http://www.botasot.info/img/foto-mbledhje-qeverie.jpg
Prioritetet e Berishës për vitin 2012
Këshilli i Ministrave të Shqipërisë zhvilloi sot mbledhjen e tij të parë për vitin 2012. Në fjalën e tij kryeministri i Shqipërisë, Sali Berisha parashtroi prioritetet e qeverisë së drejtuar prej tij për këtë vit (2012).
Kështu, kreu i ekzekutivit u ndal fillimisht në vetë rëndësinë që ka ky vit, pasi përkon me 100 vjetorin e Pavarësisë së Shqipërisë, për të kaluar më pas tek objektivat në fushën ekonomike. Por një tjetër çështje e trajtuar nga kryeministri Berisha, ishte dhe zgjedhja e presidentit të ri të shtetit, ku garantoi për një garë brenda kornizave të Kushtetutës.
100 vjetori i Pavarësisë
Kryeministri Berisha e nisi fjalën e tij me një urim për vitin që sapo kemi hyrë. “Uroj një vit plot shëndet gëzim, suksese dhe mbarësi. Falënderim për punën që ka bërë administrata. Nisim këtë vit, vitin jubilar të 10o vjetorit të Pavarësisë së Shqipërisë më të qartë, të më vendosur më optimistë, më të sigurt se kurrë. Siguroj qytetarët se do të bëj gjithçka për ta kthyer këtë vit në vitin e merituar të Shqipërisë, në 100 vjetorin e Pavarësisë së saj”, u shpreh Berisha.
Sipas kreut të qeverisë, do të bëhet një përpjekje të madhe për një vështrim të qytetëruar të të gjitha zhvillimeve nga 1870-1912. “Ky vit duhet të jetë viti i themelit të vizionit të Shqipërisë. Ky vit duhet të jetë një vit në të cilën qytetarët shqiptarë të ndihen më krenarë dhe vlerësuar se kurrë në historinë e tyre. Të ndihen krenarë me ato që kanë realizuar paraardhësit e tyre, me vizionin që mbështesin dhe të ardhmen që janë të vendosur të ndërtojnë me integrimin në BE”, deklaroi Berisha.
Zgjedhja e presidentit
Gjatë fjalës së tij, kryeministri Berisha garantoi opozitën se pozita qeverisëse do të përmbajë pikë për pikë marrëveshjen e nënshkruar vitin që kaloi. “Është në detyrën tonë, që këtë vit ta shndërrojmë në një vit suksesi më të madh. Në radhë të parë, duhet të garantoj opozitën që jemi të vendosur t’i qëndrojmë marrëveshjes pikë për pikë. Bojkoti zgjati-zgjati por dështoi. Një vend i lirë nuk mund të mbahet peng. Ndaj qëndrojmë të hapur për bashkëpunim të sinqertë, por edhe të vendosur për zbatim të Kushtetutës. Urojë që ligjet që presin të votohen, siç është përcaktuar më marrëveshje dhe uroj të bëjmë çdo gjë për realizimin e reformës zgjedhore”, u shpreh Berisha.
Ndërkohë kreu i qeverisë u ndal dhe në zgjedhjen e presidentit të ri, që do të zgjidhet po këtë vit. “Ky është viti i zgjedhjes së presidentit dhe garantoj se do të zgjidhet në respekt të Kushtetutës. Çdo përpjekje për t’iu imponuar Shqipërisë për dëshira suplementare, në raport me Kushtetutën, do shkojnë në dështime, si në rastet e tjera. Uroj të bëjmë përpjekje të mëdha, për t’i dhënë vendit një president në lartësinë e detyrave të Kushtetutës dhe lirive të vendit”, vlerësoi Berisha.
Zhvillimi ekonomik
Sipas kryeministrit Berisha, ky është viti që zona e euros është në krizë, çka tregon se kërkohet vendosmëri shumë e madhe për të zgjeruar çdo ditë e më shumë frymëmarrjen dhe lirinë ekonomike, të biznesit.
“Ne nuk kemi alternativë tjetër për të mbajtur rritjen ekonomike, për të vazhduar me ambicie programet e projektet tona, përveçse përformancën ekonomike. Nëse lexohet me kujdes ligji i koncesioneve, kjo kërkon që duhet të plotësohet me urgjencën më të madhe me ligjin e partneritetit publik. Nëse vështrojmë potencialet e mëdha që kemi, ne këtë vit mund të tejkalojmë qartësisht, pavarësisht nga kriza në rajon, objektivat tona ambicioze”, vlerësoi Berisha.
Për këtë arsye, kryeministri Berisha bëri thirrje që “të dërgojmë mesazhe se në këtë vend investohet, se ky është një vend parajsë për investimet e huaja dhe të reja”.
Por duke trajtuar hapat me të cilat është zhvilluar vendi, kreu i qeverisë risolli në kujtesë dhe qëndrimin kritik të opozitës përgjatë kësaj periudhe. “Në një kohë lirie, janë të gjitha hapësirat që disa njerëz të nxijnë gjërat. Imagjinoni sa herë e kanë përdorur fjalën krizë në këto 5 vite”, nënvizoi ai.
Por përkundrejt këtij qëndrimi, kryeministri Berisha vlerësoi se “asnjë komb në histori nuk ka dalë nga varfëria si ne, e të zhvillohet si ne”.
Bota Sot
Përgjigju Duke Cituar
Postuar më parë nga Marinari
Krijoni Kontakt