Arrestime per trafik armesh nga Kosova

[benseven11]

Finalizohet me sukses operacioni policor i koduar “Nata”, në kuadër të së cilit u bë e mundur goditja e një rasti të trafikut të armëve, si dhe arrestimi i shtetasit Pjetër Mark Vokrri, 52 vjeç, banues në Rrëshen.
Ky shtetas është kapur në flagrancë rreth orës 15.30’ në Pikën e Kalimit Kufitar Morinë Kukës, teksa po tentonte të trafikonte nga Kosova në drejtim të Shqipërisë 9 armë zjarri, pistoleta, nga të cilat 4 Beretta dhe 5 Miniblow, si dhe një sasi municioni për këto pistoleta.
Policia e Shtetit bëri të ditur se finalizimi me sukses i këtij operacioni u bë i mundur pas një hetimi intensiv të kryer nga Drejtoria Kundër Narkotikëve dhe Trafiqeve në Departamentin kundër Krimit të Organizuar dhe Krimeve të Rënda në Policinë e Shtetit, në bashkëpunim me Drejtoritë e Policisë së Qarqeve Kukës dhe Lezhë, si dhe Prokurorinë për Krime të Rënda.
Ky operacion është në vijim të operacionit policor të koduar “Mbikalimi” të zhvilluar me datë 13.04.2012, në kuadër të të cilit u arrestua shtetasi kosovar Nexhmedin Aliu, në tentativë për të trafikuar nga Shqipëria në Kosovë një sasi prej rreth 3.800 fishekësh.
Nga strukturat e Policisë së Shtetit u krye sekuestrimi me cilësinë e provës materiale i 9 armëve të zjarrit pistoleta. Po ashtu gjatë kontrollit të ushtruar në banesën e shtetasit Pjetër Vokrri u gjet dhe sekuestrua dhe një armë zjarri automatik tip kallashnikov me rreth 2.000 fishekë.
Aktualisht nga grupi hetimor vazhdojnë hetimet për identifikimin e personave të tjerë të përfshirë në këtë trafik, ndërkohë që materialet procedurale në ngarkim të shtetasit Pjetër Vokrri i kanë kaluar për ndjekje të mëtejshme Prokurorisë për Krime të Rënda për veprën penale “Trafikim i armëve dhe municioneve” parashikuar nga neni 278/a i Kodit Penal

24-ore.com