Prokuroret e shkarkuar: Ina Rama paditet për shpërdorim detyre

[Albo]

Përmbarimi gjobit Ina Ramën, refuzoi Gjykatën

Tre prokurorë të shkarkuar fituan në të gjitha gjykatat të drejtën e rikthimit në punë.

Letra në Kuvend: Refuzon vendimin e Gjykatës së Lartë.

Prokurorja e Përgjithshme Ina Rama nuk zbaton vendimet e formës së prerë të Gjykatës për kthimin në punë të tre prokurorëve të shkarkuar prej saj në periudhën 2008-2009. Ankesa është paraqitur nga tre ish-prokurorë në Komisionin e Ligjeve. Ky fakt u bë i ditur gjatë mbledhjes së djeshme, ku kryetari i Komisionit, Ilir Rusmali, e pyeti Ina Ramën përse nuk i kthen në punë prokurorët e shkarkuar që kanë fituar të drejtën e tyre në Gjykatë. Sipas letrës që tre prokurorët kanë dërguar në Komision, për njërin prej rasteve, kryeprokurorja Ina Rama është gjobitur sipas ligjit nga përmbarimi privat në masën 50 mijë lekë. Akuza ka qenë për moszbatim të vendimit të dhënë nga Gjykata për kthimin në punë të një prokurori të shkarkuar. Tre prokurorët, të cilët kanë fituar në Gjykatë të drejtën e kthimit në punë, i kanë dërguar letër së fundi Kuvendit të Shqipërisë, pas një serie letrash e njoftimesh të dërguara për çështjen e tyre te Presidenti i Republikës, te ambasadori i SHBA, ai i dhe BE-së në Tiranë dhe gjithë instancave që mund të ndikonin në vënien në zbatim të vendimeve të dhëna nga gjykatat.

Letra e plote e tre prokuroreve, drejtuar Kuvendit per Ina Ramen
Në periudhën 2008-2009, me propozim të prokurores së Përgjithshme dhe dekret të Presidentit të Republikës, për arsye krejt personale dhe në kundërshtim të hapur me ligjin, janë shkarkuar nga detyra tre prokurorë: Rita Gjati, Bardhyl Shehu dhe Tom Dedaj.
Kundër shkarkimit është bërë ankim në Gjykatë, duke paditur prokuroren e Përgjithshme dhe Presidentin e Republikës.
Gjykatat shqiptare, në të gjitha shkallët e tyre – Gjykata e Apelit Tiranë, Gjykata e Lartë dhe Gjykata Kushtetuese, e kanë konsideruar shkarkimin e prokurorëve të kundërligjshëm dhe kanë vendosur: “Shfuqizimin e dekreteve të Presidentit për shkarkim nga detyra dhe kthimin e tyre në detyrën e prokurorit në prokuroritë përkatëse”.
Pas fitimit të kësaj të drejte, i jemi drejtuar disa herë Presidentit të Republikës dhe prokurorit të Përgjithshëm, për kthimin e tyre në detyrë, por megjithëse kanë kaluar mbi dy vjet nga dhënia e këtyre vendimeve, Presidenti i Republikës dhe prokurorja e Përgjithshme refuzojnë pa të drejtë zbatimin e vendimeve të Gjykatës, madje, nga ana e tyre, nuk ka pasur asnjë reagim.
Nga interesimi i bërë në rrugë shoqërore, Ina Rama është shprehur se “nuk dua t’ia di për vendimet e Gjykatës” dhe “sa të jem unë, nuk kam për t’i marrë në punë”, a thua se Prokuroria është çiflig i Ina Ramës dhe vendimet e Gjykatës janë letra që mund të hidhen në kosh.
Ndërsa Presidenti i Republikës nuk ka kthyer asnjë përgjigje, ndonëse tre prokurorët i kanë dërguar atij, respektivisht, 7, 5 dhe 4 kërkesë-ankesa.
Dy nga prokurorët e shkarkuar, Rita Gjati dhe Bardhyl Shehu, i janë drejtuar edhe Zyrës së Përmbarimit Gjyqësor (shtetëror), por edhe kjo zyrë nuk mundet të zbatojë t’i gjitha procedurat ligjore përmbarimore, në interes të ekzekutimit të vendimit të Gjykatës, për shkak të frikës që kanë, të cilën na e kanë shprehur, pasi palë e paditur është prokurorja e Përgjithshme dhe Presidenti i Republikës. Megjithëse Avokati i Popullit me shkresën e tij nr. K2/B13-6, datë 10.10.2011, ka sugjeruar Zyrën e Përmbarimit “vendosjen e sanksionit të gjobitjes ndaj prokurores së Përgjithshme”, për moszbatim të vendimit të Gjykatës, kryetari i zyrës, Arjan Bylykbashi, përsëri nuk kryen asnjë veprim.
Ndërsa prokurori Tom Dedaj, i është drejtuar përmbarimit privat, ku, përmbaruesja e çështjes ka gjobitur prokuroren e Përgjithshme Ina Rama për moszbatim të vendimit të Gjykatës, por përsëri nuk ka pasur asnjë reagim.
Problemin e moszbatimit të vendimeve të Gjykatës, tre prokurorët ia kanë bërë prezent edhe kryetares së Parlamentit, ambasadorit amerikan, z. Arvizu, ambasadorit të BE-së dhe ambasadores angleze, por, për çudi, asnjë prej tyre nuk ka reaguar.
Prokurorja e Përgjithshme, vetëm dy vjet pas marrjes së formës së prerë të vendimit të Gjykatës, ka pasur vetëm një reagim, duke gënjyer ditën për diell se është në pamundësi të ekzekutimit të vendimit të Gjykatës, për kthimin e prokurorëve në detyrë, për shkak se organika është e plotësuar.
Këtë gënjeshtër, prokurorja e Përgjithshme, nëpërmjet përfaqësuesit të saj, e thotë “serbes- serbes” edhe para 8 gjyqtarëve të Gjykatës Kushtetuese, gjatë shqyrtimit gjyqësor të çështjes për një proces të parregullt ligjor, pikërisht për mosekzekutim të këtyre vendimeve nga Ina Rama.
Prokurorja e Përgjithshme pretendon se është në pamundësi të ekzekutimit të vendimeve, ndërkohë që nga momenti i dhënies së vendimeve të formës së prerë të Gjykatës për kthimin e prokurorëve në detyrë, prokurorja e Përgjithshme ka propozuar dhe Presidenti i Republikës ka emëruar në vazhdimësi dhe aktualisht, në total, janë emëruar plot 22 prokurorë, 11 nga të cilët oficerë të Policisë Gjyqësore, si më poshtë:
Me dekretin nr. 6655, datë 28.7.2010, është emëruar prokuror, oficeri i Policisë Gjyqësore Artan Shtrungza.
Me dekretin nr. 6765, datë 10.11.2010, është emëruar prokuror, oficeri i Policisë Gjyqësore Adriano Dyrmishi.
Me dekretin nr. 6749, datë 2.11.2011, janë emëruar prokurorë në prokurori të ndryshme të vendit: Elona Alvora, Ervin Beqiri, Sotir Kllapi, Kreshnik Ajazi, Rovena Bozo, Denisa Asko, Marsida Frashëri, Gentian Habazaj, Olger Eminaj dhe Albert Murcaj.
Me dekretin nr. 7504, datë 4.6.2012, janë emëruar prokurorë, oficerët e Policisë Gjyqësore: Erion Imeraj, Erion Shehaj, Aurel Zarka, Edina Kurti, Simon Pashuku, Leonard Filopati, Lorenc Merkuri, Pali Decolli, Elion Mustafaj, si dhe drejtoresha e kabinetit të prokurores së Përgjithshme, Miranda Bushi.
Shikoni deri ku shkon arbitrariteti dhe injorimi i vendimeve të Gjykatës nga Presidenti i Republikës dhe prokurorja e Përgjithshme.
Ndërkohë prokurorët vazhdojnë të enden rrugëve duke trokitur në dyert e institucioneve të ndryshme të këtij shteti, për të kërkuar të drejtën tonë, a thua se vendimet e Gjykatës janë “letra bakalli” e jo vendime të organeve të pushtetit gjyqësor, madje të organeve më të larta të këtij pushteti dhe të Gjykatës Kushtetuese.
Dhe kur këto vendime nuk zbatohen nga përfaqësuesit më të lartë të shtetit dhe të Drejtësisë, ky është një problem shumë i madh jo vetëm për tre prokurorë, por edhe për mbarë shoqërinë shqiptare dhe shtetin ligjor.
Dhe në këtë kontekst, kemi të drejtë të themi:
- A ka moral Prokuroria të kërkojë ndjekje penale për subjekte të tjera që nuk ekzekutojnë vendimet e Gjykatës, gjë e cila është detyrë funksionale e saj, në një kohë që vetë ky organ nuk ekzekuton vendimet e Gjykatës duke kryer vetë vepër penale?! (Neni 320 i Kodit Penal “Pengime për ekzekutimin e vendimeve të Gjykatës”)
- Përse Presidenti i Republikës punon me dy standarde?!
Ashtu si prokurorët, janë shkarkuar edhe disa gjyqtarë të gjykatave të Shkallës së Parë dhe të Apelit, siç janë: Arjana Caco, Besnik Qira, Dalip Bushi etj., por këta gjyqtarë, pasi kanë fituar të drejtën për kthim në punë nga Gjykata e Lartë, menjëherë pas fitimit të kësaj të drejte janë kthyer në punë, ndërsa prokurorët jo!?
- A nuk janë të njëjtat ligje dhe rregulla që zbatohen në këtë shtet, apo për prokuroren e Përgjithshme dhe Presidentin e Republikës këto ligje dhe rregulla zbatohen sipas rastit, dëshirës apo sipas mikut?!
- Mirë ata që i gjejnë mik Presidentit të Republikës dhe prokurores së Përgjithshme dhe kthehen në punë, po të tjerët, siç jam edhe unë, që nuk e kanë këtë mundësi, ç’duhet të bëjnë?!
Dhe në përfundim, kemi të drejtë të pyesim: A ka më shpresë në këtë vend se një ditë drejtësia do të bëhet?! Dhe kur kjo nuk bëhet nga përfaqësuesit më të lartë të shtetit dhe të Drejtësisë, ne, ashtu si dhe shumica e popullit, kemi fare pak shpresë.
Sa keq!

Panorama

[Albo]

Ina Rama: Gjyqtarët sillen si korporatë, mbrojnë njëri-tjetrin

Prokurorja e Përgjithshme në Parlament

“Të hiqet imuniteti për zyrtarët, aktet korruptive kërkojnë hetim të fshehtë”
Prokurorja e Përgjithshme, Ina Rama, akuzon gjyqtarët për bashkëpunim me proku-rorët, kur në bankën e të akuzuarve vendoset një nga zyrtarët e sistemit gjyqësor.
Duke folur në Komisionin e Ligjeve për raportin e vitit të kaluar, ajo e quajti “korporatizëm të gjyqtarëve” atë që ka ndodhur në disa raste. “Disa procese janë në zhvillim ndaj disa gjyqtarëve të akuzuar nga Prokuroria. Duhet të jenë tre. Një prokuror mori pafajësinë nga Gjykata e Apelit pasi ne e akuzuam për korrupsion. Ishte një vendim për të cilin na erdhi keq, sepse ishte një pamje evidente, ishte një aferë korruptive dhe unë nuk e di se çfarë provash Prokuroria duhet të çojë në Gjykatë për të provuar akuzën për korrupsion”, u shpreh Ina Rama. Sipas saj, “ndjehet një lloj korporatizmi mes gjyqtarëve për të mbrojtur njëri-tjetrin dhe për të mbrojtur prokurorët. Çështja nuk shikohet si një akuzë ndaj një gjyqtari apo prokurori, por shikohet si një çështje personale që është një akuzë ndaj një kolegu, ndaj një miku. Jemi në ambientin shqiptar dhe e dimë që gjyqtarët e njohin njëri-tjetrin, njohin prokurorët. Duhet të kemi një qasje të përbashkët për këtë gjë”.

Imuniteti
Një tjetër çështje e ngritur nga kryeprokurorja në mbledhjen e djeshme është heqja e imunitetit për zyrtarët e lartë. Ajo e vuri theksin te domosdoshmëria e kryerjes së hetimeve pa pasur më parë dijeni këta zyrtarë, gjë që me ligjin aktual nuk parandalohet dot. “Ne ndiejmë problematike hetimin proaktiv të rasteve korruptive që kërkojnë një hetim të fshehtë ndaj zyrtarit pa dijeninë e tij, ndërkohë që imuniteti minimalisht garanton dijeninë e zyrtarit në momentin që ai ndiqet penalisht”, tha Ina Rama.

Zgjedhjet
Deputeti socialist, Bashkim Fino, e pyeti prokuroren e Përgjithshme lidhur me procedimet e vitit të kaluar sa u takon komisionerëve të zgjedhjeve. “Zonja proku-rore, në vitin 2011 ju keni regjistruar 25 procedime penale, nga të cilat 14 të pandehur. Nga këta po vihet re që asnjë prej tyre nuk po dënohet. Dua të di reagimin tuaj dhe të institucionit që ju drejtoni për mosdënimin e asnjë të pandehuri që ka cenuar zgjedhjet e lira dhe që deformon zgjedhjet. Kjo është shumë e rëndësishme për mua, ashtu edhe për publikun”, tha Fino. Në përgjigje të kësaj pyetjeje, prokurorja deklaroi: “Ne kemi ngritur akuza dhe mendojmë që akuzat tona duhet të qëndrojnë. Para pak kohësh, Gjykata e Lezhës dhe ajo e Fierit dhanë nga një vendim. Pjesa e procesit gjyqësor dhe vendimmarrja e Gjykatës është një gjë që duhet ta presim ende, për sa kohë nuk kemi një statistikë”.

Ministria e Drejtësisë
Në të njëjtën kohë ajo kritikoi edhe raportin e Ministrisë së Drejtësisë, të depozituar pak kohë më parë në Kuvend, lidhur me inspektimin në organin e akuzës. Sipas Ina Ramës: “Sa i përket raportit të Ministrisë së Drejtësisë, ka reaguar Këshilli i Prokurorisë. Në shumë raste kemi gjetur kontrollin e ushtruar nga Ministria jashtë tagrave dhe kompetencave që ligji i jep, sepse ka marrë përsipër të vlerësojë bazueshmërinë në ligj të vendimeve të prokurorit, që nuk është kompetencë e kësaj ministrie, por është kompetencë e kontrollit gjyqësor dhe prokurorit më të lartë. Ministria jashtë kompetence ka marrë përsipër të bëjë vlerësimin profesional, etik e moral të prokurorëve”.

Ndërhyrjet e Rusmalit
Kryetari i Komisionit të Ligjeve, Ilir Rusmali, ka bërë kujdes gjatë gjithë mbledhjes së djeshme, e cila zgjati rreth 180 minuta, për të mos lejuar deputetët e të dyja kaheve që të bëjnë pyetje për çështje të caktuara. Fillimisht ai e ndaloi deputetin Fatos Hoxha ta pyeste kryeprokuroren lidhur me “zengjinët e rinj”, siç i quajti ai, që Ina Rama mbështeste, dhe më pas deputetët e PS-së për çështjen Bulqizës apo akuzat fyese të maxhorancës në drejtim të saj.

Ina Rama: Na ka ndihmuar media dhe SHISH
“Më 2011 u hetuan 618 persona, 488 prej tyre u çuan në Gjykatë”

Gjatë vitit 2011 janë marrë nën hetim 618 persona për vepra të ndryshime penale, nga të cilët 488 janë dërguar për gjykim në Gjykatë dhe pjesa tjetër janë lënë të lirë. Në raportin e përvitshëm të dërguar nga kryeprokurorja Ina Rama në Kuvend, thuhet se “gjatë vitit 2011 rezulton se janë regjistruar kryesisht 80 procedime penale nga 42 procedime të regjistruara në vitin 2010. Rezulton një rritje dy herë e numrit të procedimeve të regjistruara nga prokurorët dhe burim i informacionit kanë qenë kryesisht shtypi dhe SHISH. Gjatë vitit 2011 kanë qenë nën hetim 618 persona, për 564 janë përfunduar hetimet dhe për të pandehurit që janë përfunduar hetimet është vendosur që 488 t’i dërgohen gjykimit dhe për 79 të pushojë hetimi”. Sipas raportit, “brenda 2011-s janë përfunduar 637 procedime penale, duke pushuar 351 dhe dërguar për gjykim 286 procedime penale me 488 të pandehur. Rezulton se janë dërguar për gjykim 48% e procedimeve penale të përfunduara, shifër më e lartë se e 2010-s, kur u dërguan 42%. Gjatë dinamikës së kontrollit të hetimeve janë konstatuar zvarritje të hetimeve dhe veprime që janë kryer në shkelje të Kodit të Procedurës Penale. Për këto shkelje janë filluar 18 procedime disiplinore për 16 oficerë të Policisë Gjyqësore. Në përfundim të procesit janë vendosur 5 ‘vërejtje me paralajmërim’, 9 ‘vërejtje’, 2 ‘pezullim nga detyra’ dhe 2 ‘ulje në detyrë’”, thuhet në raportin vjetor të Prokurorisë së Përgjithshme

Raporti 2011
80 procedime penale janë regjistruar kryesisht në vitin 2011.
42 procedime ishin regjistruar në vitin 2010.
618 persona ishin në hetim gjatë vitit të kaluar.
488 persona nën hetim u dërguan në Gjykatë.
79 persona nën hetim u lanë të lirë.
637 procedime penale u regjistruar në vitin 2011.
351 procedime u pushuan gjatë atij viti.
286 procedime u dërguan në Gjykatë.
18 procedime penale u regjistruan për oficerë të
Policisë Gjyqësore.

ADI SHKEMBI

Panorama

[Albo]

Debati i plotë PD-PS për Ina Ramën, Hoxha: Ajo është rrugaçe

Deputeti i PD e akuzon për mospërfillje të Kuvendit, e mbrojnë deputetet femra të PS.

Majko: Tërhiqni akuzat. Hoxha: Ajo është rrugaçe.

Rezoluta e punës njëvjeçare të Proku-rorisë dhe përfshirja në të e ngjarjeve të 21 janarit ka shkaktuar akuza dhe fyerje mes deputetëve të maxhorancës dhe opozitës. Në mbledhjen e djeshme të Komisionit të Ligjeve, ish-kryeministri Pandeli Majko kërkoi që shumica të konfirmojë deklaratat e bëra nga Ina Rama për pjesëmarrje në puçin e shtetit, ose t’i tërheqë ato përfundimisht. “Në vitin 2011 Parlamenti ka pasur një marrëdhënie shumë të sikletshme me Prokurorinë e Përgjithshme dhe mendoj se kjo nuk duhet shmangur, se bëhet fjalë për një rezolutë që ka të bëjë me punën e Prokurorisë më 2011-shin. U ngrit një Komision hetimor, ku është kërkuar të flasë edhe prokurorja. Ne s’mund të bëjmë sikur më 2011-shin s’ka ndodhur asgjë në marrëdhëniet mes Ekzekutivit, Parlamentit dhe prokurores së Përgjithshme. Kryeministri ka thënë para Komisionit hetimor që prokurorja e Përgjithshme është bashkëpunëtore e grushtit të shtetit”, tha Majko në nisje të shqyrtimit të projekt-rezolutës. Por, i menjëhershëm ishte reagimi i maxhorancës, ku deputeti Fatos Hoxha kujtoi faktin se kryeprokurorja ishte e vetmja në atë periudhë që braktisi mbledhjen e Komisionit hetimor Parlamentar. “Komisioni hetimor i ngritur nga Parlamenti do të hetojë veprimtarinë e institucioneve dhe nuk ka ngritur akuza. Ju s’keni të drejtë të shtrembëroni atë realitet që është shprehur në media. Po, mor po, por edhe prokurorja e Përgjithshme t’i thotë Parlamentit që nuk pjerdh për ju, vetëm këtu ndodh. Merru me këtë, jo me atë. Për këtë duhet të na vijë ne turp”, u përgjigj deputeti demokrat. “Ajo i thotë Parlamentit të Shqipërisë që unë nuk pyes për ju. Hajde ta vëmë këtë, dhe jo llafet e rrugëve. Vetëm një rrugaçe e bën këtë, s’e bën njeri tjetër. Absolutisht vetëm një rrugaçe e bën”, theksoi më tej Hoxha. Fjalori i përdorur prej tij nxiti reagimin e deputetëve socialistë, të cilët kërkuan nga kryetari i Komisionit të ndërhynte për t’i ndërprerë fjalën Hoxhës. Deputetet socialiste, Ligori, Felaj e Hysi kanë mbrojtur kryeprokuroren, madje në shenjë proteste kanë braktisur mbledhjen e Komisionit.

Mbledhja
“Nuk ka njeri që e pengon trajtimin e rezolutës dhe dërgimin e saj në seancë plenare. Çështja specifike që trajton Majko nuk mund të jetë as e shtruar në formën siç e shtron Majko objekt i rezolutës, për shkak se për ngjarjen kriminale në periudhën që i referohet dhe për veprimin ose mosveprimin e institucioneve, ka një komision të posaçëm parlamentar që po merret dhe s’na takon neve që të japim konkluzione”, tha Rusmali në përgjigje të deklaratave të deputetit të PS-së, Pandeli Majko.

Debati në Komisionin e Ligjeve
Pandeli Majko: Në vitin 2011 Parlamenti ka pasur një marrëdhënie shumë të sikletshme me Prokurorinë e Përgjithshme dhe mendoj se kjo nuk duhet shmangur, se bëhet fjalë për një rezolutë që ka të bëjë me punën e Prokurorisë më 2011-n. U ngrit një komision hetimor, ku është kërkuar të flasë edhe prokurorja. Akuza që i është bërë asaj nga Kryeministri dhe maxhoranca ka qenë se ajo ishte pjesë e një grushti shteti. Ne s’mund të kalojmë një rezolutë kështu, nuk mund të bëjmë sikur s’ka ndodhur asgjë.
Fatos Hoxha: Bëj propozim ti.
Pandeli Majko: Nuk po flas këtu për Presidentin, shefin e SHIK-ut apo dhe opozitën. Maxhoranca nuk duhet të mbyllë sytë, por të marrë një qëndrim të sajin për veprimtarinë e Prokurorisë. Ose ajo ka qenë pjesëmarrëse në grusht shteti, ose nuk ka qenë. Me këtë që keni sjellë këtu del që nuk ka qenë pjesëmarrëse në grusht shteti.
Ilir Bano: A ka pasur grusht shteti?
Bashkim Fino: Atë e keni thënë ju.
Edi Paloka: Grusht ka qenë, thotë Pandi, por a ka qenë prokurorja, apo jo?
Fatos Hoxha: Komisioni hetimor i ngritur nga Parlamenti do të hetojë veprimtarinë e institucioneve, dhe nuk ka ngritur akuza. Ju s’keni të drejtë të shtrembëroni atë realitet që është shprehur në media.
Pandeli Majko: Ne s’mund të bëjmë sikur më 2011-shin s’ka ndodhur asgjë në marrëdhëniet mes Ekzekutivit, Parlamentit dhe prokurores së Përgjithshme. Kryeministri ka thënë para Komisionit hetimor që prokurorja e Përgjithshme është bashkëpunëtore e grushtit të shtetit.
Fatos Hoxha: Po, mor po, por edhe prokurorja e Përgjithshme t’i thotë Parlamentit që nuk pjerdh për ju, vetëm këtu ndodh. Merru me këtë, jo me atë. Për këtë duhet të na vijë ne turp.
Bashkim Fino: Kapeni kristalin e radhës së Fatosit.
Fatos Hoxha: Ajo thotë që unë nuk pyes për ju, Parlamentit të Shqipërisë. Hajde ta vëmë këtë, dhe jo llafet e rrugëve. Vetëm një rrugaçe e bën këtë, s’e bën njeri tjetër. Absolutisht vetëm një rrugaçe e bën.
Ermonela Felaj: Çfarë flet ti, more.
Shega Ligori: Zoti kryetar, do të ndërhyni ju?
Pandeli Majko: Si i thua rrugaçe?
Fatos Hoxha: Jo, nuk i thashë asaj, por nëse e ka bërë, është rrugaçe.
Pandeli Majko: Po rri, more Fatos tani, ç’a është kjo histori?
Fatos Hoxha: Ta them përsëri, atë që ka bërë ajo para këtij Parlamenti asnjë rrugaç nuk e bën.
Pandeli Majko: Është turp kjo.
Vasilika Hysi: Ju burrat mos flisni sot.
Fatos Hoxha: Keni frikë të flisni ju, dhe ky nuk është faji ynë. Do mbrosh prokuroren, Shega? Pse ke frikë?
Shega Ligori: Ma jep fjalën, ta tregoj unë.
Ilir Rusmali: Nuk ka njeri që e pengon trajtimin e rezolutës dhe dërgimin e saj në seancë plenare. Çështja specifike që trajton Majko nuk mund të jetë as e shtruar në formën siç e shtron Majko objekt i rezolutës, për shkak se për ngjarjen kriminale në periudhën që i referohet dhe për veprimin ose mosveprimin e institucioneve, ka një komision të posaçëm parlamentar që po merret dhe s’na takon neve që të japim konkluzione.
Bashkim Fino: Hajde ta bëjmë rezolutën me një draft nga të dyja palët. Në këtë sens dua të ndihmoj që të ul edhe gjakftohtësinë e Fatosit sot, që nuk e di çfarë ka.
Fatos Hoxha: Rrofsh, rrofsh!
Shega Ligori: Kjo mbledhje doli nga binarët nga ana etike. Unë e di qasjen e kësaj maxhorance ndaj institucioneve të pavarura. Ajo që më shqetësoi më shumë nga të gjitha është që nuk mundet këtu një deputet t’i drejtohet me atë lloj gjuhe dy herë…
Fatos Hoxha: Tri herë, tri herë.
Shega Ligori: Unë vërejtjen e kam për drejtimin e Komisionit. Ju si kryetar Komisioni duhet t’i thoni mbyll gojën, ose dil nga komisioni direkt, sepse nuk mund të përdorësh këto fjalë as në prani të kamerave, as për femra, po deshe ti.
Fatos Hoxha: Sa të paska vrarë, moj Shegë!
Shega Ligori: Natyrisht që më ka vrarë shumë, vëlla, dhe mbylle gojën se nuk ta ka dhënë fjalën kryetari.
Fatos Hoxha: Ti sikur do bëhesh prokurore!
Ilir Rusmali: Të vërtetat gjithmonë janë subjektive.
Shega Ligori: Po gjuha, kjo është gjuha? Distancohuni të paktën.
Fatos Hoxha: Ore, po pse e keni xhan ju prokuroren, unë duhet të bëj autokritikë? Nuk jam pishman unë fare.
Bashkim Fino: Fol si të duash, ore, kush ta preu ty të drejtën?
Ilir Rusmali: Në qoftë se sot kemi shqyrtimin e një draft-rezolute për veprimtarinë e një institucioni, ne me përgjegjësi të madhe, me dhimbje dhe dhembshuri duhet t’i dedikohemi institucionit, jo pallavrave të njërit apo tjetrit. Historia nisi me pallavra. Na flitet këtu për epitete fyese, por harrohet nga e kanë origjinën këto epitete, si erdhën në tavolinë, se nuk i nxori kolegu i maxhorancës, por na i solli deputeti i opozitës. A na dhimbset fakti që lufta kundër kriminalitetit vuan në Shqipëri? A na dhimbset fakti që kriminelët janë më të fortë se shteti dhe gjejnë strehë te ortakëria me Prokurorinë? Pse nuk kërkojmë ne që të futet mospajtimi i Kuvendit…
Gent Strazimiri: Në marrëveshje të plotë me Gjykatën.
Ilir Rusmali: Me faktin që në mënyrë masive dhe të gjitha çështjet me impakt publik Prokuroria ka dështuar në veprimtarinë e saj.
Shega Ligori: Të gjithë ministrat jashtë i ke, ke të drejtë.
Ermonela Felaj: Bëje rezolutën kështu siç e thua.
Fatos Hoxha: Lexoje, lexoje, se ashtu është.
Ilir Rusmali: Ermonela, të lutem, më lër ta mbaroj.
Ermonela Felaj: Jo nuk të lë të mbarosh.
Ilir Rusmali: Ore, e dëgjoni ju, Ermonela nuk më lë as të flas. Ore, ndihmë, kush do ta mbajë Ermonelën? Ju të medias, më jepni një ndihmë.
Fatos Hoxha: Pse ju dhemb aq shumë prokurorja ju?
Ermonela Felaj: Na e shpjego njëherë me çfarë fjalori do të vazhdojë kjo mbledhje, me fjalorin e rrugës, apo të qytetarisë? Na e sqaro këtë dhe të vazhdojmë.
Gent Strazimiri: Të qytetarisë nuk e thua dot ti, kështu që je rehat.
Fatos Hoxha: Pse, si ishte gjuha ime?
Shega Ligori: E shëmtuar ishte.
Ilir Rusmali: O kolegë, mos u provokoni se edhe fëmija e kupton që është provokim.
Vasilika Hysi: Paulina, po je femër moj, nuk mund të rrish kështu. Bëhet fjalë për integritetin e një gruaje.
Paulina Hoti: Ti zonjë, pedagoge, politikane që flet çfarë të thotë shefi, ky është turp.
Ilir Rusmali: Unë u përpoqa të thërras Felajn si deputete, më doli papritur zonja Felaj prokurore. E kuptoni sa e rëndë që është? Mos bëni kompromis me krimin dhe institucionet e korruptuara, se nuk është ky funksioni juaj.
Bashkim Fino: Ti po fyen.
Deputetët Fino, Felaj dhe Ligori largohen nga Komisioni.

Panorama

[Albo]

Rezoluta, PD zbut tonet e akuzave ndaj prokurores

Në projektin e maxhorancës nuk përmendet 21 janari. PS voton kundër
“Procedura transparente në emërime, luftë korrupsionit”

Komisioni i Ligjeve miraton vetëm me votat e maxhorancës projektrezolutën për punën e Prokurorisë gjatë vitit të kaluar. Opozita, e cila ishte e pranishme në mbledhje, kundërshtoi disa nga paragrafët e draftit dhe në fund, një pjesë e saj u largua, ndërsa deri në fund qëndruan Pandeli Majko dhe Armando Subashi, të cilët votuan kundër. Drafti i miratuar është më i ‘zbutur’ se akuzat e bëra nga eksponentët e shumicës gjatë vitit të kaluar, nisur edhe nga fakti se Ina Rama është në muajt e fundit të mandatit të saj. Në rezolutë, ashtu si edhe në raportin e Prokurorisë nuk ka përcaktime për ngjarjet e 21 janarit. Më herët ishin larguar nga mbledhja në shenjë proteste ndaj replikave në Komision, deputetët Bashkim Fino, Ermonela Felaj, Vasilika Hysi dhe Shega Ligori. “Më tërhoqi vëmendjen një intervistë dje. T’ia kërkojmë Parlamentit, pasi 5 vjet e ke zhytur në këtë derexhe? Parlamenti detyrën e vet di ta bëjë, kontrolli administrativ si funksionon, klientelizmi si është, emërimet nepotike dhe rrethi miqësor si janë? Kush i bën ato? I bëjmë ne si Komision Ligjesh, i bën Parlamenti? Ky duhet të ishte shqetësimi ynë sot”, u shpreh kreu i Komisionit, Ilir Rusmali, duke iu referuar intervistës së Presidentit Bamir Topi. Nga ana tjetër, deputeti i PS-së, Pandeli Majko, deklaroi votën kundër duke thënë: “Shpresoj që të jeni të vetëdijshëm për këtë marrëdhënie shumë të veçantë që keni filluar të merrni me institucionet. Shteti po shkon drejt një shteti njëpartiak”. Në rezolutën e miratuar dje për detyrat që i lihen Prokurorisë për këtë vit thuhet se ‘Kuvendi kërkon nga Prokuroria të zhvillohen procedura transparente dhe larg konfliktit të interesit për emërimin, transferimin dhe karrierën e prokurorëve në sistemin e Prokurorisë’”.

Rezoluta
“Kuvendi i kërkon Prokurorisë të intensifikojë luftën ndaj korrupsionit në administratën qendrore dhe në atë vendore ndaj zyrtarëve dhe ndaj ish-zyrtarëve, duke kërkuar hetime proaktive, të shpejta dhe efikase, si dhe duke mbajtur regjistrim të njëjtë të rasteve që nga referimi i tyre deri në ekzekutimin e vendimeve. Në mënyrë të veçantë, lufta ndaj korrupsionit në sistemin e drejtësisë të jetë një përparësi themelore e Prokurorisë”, thuhet në rezolutë.

Panorama

[mesuesi_1]

Përmbarimi gjobit Ina Ramën, refuzoi Gjykatën


Megjithëse Avokati i Popullit me shkresën e tij nr. K2/B13-6, datë 10.10.2011, ka sugjeruar Zyrën e Përmbarimit “vendosjen e sanksionit të gjobitjes ndaj prokurores së Përgjithshme”, për moszbatim të vendimit të Gjykatës, kryetari i zyrës, Arjan Bylykbashi, përsëri nuk kryen asnjë veprim.
.........

Panorama

po kete personazhin nuk e kane vene per te kryer puno ore jooooo .... e kane vene per te bllokuar Permbarimin ..... eshte ne te njejtin nivel te prokurorise qe nuk vepron sikur te bien edhe gure nga qielli ..... ka vite te tera qe me mban te bllokuar nje vendim .....

a din njeri, me qe ra fjala, te na thote ndonje gje per biografine e tij ....??

.

[Qyfyre]

Shtet rremuje. Thote gjykata kthe tjetrin ne pune se kthen njeri. Thote gjykata arresto filanin, s'te le shteti ta arrestosh.

[^SHIU^]

po kete personazhin nuk e kane vene per te kryer puno ore jooooo .... e kane vene per te bllokuar Permbarimin ..... eshte ne te njejtin nivel te prokurorise qe nuk vepron sikur te bien edhe gure nga qielli ..... ka vite te tera qe me mban te bllokuar nje vendim .....

a din njeri, me qe ra fjala, te na thote ndonje gje per biografine e tij ....??

.

Sa dallohen komunistet; mendjen te biografia e kane.

[mesuesi_1]

@ SHIU


ne fakt ne kete periudhe edhe nexhmija hoxha eshte duke perdorur mashat e saj per te bere komunista ata qe persekutuan per 50 vjet ..... mos je gje pjese e grupit qe i rrine rreth asaj ne kete strategji .....??!!


te kthehemi tek tema: a din njeri ndonje gje intersante per jeten e ketij Bylykut te Bashit ....???????


.

[Mike Oldfield]

Me sa di une ky Bylykbashi eshte andej nga Dumreja e Elbasanit, te cilin Fahri Balliu e ka bere drejtor permbarimi ne Tirane. Njeri i kapur nga koka ne kembe, i korruptuar sa nuk behet e natyrisht i pa afte me patente.
Vetem ligji i heqjes se imuniteteve do tja ngopi te gjithe ketyre.

[benseven11]

Nuk thuhet perse jane pushuar tre prokuroret.
Arsyeja e vertete cila eshte?
Ato thone qe Ina Rama i ka pushar per motive personale.