Berisha përuron terminalin e ri në Portin e Durrësit
DURRES- Kryeministri Berisha inauguroi dje terminalin e ri në Portin e Durrësit. “Ne inauguruam së bashku terminalin e ri të pasagjerëve, ndërtim me një vlerë prej 21 milion eurosh, i arkitekturës dhe teknologjisë së standardeve më të larta, ndërtim i cili përbën një portë moderne për këtë port mijëravjeçar”, u shpreh Berisha. Kryeministri theksoi më tej se qeveria e tij do vazhdojë të ketë në vëmendje investimet në qytetin bregdetar të Durrësit. Terminali është projektuar për t’i shërbyer 1.2 deri në 1.5 milionë pasagjerëve në vit, 200 mijë autoveturave dhe rreth 60 mijë kamionëve. Ai ka 65 mijë m2 sheshe, 25 mijë m2 ndërtime, 4500 m2 godina të pasagjerëve, 10 poste të kontrollit të njëkohshëm për pasagjerët këmbësorë, 36 poste për kontroll të njëhershëm për pasagjerët me autovetura, 12 poste për kontrolle të njëhershëm për kamionët. Pasi preu shiritin e inaugurimit së bashku me ministrin Olldashi, Kryeministri Berisha u drejtua për në mjediset e brendshme të terminalit, ku u takua dhe bisedoi me punonjës të Portit, si dhe u njoh nga afër me procedurat e punës në terminal. Në ceremoninë e inaugurimit ishin të pranishëm edhe drejtori i Autoritetit Portual Durrës, Eduard Ndreu, deputetë të qarkut, përfaqësues të pushtetit vendor, punonjës të kompanisë ndërtuese, punonjës të Portit të Durrësit, si dhe shumë qytetarë. Me këtë investim, ky terminal do të përmbushë nevojat në rritje të trafikut, tregtisë, ekonomisë shqiptare në zhvillim, si dhe qarkullimit të lirë të njerëzve.
Panorama
Përgjigju Duke Cituar
Postuar më parë nga Bamba
Krijoni Kontakt