Besnik Mustafaj vajton pyjet..

[Brari]

Vajtim për pyjet që digjen










5

Opinione Mërkurë, Gusht 15th, 2012

BESNIK MUSTAFAJ

Prej katër ditësh po digjet pylli i Priskës. Ky pyll, shumëshekullor, nga më të pasurit e Shqipërisë për nga bimësia dhe zogjtë, – edhe shqiponja dhe ujqër kishte, – është vazhdim i faqes perëndimore të Dajtit dhe, nga Tirana, mbrëmjeve, kush ka sy në ballë, mund të shohë këto ditë me vështrim të lirë zjarret e lemerishme si përhapen. Ndërsa ne, që jetojmë në Priskë, dëgjojmë, sidomos natën, gjithë natën, një uturimë të mbytur, të thellë. Nuk duhet të jesh medoemos fëmijë për të besuar se është rënkimi i dëshpëruar i pyllit që jep shpirt përmes dhimbjesh të tmerrshme. Një pjesë e këtij pylli u shkrumbua para tre vjetësh. Por, edhe aq sa kishte mbetur e po shkrumbohet tani, ishte përsëri, pa dyshim, një nga pyjet më të bukur të vendit dhe, për Tiranën posaçërisht, ishte një mushkëri fort e çmuar dhe e pazëvendësueshme. Ai po digjet si mall pa zot. Mjerë ai për fatin që pati, të jetë pa zot! Kryeplaku i fshatit, i vetmi përfaqësues i shtetit, që mund të takojmë ne, banorët e Priskës, më thotë se ka lajmëruar edhe kryetarin e komunës, edhe Policinë. Ai ka në zë pikëllimin e njeriut të pafuqishëm. Lajmërimi i tij ka vlerë vetëm po të nisemi nga hamendja se shtetarët e tjerë, ata, të mëdhenjtë në Tiranë, nuk kanë sy në ballë. Ky lajmërim del, megjithatë, se ka qenë mundim i kotë. Shtetarët tanë nuk kanë as veshë për të dëgjuar. Djegia e këtij pylli e që fatkeqësisht nuk është e vetmja në hapësirën e vogël të Republikës tonë jetime, përbën një dëmtim kolosal të pasurisë publike të shqiptarëve, një dëmtim me pasoja të rënda për ne, të gjallët e sotëm dhe për fëmijët tanë, fëmijët e tyre dhe për nipërit e fëmijëve tanë. Ndoshta edhe një brez më tutje. Sepse një pyll si ky ripërtërihet me zor të madh e do kohë, më shumë se një shekull. Por në komunikatat e shumta që nxjerr përditë Ministria e Brendshme e ku pasqyrohet lulëzimi i kriminalitetit, nuk shoh të përmendet ky krim. Aq më pak mësojmë të jetë arrestuar ndonjë autor apo qoftë edhe të jetë çelur ndonjë hetim. Sepse, në më të shumtën e rasteve, këto zjarre lubi nuk janë fatkeqësi natyrore. Herë pa dashje, e më së shpeshti me dashje, ato i shkakton dora e njeriut. Shqiptari i zakonshëm nuk ka mësuar ende ta dojë e ta çmojë natyrën. Përditë e shohim mjaftueshëm sa budalla tregohet ky shqiptar vdekatar me pyllin, me tokën, me ujin, me ajrin. Kjo është një dramë e madhe e kombit dhe e shoqërisë sonë të sotme. Por edhe më e madhe bëhet kjo dramë kur një verbëri të tillë e kanë edhe shqiptarët e “jashtëzakonshëm”, të zgjedhurit dhe të paguarit nga ne për të na qeverisur, domethënë, për ta ndihmuar shqiptarin e zakonshëm t’ia nxijë sa më pak jetën vetes. Ndër këta shqiptarë të “jashtëzakonshëm”, mendja më shkon më së pari te Presidenti i ri i Republikës. Mendja ime, e nxehur veçanërisht nga zjarret në pyje, ma thotë se ai do i kishte bërë një shërbim shumë më të çmuar vendit sikur të mblidhte Këshillin e Sigurisë Kombëtare pikërisht për të diskutuar mbi masat e krejt institucioneve të shtetit për parandalimin dhe neutralizimin e zjarreve në pyje, në vend që ta shtrydhte trurin siç e shtrydhi për të ndryshuar drejtorin e SHISH. Nuk më duket aspak alarm i tepruar një mbledhje. E beson apo s’e beson ai vetë, është tashmë Kryetar i Shtetit. Dhe si Kryetar i Shtetit do të kishte kështu në tryezën e vet ovale edhe shqiptarin tjetër të “jashtëzakonshëm”, Kryeministrin Berisha, të cilit, pikërisht me të drejtën dhe detyrimin e Kryetarit të Shtetit, t’i kujtonte se qytetarët e këtij vendi nuk presin prej tij nga ato rekorde qesharake të qëndrimit në ujë, sepse republika jonë, të paktën sa të jetë gjallë Kryeministri e ne bashkë me të, nuk ka gjasa të kthehet në një republikë amfibësh. Banorët tokësorë të këtij vendi presin, veç të tjerash, që ai të shuajë zjarret në pyje. Po shkrumbohen mijëra hektarë pyje çdo ditë në jug e në veri. Mijëra të tjerë janë bërë hi e thëngjill tashmë. Pranë Kryeministrit, nën fushëpamje të plotë të Presidentit, do të ishte i ulur shqiptari tjetër i “jashtëzakonshëm”, ministri i Brendshëm Flamur Noka, i cili, për më tepër e ka kaluar fëmijërinë dhe adoleshencën herë pranë pyllit e herë në mes të pyllit. Pak më tutje, gjithnjë në fushëpamje të mirë të Presidentit, do të ishte një shqiptar tjetër “i jashtëzakonshëm”, i cili nuk e ka kaluar fëmijërinë e as adoleshencën pranë pyllit e as në mes të pyllit, – po të lëmë mënjanë Parkun që rrethon Kishën e Shën Prokopit. Dhe ky është ministri i Mbrojtjes, Arben Imami. Po t’i besojmë masterit që ka kryer në SHBA, Presidenti do të ishte në gjendje t’i shpjegonte ministrit tonë të Mbrojtjes – dhe le ta ngrinte zërin se nuk bëhej nami, – se një nga drejtimet më të rëndësishme të veprimtarisë së një ushtrie anëtare të NATO-s qëndron të aftësimi i saj për të ndërhyrë në raste emergjencash civile. I tillë është pa dyshim ky i zjarreve nëpër pyje. 2 për qind e buxhetit të shtetit shkon për këtë ushtri. Sa për krahasim, të gjitha harxhimet për kopshtet, shkollat e universitetet në Shqipërinë tonë, janë më pak se 3 për qind e këtij buxheti. Është krejt e kuptueshme, pra, pse në SHBA, në Spanjë, në Francë, në Kroaci e kudo ku ka zjarre kësaj vere, shohim ushtrinë të jetë në ballë të luftës me zjarrin. Ju betohem se këmbë ushtari shqiptar nuk është dukur andej nga po ndodh hataja e pyjeve tona. Ndërsa Presidenti i Republikës, Shkëlqesia e tij Bujar Nishani, siç mësuam nga mediat, ka shkuar të çlodhet rehat në Pogradec. Ajër i pastër, freski, bukuri e Zotit! Nuk kam dëgjuar të ketë rënë ndonjë zjarr në rrethinat e liqenit të magjishëm të Lasgushit. Shyqyr! Ama kështu ne humbim çdo shpresë ta dëgjojmë zërin e qytetarit të parë të vendit për sa na dhemb ne të tjerëve, qytetarëve të dorës së dytë të vendit të tij. Edi Rama, ky shqiptar tjetër po aq “i jashtëzakonshëm” sa ata që përmenda më lart, nuk do të ishte në mbledhjen e paqenë të Këshillit të Sigurisë Kombëtare. Nuk e ka parashikuar Kushtetuta. Por e dinë tashmë i madh e i vogël se ai të paktën shërbimin në Twitter e ka gjithmonë me vete. Mund të përcillte në hapësirë, e pastaj ta kapë kush ta kapë, një fjalë ankuese për pyjet që po shkrumbohen, për kafshët e egra dhe zogjtë që po përcëllohen si në ferr, për burimet që po thahen. Një fjalë e pastaj le të shtonte se “edhe zjarret në pyje fiken kur të shkulim qeverinë Berisha”. Gëk-mëk nuk ka bërë! As sa kryeplaku i fshatit tim nuk jeton me hallet e shqiptarëve ky që sheh ëndrra për t’u bërë Kryeministri ynë vitin e ardhshëm, ndërkohë që fshati digjet. I duken të vogla atij këto lloj hallesh, të parëndësishme, ndoshta edhe të përbuzshme si halle fshatarësh. Kondicioneri i zyrës së tij të madhe e filtron mirë ajrin dhe e ftoh mjaftueshëm, që të mos e ndotë hundën e tij të ndjeshme era e shkrumbit. Edhe ai lum si të tjerët për popullin e urtë që fati u dha të qeverisin!

Me shume nga kjo kategori:
■Lidhja e Prizrenit, udhë-çelësja drejt pavarësisë
■Greqia, “të dalë apo të mos dalë” nga euro
■Imuniteti dhe “sozia” e korrupsionit
■LAMTUMIRE ARBEN!
■Shqiptarët pa Arbën Xhaferin
■Përpara malit me emrin Arbën Xhaferi
■Dialogu politik, i pashmangshëm, sfidues
■Lypsaria, një kambanë alarmi për të gjithë…!
■Të ndalim dëbimin e letërsisë!
■Administrata publike dhe koha për një reformë






5



Te nderuar komentues! Duke mos dashur te cenojme opinionet tuaja, lutemi qe ato te mos permbajne fyerje dhe ofendime personale dhe te kene lidhje me shkrimin, apo temen per te cilen komentohet. Ne te kundert, nuk do te publikohen. Ju falenderojme qe na ndiqni dhe ju ftojme te vazhdoni te jeni pjese e Panorama Online. Moderatori

10 Komente per “Vajtim për pyjet që digjen”


Gezim Seferi
15 Gusht, 2012 - 15:03



Sote si cdo dite tjeter piva kafene ne lokalin afer shtepise.Mora Panoramen ,pashe si gjithnje faqen e pare .Thash ta filloj me shkrimin e Besnikut pasi nga Sauku ku banoj e shikoj zjarrin ne malin e Priskes.Mendoja qe Besniku ka vilen e tije diku afer do te jet shume i shqetesuar.ZHGENJIM TOTAL.,PRAP POLITIKE.Edhe me zjarrin politike.E kaperdiva edhe kete fakt por me irritoi me shume fjalori i perdorur nga nje “malesore i moderuar” si Z Besnik .Po te merremi pak me etimologjin e fjales shpejt e shpejt do te kujtojme se emri Besnik nuk eshte nje emer karakteristik i shqipetareve po ashtu edhe i malesoreve .Ai eshte nje emer i vone dhe ka te beje me kohen e komunizmit.Sapo e degjon te shkon ndermend besnikeria ndaj partise, ose shprehja “Besniku i Partise” Ne veri ekziston edhe nje shprehje “i ngjafsh emerit” dhe malesori i moderuar z.Besnik me duket se ia ka arritur….”Do të ishte i ulur shqiptari tjetër i “jashtëzakonshëm”, ministri i Brendshëm Flamur Noka, i cili, për më tepër e ka kaluar fëmijërinë dhe adoleshencën herë pranë pyllit e her në mes të pyllit” shkruan shkrimtari i madh.IRONI BAJATE.Ironi folklorike e nivelit te odave madje jo e te gjitha odave,madje madje jo e odave te burrave.E kam pare qe ne fushaten per kryetare bashkie qe Besnikut i vjen turp nga origjina e tije,kur mundohej te na mbushte mendjen se ishte bo Tirons se shume rralle kishte vizituar Tropojen.Turp,Turp Turp. Atdheu zoti Besnik fillon nga vendlindja kudo qe ta kesh ate, ne mes te pyllit apo kenetes dhe kete nuk duhet te jesh shume i ditur per ta kuptuar.

Përgjigjjuni


Pippo B
16 Gusht, 2012 - 09:35



kur gishti tregon henen budallai sheh gishtin!

Përgjigjjuni




Pamvarësia
15 Gusht, 2012 - 15:38



Z. Mustafaj! Personalisht, duke e ditur vend banimin Tuaj të ri, në epokën e re, e prisja prononcimin Tuaj në lidhje me katastrofën ekologjike që po ndodh në vendin tonë, veçanërisht nga zjarrvënia e qëllimshëme nëpër pyjet e vendit tonë e posaçërisht për zjarrin gjigand që ka përfshirë shpatin perëndimor të malit të Priskës- vazhdim i varg malit Krujë-Dajt. Prononcimi i Juaj nuk ishte thjeshtë një keq ardhje deri në ,,Vajtim për pyjet që po digjen”. Jo! Shkrimi thoshte shumë më tepër se aq! Si e lexova unë, Ju, me të drejtë, bëni një akuzë të fortë publike për shkaktarët e vërtetë të zjarr vënësve të Shqipërisë, të cilës po i digjen jo vetëm pyjet-mushkëritë e gjelbërta të saj, por po i digjet zemra dhe shpirti i saj. Po i digjet shpresa për një të ardhëme më të mirë dhe për brezat që do të vijnë. Dhe përgjegjësit-,,zjarr-vënës”(qofshin pushtetarë apo sehirxhij opozitarë), Ju nuk i anash kaloni por i akuzoni drejt përsë drejti për gjendjen e rëndë që përjeton vendi jo vetëm nga flakët që kanë pushtuar pyjet, por nga ethet e një sëmundje të rëndë (politike, ekonomike, sociale, psikologjike, shpirtërore) që po mundon prej kohësh Shqipërinë dhe qytetarët e saj. Kështu e prisja prononcimin Tuaj, z. Besnik! Ju shpreh respektin tim si qytetar dhe dashamirës deri në pasion i natyrës të gjallë. Por, a mjafton kaq për të ndryshuar rrjedhën e mbrapshtë të zhvillimeve në vendin tonë? Jo, absolutisht nuk mjafton. Jo vetëm pse Ju jeni mjaft i vonuar(në kohë dhe për detyrimet që keni si intelektual e politikan) por dhe për shenjat e një nënshtrimi të stërgjatur ndaj një realiteti të pa dëshirueshëm, po kaq i stërgjatur, që po rëndon jetën dhe të ardhëmen Shqipërisë e të qytetarëve të saj. Natyrisht, këtë qëndrim kritik, me atributet e qytetarit të thjeshtë e përjetësisht opozitar ndaj çdo qeverisje, nuk e kam vetëm në adresën Tuaj si individ por ndaj të gjithë atyre intelektualëve e politikanëve që kanë marrë detyrime për sipër në shërbim të vendit e qytetarëve.

Përgjigjjuni



Trishtim
15 Gusht, 2012 - 16:50



Ky shkrim eshte rrenqethes po aq sa jam rrenqethur gjithe keto dite e nete qe shoh zjarrin te perparoje e te shkrumboje hektare pafund dhe askush nuk ndjehet. E kam hapur lajmin sa jam mundur.Kam postuar fotografi e kam cuar mesazhe ne media. Jam perpjekur te kontaktoj edhe me Ministrine…por asgje. Nje gjendje qe te con ne ekstremet e urrejtjes, mallkimit dhe shkaterrimit te nervave. Nje gjendje qe te ben te mallkosh veten qe je shqiptar dhe une, si qytetare 25 vjec e kesaj Shqiperie mallkoj cdo dite e me shume keta qeveritare qe tundin zinxhirin me fatkeqesite tona dhe me vjen te grryej token me thonje e te iki te zhdukem nga ky vend.Me keto ndjenja i ushqen shqiperia jone te rinjte e ndjeshem dhe ata qe me naivitet e pozitivitet besojne se ka shpresa. Dhimbja qe i shkaktojne natyres eshte po aq e madhe sa dhimbja e mjerimit tone si popull. E me keqardhje pranoj se ky popull nuk ka fat tjeter vecse te jete i mjeruar shpirterisht dhe materialisht.

Përgjigjjuni



Kerr kiesh
15 Gusht, 2012 - 17:05



Duhet te ruhesh nga kjo lloje rrace qe mohon vendlindjen.

Përgjigjjuni



Mihal
15 Gusht, 2012 - 19:00



Gjithsesi o ” komentues” te tere po lexojme kete shkrim …te parin dhe ndofta te vetmin me vlere…
Kush nuk ka sy la te mos shoh ….por kjo faqe MALI e zhveshur … tani ka vlere per te shkruar parulla per jetegjetsine e Partise & udheheqesit !!!

…Por si Qytetar mund te themi se nuk do ulur niveli ..nga te gjithe perfshi edhe shkrimtarin

Përgjigjjuni



Shari
15 Gusht, 2012 - 20:02



Po te ishte tjeter njeri, do te lexoja me endje shkrimet ” e bukura” plot metafore.
Turp per ty. Besoj se ka forma te tjera per te dhene mend o Besniku i Partise.
Keshtu flasin “intelektuale” qe kercasin ne deren e demokracise pa e ditur se ku eshte dera. Ruajau mos te djege ai zjarri i Priskes….

Përgjigjjuni



Kastriot Cako
16 Gusht, 2012 - 19:22



Sot digjen pyjet ne cdo cep te Republikes,cdo dite kemi skandale si ai i Minist.se Mbrojtjes,papunesia rritet,kriza thellohet.Qeverria cfar pret zgjedhjet si ti manipuloje.

Përgjigjjuni



jakup
16 Gusht, 2012 - 23:39



po sot lexova ne zeri.info se mbreti Sali tha se sa shume turiste me shume kane hy ne Shqiperi ne krahasim me vitin qe shkoi.Por ky nuk sheh se Shqipria po digjet gjithandej e njerzit po vriten edhe athere kur polisia i mbron.O e mjera Shqiperi.

Përgjigjjuni



Deda
17 Gusht, 2012 - 12:27



Ka nje pyetje te thjeshte pas ketij merakut te Besnikut, kur degjon gjithmone, qe ne situata te acaruara politike ne Shqiperi, ne fushatat zgjedhore etj, “cuditerisht” shoqerohen me shtimin e krimeve, me djegje te qellimshme te pyjeve e me sabotim deri te linjave te tensionit te larte.
Si shkrimtar, se si politikan Besniku tashme eshte plotesisht nje figure e deshtuar, do ta pyesja :
Si e shpjegon ai kete “cudi” ?
Mbase ata qe vollen gjithe vrerin e tyre per rugen e kombit, nuk ju a mban qe ti vejne gjithe ruges dinamitin, por ama kane dhene prova qe ne 97-ten, qe per hir te revanshizmit te tyre politik, te djegin gjithe Shqiperine e jo vetem pyllin e Priskes.

Përgjigjjuni






Beni nje Koment

panorama