Presidenti Nishani, vizite zyrtare ne Kosove

[MaDaBeR]

Mungesa e PS në Kosovë/ Zbardhet sms e Nishanit për Gramoz Ruçin


TIRANË: Presidenti i Republikës, Bujar Nishani tentoi të shkrijë akujt me opozitën duke kërkuar që në vizitën e tij të parë shtetërore jashtë vendit të ketë përfaqësues edhe nga PS-ja, por selia rozë e la pa përgjigje. Në fakt, kreu i shtetit ndoqi një rrugë jo zyrtare, (jashtë asaj që parashikon protokolli) për ta bërë një gjë të tillë, duke iu drejtuar kryetarit të grupit parlamentar të PS-së, Gramoz Ruçi, me një mesazh, “sms” telefonike. Burime zyrtare nga Presidenca thanë dje për gazetën “Mapo” se Nishani i dërgoi një sms Ruçit në datën 12 gusht, ku i kërkonte këtij të fundit që në delegacionin zyrtar të merrte pjesë edhe një nga deputetët e qarkut të Kukësit, për shkak të afërsisë së kësaj zone me Kosovën. Në mungesë të marrjes së një përgjigjeje, Presidenca nuk përfshiu më pas në delegacionin zyrtar asnjë deputet të opozitës, ndërkohë që nga ana e PS-së vjen një tjetër reagim. I kontaktuar dje nga gazeta “Mapo”, kryetari i grupit parlamentar të PS-së, Gramoz Ruçi deklaroi shkurt se selia rozë nuk kishte marrë ftesë, një qëndrim ky që së paku zyrtarisht edhe mund të ketë vlerë sa kohë që nuk është ndjekur rruga protokollare, ajo e dërgimit të një ftese zyrtare në emër të Presidencës, selisë rozë e konkretisht, kryetarit të grupit parlamentar të PS-së. Megjithatë, nga ana e tij Ruçi nuk përmendi as mesazhin e dërguar në telefonin e tij celular plot dy javë më parë nga ana e kreu të shtetit.

Delegacioni

Dy ditë më parë, në njoftimin zyrtar të Presidencës thuhej se Presidenti i Republikës do të kryesonte një delegacion të gjerë zyrtar, në përbërje të të cilit do të ishin edhe ministri i Arsimit dhe Shkencës, Myqerem Tafaj, ministri i Brendshëm, Flamur Noka, zëvendësministrja e Punëve të Jashtme, Edith Harxhi, deputeti i Kuvendit të Shqipërisë, Fatos Hoxha dhe Presidenti i Unionit të Dhomave të Tregtisë, Ilir Zhilla. Në ditën e tij të parë të vizitës në Kosovë, Presidenti i Republikës u takua me Presidenten Atifete Jahjaga, me kryeministrin e Kosovës, Hashim Thaçi dhe kryetarin e Komunës së Prishtinës, Isa Mustafa. Sot, Presidenti i Republikës pritet të zhvilloje takime me zëvendëskryetarin e AAK-së, Blerim Shala, me drejtuesin e Lëvizjes Vetëvendosja, Albin Kurti dhe me autoritete të tjera vendore në Kosovë, si dhe me zëvendëskryeministrin, Sllobodan Petroviç.

MAPO

[EuroStar1]

Mire kan bere qe nuk kane vajtur keta te PS-se

Pse te shkojne ? Qe te jane prezent kur te bejne pazare mbi kufit e Kosoves dhe pastaj ta ken gojen e hapur te PD-se per tju thene qe ishit edhe ju kur firmosem dhe vulosem

[Albo]

Presidenti Nishani viziton Institucionin e Arsimit Universitar AAB në Kosovë

Prishtinë, Kosovë

Në kuadër të vizitës së tij zyrtare në Kosovë, Presidenti i Republikës, Bujar Nishani, i shoqëruar nga Ministri i Arsimit dhe i Shkencës, Myqerem Tafaj si dhe nga Ministri i Arsimit, Shkencës dhe Teknologjisë së Kosovës, Ramë Buja, zhvilloi një vizitë në Institucionin e Arsimit Universitar AAB, “Akademia e Arteve të Bukura”.

Presidentit të Republikës dhe delegacionit zyrtar shqiptar iu ofrua një mirëseardhje tepër e ngrohtë dhe e përzemërt nga drejtuesit e këtij institucioni arsimor, nga pedagogë e studentë të shumtë që kishin dalë për të pritur dhe përshëndetur Kryetarin e Shtetit Shqiptar.

Pas një prezantimi të përgjithshëm që Rektori i Institucionit të Arsimit Universitar AAB, Lulëzim Tafa i bëri strukturës, qëllimit të kurrikulës dhe punës së përkushtuar të pedagogëve të këtij institucioni, Presidenti i Republikës, Bujar Nishani mbajti një ligjëratë përpara përfaqësuesve të njohur të botës akademike në Kosovë, shoqërisë civile, si dhe stafit pedagogjik e studentëve të Institucionit të Arsimit Universitar AAB.

Më poshtë vijon e plotë ligjërata e Presidentit Nishani:

“Të nderuar zotërinj ministra,
I nderuar Zoti Rektor i Institucionit të Arsimit Universitar AAB
Të dashur studentë,

Ndjej një kënaqësi të veçantë që sot ndodhem mes jush! Nga pikëpamja emocionale, vetja më duket më i ri, sepse ju keni forcën të rrezatoni energjitë tuaja të pashtershme. Si President i Republikës së Shqipërisë, tek ju shoh të ardhmen e Kosovës dhe të shqiptarëve.

Ne jetojmë në epokën e teknologjisë së informacionit dhe arritjeve të mëdha shkencore në të gjitha fushat, ndërsa festojmë 100 vjetorin e krijimit të shtetit të parë Shqiptar.

Ne Shqiptarët kemi luftuar pa reshtur kundër pushtuesve shekullorë për gjuhën dhe arsimin kombëtar dhe e kemi fituar me sakrifica të mëdha. Nuk ka komb tjetër në botë, që të ketë në altarin e tij të historisë kaq shumë dëshmorë në mbrojtje të arsimit kombëtar sa shqiptarët. Dhe nuk ka komb binjak me shqiptarët, kur bëhet fjalë për sakrificat prindërore dedikuar arsimimit të fëmijëve. Me armë dhe penë rilindasit tanë bënë përpjekje titanike për ringjalljen kombëtare, e cila çoi në formimin e shtetit të parë shqiptar njëqind vite të shkuara.

Jetojmë në një kohë globale dhe është e domosdoshme që të kapim kohën globale të dijes. Për këtë arsye, ne duhet, që bazuar në arsimin e traditës të formojmë arsimin me standarde evropiane, madje globale, i cili do të na pajisë me dijet dhe njohuritë e nevojshme për të qenë kompetitivë në botën globale të dijes. Ju, të dashur studentë dhe të nderuar akademikë, që jeni në kontakt të përditshëm me botën e dijes dhe të shkencës, jeni më të vetëdijshëm se kushdo tjetër për sfidat që arsimi dhe shkenca shqiptare duhet të përballojnë në rritjen sasiore dhe cilësore për të përgatitur brezat e shkencëtarëve dhe mësuesve që do ta bëjnë Kosovën, Shqipërinë dhe mbarë shqiptarët konkurrues dhe anëtarë të familjes së kombeve të zhvilluara.

Nismat private, të ndërmarra me seriozitet dhe të bazuara në profesionalizëm, përbëjnë një instrument shumë të rëndësishëm që pasuron dhe rrit cilësinë e tregut të dijes. Institucioni juaj arsimor është një dëshmi e gjallë. Bashkëpunimi në nivel shtetëror dhe privat, në të gjitha fushat dhe sektorët përbën një kusht të nevojshëm për unifikimin e tregut mbarëshqiptar, si pjesë e qenësishme e integrimit ndërshqiptar në rajon, Bashkimin Evropian dhe botën globale. Më shumë se kufijtë gjeografikë, të cilët po humbasin kuptimin dhe efektin e tyre tradicional gjithnjë e më shumë, na duhet dhe po kapërcejmë me shpejtësi kufirin e krijuar gjatë një periudhe të gjatë izolimi dhe ndarje nga sistemi totalitar.

Ne kemi ndërtuar tashmë një infrastrukturë moderne komunikimi ndërshqiptare dhe një infrastrukturë ligjore, që mbështet bashkëpunimin ndërmjet dy vendeve tona me popullsi shqiptare. Kjo infrastrukturë lehtëson dhe nxit lëvizjen e lirë të njerëzve dhe mallrave, si edhe bëjnë të mundur bashkëpunimin intensiv në të gjitha fushat. Vepra, si “Rruga e Kombit” kanë unifikuar tregun nëpërmjet rritjes mbi njëmbëdhjetë herë të qarkullimit të njerëzve dhe mbi pesë herë të qarkullimit të mallrave. Ajo i ka dhënë gjithashtu një impakt zhvillimit ekonomik dhe ka shumëfishuar vlerën e pasurive të patundshme në të gjitha zonat ku kalon. Tashmë Kosova është shumë pranë detit.

Konsiderojmë se ka ende shumë vend për rritjen, zgjerimin dhe intensifikimin e shkëmbimeve ekonomiko-tregtare, investimeve në infrastrukturë, turizëm, krijimin e një tregu unik energjetik, unifikimin e teksteve shkollore, shfrytëzimin e ujërave, mbrojtjen e ambientit, etj. Shkëmbimi tregtar prej 140 milion euro në vit është ende i ulët, gjeografia e studimit të studentëve shqiptarë në shtete të tjera me shumicë apo prezencë të konsiderueshme shqiptare është ende e varfër, investimet nga Shqipëria në Kosovë dhe anasjelltas janë ende në nivele jo të larta.

Ne po përpiqemi të bëjmë më të mirën, por ju, me siguri, do të bëni më shumë dhe më mire se ne. Ne shqiptarët kemi humbur shumë kohë dhe po përpiqemi ta fitojmë atë, ndërsa brezi juaj do ta fitojë kohën e humbur me siguri. Forcimi i faktorit shqiptar nuk ka si qëllim të drejtohet kundër askujt dhe, si i tillë, ai (faktori shqiptar) nuk kërcënon askënd. Realiteti i tanishëm ka treguar qartë se një faktor shqiptar i fuqishëm përbën një garanci për paqen dhe sigurinë në rajon. Ne kemi provuar me fakte historikisht se dimë të jetojmë në harmoni dhe se dimë të bashkëpunojmë me fqinjët, madje se edhe mund të kapërcejmë mëritë dhe dhimbjet e shkaktuara nga padrejtësitë historike, prej provokimeve dhe agresioneve të fqinjëve tanë për hir të së ardhmes sonë të përbashkët. Kombi që lindi Nënë Terezën nuk mund të jetë ndryshe. Shqiptarët, të shpërndarë në disa shtete, do të jenë të bashkuar në Bashkimin Europian.

Ne jetojmë një rajon, i cili vjen nga një periudhë konfliktesh, baza e të cilave janë lufta për territore, mosbesimi reciprok dhe mëritë etnike. Por, pa harruar të shkuarën, duke falur, ne shohim drejt së ardhmes, duke pasur si objektiv të përbashkët anëtarësimin në NATO dhe integrimin evropian. Duke respektuar dhimbjet e së shkuarës, ne duhet të shohim drejt së ardhmes. Dhe rruga e vetme, pa alternativë janë bashkëpunimi edhe me fqinjët, me të cilët na ndan e shkuara por na bashkon e ardhmja. Ky bashkëpunim fillon me zgjidhjen e problemeve të trashëguara nga e shkuara, që mund të bëhet vetëm me dialog. Dialogu mbetet arma më e fuqishme për të luftuar për të ardhmen.

Kosova e pavarur është tashmë një realitet i pakthyeshëm i njohur nga 91 vende Ajo është shndërruar tashmë në një faktor paqeje dhe stabiliteti në Ballkan. Kosova ka vendosur marrëdhënie diplomatike me të gjitha vendet fqinje, përveç Serbisë dhe Bosnjë-Hercegovinës. Drejtuesit e shtetit të Kosovës priten zyrtarisht në kancelaritë më të rëndësishme të botës. Përfaqësuesit legjitimë të Republikës së Kosovës marrin pjesë në forume rajonale e më gjerë. Çështja e statusit të Kosovës dhe kufijve të saj është një çështje e mbyllur. Shqipëria mbështet plotësisht tërësinë territoriale të Kosovës në kufijtë e saj aktualë të njohur ndërkombëtarisht. Çdo tentativë për rihapjen e tyre nuk bën gjë tjetër, por kthen kohën mbrapa dhe cenon të ardhmen.

Vendimi i fundit të Grupit Drejtues Ndërkombëtar për Kosovën, që i dha fund pavarësisë së mbikëqyrur, hapi kapitullin e ri të funksionimit të Republikës së Kosovës si shtet plotësisht sovran e i pavarur. Ai përbën një licencim të institucioneve kosovare dhe shton njëkohësisht përgjegjësitë e institucioneve, shoqërisë civile, botës akademike dhe gjithë qytetarëve të saj. Bujaria e faktorit ndërkombëtar, me në krye SHBA dhe BE, nuk duhet shpërdoruar, por duhet përdorur me kujdes, sepse është një kapital me shumë vlerë që duhet investuar me kujdes.

Nuk duhen lënë jashtë vëmendjes edhe hapat e Kosovës në drejtim të BE si marrja e udhërrëfyesit për liberalizimin e vizave për qytetarët e Kosovës dhe fillimi së shpejti i studimit të fizibilitetit për MSA, duke e vlerësuar këtë si një etapë të re në marrëdhëniet e saj me Bashkimin Evropian. Kemi ofruar dhe do të vazhdojmë të ofrojmë përvojën tonë në proceset integruese. Por, mund të mësohet edhe duke parë me syrin kritik, në mënyrë që të bëhet më mirë ajo që ne kemi bërë. Shqipëria ka të gjithë gatishmërinë në ofrimin e ekspertizës konkrete në transferimin e njohurive dhe eksperiencës, lidhur me kuadrin ligjor në fuqi, procedurat dhe strukturat e ngritura, ofrimin e ekspertëve më të mirë shqiptarë për fushën apo në rritjen e intensitetit të aktiviteteve të përbashkëta në kuadër të procesit të integrimit evropian.

Por, sa me shumë bëjmë ne sot, aq më të ditur duhet të jenë njerëzit e së ardhmes. Kjo është arsyeja pse ne na duhet të investojmë më shumë për arsimin, të vazhdojmë me reformimin dhe modernizimin e tij, nëpërmjet reformave strukturore, kurikulare dhe dixhitalizimit të tij. Na duhet një kërkim shkencor inovativ, që promovon idetë, shton prodhimin, shtyn përpara proceset teknologjike, informatizon shërbimet dhe aktivitetet e institucioneve, pra që shërben në rritjen e standardit të jetesës, cilësisë së jetës dhe mirëqenies. Jo më kot, shkalla e zhvillimit shkencor është indikator i nivelit të zhvillimit të një vendi dhe anasjelltas, niveli i zhvillimit shkencor përcakton edhe nivelin e zhvillimit të një vendi.

Ne vijmë nga një sistem, ku të flisje për konceptin institucion i pavarur përbënte një shkelje ligjore, madje dënohej si veprimtari armiqësore. Pavarësia e institucioneve kyçe kushtetuese dhe ndarja e pushteteve përbëjnë bazën e funksionimit të shtetit ligjor dhe demokracisë. Jo rrallë e shkuara ngatërrohet me të sotmen në mënyrën e mendimit dhe veprimit. Kjo situatë bëhet edhe më komplekse po t`i shtojmë implikimin e interesave ditore, për përfitime ekonomike dhe pushtet politik. Ja, pse beteja për drejtësinë mbetet nga sfidat më të forta, por edhe ajo më vitale, që ne duhet dhe do ta fitojmë me çdo kusht.

Nëpunësi i shtetit në demokraci është shërbëtor i popullit. Shteti dhe institucionet e tij janë në shërbim të qytetarëve dhe, për pasojë, duhet të dëgjojnë zërin e përditshëm të qytetarëve. Në këtë kontekst, shoqëria civile është një promovuese e vlerave të demokracisë dhe një vëzhguese e kujdesshme e veprimtarisë së institucioneve dhe zyrtarëve që veprojnë brenda tyre. Forcimi i shoqërisë civile dhe zgjerimi i hapësirës në të cilën ajo vepron është, në një farë mënyre, matës i funksionimit të demokracisë dhe i pjekurisë së saj.

Institucionet e shoqërisë civile duhet të bëhen vetë gjithashtu, gjithmonë e më shumë të vetëdijshme për misionin e tyre të pazëvendësueshëm në një shoqëri demokratike. Sa më shumë të mbeten të pavarura, objektive dhe transparente, aq më efektive do të jenë në përcjelljen e mesazheve të tyre dhe në mbikëqyrjen e veprimtarisë së institucioneve.

Shqipëria ka formuluar vazhdimisht një politikë të jashtme, që është shquar dhe vlerësuar për qëndrimet e saj të balancuara, në shërbim të paqes dhe stabilitetit në rajon. Kjo nuk do të thotë se ka bërë lëshime. Ne kemi ndjekur me vëmendje zhvillimet në rajon dhe kemi treguar kujdes që shqiptarët kudo në Maqedoni, Luginën e Preshevës apo Mal të Zi të gëzojnë të drejtat e tyre njerëzore dhe kombëtare, të zgjerojnë hapësirën e tyre demokratike, të jetojnë në paqe e siguri. Ata duhet të ndjehen qytetarë të lirë të vendeve ku jetojnë. Ne nuk kemi hequr dorë nga këto qëndrime të cilat janë të bazuar në të drejtën ndërkombëtare dhe përbëjnë një nga kriteret e politikës së fqinjësisë së mirë.

Shqipëria luan një rol aktiv për të bërë të mundur përfaqësimin gjithmonë në rritje të Kosovës në forumet, nismat, qendrat e organizatat rajonale, ku po gjen një përkrahje në rritje nga vendet e rajonit. Lobimi për shtimin e njohjeve të Kosovës është një nga pjesët më aktive të agjendës së diplomacisë shqiptare në kuadrin dypalësh dhe veçanërisht në atë shumëpalësh. Kam deklaruar para Kuvendit të Republikës së Kosovës dhe po përsëris para jush angazhimin tim se Kosova do të jetë kryefjala e aktivitetit tim, në përpjekjet për lobim në shtimin e njohjeve ndërkombëtare, pjesëmarrjen në nismat dhe forumet rajonale, mbështetjen e saj në rrugën e integrimit euroatlantik.

Njëqind vjetori i Shtetit Shqiptar përbën një ngjarje të shënuar në jetën e kombit Shqiptar. Ne vijmë të gjithë së bashku me solemnitetin që meriton një eveniment si ky. Gëzimi dhe ngazëllimi legjitim që na jep një moment i tillë nuk na errëson arsyen dhe nuk na bën euforik sa të mos analizojmë atë çfarë kemi bërë mirë apo jo mirë, me vështrimin tek e ardhmja, e cila është e përbashkët për të gjithë shqiptarët, popujt e rajonit dhe më gjerë, anëtarësimi në familjen evropiane.

Burrat e mençur të këtij kombi, ditën ta drejtojnë timonin e anijes shqiptare drejt Perëndimit. Luhatjet e përkohshme, ndonëse me pasoja të rënda, nuk na shpërqendruan, por ne vazhduam ta mbajmë timonin në drejtimin e duhur, drejt Perëndimit.

Ju, studentë të dashur, do merrni në dorë Kosovën me orientim perëndimor dhe do ta bëni atë një Zonjë të nderuar. Kjo kërkon dashurinë për kombin, dashurinë për dijen, mendjen e shëndoshë, që ju po e ushqeni me dije nga profesorët tuaj të talentuar dhe të përkushtuar. Me ju e ardhmja e këtij vendi është e sigurt.

Rroftë Kombi Shqiptar!

Gëzuar 100 Vjetorin e Shtetit të Parë Shqiptar!

Ju faleminderit!”


Presidenca

[Antiproanti]

Presidenti shqiptar pritet nga krerët e lartë të shtetit kosovar.

...

...kreret e larte te pushtetit...

...kuisling.

[violativo]

...kreret e larte te pushtetit...

...kuisling.

E mer burre dhe ti .....! Po punen e serbit ka shkuar te beje ne Kosove , Nishanxhiu ! Per cfare tjeter e kane nisur ?

Cope postieri eshte , asgje me shume !

[Edvin83]

Si është bo kështu Shqipëria....serbë e greke në qeveri, e shqiptarë të shpërndarë nëpër botë e ca skllevër të mbetur në Shqipëri...

[_MALSORI_]

se diletante jeni mor aman..beni si te menqur..vaj medet..i qani hallin kaloresit ne ju varen kembet..

po te ishit me te menqur ju kishit zene vendin e sales e nishanit e nuk shkruanit ne forumin shqiptar ..shyqyr qe ju ka mbetur ky forum te shfryheni pak..edhe kete forum e keni teper por mire beni qe shfryni pasi ja shtoni te ardhurat albos dhe fiorit..hej medet ..

[Ziti]

po te ishte presidenti nga ps-ja udhetimin e pare jashte shtetit do ta bente tek papa - ndreu ne athine.

[violativo]

po te ishte presidenti nga ps-ja udhetimin e pare jashte shtetit do ta bente tek papa - ndreu ne athine.

Kete gje e thua sepse di ndonje gje te fshehte se greku dhe serbi e kane ndare Shqiperine ? Apo sepse keshtu e do ti qe te ndahet Shqiperia ?

Na e thuaj mos na ler keshtu ne medyshje !

[Antiproanti]

se diletante jeni mor aman..beni si te menqur..vaj medet..i qani hallin kaloresit ne ju varen kembet..

po te ishit me te menqur ju kishit zene vendin e sales e nishanit e nuk shkruanit ne forumin shqiptar ..shyqyr qe ju ka mbetur ky forum te shfryheni pak..edhe kete forum e keni teper por mire beni qe shfryni pasi ja shtoni te ardhurat albos dhe fiorit..hej medet ..

Absurd...

Sipas kesaj qe thua ti, secila kritike kunder Kryetarit ose secilit qe eshte ne pozite me te larte formale (gje qe per disa pozita eshte e pashmangshme dhe e vetekuptueshme) do te ishte jolegjitime. Njekohesisht Kryetari dhe secili udheheqes politik etj. do te ishin me te "menqur" se secili nga kritiket e tyre. Rrjedhimisht Kryetari dhe udheheqesit politik etj. do te ishin te pagabueshem ose te barabarte me zotin...