Këshilla mbi edukimin e fëmijës suaj

[sirena_adria]

Si i mësojnë prindërit japonezë fëmijët e tyre që të mos bëjnë “naze” me ushqimin. Gjithçka duhet të bëni është…


Për shumë prindër, t’i bësh fëmijët të hanë ushqim të shëndetshëm është si të zbusësh një viç kokëfortë. “Bright Side”, tregon se si prindërit japonezë i bëjnë fëmijët të shijojnë të gjitha ushqimet.

1. Lëreni fëmijën të eksperimentojë një shije të re.

Fëmijët mërziten lehtësisht me të njëjtat ushqime dhe zakonet e tyre të të ngrënit ndryshojnë shpesh. Është e rëndësishme që një fëmijë të shijojë pjata të reja, dhe shumica e prindërve japonezë e marrin këtë shumë seriozisht.

Sipas ekspertëve, sa më shumë një fëmijë të provojë lloje të ndryshme të ushqimit të shëndetshëm, aq më shumë interesi i tij do të rritet për dietat më të shëndetshme gjatë kohës që rritet. Shija e tij gjithashtu do të zhvillohet dhe ai do të jetë i prirur të provojë pjata të reja.

2. Lërini ta shijojnë vetë procesin e të ngrënit.

Prindërit duhet të shmangin të qenit shumë të rreptë në lidhje me ushqimin e shëndetshëm. Fëmijët duhet të kënaqen me ushqimet e tyre dhe përfshirja e ëmbëlsirave të vogla mund t’i bëjë ata të presin me padurim.

3. Shërbejeni ushqimin në pjata më të vogla.

Arsyeja pse fëmijët duhet të hanë ushqim në pjata më të vogla është e thjeshtë: ata nuk duhet të ndihen të frikësuar nga madhësia e një pjate që supozohet të ketë shumë ushqim në të. Kur përdorin pjata më të vogla, ata inkurajohen të hanë vetë ushqimin, gjë që i ndihmon të zgjedhin atë që duan të hanë.

Pjesa që prindërit konsiderojnë të jetë “me madhësi normale” në të vërtetë mund të jetë shumë e madhe për një fëmijë, dhe prindërit duhet ta mbajnë mend këtë kur matin sasinë e ushqimit që fëmija mund të hajë në një vakt.

4. Hani ushqime familjarisht dhe përfshijini edhe fëmijët.

Të ngrënit së bashku dhe lënja e fëmijës që të marrë pjesë në procesin e gatimit mund t’i inkurajojë ata të tregojnë më shumë kujdes për atë që do të hanë. Krijoni një rutinë gatimi të shëndetshëm, të shijshëm dhe me ushqim të këndshëm si shembull për fëmijët tuaj.

5. Të bësh shumë kërcime dhe vrap.

Njerëzit në Japoni shpesh preferojnë të ecin me biçikletë ose të bëjnë një shëtitje të shpejtë kur lëvizin në vende që nuk janë shumë larg banesës së tyre. Në një farë mënyre, prindërit japonezë i inkurajojnë fëmijët të merren me aktivitete fizike, si vrapimi dhe kërcimi.

Në vend që t’i lini fëmijët të luajnë video lojëra për orë të tëra, është më mirë t’i nxirrni për një shëtitje në parkun e lagjes ose të luani një lojë në shtëpi.


Gazeta Panorama

http://www.panorama.com.al/si-i-meso...te-beni-eshte/

[sirena_adria]

Qarja, kafshimi, bërtitja nuk janë gjithmonë të këqija: Qe përse fëmija ka një sulm inati

Shikoni çfarë fshihet pas sulmit të zemërimit, por edhe çfarë nuk duhet të bëni në ato momente!

Psikoterapistja Jasmin Zafar shpjegon se për çfarë bëhet fjalë kur një fëmijë sillet në këtë mënyrë. Ajo thotë se kjo gjë nuk duhet të jetë aspak shkak për shqetësim,

“Gjëja e parë që them gjithmonë është se nuk ka vend për t’u frikësuar, nëse fëmijë bërtet, çirret, kafshon, refuzon. U kujtoj gjithmonë prindërve fillimisht se fëmija ndihet i sigurt pranë tyre, andaj mund të shprehë ndjenjat e tij”, thotë mjekja, duke theksuar se fëmija në atë moment ka nevojë për diçka.

Fëmija përballet me emocione të mëdha

Sjellja e keqe e një fëmije thjesht do të thotë se ai ende nuk ka mësuar t’i shprehë ndjenjat e tij në mënyrën e duhur.

“Truri zhvillohet me kalimin e moshës, kështu që ndonjëherë ata nuk janë në gjendje të shprehin të gjitha ato emocione, siç është pasiguria. Ata nuk janë as të sigurt se çfarë ndiejnë atëherë”, tregon mjekja.

Ajo thotë se është një punë e madhe për prindërit. “Detyra jonë është t’i ndihmojmë ata të përballen me ato ndjenja në mënyrë që të kuptojnë më mirë veten dhe sjelljen e tyre.

Është e rëndësishme të qëndroni të qetë

Mënyra se si i trajtojmë këto episode ndikon shumë në mënyrën se si do të sillet fëmija.

“Gjëja tjetër që u them prindërve është të jenë të qetë. Jam e vetëdijshme se është shumë vështirë, veçanërisht nëse ju vetë jeni të lodhur, të uritur, të shqetësuar në atë moment, por nëse filloni t’i bërtisni, t’i ndëshkoni dhe t’i kërcënoni, kjo nuk do ta përmirësojë situatën. Ju vetëm do të largoni mendimet tuaja nga problemi kryesor”, thotë dr. Jasmin.

A ndihet fëmija sikur askush nuk e dëgjon?

A keni menduar ndonjëherë se ndoshta ky është problemi? Ndoshta fëmija është më i vogli në familje, më i qetë?

“Sapo të kuptoni se çfarë po kalon fëmija, do ta keni të qartë se fëmija po përpiqej t’ju tregonte të gjitha këto. Përpiquni ta ndihmoni dhe të jeni aty për të komunikuar më mirë me ju”, përfundon doktori.


Bota Sot

https://www.botasot.info/life-style-...je-sulm-inati/

[sirena_adria]

5 arsye pse të ngrënit si familje ndikon për mirë te fëmijët

Shumë prej nesh i pëlqejnë skenat e filmave ku familjet hanë mëngjesin apo darkën së bashku. Kjo është një traditë e vjetër, shenjë e një familjeje të bashkuar që në fakt ndikon shumë mirë dhe te fëmijët.

Pse ngrënia e ushqimit së bashku është më shumë se thjesht një veprim i thjeshtë i konsumimit të ushqimit.

1. Fëmijët mësojnë sjellje të mira

Fëmijët në mosha të vogla imitojnë sjelljen e prindërve të tyre kur hanë së bashku. Prindërit mund të shfrytëzojnë mundësinë për të treguar se si të sillen siç duhet gjatë ngrënies. Përveç kësaj, aftësitë sociale dhe komunikuese mund të zhvillohen edhe përmes vakteve familjare.

2. Ata dalin më mirë në shkollë

Fëmijët që hanë me prindërit e tyre marrin nota më të mira se ata që hanë vetëm. Kjo ndoshta sepse vaktet që shërbejnë prindërit kanë më shumë vlera ushqyese dhe për rrjedhojë marrin më shumë vitamina. Për më tepër, diskutimi i problemeve të shkollës i inkurajon fëmijët që t'i trajtojnë problemet në mënyrë më efikase dhe të përshtatshme.

3. Ata ushqehen më shëndetshëm

Si rregull, të ngrënit së bashku çon në zgjedhje më të shëndetshme ushqimore. Ngrënia vetëm ose larg shtëpisë, nga ana tjetër, nxit zakone më të këqija të të ngrënit.

4. Ata hapen më shumë

Një mbledhje familjare zakonisht krijon një atmosferë të rehatshme dhe komode që i ndihmon fëmijët dhe adoleshentët të flasin më hapur për ndjenjat e tyre. Sipas një studimi të rinjtë kanë një komunikim më të mirë me prindërit nëse hanë me familjarët. Secili anëtar ndan një pjesë të ditës së tij, duke krijuar kështu një lidhje të fortë familjare.

5. Vetëvlerësimi i tyre rritet

Të ngrënit së bashku krijon një ndjenjë përkatësie. Përqendrimi në bisedë dhe të ngrënit në një atmosferë të mirë mund të gëzojë ndjeshëm fëmijët dhe gjithashtu të rrisë vetëvlerësimin e tyre për shkak të angazhimit social për të cilin kanë nevojë shumë fëmijë dhe adoleshentë. Adoleshentët përfundojnë duke qenë më pak të ‘dëshpëruar’, pasi është më e lehtë të bisedojnë ndërsa ndajnë ushqimin me më të afërmit dhe më të dashurit e tyre.


Tiranapost.al

https://tiranapost.al/stil-jete/5-ar...emijet-i508478

[sirena_adria]

Mos i mbyllni fëmijët në shtëpi në dimër!

Me ardhjen e dimrit, prindërit kanë më pak gjasa t’i çojnë fëmijët e tyre në parqe dhe kënde lojërash nga frika se mos ftohen.

Sapo temperatura ulet, ata preferojnë t’i çojnë në dhomat e mbyllura të lojërave ose t’i lënë në shtëpi. Megjithatë, është e rëndësishme që fëmijët të luajnë jashtë edhe kur është ftohtë.

Çdo arrë, gështenjë, boçë e pishave që një fëmijë e mban në dorë gjatë lojës, mbledh baktere që forcojnë imunitetin. Kështu organizmi krijon një mbrojtje kundër një sërë sëmundjesh.

Mjekët kujtojnë se aktiviteti në natyrë, vrapimi apo ecja, i jep fëmijës mundësinë për të marrë ajër të pastër dhe ka një efekt të dobishëm në rrugët e frymëmarrjes, i pastron ato dhe redukton kollën.

Drita e diellit është një kurë, veçanërisht në vjeshtë dhe dimër, kur nuk është aq e fortë.

Hulumtimet tregojnë se momentet traumatike dhe stresuese të jetës shkaktojnë më pak çrregullime mendore te fëmijët që qëndrojnë shpesh në natyrë.

Ndriçimi artificial dobëson fokusin e syrit, ndërsa dita e kthen atë në normalitet, ndaj është e rëndësishme ta mbani fëmijën jashtë çdo ditë.

Qëndrimi jashtë zvogëlon hiperaktivitetin sepse fëmijët janë më të qetë pasi luajnë në park, ndaj i qasen zgjidhjes së detyrave dhe aktiviteteve të tjera me më shumë vëmendje.


Bota Sot

https://www.botasot.info/life-style-...tepi-ne-dimer/

[sirena_adria]

Pse fëmijët zihen shumë dhe çfarë të bëjnë prindërit

Çdo familje me shumë fëmijë ka me siguri zëra të lartë, përplasje dyersh dhe shumë grindje dhe zënka. Fëmijët zihen për shumë arsye. Ata mund të jenë të uritur, të lodhur ose thjesht të mërzitur nga njëri-tjetri.

Cilat janë shkaqet kryesore të grindjeve të fëmijëve?

Shkenca rendit disa arsye për këto grindje, dhe megjithëse nuk janë befasuese, ato mund të çojnë në një reflektim për prindërit nëse ata duhet të korrigjojnë sjelljen e tyre.

Trajtimi preferencial: Disa kultura, ku bëjmë pjesë dhe ne shqiptarët, i kushtojnë më shumë rëndësi një gjinie mbi një tjetër, dhe kjo mund të çojë në pakënaqësi dhe, pra, në grindje mes vëllezërve.

Një thirrje për pavarësi: Fëmijët, qoftë si parashkollorë apo si adoleshente, e kanë shjumë të nevojshme lirinë dhe pavarësinë për t’i bërë gjërat vetë. Me hormonet e tërbuara ose aftësitë e kufizuara sociale vjen një betejë për barazi me vëllezërit e motrat më të mëdhenj ose më të vegjël. Kjo shkakton pakënaqësi dhe, për rrjedhojë, grindje.

Nevojë për vëmendje: Ndonjëherë vëllezërit e motrat mund të grinden me njëri-tjetrin nëse e kuptojnë se kjo është një mënyrë për të tërhequr vëmendjen e prindërve. Kjo është më shumë një nevojë për dashuri dhe vëmendje.

Karaktere të ndryshme: Të gjithë fëmijët janë të ndryshëm, edhe nëse kanë të njëjtat gjene. Grindja mes individëve me karaktere të ndryshëm që jetojnë me njëri-tjetrin është normale, për sa kohë që nuk bëhen shqetësuese.


Ç’të bëjnë prindërit kur fëmijët zihen gjatë gjithë kohës?

1. Mësoni kur të ndërhyni dhe kur jo.

Dhuna, ngacmimi dhe shenjat e tjera të grindjes fizike duhet të eliminohen që në fillim. Asnjë grindje nuk mund të justifikojë goditjen e njëri-tjetrit.

Por nëse debati është relativisht i butë dhe fëmijët duket se po e zgjidhin, nuk ka nevojë të ndërhyni. Studimet thonë se fëmijët që i zgjidhin vetë zënkat bëhen më tolerantë në të ardhmen.

Kështu që herën tjetër që fëmijët grinden, qoftë edhe me zhurmë, lërini ta zgjidhin vetë për sa kohë që nuk ka kërcënim fizik.

2. Ndërmjetësoni, por mos gjykoni.

Çdo prindër, i do fëmijët njësoj. Por ndonjëherë, mund të mos gjykojnë ftohtë kur fëmijët grinden. Ju, pa dashje, mund të përfundoni duke marrë anën e një fëmije mbi të tjerët, duke krijuar edhe më shumë pakënaqësi.

Nëse lufta bëhet e shëmtuar dhe ju ndërhyni, mos mbani anë. Në vend të kësaj, inkurajoni fëmijët që të flasin mes tyre, kërkojuni të gjejnë zgjidhje për problemin dhe ndihmojini ata të arrijnë një marrëveshje vetë.

3. Kaloni kohë me secilin fëmijë individualisht.

Fëmijët janë shumë të ndryshëm. Nëse njëri dëshiron të shikojë një film, ndërsa tjetri dëshiron të lexojë një libër, përpiquni të kaloni kohë me secilin. Për shpërblime dhe dhurata, sigurohuni që t'i merrni secilit fëmijë atë që i pëlqen, në vend të të njëjtës gjë.

4. Përdorni të njëjtën disiplinë.

Ndonëse mund të mos merrni anë ose të ndërhyni, ka raste që do t'ju duhet të jepnni dënime si prind. Harrojeni se kush e filloi luftën. Kur dhe nëse vëllezërit e motrat zihen, trajtojini të gjithë njësoj.

5. Mbi të gjitha ruani gjakftohtësinë.

Mos harroni asnjëherë se jeni i rritur. Në çdo situatë, pa marrë parasysh se çfarë kanë bërë fëmijët tuaj, ju nuk mund të bërtisni me të madhe. Për sa kohë që grindja nuk është agresive mund ta zgjidhni duke ruajtur qetësinë.


Tirana Post

https://tiranapost.al/stil-jete/pse-...nderit-i509431

[sirena_adria]

Gabimet “toksike” të prindërve që padashur rrisin fëmijë egoistë

Mund ta keni dëgjuar shpesh se edukimi i mirë apo i keq fillon nga familja. Një nga problemet më të mëdha të prindërve është se gjithmonë e më shumë pa e ditur, bëjnë disa gabime,që ndikojnë më vonë në mënyrën se si fëmija komunikon dhe sillet me të tjerët.

Traci Baxley një trajner prindërimi tregon 5 nga sjelljet e gabuara që bëjnë zakonisht prindërit me fëmijët, sjellje që më vonë ju ndikojnë atyre në ndërtimin e karakterit.

Sipas studimeve ndjeshmëria dhe ndjenjat që lidhen me dhembshurinë tek një fëmijë,fillojnë që në moshën 3 vjeçare. Por cilat janë 5 gabimet,të cilat Baxley i përkufizon toksike e që rrisin individë egoistë!?

Së pari,ti thuash një fëmije po për çdo gjë duket të jetë një nga gabimet më të mëdha. Studimet tregojnë se fëmijët që marrin vetëm po si përgjigjje janë më pak të ndjeshëm ndaj të tjerëve.

Dështimi në krijimin e mundësive mësimore është një tjetër arsye. Që nga komunikimet familjare një fëmijë duhet të mësojë të mendojë për të tjerët.

Ti tregosh fëmijës se çfarë është duke ndodhur në botë dhe ta bësh të ndërgjeshëm të vlerësojë kushtet e tij është një nga format më të mira të edukimit.

Fëmijët mësojnë të jenë mirënjohës kur nuk marrin gjithçka që kërkojnë. Kështu mësojnë njëkohësisht të jenë falënderues.

E si përfundim të mos i lejosh apo angazhosh me punë vullnetare i bashkohet listës së gabimeve toksike që prindërit shpesh bëjnë.


/CNBC / Vjola Gremi - SCAN



http://www.scan-tv.com/gabimet-toksi...emije-egoiste/

[sirena_adria]

Gjërat që fëmijët i mbajnë mend nga prindërit

Faza e rritjes së fëmijëve, është më shumë se një provë e vështirë për prindërit.

1. Kur i keni bërë të ndihen të sigurt

Çdo fëmijë ka nevojë për mbrojtje, prandaj fëmijëve tuaj do t’i nguliten në memorie të gjitha ato herë kur keni luftuar përbindëshat që fshihen poshtë krevatit të tyre, ose kur i keni qëndruar pranë pas një ëndrre të keqe. Por do të mbajnë mend edhe ato raste kur temperamenti juaj ju ka shndërruar juve në ato përbindëshat që ata i ruhen aq shumë. Është normale që fëmijët t’iu shohin të tensionuar dhe nevrastenikë, ama qëllimi juaj kryesor duhet të jetë t’i bëni të ndihen të sigurt kur janë pranë jush.

2. Kur u keni kushtuar kohë

Fëmijët e lidhin ndjenjën e dashurisë me sasinë e vëmendjes që marrin. Ato ditë kur ju ndaloni atë që po bëni për t’u bërë pjesë e një çaji me vajzën tuaj, apo një loje me top me djalin, do të jenë kujtime të ngulitura thellë në memorien dhe zemrat e tyre kur të rriten. Gjeni kohën për të bërë gjëra të vogla me fëmijët tuaj, sepse në fund, do të jenë momentet më të rëndësishme.

3. Marrëdhënia juaj me partnerin

Fëmijët e formojnë këndvështrimin e tyre rreth dashurisë duke parë prindërit e tyre. Synoni të keni atë lloj marrëdhënieje, që t’i bëjë ata të presin me padurim martesën e tyre një ditë. Jepini fëmijëve sigurinë që vjen kur shohin mamin dhe babin në një marrëdhënie dashurie të përkushtuar me njëri-tjetrin.

4. Përgëzimet dhe kritikat tuaja

Zemra e një fëmije është si çimento e patharë, përshtypjet që krijojnë në fazat e hershme të jetës së tyre, do të ngurtësohen me kalimin e kohës. Ata do të krijojnë identitetin e tyre, aftësitë dhe ndjenjën e vetëbesimit, në varësi të fjalëve që ju i keni thënë gjatë fëmijërisë. Detyra e prindërve është të mësojnë dhe disiplinojnë, por edhe kur kritikoni, bëjeni me dashuri dhe inkurajim.

5. Traditat tuaja familjare

Fëmijët do të mbajnë mend ‘traditat’ që ju vendosni në familjen tuaj, qoftë një film në fundjavë, një vend drejt të cilit udhëtoni rregullisht, mënyra si festoni ditëlindjet ose eventet e tjera speciale. Krijoni qëllimisht disa traditat që dhe fëmijët tuaj do të donin t’ia kalonin fëmijëve të tyre një ditë.


Gazeta Metro

https://gazetametro.net/gjerat-qe-fe...nga-prinderit/

[sirena_adria]

3 mënyra si prindërit mund t’i mësojnë fëmijët të jenë të zgjuar me paratë nga një këshilltar i familjeve të pasura

Prindërit nuk duhet të presin derisa fëmijët e tyre të arrijnë në moshë madhore për t’i mësuar si të menaxhojnë paratë. Kjo sipas Ken Eyler, CEO i Aquilance, një kompani shërbimesh financiare dedikuar “familjeve të pasura”.

Gjatë karrierës së tij 31-vjeçare duke këshilluar familjet me pasuri të mirë, Eyler ka parë mbi 100 fëmijë të rriten. Ai këshillon klientët e tij që të fillojnë t’i mësojnë fëmijët me paratë në moshë të re, rreth moshës 5 ose 6 vjeç, në mënyrë që t’i ndihmojnë ata të krijojnë zakone të mira dhe një marrëdhënie pozitive me to.

“Në kohën kur të jenë 11, 12, 13 vjeç dhe të futen në adoleshencë ata duhet të jenë mjaft të aftë për mënyrën se si funksionojnë paratë në shoqëri,” thotë ai për CNBC. “Paraja është një mjet dhe ta kesh atë për çfarëdo qëllimi është vërtet e rëndësishme.”

Nga kursimet te taksat, këtu janë tre njohuri që sipas tij të gjithë prindërit duhet t’ia mësojnë fëmijëvë të tyre kur ata janë të vegjël.

1. Mësojini atyre rëndësinë e kursimeve

Një nga gjërat e para që prindërit duhet t’u mësojnë fëmijëve është rëndësia e kursimit të parave, thotë Eyler. Këshilla e tij vjen nga përvoja: vetë prindërit e Eyler-it kishin rregulla se si ai lejohej të shpenzonte paratë që merrte kur ishte i vogël.

“Nëse do të merrja 100 dollarë, mund të shpenzoja një të tretën e tyre, më duhej të kurseja një të tretën e tyre dhe duhej të gjeja një të tretën e tyre për të bërë diçka produktive,” thotë ai. Opsionet e tij varionin nga dhurimi i parave deri te drejtimi i “një biznesi të vogël”. Rregullat i mësuan se nuk mund të shpenzonte gjithçka që kishte.

“Të kesh para mënjanë është absolutisht thelbësore,” thotë Eyler. “Ka gjithmonë rrethana të jetës ku keni nevojë për një rezervë parash.”

2. Ndihmojini të kuptojnë taksat

Fëmijët gjithashtu duhet të kenë një kuptim të përgjithshëm të taksave, thotë Eyler. Kjo varion nga të kuptuarit pse ato hiqen nga një rrogë deri tek pse i shtohen çmimit përfundimtar të diçkaje që blini në dyqan.

“Realiteti është se çdo person në shoqëri paguan taksa,” thotë ai.

Prindërit duhet gjithashtu të sigurohen që fëmijët e tyre të kuptojnë pse taksat zbriten për gjëra si Sigurimet Shoqërore dhe Shëndetësore. Të ndihmosh fëmijët të mësojnë për taksat kur janë të vegjël mund t’i ndihmojë ata të shmangin çdo surprizë të pakëndshme sapo të fillojnë të fitojnë paratë e tyre thotë Eyler.

3. Njiheni me deklaratën e kartës suaj të kreditit

Njohja e fëmijëve me dokumentet e zakonshme financiare në moshë të re mund t’i ndihmojë të kuptojnë konceptet e rëndësishme të parasë.

“Kjo mund të jetë aq e thjeshtë saç është një deklaratë e kartës së kreditit,” thotë Eyler. “Kur jam duke përdorur një kartë krediti, kjo nuk do të thotë se kam akses të pakufizuar në fonde.”

Eyler sugjeron t’i mësoni fëmijës tuaj çdo gjë rreth kartës së kreditit dhe t’i shpjegoni gjëra të tilla si kufiri i kreditit.

“Të kesh një limit kredie prej 10,000 dollarësh nuk do të thotë se kam 10,000 dollarë për të shpenzuar, sepse nuk mund t’i kthej ato para,” thotë ai.

Eyler shton se shfaqja e shpenzimeve të fëmijëve që lidhen me ta, si pagesa për kampin veror ose një lodër që e duan shumë mund t’i “tregojë atyre se si funksionon jeta”.

“Ndihmojini ata të kuptojnë se çdo gjë kërkon punë dhe para,” thotë Eyler. “Ky është arsim i mirë në çfarëdo niveli.”


Tirana Post

https://tiranapost.al/stil-jete/3-me...me-par-i510375

[sirena_adria]

Marrëdhënia midis prindërve tuaj mund të ndikojë në atë që ju do të krijoni në të ardhmen

Marrëdhëniet janë pjesa më e rëndësishme e jetës, por në të njëjtën kohë janë jashtëzakonisht të ndërlikuara. Ne nuk i zgjedhim të gjitha marrëdhëniet në jetën tonë, sepse me disa njerëz jemi të lidhur me gjak dhe me të tjerët thjesht krijojmë një lidhje. Marrëdhëniet tona ndikohen nga faktorë të shumtë si sjellja, kushtëzimi, humori, edukimi dhe tiparet e karakterit tonë.

Sidoqoftë, është interesante të theksohet se marrëdhëniet romantike që mund të kemi ndikohen nga marrëdhënia midis prindërve tanë. Kjo pasi marrëdhënia midis tyre është e para që dëshmojmë dhe nga e cila mësojmë. Bëhet model për të gjitha marrëdhëniet e tjera.

Modeli

Fëmijët rriten duke parë marrëdhënien e prindërve si gjëja e parë që mësojnë në jetë, si kur janë të pandërgjegjeshëm ashtu edhe kur fillojnë të kuptojnë. Në vitet e formimit, fëmija ka pak ose aspak ide të së drejtës dhe të gabuarës, veçanërisht kur bëhet fjalë për marrëdhëniet. Modelet dhe veprimet, sado toksike apo të shëndetshme qofshin që ata dëshmojnë në marrëdhënien e prindërve bëhen një pikë referimi për ta.

Angazhimi

Prindërit janë mikrokozmosi i fëmijës. Hapësira e sigurt që ata kërkojnë për t’u rikthyer herë pas here. Kur fëmijët shohin se zhvillohen konflikte dhe mosmarrëveshje, kjo u shqetëson ndjenjën e sigurisë. Ne bëhemi pjesë e mosmarrëveshjeve të tyre dhe të përpiqemi t’i zgjidhim ato. Ky angazhim është vetëm i natyrshëm dhe mund të ndryshojë nga fëmija në fëmijë, në varësi të lidhjes së fëmijës me familjen.

Dinamika e fuqisë

Përfshirja në konfliktet e prindërve shpesh çon në mbajtjen e anës së njërit prind për të cilin mund të keni një ndjenjë simpatie sepse besoni se ata janë në disavantazh. Kjo na bën të përthithim të gjitha cilësitë e prindit 'më të dobët' sepse duam t’i mbështesim ata dhe të refuzojmë totalisht tjetrin. Kjo rezulton në krijimin e një dinamike të fuqisë.

Imitimi i sjelljeve në marrëdhënien tonë

Ndërsa përvetësojmë të gjitha cilësitë e prindit që favorizojmë mund të fillojmë të shohim veten në vend të prindit të favorizuar, më të dobët në marrëdhënien tonë.

Pasojat

Mund të mos e kuptojmë që imitojmë këto sjellje në marrëdhënien tonë. Këto mund të çojnë në lindjen e konflikteve në marrëdhënie. Zgjidhja është të shikoni me kujdes marrëdhëniet e prindërve tuaj dhe të shqyrtoni se si ndiheni prej saj. Ekzaminimi i kujdesshëm do t'ju japë zgjidhje dhe do t'ju ndihmojë të kapërceni problemet e marrëdhënies suaj.


Tirana Post

https://tiranapost.al/stil-jete/marr...-te-kr-i510472

[sirena_adria]

Si të mësoni fëmijët të reagojnë kur ngacmohen vazhdimisht nga shokët

Çdo prind dëshiron të rrisë një fëmijë të sigurt, miqësor, i cili përshtatet mirë dhe nuk ngacmohet kurrë nga të tjerët. Sidoqoftë, kjo mund të jetë larg realitetit pasi disa fëmijë shpesh ngacmohen në shkollë nga të tjerë më të mëdhenj apo edhe bashkëmoshatarët, ndërsa të tjerët tallen nga fëmijët në lagjje.

Nëse dyshoni se kjo po ndodh edhe me fëmijën tuaj, këtu janë disa mënyra për të ndaluar në mënyrë aktive fëmijët që të ngacmojnë djalin ose vajzën tuaj.

Mësojeni si të përgjigjet

I vogli juaj ka të ngjarë të mos dijë t'u kthejë përgjigjet e duhura atyre që i ngacmojnë. Pra, ju duhet t'i ndihmoni ata të mësojnë t’i dalin për zot vetes. Këto mund të jenë fraza të thjeshta dhe të qarta, të tilla si "Më lër të qetë", "mjaft" apo edhe të thuash "nejse" dhe të largohesh. Sigurohuni që fjalët që u mësoni atyre të mos jenë të tilla që mund të përkeqësojnë situatën.

Inkurajoni komunikimin e qartë me ju

Është me rëndësi të madhe që fëmija juaj t'ju hapet për çdo gjë, edhe në raste të ngacmimit. Nëse qëndrojnë të heshtur mund të përvetësojnë ndjesinë e frikës, e cila mund të rezultojë në trauma afatgjatë.

Pyeteni fëmijën tuaj si i shkoi dita dhe mbani kontakte me prindërit e miqve të fëmijëve tuaj çdo javë që të dini si shkojnë gjërat. Ndonjëherë fëmijët e tjerë mund të tregojnë në shtëpi se shoku i tyre po ngacmohet, ndërsa fëmija juaj mund të qëndrojë i heshtur nga frika. Pra, duhet të inkurajoni komunikim midis jush.

Organizoni situata përmes lojërave me role për të parë reagimin e tyre

Me shumë mundësi edhe nëse mëson çfarë duhet të thotë në rast ngacmimi, fëmija mund të ketë frikë ta thotë kur gjendet në të tillë situatë. Luani me role, është një mënyrë argëtuese për të kuptuar më shumë dhe t’i mësoni fëmijës se si të përballet me dhunuesin. Kjo është një mënyrë e shkëlqyeshme për të siguruar që fëmija juaj të mos lëndohet nga situata.

Nëpërmjet këtyre mënyrave mund ta ndihmoni fëmijën tuaj të përballet me botën reale dhe të ndërtojë vetëvlerësimin e tij.


Tirana Post

https://tiranapost.al/stil-jete/si-t...a-shok-i511146