Fëmijët duhet ta dinë që në moshë të vogël se në shtëpi, ashtu si në shoqëri, ka kufij që duhen respektuar dhe sa më shpejt t’i dinë, aq më të sigurt do të ndihen, sepse do të dinë çfarë të presin në çdo moment. Pasi të vendosen rregullat, ne do të ofrojmë të drejta dhe ato gjithashtu do të negociohen dhe diskutohen. Është gjithashtu e rëndësishme t’u ofrohet fëmijëve autonomi adekuate bazuar në moshën e tyre. Në këtë mënyrë ata do të ndihen të aftë dhe të sigurt për veten e tyre, pasi do të marrin gjithmonë mbështetjen dhe udhëzimet tona në çdo kohë.

Gjithmonë ofrojuni atyre besimin tuaj, flisni përpara se t’i ndëshkoni, dëgjojini para se t’i qortoni dhe flisni sa më shumë me ta. Ata kurrë nuk duhet t’ju shohin si armik.

Autonomia është një faktor kyç në edukimin e fëmijëve. Me kalimin e viteve ata do të mendojnë se ne e vlerësojmë mënyrën e tyre të të menduarit dhe do të duan të marrin vendimet e tyre. Do të jetë mirë t’i lini të kontrollojnë nëse vendimi i tyre është i drejtë apo i gabuar. Shumë prindër, nga frika se mos vuajnë fëmijët e tyre, priren të jenë tepër mbrojtës pa e kuptuar se ulin aftësinë e tyre për të mësuar.

Asnjëherë mos u përpiqni të kompensoni kohën që nuk mund ta kaloni me ta

Është një gabim që bëjnë shumë prindër në ditët e sotme. Duke mos qenë në gjendje të kalojnë shumë kohë me fëmijët e tyre, përfundojnë duke i shpërblyer me një dhuratë, një lodër, atë video lojë që kërkojnë gjithmonë, tabletin, celularin… Është një gabim i madh. Fëmijët nuk i vlerësojnë dhuratat aq sa mendojmë ne. Dhe aq më tepër nëse e përdorim si shantazh, sepse ata në fund e kuptojnë shumë mirë strategjinë.

Prandaj duhet të jemi të qartë: nuk ka asgjë për të kompensuar. Prindërit punojnë dhe është normale, të gjithë në familje kanë një funksion dhe një rol, nuk duhet t’i kompensojmë me “objekte” se nuk jemi në shtëpi. Kompensojini me “cilësinë” e jetës. Koha që kalojmë me ta le të jetë gjithmonë më e mira, më e sinqerta.

Mos hezitoni të luani, të flisni, të gatuani, të ecni së bashku… Fikni telefonin dhe qeshni me fëmijët tuaj, pa u shqetësuar nëse jeni apo jo prindi “perfekt”. Ka një mijë mënyra për të qenë një prind i mirë dhe të gjitha janë të mira për të rritur fëmijë të lumtur.

Inteligjenca emocionale për të rritur fëmijë të lumtur

Edukimi i fëmijëve tanë që nga mosha e hershme deri në inteligjencën emocionale do të jetë padyshim një sukses. Kjo e fundit, siç e përshkruan Daniel Goleman, “është aftësia për të njohur ndjenjat e veta dhe të të tjerëve, për të motivuar veten, për të menaxhuar saktë emocionet tek ne dhe në marrëdhënie”.


/ Revista Psikologji / Panorama

http://www.panorama.com.al/keshillat...isht-te-forte/

[sirena_adria]

Prindërit që rritin fëmijë inteligjentë dhe të sigurt bëjnë gjithmonë 5 gjëra gjatë ‘kohëve të vështira’

Ne të gjithë duam të rrisim fëmijë elastikë , të sigurt dhe inteligjentë. Një psikolog i specializuar në zhvillimin e adoleshentëve, thotë se çelësi është që prindërit t’ju ofrojnë siguri që në moshë të re.

Fëmijët, veçanërisht adoleshentët dhe të rinjtë, ndonjëherë kanë nevojë për një vërtetim se ajo që ata mendojnë dhe ndjejnë është normale dhe në rregull. Në fakt, psikologët besojnë se vërtetimi është një nga mjetet më të fuqishme të prindërimit, dhe megjithatë shpesh lihet jashtë programeve tradicionale të trajnimit të prindërve në sjellje.

Vërtetimi i ndjenjave të fëmijës suaj nuk do të thotë domosdoshmërisht se ju i falni ose pajtoheni me veprimet që ai bën. Thjesht do të thotë të tregosh se i dëgjon, i kupton dhe i pranon.

5 mënyra për që përdorin prindërit e suksesshëm sipas psikologëve:

1. Ata normalizojnë përvojat

Miqësitë i ndihmojnë fëmijët të zhvillojnë aftësi të rëndësishme jetësore, por asnjëra nuk është e përsosur.

Kujtojini fëmijës tuaj se të gjitha miqësitë kalojnë nëpër ulje dhe ngritje. Në marrëdhëniet e qëndrueshme, miqtë e ngushtë në mënyrë të pashmangshme zhgënjejnë dhe irritojnë herë pas here.

2. Ofrojnë rehati fizike

Disa studime kanë gjetur përfitimet e kontaktit ndërpersonal. Për shembull, përqafimi mund të ulë presionin e gjakut dhe të rrënjos një ndjenjë kujdesi dhe sigurie.

Le të themi se fëmija juaj po ndihet i mërzitur për diçka. Para se të thoni një fjalë të vetme, mund t’i fërkoni shpinën, t’i përqafoni ose t’i mbani dorën.

3. Ata mësojnë se cilësia e kalon sasinë

Një studim zbuloi se adoleshentët që kishin shumë miq - por më sipërfaqësorë – në shkollë, ishin më të shqetësuar.

Plus, ndryshe nga sa mendojnë shumica e fëmijëve, të qenit popullor nuk e lehtëson vetminë.

Sigurojeni fëmijën tuaj se nuk ka nevojë për qindra miq, qoftë në rrjetet sociale apo në jetën reale. Disa do të mjaftojnë, për sa kohë që ata janë besnikë, të besueshëm dhe mbështetës.

Hulumtimet tregojnë se së bashku me pranimin nga bashkëmoshatarët, të

4. Ata fokusohen në gjërat pozitive

Shpesh shoh fëmijët të ndalen në një zhgënjim të vogël shoqëror, i cili në atë moment duket më i madh dhe më urgjent se të gjitha gjërat pozitive në jetën e tyre.

Ndërsa ndjeni ndjeshmërinë për shqetësimin e fëmijës suaj, ripërqendrimi i vëmendjes së tij në triumfet dhe kënaqësitë e tij më të fundit i lejon ata të vlerësojnë gjërat që me të vërtetë kanë rëndësi.

5. Ato japin shpresë

Tregojini fëmijës tuaj se megjithëse po kalon një kohë të vështirë tani, ajo nuk do të zgjasë përgjithmonë. Gjërat do të përmirësohen. Kjo nuk është një trillim. Situatat sociale do të ndryshojnë sepse fëmijët do të ndryshojnë.


Tiranapost.al

https://tiranapost.al/stil-jete/prin...one-5--i512637

[sirena_adria]

Mbi prindërimin: “Jepuni fëmijëve lodra të thjeshta, jo tabloide!”

Larg smartfonët dhe tabletët, nga të vegjlit! Sinjalizimi, edhe pse i mbështetur nga një studim shkencor prestigjioz, erdhi në dhjetor 2018 nga Akademia Amerikane e Pediatrisë, që tregoi sesi përdorimi i telefonave celularë, tabletëve, por edhe thjesht pajisjeve elektronike me ekrane të ndezura, nuk rekomandohen për mirërritjen e fëmijëve. Më mirë lodra të thjeshta dhe krijuese, që stimulojnë imagjinatën dhe zhvillimin njohës.

Raporti i publikuar nga AAP përqendrohet mbi të gjitha në këshilla për prindërit se çfarë lloj lodrash duhet t’u dhurojnë ose t’u japin fëmijëve nga lindja deri në moshën shkollore. Këshillat e ekspertëve të pediatrisë janë pikërisht këto:

“Lodrat kanë evoluar me kalimin e viteve dhe reklamat mund t’u japin prindërve përshtypjen se lodrat me një platformë” virtuale “ose dixhitale janë më arsimore […] Hulumtimi na tregon se lodrat më të mira, nuk janë ato me dritë verbuese ose të shtrenjta, ose që vijnë me një app për t’i përdorur”.

Cilat janë lodrat më të mira që stimulojnë krijimtarinë e fëmijëve dhe gjithashtu, marrëdhëniet e tyre me mjedisin e njerëzit përreth tyre?

Sipas pediatërve amerikanë, “lodrat më të mira, janë ato që përfshijnë prindrit dhe fëmijët në lojë, të pretendojnë sikur, apo dhe të ndërveprojnë së bashku […] Ju nuk merrni të njëjtën kënaqësi nga një tabletë, apo një ekran. Ndërsa, kur fëmijët luajnë me prindrit, këtu ndodh magjia e vërtetë, pavarësisht nëse ata janë duke u lodhur me personazhet e lodrave, apo tullat, apo enigmat së bashku”.

Shkurt, fëmijët mund të luajnë me tulla dhe gjëegjëzë, për të zhvilluar aftësitë e tyre motorike, zhvillimin gjuhësor dhe njohës, vetëdijen hapësinore dhe aftësitë e para matematikore. Ndaj, të dashur prindër që jeni duke na lexuar, mos lejoni që vogëlushët tuaj, të marrin telefona inteligjentë ose tableta, apo ndonjë gjë që është digjitale, që në moshë të hershme; stimulojeni kureshtjen e tyre me lodra, apo lojra edukative ose “sociale”… ata, do t’u jenë mirënjohës në të ardhmen!


Konica.al

https://konica.al/2022/06/mbi-prinde...a-jo-tabloide/

[sirena_adria]

“Kështu mund të mbahet një miqësi”. Mesazhi i kësaj nëne do t’ju lërë pa fjalë.

“Një nënë dhe djali i saj po ecnin në bregdet. Në një moment të caktuar, djali i thotë: “Ma, si mund të mbahet një miqësi?”.
Nëna e sheh djalin duke qeshur dhe i thotë: “Merr pak rërë në dorë”.

Djali ulet, merr një grusht rërë në dorë dhe sheh nga e ëma”. Nëna, duke vazhduar të buzëqeshte, i kërkoi: “Tani shtrëngoje dorën grusht”.
Djali i vogël shtrëngoi dorën ku mbante rërën dhe vuri re se, sa më shumë e shtrëngonte dorën, aq më shumë humbiste rërë nga dora. “Ma, por rëra është duke rënë nga dora ime”, tha ai.

“E di, i dashur. Tani mbaje dorën plotësisht të hapur”, i kërkoi e ëma.
Djali u bind ama filloi të frynte një erë e fortë, e cila ia mori gjithë rërën nga dora. Ai i tha: “As kështu nuk munda ta mbaja dot rërën”.

Nëna, e cila vazhdonte të buzëqeshte, i kërkoi: “Atëherë, tashmë merr prapë pak rërë, por mbaje dorën të hapur në formë të lugët, pra gjysmë të mbyllur për ta ruajtur, dhe gjysmë të hapur për ta lënë të lirë”.
Djali provoi sërish siç i tha e ëma, ama këtë herë rëra nuk u zhduk nga dora e tij, arriti të qëndronte pavarësisht erës së fortë.
“Kështu mund të mbahet një miqësi”, i tha e ëma”. – Kherydan

Një miqësi mund të mbahet pikërisht në këtë mënyrë, duke treguar maturi në gjithçka që thua. Mund të kemi pakënaqësi, hatërmbetje, ama asnjëherë nuk duhet t’i shprehim ato në mënyrë të tillë që ta lëndojmë mikun apo mikeshën tonë. Fjalët vrasin ndaj duhet t’i peshojmë ato mirë, përpara se t’i nxjerrim nga goja jonë. Vetëm kur tregojmë mature dhe pjekuri, mund t’i mbajmë miqësitë për një kohë të gjatë.


Bota.al

https://bota.al/keshtu-mund-te-mbahe...lere-pa-fjale/

[sirena_adria]

Gjërat që fëmijët i mbajnë mend nga prindërit

Duke pasur parasysh se rritja e fëmijëve është një kohë sa e rëndësishme edhe e vështirë për prindërit, ne kemi listuar disa përgjigje nga të cilat të gjithë prindërit do të jenë në gjendje të mësojnë diçka.

Çdo fëmijë ka nevojë për mbrojtje, prandaj fëmijëve tuaj do t’i nguliten në memorie të gjitha ato herë kur keni luftuar përbindëshat që fshihen poshtë krevatit të tyre, ose kur i keni qëndruar pranë pas një ëndrre të keqe. Por do të mbajnë mend edhe ato raste kur temperamenti juaj ju ka shndërruar juve në ato përbindëshat që ata i ruhen aq shumë. Është normale që fëmijët t’iu shohin të tensionuar dhe nevrastenikë, ama qëllimi juaj kryesor duhet të jetë t’i bëni të ndihen të sigurt kur janë pranë jush.

Kushtoni kohë fëmijëve tuaj

Fëmijët e lidhin ndjenjën e dashurisë me sasinë e vëmendjes që marrin. Ato ditë kur ju ndaloni atë që po bëni për t’u bërë pjesë e një çaji me vajzën tuaj, apo një loje me top me djalin, do të jenë kujtime të ngulitura thellë në memorien dhe zemrat e tyre kur të rriten. Gjeni kohën për të bërë gjëra të vogla me fëmijët tuaj, sepse në fund, do të jenë momentet më të rëndësishme.

Marrëdhënia juaj me partnerin

Fëmijët e formojnë këndvështrimin e tyre rreth dashurisë duke parë prindërit e tyre. Synoni të keni atë lloj marrëdhënieje, që t’i bëjë ata të presin me padurim martesën e tyre një ditë. Jepini fëmijëve sigurinë që vjen kur shohin mamin dhe babin në një marrëdhënie dashurie të përkushtuar me njëri-tjetrin.

Lavdatat dhe kritikat tuaja

Zemra e një fëmije është si çimento e patharë, përshtypjet që krijojnë në fazat e hershme të jetës së tyre, do të ngurtësohen me kalimin e kohës. Ata do të krijojnë identitetin e tyre, aftësitë dhe ndjenjën e vetëbesimit, në varësi të fjalëve që ju i keni thënë gjatë fëmijërisë. Detyra e prindërve është të mësojnë dhe disiplinojnë, por edhe kur kritikoni, bëjeni me dashuri dhe inkurajim.

Traditat tuaja familjare

Fëmijët do të mbajnë mend ‘traditat’ që ju vendosni në familjen tuaj, qoftë një film në fundjavë, një vend drejt të cilit udhëtoni rregullisht, mënyra si festoni ditëlindjet ose eventet e tjera speciale. Krijoni qëllimisht disa traditat që dhe fëmijët tuaj do të donin t’ia kalonin fëmijëve të tyre një ditë.


Bota Sot

https://www.botasot.info/life-style-...nga-prinderit/

[sirena_adria]

Po sikur në vend të arsimimit, t’i rrisnim fëmijët tanë me ushqim për shpirtin, argëtim dhe art!

Po sikur në vend të arsimimit ne t’i edukonim fëmijët tanë me ushqim për shpirtin, argëtim dhe t’i lëmë të ndihen të lirë?
A do rritej një brez më i lumtur?

Ish profesori i i psikologjisë sociale në Universitetin Howard, Jaiya John, autor i shumë librave, hedh idenë e një përmbysjeje të sistemit të edukimit që në vegjëli, për fëmijë më të lumtur.

Ai i quan vitet e shkollimit deri një morg dhe vdekje shpirtërore dhe në vend të 18 viteve të humbura Jaiya John thotë se fëmijët tanë duhet të edukohen me muzikë, kërcim, poezi e art.

Ja çfarë shkruan ai në librin e tij “Freedom: Medicine Words for Your Brave Revolution”:

Po sikur edukimi të ishte kënga dhe vallëzimi, teatri, muzika, poezia, arti, kultura, loja, lëvizja, aventura dhe zbulimi dhe këto të ishin bazat, metodat përmes të cilave të përcilleshin historia, leximi, shkrimi, matematika dhe shkenca?

Si do të ndikonte kjo në trupin, mendjen, sistemet nervore, kapacitetet sociale, aftësinë shëruese, menaxhimin e stresit dhe ankthit dhe marrëdhënien me jetën dhe gëzimin e fëmijëve tanë?

Po sikur arsimi të ishte një kopsht pasionant dhe jo një morg i zymtë?

Po sikur familjet dhe komunitetet të ishin të pranishme dhe të përqendruara, jo të margjinalizuara, të heshtnin dhe të fshiheshin?

Po sikur fëmijët tanë të mund të kishin 18 vjet jetë dhe jo 18 vjet vdekje shpirtërore?

Po sikur në vend të indoktrinimit, kontrollit, ndëshkimit, heshtjes dhe turpërimit të tyre, ne t’i drejtonim ata dhe t’i ushqenim me lirinë e të qenit të dashuruar me atë çka janë?

A është ky një skenar shumë i frikshëm?

Duket e pamundur apo të jetë një mënyrë inferiore vallë?

Atëherë, ndoshta shpirtra të dashur, është urgjente të shqyrtojmë se çfarë na ka bërë edukimi.

Jaiya është themeluesi i Soul Water Rising, një mision rihumanizues global për të çrrënjosur shtypjen si dhe i Freedom Project, një iniciativë globale që ringjall praktikat tradicionale për shërimin dhe çlirimin shoqëror.

Për idetë e tij ai ka folur me mbi një milion njerëz në mbarë botën me audiencë deri në disa mijëra.

Shpirti i tij indigjen ëndërron bukë të skuqur, bar të ëmbël, bambu në fllad dhe liqene breshkash, poezia e të cilëve është paqe.


Tiranapost.al

https://tiranapost.al/sociale/po-sik...r-shpi-i516889

[sirena_adria]

Shprehja “kërcënuese” që nuk duhet t’i thuhet kurrë fëmijës

Nga Lira Gjika

“Mbylle gojën!” Kjo shprehje edhe kur thuhet me të qeshur është kërcënim. Për fat të keq kjo shprehje është pjesë e fjalorit tonë të përditshëm dhe e përdorim kudo.

Dëgjohet në shtëpi, në rrugë dhe për fat të keq e dëgjojmë të përdoret edhe në institucionet e edukimit, si kopshte e shkolla. Mbase ka ardhur koha që duhet të hartohet një listë me fjalë dhe shprehje që nuk duhen përdorur. Këtë listë duhet ta pregatisë një ekip miks specialistësh, duke filluar nga gjuhëtarët e psikologët e deri te pensionistët.

Ne duhet të zgjedhim fjalët për të rregulluar etikën e komunikimit me veten, tjetrin dhe sidomos me fëmijët. Duhet të ndalohet me ligj shprehja “mbylle gojën” në institucionet shkollore e parashkollore, që për fat të keq, kjo shprehje, është ulur këmbëkryq dhe më e keqja, nuk na bën përshtypje. Duhet ta bëjmë këtë veprim ashtu siç është bërë me fjalën “pusho” që nuk lejohet të përdoret në institucionet shkollore e parashkollore.

Ka ardhur koha, madje jemi vonë, për të përmirësuar fjalorin, sepse janë fjalët ato, që krijojnë mendimin. Kur përdorim një fjalor të tillë, apo më saktë fjalor bazik, është e pamundur të realizojmë dëshirat dhe qëllimet tona.


Koha Jone

https://kohajone.com/shprehja-kercen...kurre-femijes/

[sirena_adria]

Frazat që fëmija asnjëherë nuk duhet t’i dëgjojë nga ju

Gjatë edukimit të fëmijëve, shpeshherë shumë prindër harrojnë se sa të rëndësishme janë fjalët që jua thonë atyre


Këto fjalë mund të jenë të aprovimit, por gjithashtu mund të jenë edhe fjalë negative të cilat jua themi fëmijëve kur jemi të zemëruar.

Këto fjalët e fundit e dëmtojnë fëmijën dhe nuk sjellin ndonjë përfitim..

Prandaj, shumë ekspertë tregojnë dhe sugjerojnë që t’i thoni të “njëjtat” gjëra, por në mënyra më pozitive.

Më poshtë i keni disa shembuj.

– Në vend të “Sepse unë po them kështu”, thoni “E di se dëshiron të luash më shumë, por duhet që patjetër të shkojmë ta vizitojmë gjyshin.”

– Në vend të “Boll qave më”, thoni “E di se ndjehesh keq. Nëse do të isha në vendin tënd, edhe unë do të qaja.”

– Në vend të “Nëse nuk hanë bukë, do të bëhesh i dobët dhe i vogël”, thoni “Nëse e hani ushqimin, do të bëhesh i mençur dhe i fortë si babi.”


Koha Jonë

https://kohajone.com/frazat-qe-femij...egjoje-nga-ju/

[skender76]

Nje kshille” prej meje,

Kur t’ju bahet vajza/djali 20 vjeç, bani çmos, gjeni mnyren, qe te dale nga shpija e ngrohte” prindrore, e te jetoje vetem,
Do i sherbeje shume…

Qe kur te vije dita te bashkjetoje/martohet te jet e/i afte me vlersu partnerin/en, dhe ne rastin me te keq kur ka mosmarrveshje, e di qe jetohet edhe vetem, mos ta ket frike ndarjen (kjo vlen me shum per vajzat, ka raste qe pranojn denglat e derrkucit” vetem e vetem te mos kthehet te shpija e prinderve…)