Ismet Rraci simbol urtësie e guximi

[PLAKU]

smet Rraci simbol urtësie e guximi
Florim Zeqa


Në 11 vjetorin e vrasjes së Ismet Rracit, kryetarit të Klinës dhe degës së LDK-së

Njëri ndër personazhet që la gjurmë të pa shlyera në historinë më të re të Kosovës është edhe Ismet Rraci, tribun e lider i shqiptarëve të komunës së Klinës, protagonistin e të gjitha ngjarjeve të rëndësishme kombëtare të viteve të '90-ta jo vetëm në komunën e Klinës, por edhe më gjerë.
Ishte ndër nismëtarët e parë të këshillit iniciativë për themelimin e Lidhjes Demokratike të Kosovës, dega në Klinë, ku vetëm pas një muaji nga themelimi i LDK-së Qendrore në Prishtinë, më 23 janar të vitit 1990 formohet dega e LDK-së për Klinë, me mbajtjen e Kuvendit të parë zgjedhor në Shtëpinë e Kuvendeve në fshatin Bokshiq, vend ky i cili për vite më radhë ishte bërë çerdhe e bastion i fortë i LDK-së për këtë komunë.
Në këtë Kuvend të parë të LDK-së, më votat e delegatëve nga të gjitha aktivet zgjidhet kryesia e parë e LDK-së prej 11 anëtarëve, kryetar u zgjodh Anton Kolaj, ndërsa për Sekretar të parë të saj u zgjodh Ismet Rraci, i cili pas shkuarjes së z. Kolaj në Prishtinë, në cilësinë e nënkryetarit të parë të Kryesisë qendrore të LDK-së, kryesia e degës së saj në Klinë për kryetar e emëron Ismet Rracin.

Detyra e parë e kryetarit Ismet ishte që të riorganizonte ristrukturimin e degës së LDK-së, si dhe në vënien në binarë të shëndoshë të punës së Forumit Rinor dhe Forumit të Gruas së LDK-së, pas transformimeve nga LDRK e LDGK, fillimisht më mbajtjen e Kuvendit të Forumit Rinor të LDK-së në fshatin Bokshiq më 20 shtator 1991, dhe me vone atë të Forumit të gruas po në të njëjtin vend.
Veprimtaria e Ismet Rracit është e gjerë dhe e gjithanshme. Përveç aktivitetit politik në Lidhjen Demokratike të Kosovës, kontribut të madh kishte dhënë në arsimin shqip në mësimdhënie e më vonë edhe si Drejtor në shkollën fillore në qytetin e Klinës, shkollë kjo që sot më krenari bartë emrin e tij.
Ishte pjesëmarrës aktiv në aksionin e madh të pajtimit të gjaqeve në Komunë e më gjerë, po ashtu merrej edhe me krijimtari letrare, me shkrime të botuara në gazetat e kohës.
Por, ajo që e bënë më të dashur e të pa harruar për qytetarët e Klinës, është aktiviteti i tij politik në cilësinë e kryetarit të degës së LDK-së në Klinë. Përveç se një lider politik, më urtësinë e tij, sinqeritetin e afërsinë më të gjithë bashkëkombësit e vet, ishte shndërruar në një lider shpirtëror të Klinasve.
Ismet Rraci ishte një njeri i urtë e paqësore, fjalë pak e punë shumë, mbi të gjitha ishte trim dhe i vendosur në rrugën që kishte nisur. Për këto veti të jashtëzakonshme që kishte, ishte bërë halë në sy të armikut (policisë serbe), të cilët e kishin arrestuar me dhjetëra here në biseda "informative", ku përmes torturave psikike e fizike ishin munduar të zmbrapsin por pa sukses. Ismeti disa here ju kishte thënë sy pushtuesve serb se: "ajo për çka në po angazhohemi është shteti i Kosovës, dhe nga ky qëllim nuk do të ndalemi asnjëherë". Kryetari Ismet ishte një bashkëpunëtor i mirë, i afërt në biseda dhe shumë praktik, i aftë në zgjidhjen e problemeve dhe zbatimin e marrëveshjeve.
Rugova e ka çelësin e zgjedhjes së problemit të Kosovës! Kudo që shkonte, reflektonte shpresë e optimizëm. Pas sulmit të policisë serbe në fshatin Bokshiq të Klinës më 23 shkurt të vitit 1993, ku nga torturat fizike të plagosur rëndë kishin mbetur dhjetra burra të këtij fshati, ku njëri nga këta (Ali Zeqa) vdes nga plagët e marra. Kryetari Ismet mënjëhere të nesërmen kishte ardhur në fshat më një pjesë të kryesisë së degës së LDK-së, për t'ju dhënë forcë e kurajo për shërim sa më të shpejtë të të plagosurve nga torturat serbe, për t'ju ngritur lart moralin me fjalët; "liria është shumë afër, së shpejti do të jemi të lirë".
Ja vlen të përmendni edhe një detaj nga aktivitetet e përbashkëta që kam pasur me kryetarin Ismet; gjendeshim në një mbledhje të aktivit të LDK-së në fshatin Gremnik, pak ditë pas kthimit të Presidentit historik Ibrahim Rugova nga SHBA-të, kur njëri nga aktivistët e këtij fshati e pyeti kryetarin Ismet: çka na solli Ibra nga Amerika? Përgjigja e kryetarit Ismet ishte kjo: me një gjest simbolik e futi dorën në xhepin e djathtë të setrës e tha: "Rugova e ka çelësin e zgjidhjes së problemit të Kosovës". Kjo ishte metoda e tij e punës, për heqjen e dilemave e shqetësimeve, për krijimin e bindjes së fortë tek anëtarësia e gjerë e LDK-së, së janë SHBA-të, ato që do t'na ndihmojnë në çlirimin nga Serbia.
Vërtet fjala e tij ishte me peshë e me vlerë, ishte inspirim për të gjitha gjeneratat, ishte tolerant e unifikues, i arsyeshëm e burrëror.
Kryetari Ismet, qytetarët e vet nuk i harroj as në ditët më të vështira, gjatë periudhës së luftës, duke shkuar këmbë nga fshati në fshat, shpeshherë duke e rrezikuar jetën e tij, për t'i vizituar bashkëkombësit e vet, për t'ju dhënë shpresë e kurajo për qëndresë, duke ju thënë çdo here siç e kishte zakon të thoshte: "Okupatori i ka ditët e numëruara"
Kjo kishte bërë që në zgjedhjet e para të lira të pasluftës, në vitin 2000, Ismet Rraci të zgjidhet kryetar i komunës së Klinës me votat absolute të qytetarëve, gjë e cila nuk ndodhi më vonë me pasardhësit e tij për këtë post në komunë.
Mirëpo, një popullaritet kaq i madh i tij, vendosmëria, guximi, qëndresa, ishin bërë pengesë e madhe e caqeve kriminale, e shpirtëligëve, fatzinjve të kombit shqiptar, të cilët në mëngjesin e 24 prillit të vitit 2001, liderit e tribunit të madh shqiptar ia ndalën rrugëtimin me një atentat në shkallët e banesës së tij në Klinë, me të shtëna qyqare pas shpine, e qëllojnë duke e lënë për vdekje shpirtin e demokracisë, kryetarin Ismet Rraci, duke e vrarë kështu lirinë e demokracinë në qytetin e Klinës.



Ne foto autori i tekstit prane bustit te Ismet Rracit para objektit te meparshem te kuvendit komunal te Klines.