Fushë-Krujë policia arreston disa orë pas krimit 27-vjeçarin Erion Dashi
Vali Qyrfyçi
Një 27-vjeçar ka qëlluar për vdekje një të ri, nga një fshat i Fushë-Krujës, pasi ky i fundit i kishte ngacmuar bashkëshorten. Ngjarja e rëndë, sipas burimeve policore, ka ndodhur rreth orës 14:30 të ditës së premte, në afërsi të një lokali, në qendër të qytetit. Plumbat e dala nga një pistoletë i kanë marrë jetën Fitim Nikollës. Vrasësi më pas është larguar me shpejtësi nga vendi i ngjarjes, duke marrë me vete dhe armën e krimit që ka tronditur banorët e qytetit të vogël, për t‘u vënë në pranga në orët e vona të mbrëmjes. Sipas burimeve zyrtare të policisë, dy të rinjtë kanë shkëmbyer fjalë, pasi ai e akuzonte 24-vjeçarin se i kishte ngacmuar të shoqen.
Forca të shumta policie kanë mbërritur në vendngjarje dhe më pas janë vënë në kërkim të autorit, i cili është identifikuar brenda një harku të shkurtër kohor. Burimet bënë të ditur se autori i dyshuar i vrasjes është Erion Dashi, 27 vjeç, banor i lagjes së njohur me emrin "Hasani", në qytetin e Fushë-Krujës.
Nga hetimet e para ka rezultuar se ka qenë një grindje e rastit mes Fitim Nikollës dhe Erion Dashit, që i ka paraprirë krimit të rëndë kundër personit.
Kanë qenë dëshmitarë okularë, që kanë pohuar për një grindje mes protagonistëve të kësaj ngjarjeje të rëndë. Gjithsesi, grupi hetimor i çështjes ka nisur hetimet për të zbardhur ndonjë tjetër motiv të mundshëm të fshehur pas grindjes së çastit. Në vendin e ngjarjes janë bllokuar me cilësinë e provës materiale gëzhoja të plumbave të dalë nga gryka e pistoletës së përdorur nga Dashi, po nuk është gjetur arma e tij. Gjithçka ka ndodhur pranë një lokali të njohur në Fushë-Krujë, pranë bar "Deutchland".
24-vjeçari është shembur në tokë i mbytur në një pellg gjaku, ndërsa Erion Dashi është larguar me një fuoristradë me ngjyrë të errët. Kaq të dhëna ka arritur të marrë policia pas mbërritjes në vendin e ngjarjes, ndërsa mjetet e saj janë vënë në ndjekje të automjetit fuoristradë, me të cilin u largua autori. Ndërkohë i plagosuri për vdekje është marrë menjëherë për t‘u dërguar drejt Spitalit Ushtarak të Tiranës, por ka qenë e kotë. Nikolla ka gjetur vdekjen vetëm pak minuta më pas, pa arritur të mbërrijë në spital.
Identifikimi i autorit ka bërë që kontrolli për gjetjen të nisë nga banesa e tij, po ky kontroll nuk ka rezultuar pozitiv. Shërbimet e policisë kanë njoftuar të gjitha postblloqet e policisë dhe të rretheve fqinjë për karakteristikat e fuoristradës, me të cilën u largua nga vendngjarja autori. Ndërkohë ka nisur dhe krehja e zonës përreth, si dhe kontrollet në banesat ku mund të strehohej i dyshuari për vrasjen e 24- vjeçarit Fitim Nikolla. Pas një pune që zgjati disa orë policia ka arritur të vërë në pranga 27-vjeçarin Dashi, i cili akuzohet për veprën penale të vrasjes me paramendim.
shqip.org
Përgjigju Duke Cituar
Postuar më parë nga FJORIN
Krijoni Kontakt