Tirane: Debora e madhe, qeveria shpall gjendjen e fatkeqësive natyrore

[Deni_Boy]

TIRANË- Kryeminisitri i vendit Sali Berisha, duke shprehur shqetësim për shkak të gjendjes emergjente që paraqitet në zonat verilindore dhe juglindore të vendit shpalli gjendjen e fatkeqesisë në zonat e bllokuara

“Shpall gjendjen e emergjencës së fatkeqësisë natyrore në Shkodër, Kukës, Dibër, Korcë dhe rrethin e Librazhdit. Por, çdo lokalitet do e ndihmojmë, por këto janë më problematiket”,- deklaroi Berisha.

“Bora me mbi 2.5 metër lartësi përbën një problem real të lëvizjes, furnizimit me ushqime, ndaj dhe duke shpallur gjendjen e fatkeqësisë natyrore në këto zona nënkupton ndërmarrjen e përgjegjësive për hapjen e rrugëve në të gjitha komunat e izoluara si kusht i të gjitha kushteve për shpëtimin e banorëve të kërcënuar. Problem janë orteqet por edhe catitë, ndaj në emer të qeverisë duke shprehur solidaritetin më të madh banorëve me zona me probleme të mëdha, ju bëj thirrje në mënyrë të programuar se dp bëjnë gjithcka për të parandaluar çdo kërcënim dhe humbje jete, duke shmangur rreziqet më eminente. Dhe një nga rreziqet janë shembja e cative nga sasitë e mëdha të dëborës,- shpalli kryeministri Berisha.

Kryeministri gjatë fjalës së mbajtur në mbledhjen jashtë radhe të qeverisë për shkak të situatës së krijuar në vend, deklaroi se qeveria po përballon me sukses agresivitetin e motit.

“E mblodha qeverinë për shkak të gjendjes së krijuar. Nga dje deri më sot ortoqet kanë bllokuar rrugë kombëtare, si Bajram Curri -Fierzë, Krumë-Kukës dhe rrugë të tjera, për të cilat ministri do informojë.Qeveria mendoj se ngriti në kohë komitetin dhe e trajtoi problemin në të njëjtin standard të një emergjence civile. Gjatë javës që kaloi ka patur angazhim total të qeverie vendore, këshilla së kryepleqve në qarqe. Një angazhim total të komiteti të emergjencave civile të kryesuar nga ministri Nishani, të forcave të armatosura të ministrisë së Shëndetësisë, pra situata me gjithë agresivitetin e saj është përballuar”- deklaroi Berisha.

Shefi i qeverisë bëri thirrje për dhënien e fondeve për çdo komunë për hapjen e akseve rrugore të bllokuara.
“Fonde për çdo komunë që do kontraktojnë mjete për hapjen e rrugëve”,- nënvizoi Berisha.

Kryeministri Berisha akuzoi kreun e opozitës Edi Rama se po tenton të përfitojë nga fatkeqësia natyrore që ka mbërthyer vendin.
“Ata që nga strofulla e tyre fërkojnë duart dhe gëzojnë duke vjellë vrer nga mëngjesi deri në darkë me shpresën që mund të qëmtojnë vota mbi mundimin dhe sakrificën e qytetarëve shqiptarë e krijuar nja një situatë natyrore e paparë, 45 vjetët e fundit dëshmojnë se jetojnë në shpellën e primitivizmint të tyre”,- u shpreh Berisha.

MINISTRI NISHANI: STRUKTURA NË GATISHMËRI
Ministri Nishani paraqiti masat që ka marrë ministria nga data 7 shkurt me ngritjen e Shtabit të Emergjencave për përballimin e reshjeve të dëborës në qarqet e prekura nga bora dhe ngritjen e shtabeve të prefekturave. Ndër masat kryesore, Nishani renditi miratimin e planit konkret për përballimin e situatës, ku prioritet mbetet dhënia e asistencës profesionale për emergjencat shëndetësore.

"Për këtë qëllim, ministria e Shëndetësisë ka pasur në dispozicion ekipin e helikoperëve të saj me të cilët janë organizuar rreth 38 fluturime në Tropojë, Has, Kukës, Malësi e Madhe ku janë shpëtuar jetë të disa fëmijëve dhe disa nënave në lindje", tha ministri Nishani.

Ai përmendi rolin që po luajnë në dhënien e ndihmës së shpejtë nga ministria e Mbrojtjes me angazhimin e ekipeve të regjimentit të Farkës në ofrimin e emergjencës me ushqime në disa fshtra të Kukësit, Peshkopisë dhe në lëvizjen e akseve kryesore nacionale. Nishani tha se në ndihmë të zonave të mbuluara nga bora që ka arritur në lartësi të mëdha, Drejtoria e Rrugëve ka vënë 46 borëpastruese duke mbajtur hapur akset nacionale dhe në tërësi edhe ato rurale në komunat më të thella. Në ministrinë e Brendshme situata po mbahet nën monitorim dhe kontaktet po menaxhohen nga salla e Emergjencës civile me shërbim 24 orë, me linja telefonike në komunikim direkt me shtabet e prefekturave si dhe direkt me komunat.

MINISTRI VASILI: SKA PASUR MUNGESË MEDIKAMENTE
Ministri i Shendetësisë, Petrit Vasili prezantoi në mbledhjen e Qeverisë sot në mbrëmje masat për përballimin e çdo situate në mbrojtje të jetës së banorëve në zonat e thella malore të prekura nga bora e ditëve të fundit.
"Nuk ka asnjë rast vdekje për shkaqe shëndetësore, kemi transportuar barnat e nevojshme, personeli po qëndron non stop me shërbimin shendetësor, ndërsa kemi ngritur shtabet shëndetësore për zonat e prekura", tha Vasili. Ai paraqiti punën që po bëhet në çdo prefekturë të prekur nga vështirësitë e borës, ku shtabet e shërbimit shendetësor po punojnë për të siguruar ndihmë në kohë minimale dhe pa vonesë. Ministria e Shëndetësisë ka pasur në dispozicion ekipin e helikoperëve të saj me të cilët janë organizuar rreth 38 fluturime në Tropojë, Has, Kukës, Malësi e Madhe ku janë shpëtuar jetë të disa fëmijëve dhe disa nënave në lindje.
"Në zonat e prekura, në funksion të plotë janë personelet shendetësore, ndërsa kemi aplikuar ndihmën ambulatore shtëpi më shtëpi. Situata po ndiqet online nga të gjitha strukturat e shëndetësisë", tha ministri i Shëndetësisë, Petrit Vasili.

OLLDASHI: AKSET PA PROBLEME
Ministri i Transportit dhe Rrugëve Sokol Olladashi bëri një pasqyrë të akseve rrugore në vend deri në orën 19:00. “Fieri pa probleme, Skrapari pa probleme, në akset Gjirokastër, Tepelene-Përmet pa probleme. Me probleme rruga në Korcë, ku duhen zinxhirë. Rruga e Boboshticës.
Kukës gjendja e vështirë për shkak të reshjeve të borës pa ndërprerje, Kukës Qafë-Shllak me probleme....”-deklaroi Olldashi.
(el.me/BalkanWeb)

[PLAKU]

Berisha shpall gjendjen e fatkeqësive natyrore
Bota Sot

Kryeministri, Sali Berisha shpalli gjendjen e fatkeqësisë natyrore në Shkodër, Kukës Dibër, Korcë dhe Librazhd.
Kryeministri gjatë fjalës së tij në mbledhjen e qeverisë foli për gjendjen e vështirë që ka përfshirë vendin. Ai kërkoi nga ministrat përkatës marrjen e masave dhe përgatitjen për rëndimin e situatës.
“Gjysma e territorit të vendit e mbuluar me sasi të mëdha bore. Do bëjmë gjithçka për të shpëtuar jetët dhe pasuritë e qytetarëve. U bëj thirrje banorëve të shamangin në maksimumin e mundshëm udhëtimet, pasi ndihma jo në çdo moment mund të arrijë në kohën e duhur. Nuk ka asgjë për t’u përfshirë nga paniku, por duhet urtësi dhe maturi. Deri tani gjendja është përballuar me sukses”, tha Berisha.
Ndërsa Ministri i Brendshëm, Bujar Nishani bëri një përmbledhje të situatës dhe masat që janë marrë për përballimin e saj.



“Kemi vënë në gadishëmri të plotë regjimentin e helikopterëvë. E kemi mbajtur nën kontroll situatën në shkolla në të gjithë vendin.
Janë mbajtur kontakte me sallën operative dhe Shtabin e Emergjencave Civile. Janë rreth 100 forca pune, që punojnë me tre turne për të dërguar ndihma në Veri dhe Jug-Lindje”, tha Nishani.
Ministrat Vasili, Ruli, Olldashi dhe Ksera bënë me dije masat që kanë marrë ministritë që ata drejtojnë dhe koordinimet mes tyre për stabilizimin e situatës. Ndërsa Minsitri i Arsimit, Tafaj bëri me dije që në katër qarqe të vendit janë mbyllur shkollat.
Më herët kryeminstri Berisha ishte në qytetin e Kukësit, ku ndoqi nga afër situatën e krijuar.
Bashkia e Tiranës, 100 mijë euro për zonat e bllokuara
Bashkia e Tiranës ofron 100 mijë euro për banorët e zonave të bllokuara nga reshjet e borës. Fondi prej 100 mijë eurosh i Bashkisë së Tiranës i jepet Shtabit të Emergjencave Civile.
Bashkia e Tiranës, gjithashtu ofron edhe kapacitete njerëzore për përballimin e situates në këto zona.

[PLAKU]

Rama: Qeveria s’ka fuqi, arka e shtetit bosh
Panorama

Kreu i PS akuzon në Twitter Kryeministrin gjatë takimeve në Kukës

“Askush s’është ndihmuar me fonde, shteti është rrënuar në moral”

Kreu i PS, Rama

Kryetari i Partisë Socialiste, Edi Rama, akuzoi dje qeverinë dhe Kryeministrin Berisha gjatë kohës që ai zhvillonte takime në qytetin e Kukës në Shtabin e Emergjencave. Me mesazhe të njëpasnjëshme të publikuara në adresën e tij në rrjetin social Twitter, Rama kundërshtoi premtimet dhe angazhimet e qeverisë për t’iu gjendur sa më pranë banorëve të zonave të bllokuara të vendit. Sipas Ramës, në Veri nuk ka shkuar asnjë ndihmë, ndërsa shteti fsheh ‘ngricat’ ekonomike. “Deklarimet e Kryeministrit në Veri për fonde për banorët, kopje e premtimeve për Shkodrën e përmbytur: Askush s’është ndihmuar me fonde ende sot!”, u shpreh Rama në reagimin e tij të parë në Twitter ndaj deklaratave të Kryeministrit. Në vijim, kreu i opozitës akuzoi emergjencat civile si inekzistente. “Kjo qeveri s’ka asnjë fuqi për të përballuar emergjenca, arka e shtetit është bosh, kurse shteti është rrënuar në moral e në profesionalizëm!”, u shpreh Rama në rrjetin social, në të cilin reagon pas çdo zhvillimi politik dhe social në vend. Për kreun e PS, dëbora në Veri ka gjunjëzuar shtetin, duke e cilësuar një dështim të qeverisë aktuale. “Kryeministri mund të gënjejë për ngricën që ka bllokuar ekonominë, por s’mund të fshehë dot dëborën që ka bllokuar Veriun e gjunjëzuar tërësisht shtetin”, shprehet Rama. Gjatë takimeve të zhvilluara dje paradite në qytetin e Kukësit, Kryeministri Berisha premtoi se “qeveria është e vendosur të angazhojë të gjitha mundësitë, të gjitha fondet, për të mbështetur e ndihmuar këto familje, por të jemi realistë, kushtet e motit punojnë shumë kundër nesh, punojnë shumë kundër fluturimeve me mjete ajrore, punojnë shumë kundër hapjes së akseve rrugore, sepse i mbyllin ato me shpejtësi”. Kryesocialisti e cilësoi këtë angazhim të Kryeministrit propagandistik dhe mediatik. Në mesazhin e tij të fundit në Twitter, Rama shkruan se “asnjë ndihmë s’ka shkuar në Veri prej dy javësh dhe ndihmat që mund të shkojnë nga sot do jenë thjesht mediatike, sepse shteti ka rënë!”.



Bashkia e Tiranës jep 100 mijë euro për Veriun

Bashkia e Tiranës ka akorduar dje një shumë prej 100 mijë eurosh për t’u ardhur në ndihmë banorëve të zonave të prekura nga reshjet e shumta të dëborës. Në të njëjtën kohë, kjo Bashki ka vënë në dispozicion të Shtabit të Emergjencës Civile të gjitha burimet e saj njerëzore. “Për t’u ardhur në ndihmë banorëve të zonave të bllokuara nga dëbora, Bashkia e Tiranës ofron një ndihmë financiare prej 100 mijë eurosh. Fondi do t’i vihet në dispozicion Shtabit të Emergjencave Civile. Bashkia e Tiranës vë në dispozicion të Shtabit të Emergjencave Civile edhe burimet e saj njerëzore”, thuhet në njoftimin e shtypit të Bashkisë së Tiranës. Bashkia e kryeqytetit është e para njësi vendore, e cila ka akorduar një shumë si ndihmë financiare për t’u ardhur në ndihmë banorëve të zonave të prekura nga reshjet e shumta të dëborës, që i kanë bllokuar ato prej disa ditësh.
Ministria: Numra telefoni për emergjencat
“Monitorimi dhe komunikimi me të gjitha rajonet në vështirësi kryhet nëpërmjet kryetarëve të komunave me pikat e kontaktit në çdo shtab prefekture dhe me shtabin qendror të emergjencave në numrat: 2233106, 2233090 dhe 0694110198”. Kështu njoftoi dje Ministria e Brendshme, duke shtuar se Shtabi Qendror i Emergjencës Civile dhe shtabet rajonale në prefektura po vijojnë organizimin dhe drejtimin e operacioneve të ndihmës në të gjithë territorin e zonave në vështirësi në vendin tonë. Nëpërmjet angazhimit të 49 borëpastrueseve, 40 fadromave dhe disa mjeteve me zinxhirë të ushtrisë është bërë e mundur mbajtja hapur për komunikim e të gjitha akseve kombëtare, si dhe pjesa kryesore e rrugëve rurale. Ekipi i helikopterëve të Ministrisë së Shëndetësisë ka realizuar 38 fluturime për transportin e emergjencave shëndetësore në rrethet Tropojë, Malësi e Madhe dhe Kukës.
Dëbora dy metra, Kukësi dhe Mirdita të bllokuara
Situatë problematike paraqitet në Kukës, në Mirditë, Korçë, Gjirokastër, si dhe në Vlorë në pjesën e Llogorasë. Trashësia e dëborës nga reshjet e vazhdueshme në qytetin e Kukësit arrin në 1.2 m, në Krumë 1.3 m dhe në Bajram Curri 2.2 m. Të gjitha rrugët rurale janë bllokuar. Edhe rrugët nacionale thuajse janë të pakalueshme, përveç “Autostradës së Kombit”, e cila kalohet me vështirësi me zinxhirë. Nga të gjitha zonat e qarkut janë lajmëruar emergjenca shëndetësore, mungesa ushqimesh, bllokime dhe rrezik ortekësh. Sipas njoftimit të dhënë nga Policia e Shtetit, aksi Rubik–Kalimash është i kalueshëm me zinxhirë me një kalim. Madje, policia u kërkon drejtuesve të tonazheve të rënda të mos marrin udhëtime në këtë aks, derisa të normalizohet situata. Edhe zonat e thella nga Rrësheni në drejtim të Lurës janë të pakalueshme. Problematike janë edhe disa zona të Librazhdit. Në Korçë, aksi Kapshticë-Korçë-Qafë/Thanë është i kalueshëm me zinxhirë. Ndërsa zonat turistike në Boboshticë, Dardhë, Voskopojë janë të pakalueshme. Edhe në Gjirokastër, moti ka shkaktuar probleme. Vështirësi në qarkullim paraqiten dhe në aksin Vlorë–Llogora, ku lëvizja kryhet me zinxhirë.
Orteku rrafshon shtëpinë, shpëtojnë 7 veta
Situatë e rëndë edhe në Dibër, banorët në panik nga ortekët. Kryekomunarët: Jemi pa bukë e ilaçe
Ngjarja në Vermosh, fshatrat e Shkodrës e Pukës të izoluara

Makina e bllokuar dje në Dibër
Dhjetëra fshatra në veri dhe juglindje të vendit vijojnë të mbeten të bllokuara, për shkak të dëborës dhe temperaturave disa gradë nën zero. Drejtuesit vendorë të zonave të thella raportojnë situatë mjaft emergjente.Veç izolimit, errësirës e urisë, fshatrat ku trashësia e dëborës i ka kaluar dy metra, japin alarmin se janë të rrezikuar nga ortekët. Në rrethin e Shkodrës, situata më problematike paraqitet në komunat e Dukagjinit. Ndërkaq, rreziku më i madh i banorëve të zonave të izoluara janë ortekët. Orteku i fundit ishte paraditen e djeshme në Vermosh, nga i cili është shembur banesa e Ndue Kolvushaj. Fatmirësisht, 7 familjarët arritën të dilnin në kohë dhe të largoheshin, por tashmë ata kanë mbetur në qiell të hapur. Në Pukë, dëbora brenda në qytet arrin afro 2 metra, ndërsa pesha e rëndë po rrezikon shembjen e çative. Kryetari i Bashkisë, Beqir Arifaj, ka ngritur grupe pune me efektivë të PMNZSH-së për pastrimin e banesave të rrezikuara. Ortekët po shkaktojnë bllokimin e akseve nacionale rrugore, kryesisht të rrethit të Pukës, ku në shumë vende bora ka arritur deri në 3 metra. Të vdekur që mezi varrosen, të gjitha komunat e izoluara, të sëmurë që transportohen me krahë drejt Peshkopisë e Bulqizës, shtëpi që rrezikohen të shemben, frikë nga ortekët që mund të nisin. Kjo është situata në qarkun e Dibrës, ku mijëra banorë janë të izoluar. Kryetarët e 14 komunave të Dibrës, 7 të Bulqizës dhe 2 të Matit raportojnë se situata vazhdon të përkeqësohet. Kryetari i komunës Kala e Dodës, Bajram Himallari, tha se “të gjithë fshatrat kanë probleme, por Radomira dhe Shullani janë më keq, pasi rezervat ushqimore po mbarojnë. Nuk kemi shërbim shëndetësor dhe as ilaçe”. Disa familje për të mbajtur frymën gjallë po ziejnë misër. Xhemal Delishi, kryetar i komunës Selishtë në Dibër, raportoi gjithashtu situatë kritike në këtë rajon. Kryekomunari i Zall-Dardhës, Njazi Cani, tha se 1343 banorët e 9 fshatrave janë në gjendje të rëndë, pasi trashësia e borës në disa zona është mbi 2 metra. “Një banesë në Lugje është shembur, ndërkohë që çatitë e banesave të tjera vihen në rrezik. Ndërsa kryetari i Fushë-Bulqizës raportoi se “kërkuam një mjet borëpastrues, pasi kishim një rast vdekjeje. “Është ngritur i gjithë fshati në këmbë për të mundësuar varrimin e tij. Kështu ka ndodhur edhe në Zerqan, ku një i vdekur ka qëndruar dy ditë pa u varrosur”, tha ai. Banorët e Kastriotit i kanë ardhur në ndihmë një gruaje shtatzënë, duke e transportuar drejt maternitetit të Peshkopisë. Disa fshatrave të komunave të izoluara u mungon energjia elektrike, ndërsa në disa të tjera telefonia celulare, pasi antenat janë jashtë funksionit për shkaqe të ndryshme.
PESHKOPI
Burrat e fshatit Vrenj në Dibër kanë udhëtuar 5 orë më këmbë, për t’i shpëtuar jetën një 27-vjeçareje shtatzënë. Ata kanë përshkuar disa kilometra rrugë me rreth 1.5 metra borë për ta transportuar me barelë në spitalin e Peshkopisë gruan që rrezikonte jetën e saj dhe të fëmijës. Fatmirësisht, ata mbërritën në kohë dhe 27- vjeçarja lindi fëmijën pa probleme. Burime spitalore bënë të ditur se nëna e re dhe foshnja gëzojnë shëndet të mirë.
KUKES
Një grua në fshatin Pistë të komunës Malizi rrezikon jetën e saj dhe të bebes që pret të lindë. Të afërm të saj në Kukës kanë dhënë alarmin, pasi sipas tyre shtëpia ku ndodhet Valentina Tahiri bashkë me familjarët e saj po shembet. Fëmijët e vegjël janë të sëmurë, ndërkohë që ata s’kanë as ushqime. Një tjetër grua në lindje e sipër është transportuar me shumë vështirësi në spitalin e Kukësit.

[PLAKU]

Fole keq ne mort, o mik!
Nga Frrok Cupi

Kryetari i qeverise, qe ne fakt eshte edhe kryetar i shtetit, dje shpalli shtetin ne gjendje te Jashtezakonshme. Do te thote se cdo njeri ne dobi te njerezve ne rrezik, ne dobi te atyre qe mund te vdesin! Ne Veri thone mos fol se bie orteku. Po fole orteku merr jete njerezish. Por po fole keq, jetet e njerezve hidhen ne ferr. Udheheqesit e Partise Socialiste po i dergojne njerezit ne ferr, sepse po flasin fjale te renda. Fjale te renda ne mort.

Moti tani eshte si morti, po vdesin njerez nen peshen e dimrit. Ne qofte se dikush vjen e thote se “me keq do te behet”, atehere edhe te gjallet nuk kane me shprese; ne qofte se nuk do te ndodhte kjo, njerezit mund te kishin nje dritare jete. Bora e ngrica, ardhur prej natyres, kane rrethuar njerezit, sidomos ne Veri. Njerezit shikojne nga qielli: o lajm i mire, o lajm vdekjeje! Dje kryetari i Partise Socialiste (ish-komuniste) leshoi lajmin se “nuk ka shtet”. Lajmi shkoi te njerezit para se te shkonte lajmi se mund te jetojme. Aty ku ka mort per te vdekurit natyrore, aty njerezit menduan se po varroseshin te gjalle. Helikopteret do te vijne me vone, edhe vete kryeministri i Republikes po udhetonte mes akullit drejt njerezve te bllokuar; ndersa lajmi i zi i kryetarit te PS erdhi me shpejt. Ne mort lajmi i keq shkaterron shpirtin. Shkaterrimi i shpirtit njerezor eshte qellimi i vete kryetarit dhe endurazhit te Partise Socialiste (ish-komuniste).

Ne Europe kane vdekur 500. Dje ne Shqiperi vdiq njeriu i pare nga dimri, por realisht i pari nga dimri. Bash dje priten te dergojne fjalen e rende ne dite morti. Dite morti quhet cdo dite qe kalon kete tmerr dimeror te pashoq.

Djemte e “Bllokut”, ku ben pjese edhe kryetari i Partise Socialiste, rrine prane oxhaqeve me zjarr dhe miliona te vjedhur nga populli dhe i dergojne fjale popullit ne mort: “Aty do te vdisni, nuk keni shtet!”.

Po, a flitet keq ne diten e mortit, valle? A flitet rende ne dite te keqe?

Partite e Opozites, sidomos ne krye te saj, sa nisi bllokimi njerezor prej dimrit shume te ashper qe sundoi gjithe Europen Qendrore, bash ne ate moment leshuan fjalet e renda. “Na mbyti krimi!- tha kryetari i PS... Po na vjen uria! - tha perseri!... “ Ka dy dite qe del ne publik e leshon fjale tmerruese...

Prape pyetja: A flitet diten e keqe?

Kjo nuk eshte shkruar as ne kodet zakonore, as ne kodet qytetare, flitet apo nuk flitet? Sepse as mund te shkruhet, madje as mund te sillet ndermend qe dikush te leshoje fjalen e keqe diten e keqe. Nje gje qe nuk mund te ekzistoje njerezisht, asnje ligj njerezor nuk mund ta ndaloje as ta lejoje. Fjala e keqe diten e keqe eshte jashte mendjeje, jashte planetit ku jetojne njerez.

Ate qe do te bente fjala e keqe nuk e ben dot as dimri me i eger. Kur u ngriten helikopteret per te derguar ndihmat e emergjences per njerezit e bllokuar pertej Kaptines se Martaneshit, mes Librazhdit e Dibres dhe ne malet e Vermoshit, secili prej atyre njerezve qe po niseshin e dinte se para helikopterit atje ka mberritur fjala e keqe e kryetarit te PS. Fjala iu kishte derguar njerezve te izoluar nje lajm me te rende se izolimin: Tmerrin nga frika e krimit dhe e urise. A mund ta mendoni sa keq “i priten krahet” nje njeriu qe nuk mund te dale as ne dere te shtepise i rrethuar nga dimri, kur nje ze i vjen nga politika: “Aty do te vdesesh, edhe po u shkri bora!”. A mund ta mendoni sa keq ndihet njeriu me femije e prinder ne vater, kur nga kryeqyteti vjen fjala me e keqe se moti dhe kete e degjojne i madhi e i vogli!? Ky njeri qe edhe mund te kuptoje sado pak se fjala e keqe eshte “ne ere”, nuk ka si ua thote prindit e femijes qe e rrethojne... A mund te thote burri se disa burra ne qender genjejne per qejf. Se po ta thote kete, atehere femija do te marre mesim te keq; por edhe prindi qe eshte kthyer ne femije nuk mund t’i besoje me birit kryefamiljar.

Mandej gjithe vendi, Shqiperia, qe kishte demet me te pakta nga dimri i eger qe e coi Europen ne panik, valle si e perjeton “te zezen” qe fryn nga kryeqyteti diten me te akullt te vitit? Ne Kukes nje nene lindi dy binjake ne ato kushte te egra kur spitali kishte shkuar nje jete larg; dhe, te degjoje nena se “Partia po thote se vjen kiameti”, valle c’femije po sillte ne jete. Pse i sillte? - behet pyetja qe vjen nga makabriteti i fjales se keqe qe vjen nga qendra. Ndersa ne Shishtavec te pertej Gjallices, njeriun qe nderroi jete natyralist, e percollen si ne legjenda mes “mureve” te bores. Por fjala e ardhur nga qendra se “me keq do ta keni”, i ben te gjallet ta quajne me fat njeriun qe nderroi jete “ne prag te te keqes me te madhe”.

Pse ndodh kjo cudi e pandodhshme? Kryetari i nje partie opozitare (me e madhja ne opozite) qe tenton te marre pushtetin nje dite e me pare, diten me te veshtire te njerezve leshon lajme ogurzeza. Aq te renda sa iu keput krahet te gjithe njerezve qe po luftojne me dimrin. Aq te renda sa duket se dita eshte zgjedhur per te renduar sa me shume shpirtin njerezor. Po, a nuk kishte dite tjeter qe kryetari i Partise Socialiste (ish-komuniste) te vinte ne koke futen e zeze e te bertiste: “Ku ku! Per ne, na gjeti e keqja!”.

Lajmin e zi e zgjedh njeriu i keq, me i keqi mes njerezve, bash diten e keqe. E dini arsyen? Sepse dite tjeter lajmi i zi dhe fjala e keqe fluturojne ne ajer. Fluturojne, sepse nuk besohen. Te pavertetat kane nevoje per mort. “Ra ky mort e po shihemi!”, thote elegjia me e trishte e nje kombi. Po valle pse ne kete epoke moderne? Aq me keq kur fjala nuk eshte as e vertete, as reale... Derisa te shkrihet bora ky njeri nuk pret, se atehere nuk i ka takat e keqja.

Fjala e rendon te keqen dhe barren e dimrit. Kam ne sy akoma komandantin e repartit qe kishte shkuar te shpetonte disa femije shkolle te bllokuar nga orteku ne Brezovice te Prizrenit afer Kukesit. Komandanti iu tha femijeve me ze te ulet e te prere: “Mos flisni, asnje fjale... se bora shembet nga fjala!”. Pa mendoni kur dikush nga Tirana leshon fjalen e zeze e te rende... vete dimri behet me i rende.
Koha Jone

[AlbaneZ]

Injoranti dhe narkomani nuk behet ndonjehere njeri.Ne kete kohe te keqe dhe dimer te madh ky skizofren gjen mundesine dhe kritikon qeverine se s'ka leke ?! Turpi i kombit ka nje emer dhe ky eshte edvin kristaq skizofren rama.

[PLAKU]

Publikuar më: 12 Shkurt, 2012 Politikë | nga AMA-News
Berisha shpall gjendjen e fatkeqësisë natyrore: Kjo situatë s’është parë prej 35-40 vitesh! Rama po vjell vrer e po fërkon duart


Kryeministri Sali Berisha mblodhi pak minuta më parë qeverinë me qëllim për të ju përgjigjur situatës së krijuar pas reshjeve të borës në verilindje dhe juglindje të vendit. Kreu i qeverisë tha se është shpallur gjendja e fatkeqësisë natyrore në zonat e prekura nga reshjet e borës dhe bllokimi i rrugëve. Ai tha se agresiviteti i natyrës prej mëse një jave ka marrë përgjigje me veprime të ngjashme me kushtet e emergjencës.
“Reshjet në ndonjë rreth arrijnë edhe në 2 deri në 2.5 metra. Reshje që vazhdojnë me intensitet të madhe dhe të pandërprerë në Qarqet e Shkodrës, Kukësit, Peshkopisë, Elbasanit, Korçës por në mënyrë të veçantë janë të mëdha në Qarqet Shkodër, Kukës e Peshkopi”, tha kryeministri.
Sipas tij nga dje në drekë deri sot orteqet dhe reshjet kanë bllokuar edhe rrugët kombëtare siç është rruga Bajram Curri-Fierzë, Krumë-Kukës e rrugë të tjera për të cilat ministri do informojë me më hollësi.
“Qeveria ngriti në kohë komitetin qeveritar dhe e trajtoi problemin me të njëjtën standard të një emergjence civile. Gjatë javës që po kalon ka pasur angazhim total të qeverisjeve vendore, këshillave, kryepleqve, qarqeve, kryetarëve të bashkive, një angazhim total të komitetit të emergjencave civile të kryesuar nga zoti Nishani dhe forcave të armatosura e policisë së shtetit”, theksoi Berisha.
Situata tha ai megjithë agresivitetin e saj në tërësi është përballuar. “Dje ka qenë viktima e parë e lidhur direkt me hipoteminë, dy punonjës të një kompanie telefonike private janë nisur pardje për të rivendosur antenat në një maje mjaft të lartë dhe kanë mbetur në borë. Mbi 100 forca nga ora 9 e mëngjesit të djeshëm deri vonë në darkë u angazhuan në shpëtimin e tyre. Ata u gjetën dhe njëri prej tyre duket se po e kalon por tjetri megjithë ndihmën serioze mjekësore ndërroi jetën”, u shpreh Berisha.
Kryeministri tha se në emër të qeverisë, duke u shprehur solidaritetin më të madh banorëve të zonave me reshje të mëdha dëbore, qeverive vendore bën thirrje që në mënyrë të programuar të bëhet gjithçka për të parandaluar çdo kërcënim dhe humbje jete të qytetarëve në komunitetet e tyre.
“Një nga rreziqet më eminente në këto raste janë shembja e çative nga sasitë e mëdha të dëborës. Sigurisht nuk po them asgjë të re për banorët e këtyre zonave por po e theksoj sepse ka jo pak familje të cilat vet nuk kanë mundësi të kryejnë shërbimet e duhura në këto rrethana. Ndaj është në tagrin dhe dinjitetin e qeverisjeve vendore të asistojnë. Bora me 2 metra, 1.5 përbën bllokim real të lëvizjes dhe problem serioz të furnizimit ndaj dhe duke shpallur gjendjen e fatkeqësisë natyrore në këto zona ne japim mundësi për marrjen e masave më të shpejta për hapjen e të gjitha rrugëve të komunave dhe fshatrave të zonave ku ka reshje të mëdha”, tha Berisha.

Duke replikuar me deklaratat e opozitës dhe kritikat e bëra ndaj qeverisë ai tha se “në këtë përpjekje njerëzit e qytetëruar janë të bashkuar ndërsa ata që nga strofulla e tyre fërkojnë duart dhe gëzojnë duke vjell vrer nga mëngjesi deri në darkë me shpresën se do mund të qëmtojnë vota mbi mundimin dhe sakrificën e qytetarëve shqiptarë të krijuar nga një situatë natyrore e paparë të paktën 35-40 vitet e fundit dëshmojnë se rendin jo në dëborë por në kënetën e primitivizmit të tyre. Ndaj dhe u them sonte se sigurisht që është një situatë jo e lehtë pasi pothuajse gjysma e territorit të vendit është e rrethuar, e mbuluar nga sasi të mëdha dëbore, temperatura të ulta, por ne do bëjmë gjithçka ti kapërcejmë. Do bëjmë gjithçka që qytetarët shqiptarë të dalin e të mbrojmë jetët e tyre në rradhë të parë”./lajmifundit

[landi45]

e paska zgjidh problemin

e me ushtrin dhe leket e kujt

do ndihmoje ky ne zonat e bllokuara

ushtria eshte bere si lecke

dhe arkat jane bosh

do i fusi ca premtime koti

mos premton se do vrasi deboren si vrau me 21 janre

hajde rrote hajde


ka nja 1 muaj qe thuhej do kete bore e ngrica ne gjithe evropen

ky zgjohet nga gjumi kur bora shkon ne 2 metra

[Duaje Siveten]

E zgjidhi situaten emergjente kryeministri jone me keto "keshillat" prej mjeku adhamudhian ...

Berisha: Urgjencë, pastrimi i borës nga catitë e shtëpive

TIRANE

Kryeministri Sali Berisha ka bërë thirrje sot që banorët e zonave të mbuluara nga reshjet e dëborës të pastrojnë catitë e shtëpive.

“Ky është rrezik evident. Është urgjencë, është një problem që duhet evituar. Mesazhi im për banorët e këtyre zonave të konsiderojnë përparësi absolute pastrimin e cative nga bora që banesat të mos shemben, të jenë të sigurta”, tha Berisha në mbledhjen e grupit të Partisë Demokratike.

Sipas kreut të qeverisë një dimër kaq i ashpër ka ndodhur rreth 27 vite më parë, në vitin 1985.

“Ata që e njohin dimrin, që e njohin borën që kanë parë situata të tilla e dinë më shumë se kurrë se sot nevojitet solidaritet kolektiv”.

balkanweb

[Deni_Boy]

TIRANE - Pjesa më e madhe e Shqipërisë vijon të jetë nën borë, por në veri trashësia e borës vijon të sjellë probleme në qarkullim dhe si pasojë emergjenca të shumta si nevojat për mjek dhe mami. Prej 14 ditësh, banorë të Pukës, Dibrës, Kukësit, zona të Shkodrës, Hasit e Tropojës janë ngujuar nga bora.
Bora ka shkaktuar avari në rrjetin e energjisë elektrike, ndërsa uji i pijshëm mungon prej disa ditësh për shkak të ngrirjes së tubacioneve nga temperaturat e ulëta, kurse shkollat janë mbyllur deri në një urdhër të dytë.
Në Pukë trashësia e borës është shënuar mbi 2 metër kurse temperatura -10, në Kukës temperatura më e ulët është regjistruar -8 gradë celsius ndërsa dëbora në qytet regjistron 1.5 m.
Dukagjini dhe Vermoshi prej ditësh nuk komunikojnë me zonat e tjera ndërsa në Malësinë e Madhe, reshjet e borës kanë arritur 3 metër.
Përveç akseve rrugore që lidhin komunat e këtyre rretheve me qendrat urbane, janë të bllokuara akset nacionale, Kukës-Peshkopi, Kukës-Tropojë, Librazhd-Dibër e disa segmente të tjera.
Bora ka shkaktuar probleme dhe në jug e juglindje të vendit ku komuna Frashër është bllokuar, Dardha prej 5 ditësh vijon të qëndrojë e izoluar, kurse fshatrat Novoselë, Lekas e Clirimi, Velcan, Proptisht e Trebinjë.
Dy ditë më parë qeveria shpalli emergjencën e fatkeqësisë natyrore, ndërsa gjatë ditës së djeshme kryeministri u bëri thirrje banorëve të pastrojnë çatitë e shtëpive pasi rreziku është evident.
Sot ne Bulqizë raportohet se 6 banesave u janë dëmtuar çatitë, por fatmirësisht nuk ka pasur të lënduar.

Kryeplaku i Drenovicës: Nuk kemi ushqime
120 banorë në fshatin Drenovicë të Komunës Lunik në Librazhd, ndodhen totalisht të izoluar, ndërkohë që të paktën 4 familje vuajnë nga uria prej disa ditësh. Kryeplaku i Drenovicës, në Librazhd Belul Sollaku bën apel NEWS24 se tashmë rreth 120 familje nuk kanë më rezerva ushqimore.
“Nuk kemi ku të marrim asnjë lloj furnizimi. Ujë të pishëm kemi drita nga 7 ditë jo. Rreth 120 banorë kanë përfunduar rezervat ushqimore”,- deklaroi Sollaku.

Pukë, vdes një 85-vjeçar teksa transportohej me helikopter
Një 85-vjecar nga Puka ka vdekur pasditen e sotme teksa transportohej me helikopter pas përkeqësimit të gjendjes së tij shëndetësore, shkaqet e të cilës nuk dihen ende.
Viktima Zyber Furriku, 85 vjeç jetonte në fshatin Meçe të komunës Rrape. Pas përkeqësimit të gjendjes së tij shëndetësore është kërkuar ndihma e helikopterëve për të ndërhyrë, të cilët i erdhën menjëherë në ndihmë pavarësisht vështirësive, por pa mundur ta sjellin atë të gjallë në spitalin e Pukës. Nuk dihet ende shkaku i përkeqësimit të gjendjes shëndetësore të të moshurit.

Pukë, familja Jaku në gjendje të mirë
Banorët e fshatit Shkozë në Pukë raportuan për shembjen e një banese, që sipas tyre i përket shtetasit Pjetër Jaku, por me të arritur atje 20 banorët mësuan se familjarët ishin në gjende të mirë shëndetësore dhe se ishte shembur një pjesë e stallës së bagëtive, të familjes Jaku.

Tarraca e stallës është shembur pjesërisht për shkak të dëborës së dendur, ndërsa mësohet se familjes Jaku po i mbaronin rezervat ushqimore.

Haxhinasto në Pukë, Nishani në Librazhd
Raportohet se zv. kryeministri njëherësh ministri i Jashtëm Edmond Haxhinasto ka vizituar sot qytetin e Pukës, për të takuar atje strukturat vendore si dhe për të parë nga afër situatën e krijuar nga reshjet e dendura të borës.
Haxhinasto ka këshilluar këto struktura t’i vinë me çdo kusht në ndihmë banorëve të zonave të izoluara.

Ndërkohë që ministri i Brendshëm, Bujar Nishani ka shkuar sot në Librazhd. Në takimin me forcat e shtabit të emergjencës civile, Nishani është siguruar për marrjen e të gjitha masave, për t’ju ardhur në ndihmë banorëve të zonave të izoluara. Nishani ka kërkuar nga ky shtab zbatimin e të gjitha masave me qëllim përballimin e kësaj situate të krijaur nga reshjet e dendura të borës.

“Për këtë situatë duhet të ndërgjegjësohen qytetarët. Këtë më mirë se mund ta bëjnë kryetarët e komunave, fshatrave, këshilltarët e komunave, nuk mund ta bëjë askush tjetër. Ministria e Brendshme bëri të mundur lëvrimin e një fondi emergjent, i cili është i destinuar vetëm për kontraktimin e mjeteve lokale për hapjen e rrugëve që janë në menaxhim nga komunat”, tha Nishani.

Bulqizë, 12-vjeçarja në gjendje të rëndë dërgohet në Maqedoni
Policia kufitare dhe ajo e Dibrës kanë bërë të mundur transportimin në Maqedoni të 12-vjeçares Adelina Manaj, e cila qëndroi e bllokuar për disa orë në komunën Trebishtë të Bulqizës, në gjendje të rëndë për jetën.

Familjarët e vajzës kërkuan ndihmë për transportimin e saj me helikopter, pasi e kishin të pamundur dërgimin e saj në spital, për shkak të rrugëve të bllokuara nga dëbora që ka arritur deri në 3 metra.

Kreu i komunës, Razi Rama bëri të ditur se vajza Adelina Manaj ishte me temperaturë tepër të lartë dhe në gjendje kritike për jetën. Një mjek u përpoq të udhëzonte për disa orë familjarët me telefon, por gjendja e vajzës vijoi të përkeqësohej për shkak edhe të mungesës së medikamenteve.

Autokolona ushtarake drejt Kukësit
Ministria e Mbrojtjes dhe Shtabi i Forcave të Armatosura kanë nisur drejt Qarkut të Kukësit një autokolonë ushtarake, ku përfshihen forca dhe mjete ushtarake që do t’u vijnë në ndihmë banorëve në zonat e bllokura. Autokolona do të ketë si bazë aeroportin e Kukësit. Zv.shefi i Shtabit të Përgjithshëm të Forcave të armatosura, gjeneral brigade Sandër Lleshi, bëri të ditur se krijimi i kësaj baze do të shkurtojë distancën për tu ardhur në ndihmë banorëve si në asistencën mjekësore, ashtu dhe në shpërndarjen e ndihmave ushqimore. Gjithashtu mejtet dhe forcat ushtarake do të angazhohen maksimalisht për zhbllokimin e akseve të bllokuara nga bora.

Helikopterë drejt zonave të bllokuara nga dëbora
Pas një ndërprerjeje dy ditore, për shkak të reshjeve të dendura të dëborës dhe erërave të forta, helikopterët e ushtrisë kanë fluturuar sot në drejtim të zonave të izoluara, duke vazhduar me operacionet e ndihmës për banorët e këtyre zonave.
Në qytetin e Pukës kanë shkuar dy helikopterë, të cilët kanë dërguar pako me ushqime dhe medikamente ndërsa pritet që në orët në vazhdim të ketë fluturime të tjera në zonat e izoluara nga dëbora. Helikopterë edhe në Tropojë.
Zëdhënësi i ministrisë së Brendshme Fatmir Konja tha se me nisjen ndihmave nga ajeri është bërë i mundur dërgimi i ushqimeve dhe medikamenteve. “Janë dërguar 200 pako ushqimore në Pukë dhe Tropojë. Njëri prej helikopterëve të Forcave të Armatosura do të marrë në kthim edhe 4 persona të bllokuar në Malzi komuna Fierzë. Ndërkohë në prefekturën Shkodër po dërgohen rreth 500 pako ushqimore”, tha Konja.
Po sot helikopterë të Ministrisë së Shëndetësisë kanë mundur të kryejnë 4 fluturime për emergjenca shëndetësore, në Rrëshen, Vermosh, Pukë dhe Kalaja e Dodës, ndërsa parashikohet edhe një ndërhyrje në Tropojë.

URGJENCAT ME GRATE SHTATZENA
Përkeqësimi i motit dhe bllokimi i rrugëve nga dëbora e madhe ka pasuar me shtimin e rasteve të urgjencave mjekësore, kryesisht të grave shtatzëna.
Vetëm gjatë ditës së djeshme janë shënuar 5 raste të tilla. Burime zyrtare nga Prefektura e Dibrës, bëjnë me dije se për shkak të ftohtit të madh një 22-vjeçare ka humbur fëmijën e saj, ndërsa është transportuar për në spital, pasi rrezikonte të humbte jetën nga hemorragjia.
Rasti i dytë është shënuar po në rrethin e Dibrës, kurse tri rastet e tjera në Qarkun e Kukësit. Nisur nga situata e krijuar, ministri i Shëndetësisë, Petrit Vasili urdhëroi marrjen e informacionit për moshën, gjendjen dhe lokalizimin e grave shtatëzëna. Ai kërkoi marrjen e masave urgjente për disponibilitetin e personelit, mjek, mami dhe transportin sa më të shpejtë të grave shtatëzëna (7 muaj e sipër) në spitalin e rrethit më të afërt për t’i mbajtur nën kujdes dhe monitorim të vazhdueshëm.

Dibër, mbetet e bllokuara një grua shtatzënë në Kalanë e Dodës
Një 24-vjeçare shtatzënë ne gjendje te rende shendetesore ka mbetur me shume se 24 ore e bllokuar në Kalanë e Dodës që prej mbrëmjes së djeshme. Ka qenë ora 11:00 e paradites kur u njoftua se 24 –vjecarja shtatzënë po transportohej drejt Tiranës me helikopter. Pas disa 2 tentativash, më në fund pilotët arritën të ulnin helikopterin në fshatin Ujmire të Kalasë së Dodës për të marrë nënën e re që rrezikonte jetën e saj dhe të fëmijës.
Gruaja u transportua mbreme me barrelë nga disa burra nga Shullani në Kalanë e Dodës, por për shkak të përkeqësimit të motit nuk mundi të vazhdonte rrugën për në spital. Mësohet se 24-vjeçarja, në muajin e 6-të të shtatzënisë, ishtë strehuar në një familje në fshatin Ujmir, ku trashësia e dëborës arrin deri në 2.5 metra. Një helikopter i Ministrisë së Shëndetësisë tentoi disa herë të ulej në fshatin Ujmir, për të bërë të mundur dërgimin e 24-vjeçares në spital, por ishte e pamundur per shkak te stuhive te bores. TVNews24 meson se gjendja e saj dhe e femijes eshte serioze. Vetem rreth mesdites u mundesua transporti i gruas drejt Tiranes me helikopter.
Ndërkohë edhe në zona të tjera janë konstatuar emergjenca të tjera shëndetësore. Aktualisht raportohet për një të sëmurë rëndë në Qelëz të Pukës dhe një në Fierzë.

Shtatzëna humb fëmijën
Tre ditë më parë, një 22-vjeçare (shtatzënë 4 muajshe) nga zona e Sllovës në Dibër, humbi fëmijën e saj të parë. Për shkak të bllokimit të rrugëve, gruaja ka bërë abort të pavullnetshëm në shtëpi. Me gjithë kujdesin e familjarëve, gjendja shëndetësore e të resë është përkeqësuar. Ndërsa, gruaja rrezikonte jetën nga hemorragjia, familjarët e saj kanë dhënë alarmin. Rreth 70 burra të fshatit Kall e kanë transportuar 22-vjeçaren me barelë, duke çarë për më shumë se 5 orë dëborën që arrin mbi 2 metra. Ajo është dërguar në Spitalin Rajonal të Peshkopisë, ku po merr ndihmën mjekësore. Po dje, një 24-vjeçare shtatzënë mbeti e bllokuar për orë të tëra në rrugë. Burime nga Prefektura e Dibrës bënë me dije se rreth orës 17:27, banorë të zonës së Kalasë së Dodës kanë transportuar një grua shtatzënë 6 muajshe për në spital. Dëbora e madhe si dhe gjendja e rënduar e 24-vjeçares ka bllokuar banorët në mes të rrugës. Mësohet se ata dhe shtatzëna për shkak të pamundësisë për të shkuar në destinacion, janë detyruar të ndalin në fshatin më të afërm.

Dy gra shtatzëna kanë rrezikuar të vdesin rrugës në rrethin e Kukësit. 38-vjeçarja Pranvera Dokuzi, shtatzënë 7 muajshe, dje u transportua me barelë nga fshati Lusën deri në vendin e quajtur Qafa e Kolosjanit. Pas 6 orësh udhëtim në borë, gruaja është transportuar me një makinë ushtrie për në Spitalin Rajonal të Kukësit. Ndërsa, një grua shtatzënë në prag të lindjes në fshatin Pistë të Komunës Malzi në Kukës është në gjendje të rënduar shëndetësore. Të afërm të Valentina Tahirajt kanë kërkuar ndihmën e vendorëve, duke u shprehur se nuk mund ta transportojnë dot në spital, pasi bora arrin mbi dy metra. Mbrëmë, një helikopter i Ministrisë së Shëndetësisë transportoi një 33-vjeçare shtatzënë nga Lekbibaj i Tropojës në Maternitetin e Ri në Tiranë.
(d.b/er.nu/ma.ar/el.me/BalkanWeb)

[drague]

mund ta quajm kronike e zeze apo e bardhe?

shume banore po vdesin urije dhe nuk e hapi ndonje moderator nje teme sensibilizimi.