Dy Mondët e mi. Prill 2012.

[mondishall]

Te dashur miqte e mi, Agim dhe Helikron, ju falenderoj per kohen kushtuar krijimtarise sime dhe fjaleve kaq dashamirese dhe inkurajuese per mua. Ju pershendes...



Kliku

Dhe jeta qenka një klik
Një klik në çastin e ngjizjes
Një klik në çastin kur lind
Një klik në çastin e ikjes.

Në dorën tonë është asgjëja
Njëlloj si në dorën e Zotit
Mes klikesh krijohen të tëra
Dhe qeshja dhe pika e lotit.

Një klik dhe zemra marrohet
Dy klike, marrëzisht dashurohet.

Selanik, prill 2012

[mondishall]

Kryqëzimi im

Më thoni që nesër do ringjallem si Krishti
Dhe keni për të parë si do shkoj kryqëzimit
Nga një nënë tokësore si unë dhe Ai lindi
Baballarët njëlloj i kemi prej shpirtit.

Nëse veç tre ditë, Ai vazhdoi në mundim
Dy mij' e ca vjet, unë jam në kryqëzim.

Selanik, 13 prill 2012

[mondishall]

Bota dhe Unë

E nxe të gjithë botën
Çudi, bota s'më nxe
Nga grimca a nuk dolëm
Dhe lindi univers?

Por bota varfanjake
Nuk ka një vend per mua
Më do vetëm të majmet
Dhe jo si unë e dua.

Unë botën prapë mbaj
Të gjithën brenda meje
Në qofsha jashtë saj
S'do jetë botë e njerzve.

Selanik, prill 2012

[mondishall]

Humbja absolute

Të zbutim sadopak fortësitë e jetës
Jo me thyerrje, mos bëhemi agresivë
Çfarë është fituar me instiktin e egër?
Veç kokë të prera në të tmerrshmen gijotinë.

Ja ikën kokëprerët, ç'fituan kokëprerësit?
Fasadash revolucionesh, demonësh për gjak
Kështu mijra vjet, kësaj bote njerëzit
Vazhdojnë gijotinës të luajnë shah.

Vriten ushtarë, kalorës vriten
Mbretër, mbretëresha, vriten gjithashtu
Humbin të humburit, fituesit ngjiten
Lojës ku i pret, i humbësit fund.

Selanik, prill 2012

[mondishall]

Brenda teje

Më shumë se çdo e dashur
Se çdo i dashur më shumë
Dashurinë e ke patur
Më të ndershmen kurvë.

Ajo është brenda teje
Reale dhe imazh
Dhe kurvë dhe e ndershme
Që nuk njeh mëkat.

Selanik, prill 2012

[mondishall]

Kodi i mosthënies

Në çdo të thënë, fsheh të mosthënën
I shtoj më shumë një çelës
Një kod më shumë i shtoj
Për ta rihapur përsëri
Në thënien tjetër, me tjetrën mosthënie
Për ta rikyçur përsëri
Me një çelës e kod të ri
Në fund?
Oh në fund
Me të pathënën e thënë
Hapni portën
Për të thënën e pathënë.

Selanik, prill 2012

[mondishall]

Natyrës kur dal

Në çdo vend natyre
Ku ec i vetëm
Të sjell imazhesh
Ty e asnjë tjetër.

Ja tek një pemë
Të dy ngjeshur
Trupash ndjejmë
Ndezjen e fshehur.

Fillojmë aty
Aty mbarojmë
Tek pema në pyll
Ku rrinë veç zogjtë.

Ja tek një stol
Trupash ngatruar
Fillojm' e mbarojm'
E s'kemi të shuar.

Në mes të ditës
Të natës, në mes
Paturpshëm rrimë
Seksi mbi seks.

Në krahë të marr
Më merr me puthje
Natyrës kur dal
I vetëm s'mundem.

Selanik, prill 2012

[mondishall]

Bota e lotit

E vetmja tradhti në jetën time
Eshtë loti që papritur më del
S'e kthej dot atë rrjedhje mistike
As burrëria dot prapa s'e kthen.

Në pikën e lotit një botë
Nga lëngu i shpirtit njomur
Si poezia që shkruaj, më thotë
Jam ndjenja jote e pangopur.

Më merr brenda tij loti im
Ta ndjej pak botën me shpirt.

Selanik, prill 2012

[mondishall]

Me natën, hijet e ditës mbajmë zgjuar
Sa shumë hije, më shumë se nga hijebërësit
Dikush sigurisht nga vetja dyzuar
Udhës se jetës hijesohet shumuar.

Selanik, prill 2012

[mondishall]

Dy hapat e dashurisë

Dashurisë mos i trokit
Porta e saj është e qielltë
Hyrja në të është infinit
Do vetëm shikim të dielltë.

Dashurisë mos i thërrit
Dëgjimi i saj është hapësirë
Hyrja në të është infinit
Do vetëm shpirt të lirë.

Dashurinë mos e kërko
Vendodhja e saj është tek ty
Hyrja në të është ngado
Do vetëm dy hapa të hysh.

Selanik, prill 2012