Tiranë, NOA.al/Ariola Ymeraj - Duhet të ishte një ndër aksesorët më të pëlqyer për femrat, kryesisht për gratë por tashmë është kthyer në tmerr mbajtja e saj. Bëhet fjalë për varëset e floririt të cilët po aq sa femrat i dëshirojnë edhe hajdutët.
Gjatë stinës së verës varëset e floririt janë të ekspozuara në qafën e femrave duke lehtësuar kështu punën e hajdutëve. Këta të fundit nuk druhen se do të kryejnë vjedhje në mes të ditës dhe në mes të rrugës, mjaftojnë që të shohin varësen e floririt dhe fusin duart në qafën e femrës për ta këputur atë.
Burime nga policia thanë për agjencinë e lajmeve ‘NOA” se vetëm gjatë muajit Maj dhe afro tre javëve të para të muajit Qershor janë regjistruar të paktën 50 grabitje të varëseve të floririt në rrugë ose një për çdo ditë.
Djem të rinj nga Tirana apo edhe nga rrethet “gjuajnë” femrat të cilët mbajnë varëse floriri dhe më pas i grabisin.
“Varëset e floririt janë një rrugë e shpejtë që hajdutët të përfitojnë shuma parash. Ata e shesin varësen pak minuta pas vjedhjes, në dyqanet të cilët blejnë flori të përdorur me një kosto më të ulët se tregu real. Ky itinerar e bën të vështirë identifikimin dhe kapjen e tyre duke i hapur rrugë autorëve të kryejnë vjedhje me dhunë në seri” thanë për NOA-n, burimet policore të kryeqytetit. Ata shtuan se tashmë vjedhjet e varëseve të floririt janë kthyer në një fenomen shqetësues në Tiranë.
Sipas policisë pavarësisht se janë arrestuar disa persona për këto ngjarje, vazhdojnë të regjistrohen denoncime.
“Nuk do të mbaj më kurrë varëse floriri. U tmerrova kur një djalë rreth të njëzetave me vendosi duart në fyt, nuk po e kuptoja çfarë po ndodhte. Në fillim mendova se do të më mbyste, por brenda pak sekondash ai u largua me shpejtësi bashkë me varësen e floririt që mbaja në qafë”, - tregoi për NOA-n, 44-vjeçarja B. Stafa e cila ra pre e hajdutëve vetëm pak ditë më parë..
Më tej vazhdon rrëfimin: ‘Mendova se do të më ndalonte zemra, britmat e mia për ndihmë ishin të kota. I kërkova ndihmë një djali që ndodhej vetëm pak metra larg meje por ai jo vetëm që nuk u afrua të më ndihmonte për më kërkoi të mos thërrisja për ndihmë, pashë që ai u largua bashkë me hajdutin”.
Stafa u shpreh se denoncoi ngjarjen në polici por nuk ka shpresa për të rimarrë varësen e floririt e për më tepër, ndjehet e terrorizuar dhe kur del në rrugë, shikon sa andej-këndej në çdo çast, duke iu druajtur përsëritjes së një grabitjeje.
“Nga eksperienca ime do t’i këshilloja femrat që të mos mbajnë varëse floriri nëse lëvizin në këmbë. Është e rrezikshme”, u shpreh 44-vjeçarja duke folur me noa.al.
E.Y., 45 vjeçe, jeton tek rruga “Mihal Grameno” në Tiranë. Ajo tregon: “Ishte ora 12 e drekës. Bleva disa zarzavate te tregu afër shkolës së Baletit dhe u mata të ikja në shtëpi. Teksa ecja, me njërën dorë çantën dhe tjetrën qeset me gjërat që bleva, një motor erdhi me shpejtësi. Në motor ishin dy çuna. Njëri prej tyre vërtikthi kapi çantën dhe mas këputi nga krahu. Kurse tjetri doli nga motori ku rrinte pas dhe më shqeu varësen e floririt, dhuratë nga im shoq”.
Dëshmia e 45-vjeçares, vazhdon: “Doja të bëja denoncim në polici. por vetëm dy ditë para, një shoqes sime, po këtu, tek rruga që shkon për “Ali Dem”, i vodhën varësen dhe kur shkoi në polici s’i dhanë asnjë shpresë’.
Gruaja 35 vjeçare ka dhe një tjetër shqetësim: “Mirë unë që ja ia hodha pa u vrarë po të tjera kanë vdekur siç kam dëgjuar. Kam frikë se mos e pëson dhe ime bijë që kur del vë ndonjë nga bizhutë që ka vlerë...”, - përfundon plot shqetësim rrëfimin e saj gruaja 45 vjeçare. a.y/e.t/noa.al
Përgjigju Duke Cituar
Krijoni Kontakt