Kombëtarja Shqiptare

[Qyfyre]

De Biasi shpall listen per Moldavine

Erjon Dushku, Erjon Vucaj dhe Renato Arapi janë tri prurjet e reja të trajnerit Xhani de Biazi në Kombëtaren shqiptare. Lajmi bëhej i ditur nga burime të sigurta në Federatën Shqiptare të Futbollit, si dhe gjente konfirmim edhe nga drejtuesit e tri klubeve, ku këta tre lojtarë aktivizohen aktualisht.

Kjo është zyrtarizuar mesditën e së shtunës edhe përmes publikimit të listës së kuqezinjve të thirrur nga ana e De Biazit për miqësoren e 15 gushtit në Tiranë, ndaj Moldavisë. Ndërkohë, kemi edhe një prurje tjetër të re, lojtar që nuk ka luajtur më parë për kuqezinjtë, sikundër dy të parët (Arapi ka qenë një herë me Kombëtaren në miqësoren ndaj Argjentinës, por ajo ndeshje nuk ka qenë zyrtare dhe nuk njihet nga FIFA), i cili luan në kampionatin shqiptar të futbollit. Ai është shkodrani i Lacit, Erjon Vucaj.

Rikthim në kombëtare i Ledian Memushajt, që luan me Leçen në Itali, por nuk mbetet jashtë listës edhe Edgar Cani, pavarësisht se është pa skuadër. Ai, së bashku me Bogdanin dhe Salihin do të jenë pjesë e repartit ofensiv për këtë miqësore, ndërsa ka mbetur jashtë elbasanasi Armando Sadiku.

Dy portierë ka grumbulluar italiani i pankinës kuqezi për testin gjeneral miqësor para startit të fushatës kualifikuese për Botërorin 2014, dy kosovarët Samir Ujkani dhe Etrit Berisha. Nuk figuron në këtë grumbullim Migjen Basha, pavarësisht se atij i kanë nisur procedurat për paisje me pasaportë shqiptare. Ndoshta pritet përgjigjia përfundimtare e FIFA-s, që ta lejojë kosovarin të luajë me kuqezinjtë, kur dihet se ka provuar të veshë më herët fanellën e Zvicrës U-21.

Erjon Dushku, Renato Arapi dhe Erjon Vucaj, të tre nga kampionati shqiptar, kanë arritur të bindin trajnerin De Biazi me lojën e tyre, kryesisht gjatë pjesës së dytë të sezonit të shkuar, ndërsa shkodrani i Laçit në angazhimin që pati me Skënderbeun në dy ndeshjet e “Champions League”. Për qendërmbrojtësin bardheblu, italiani është bindur pas ndeshjes finale të Kupës së Shqipërisë ndaj Skënderbeut, në maj të këtij viti. Dushku zhvilloi një nga takimet e tij më të mira, duke bërë që De Biazi të krijonte një ide më të qartë për të.

Ndërsa për Arapin, ajo që vendosi ishte takimi i parë i Ligës së Kampioneve, mes Skënderbeut dhe Debreçenit, ku korçarët fituan 1-0. Duke pasur edhe mungesa në të majtë të mbrojtjes (nuk është Kristi Vangjeli), tekniku italian ka menduar që t’i japë një shans kavajasit të korçarëve. Në prag të ndeshjeve zyrtare të shtatorit për kualifikimet e Botërorit 2014 (më 7 shtator luajmë ndaj Qipros në Tiranë dhe më 11 luajmë në Luzern ndaj Zvicrës), De Biazi kërkon të konsolidojë grupin, ndaj edhe përballja me Moldavinë do të shihet si testi i vërtetë i kuqezinjve.

Tekniku nuk ka lënë pa grumbulluar edhe Hamdi Salihin, paçka se ky i fundit gjatë këtij muaji është tejet i impenjuar te DC Junajtit në kampionatin amerikan (shto këtu edhe largësinë SHBA-Shqipëri dhe lodhjen nga udhëtimi), as Edgar Canin, ende pa ekip, por nuk u ka bërë vend në këtë ndeshje Gjergji Muzakës dhe Franc Veliut. Që të dy këta lojtarë pjesë e Flamurtarit. I pari prej kohësh lider i kuqezinjve të Vlorës, i graduar edhe kapiten i tyre, ndërsa i dyti i mbërritur së fundi në qytetin bregdetar, pasi e mbylli eksperiencën dyvjecare me Skënderbeun.

Në fakt, as njëri, as tjetri nuk kanë qenë pjesë e titullarëve kuqezinj në të shkuarën, por kontigjent i kombëtares po. Mbrojtësi vlonjat shihej si një element premtues për qendrën e mbrojtjes së Shqipërisë, por mesa duket ka qenë forma e mirë sportive e lezhjanit të Tiranës, Erjon Dushku, që e ka eklipsuar, madje edhe e ka lënë tashmë jashtë kombëtares. I njëjti fat e ka ndjekur edhe Gjergji Muzakën.

Po ashtu, në këtë miqësore nuk ka vend as për Gilman Likën, shkodranin e spikatur te bardheblutë dhe njëri ndër më të mirët e kampionatit shqiptar. Rrethi i lojtarëve të Superiores, që ftohen në kombëtare, është ngushtuar nga De Biazi (janë vetëm katër të tillë: Erjon Dushku, Sabien Lilaj, Renato Arapi dhe Erjon Vucaj), i cili, sikurse mund të hamendësohet, beson më tepër tek elementët që luajnë jashtë vendit dhe do bazohet pikërisht tek ata në ndeshjet kualifikuese, që startojnë fillimin e muajit të ardhshëm.

Lista anti-Moldavi

1 Samir Ujkani 05.07.1988 Palermo
2 Etrit Berisha 10.03.1989 Kalmar
3 Lorik Cana 27.07.1983 SS Lazio
4 Armend Dallku 16.06.1983 Vorskla Poltava
5 Erjon Dushku 25.02.1985 KF Tirana
6 Andi Lila 12.02.1986 PAS Jannina
7 Mergim Mavraj 09.06.1986 SpVgg Greuther Furth
8 Renato Arapi 28.08.1986 SK Skenderbeu
9 Sabien Lilaj 10.02.1989 SK Skenderbeu
10 Odise Roshi 22.05.1991 FSV Frankfurt
11 Jahmir Hyka 08.03.1988 Luzern
12 Emiljano Vila 12.03.1988 PAS Jannina
13 Ledjon Memushaj 07.12.1986 US Lecce
14 Ansi Agolli 11.10.1982 Qaraback
15 Hair Zeqiri 11.10.1988 Rizespor
16 Ervin Bulku 03.03.1981 Sepahan
17 Erjon Vucaj 25.12.1990 Laci
18 Elis Bakaj 25.06.1987 Chernomorets Odessa
19 Hamdi Salihi 19.01.1984 DC United
20 Edgar Çani 22.07.1989 Pa skuader
21 Erjon Bodgani 14.04.1977 Siena

[roni_s]

http://www.indeksonline.net/?FaqeID=3&LajmID=26442

[MaDaBeR]

Ndeshja e kombetares rrezikohet qe te mos luhet fare ose t'i nderrohet orari, per arsye se stadiumi Kombetar "Qemal Stafa" ka detyrime te pashlyera ndaj kompanise CEZ.

Turp nese do te ndodhe kjo me te vertet. Dhe njehere ne tregojme nivelin teper te ulet organizativ dhe qe jemi akoma te paafte per te menxhuar ne menyren e duhur qofte dhe nje ndeshje futbolli. Precedentet, qe nga uji i ftohte i dusheve e deri ketu tek energjia elektrike, nuk kane te mbaruar per ne. Gjera qe ne vende dhe me te vogla se Shqiperia kane mare zgjidhje me kohe... S'di çte them, njerezit ketu po me zhgenjejne çdo dite e me teper...

[freeopen]

Sa ekip skarso qe kemi booooooooo bo!

[Qyfyre]

Shqiperia zhgenjen me loje, barazon 0-0

Një Shqipëri pa ide dhe me probleme në organizimin e lojës nuk shkon më shumë se barazimi pa gola në miqësoren e mbrëmshme ndaj Moldavisë qe u luajt ne stadiumin "Qemal Stafa". Premiera e Xhani De Biazit në një ndeshje shtëpiake tregoi edhe një herë tjetër se kuqezinjve u mungon fantazia në mesfushë. Edhe pse italiani eksperimentoi me futjen në lojë nga minuta e parë të Memushajt, sërish skuadra u duk e mefshtë, veçanërisht gjatë 45 minutave të para.

Një tjetër provë që stonoi, ishte ajo e dyshes së sulmit Çani-Salihi. I pari nuk arriti të shfrytëzonte dy raste të pastra, ndërsa i dyti, me shumë kilometra udhëtim mbi shpinë, ishte larg asaj që pritet. Goli mbeti thjesht në tentativë përballë një kundërshtari modest si Moldavia.

Kjo e fundit, duke parë që edhe Shqipëria ishte në një ditë të errët, guxoi në disa momente për ta goditur portën kuqezi. Ajo që zhgënjeu më shumë në këtë miqësore ishte pa dyshim mënyra se si kuqezinjtë e kërkonin golin.

Reparti i mesfushës, veçanërisht qendra e saj, çaloi jo pak. De Biazi u mundua të gjente alternativa të tjera për të arritur te goli, por as loja nga krahët në pjesën e dytë nuk solli ndonjë ndryshim të madh.

Nje faktor qe nuk ndihmoi kombetaren tone ishte dhe gjendja e tapetit te stadiumit kombetar, por edhe kundershtari qe luajti kryesisht ne mbrojtje duke lene shume pak hapesira per kuqezinjte.

Me risinë e kalimit të Lilës në të majtë të mbrojtjes (De Biazi provoi këtë alternativë, pasi Agolli është i pezulluar për ndeshjen eliminatore ndaj Qipros), Memushajn në rolin e një fantazisti dhe aktivizimin për herë të parë në sulm të dyshes Salihi-Çani, Shqipëria e nisi ndeshjen me një rast të pastër për gol. Mirëpo, goditja e dobët e Çanit ishte thjesht një shkëndijë, pasi minutat e tjera treguan një Shqipëri që nuk funksiononte në mesfushë.

Me Bulkun jo në 100% të formës (nuk ka debutuar ende te ekipi i ri Sepahan) dhe Memushajn që nuk arriti të orientohej në fushë, skuadra e kishte të vështirë të organizohej në sulm. Madje, Çani dhe Salihi detyroheshin të ktheheshin shumë pas për të kërkuar topin. Disa dalje të shpejta të Bakajt dhe Vilajt nga krahët ishin pak për kuqezinjtë. Deri në minutën e 35-të loja u bë shumë e mërzitshme. Një goditje e fuqishme e Bulkut dhe, më pas, një rast i humbur i Çanit, sikur dha shpresa për një pjesë të dytë më të mirë se ajo e para.

Loja rinis me tri ndryshime të menjëhershme te kuqezinjtë. De Biazi largon Ujkanin, Memushajn dhe Çanin, për të futur në lojë Berishën, Roshin dhe Bogdanin. Mesfushori dhe sulmuesi mundohen t’i japin gjallëri lojës. Megjithatë, duhet të kalonin 12 minuta nga fraksioni i dytë, që të regjistrohej rasti më i rrezikshëm. Një kombinim tresh Roshi-Bulku-Bogdani sjell një goditje spektakolare të këtij të fundit, por këtë herë është portieri që grushton, duke i mohuar golin shënuesit më të mirë të Shqipërisë.

Moldavia mundohet të mos lërë hapësira, në një kohë që kuqezinjtë e kanë të vështirë ta qarkullojnë lirshëm topin. De Biazi e përqendron lojën nga krahët, teksa ndryshon skemën, duke i besuar vetëm Bogdanit në majë. Futja e Zeqirit dhe Agollit e bën më të rrjedhshme lojën, por përsëri goli mungon. Në fund, një rast i humbur nga mbrojtësi Mavraj konfirmon ditën “jo” të kuqezinjve.

Shqiperi - Moldavi 0-0

SHQIPËRIA (4-4-2): Ujkani (E.Berisha 46′), Dallku, Cana, Mavraj, Lila, Vila (Agolli 74′), Bulku, Memushaj (Roshi 46′), Bakaj (Hyka 53′), Salihi (Zeqiri 62′), Çani (Bogdani 46′). Trajner: Xhani De Biazi
MOLDAVIA (4-4-2): Namasko, Racu, Bulgaru, Armas, Epureanu, Suvorov (Doros 56′), Gatcan, Onica, Patras (Dedov 76′), Kovalciuk (A.Paskenko 88′), Pikusiak (Oksenikov 60′). Trajner: Ion Caras
KARTONË TË VERDHË: Mavraj 89′/ Patras 59′
GJYQTARE: Yunus Yildirim; Baki Tuncay Akkin, Serkan Gencerler (Turqi)

[goldian]

QOFTE ME SKUADRA QOFTE ME KOMBETARE KOT SHPRESOJME
ende kemi lojtar qe skane skuader pffff

[MaDaBeR]

Per sa kohe do te kemi nje kampionat medioker, me skuadra medioker, me trofe te paravendosur dhe nje organizim mjeran, Kombetarja do te jete e tille. Iku koha kur pati nje kapercim nga diktatura dhe disa talente dolen jashte e u sterviten e fituan eksperience andej. Tani eshte koha qe duhet investuar ne vend, pasi ne krahasim me vitet 90, futbolli europian ka pesuar ndryshime rrenjesore si ne te luajtur ashtu dhe ne organizim. Ndersa te ne? Te ne eshte i njejti nivel, mos te them qe ndohta ca me keq.

[MaDaBeR]

Kukeli, nga futbolli i rrugës te kombëtarja e Shqipërisë

Një histori sakrificash, si e shumë emigrantëve kosovarë të pas viteve ’90-të, por që në fund ka dhënë frytet e ëndërruara. Dikur ai luante në finalen e Botërorit të futbollit në rrugë, ndërsa sot është një lojtar i Kombëtares shqiptare. Dhe një gjë e tillë shihet sa me skepticizëm, por edhe me ironi e me nota fyese nga ana e mediave zvicerane. Bëhet fjalë për mesfushorin e Zyrihut, Burim Kukeli, i cili ka arritur që të bindë trajnerin e ekipit tonë përfaqësues për ta marrë në skuadër për ndeshjen ndaj Qipros dhe Zvicrës. “Mesfushori kosovar, Burim Kukeli, luante dikur përkrah yllit, tashmë të Zvicrës, Gokhan Inler. Të dy ishin pjesë e skuadrës së të rinjve te klubi Solothurn e më pas edhe te klubi Olten. Madje, në vitin 1999-të, së bashku kishin luajtur edhe në finale të Botërorit të futbollit të rrugës. Tani të dy kanë gjasa të gjenden sërish në të njëjtën fushë, por kësaj radhe si kundërshtarë”, – shkruan gazeta zvicerane “Blick”. Në serinë prej disa shkrimesh me ton vajtues lidhur me “mangësinë e patriotizmit zviceran” të disa futbollistëve shqiptarë të Zvicrës, kjo media ka shtuar edhe një tjetër shkrim, duke ironizuar këtë herë me lojtarin e Zyrihut. Burim Kukeli mund të bëhet, sipas këtij uebsajti, personi që “do t’i dalë në rrugë” kombëtares zvicerane në ndeshjen Zvicër- Shqipëri, e programuar për më 11 shtator në Luzernë. Kukeli, i cili, siç shkruan blick.ch, është “më zviceran se shumë disa lojtarë që tashmë luajnë për helvetët si Shaqiri, Xhaka, Behrami etj”, sepse ai ka ardhur në këtë vend në moshën 4- vjeçare. Ndërkohë, një ditë më parë mediat zvicerane hulumtonin në të shkuarën e Kukelit, duke u tallur disi me faktin se gjatë kohës kur ai luante në futbollin amator kishte punuar edhe si pjatalarës. Gjithsesi, përpos “inateve” që shfryjnë së fundmi mediat helvete, vetëm lojtari ka pohuar në një prononcim për “sport.info” se është i lumtur që do e veshë fanellën kuqezi. Kujtojmë se aktualisht ai ka pasaportë kosovare dhe zvicerane, megjithëse prej ditësh Federata Shqiptare e Futbollit ka çuar në presidencë dokumentet për pajisjen e tij me nënshtetësi dhe pasaportë shqiptare. Një gjë e tillë pritet të konkludohet para ndeshjes ndaj Qipros, kështu që Kukeli pritet të jetë në dispozicion të trajnerit Xhani de Biazi.

Panorama Sport

[Qyfyre]

Biletat, në shitje vetem tre ditë, 50 mijë tribuna

Kombëtarja, dje në mbrëmje, ka nisur përfundimisht aventurën e eliminatoreve të Botërorit Brazil 2014, me përgatitjet për dy ndeshjet e Grupit E kundër Qipros më 7 shtator dhe kundër Zvicrës më 11 shtator. Por një çështje për të mos u nënvlerësuar është edhe fakti, se ndaj qipriotëve pritet që kuqezinjtë të luajnë me mbështetjen e një numri jo të madh tifozësh në stadiumin “Qemal Stafa”.

Sigurisht, kundërshtari është Qipro dhe interesi ndoshta mund të mos jetë si ai kundër yjeve të Holandës, Francës apo Portugalisë, që kanë shkelur së fundmi në impiantin e vetëm kombëtar të vendit tonë. Gjithsesi, kjo është ndeshja e hapëse e Kombëtares në këto eliminatore të Botërorit 2014, dhe prania e tifozëve të shumtë do të ishte një faktor më shumë për të karikuar skuadrën, në kërkim të një starti të mirë me fitore.

Federata Shqiptare e Futbollit thekson se, nga ana e saj, i ka marrë të gjitha masat që biletat të mos mungojnë në treg. “Nesër (sot) dalin në shitje biletat për ndeshjen Shqipëri-Qipro, – u shpreh dje zëdhënësi për shtyp i këtij institucioni, Lirim Zalla. Jemi mobilizuar maksimalisht, që tifozët të kenë mundësi të shumta se ku të mund të gjejnë bileta për këtë sfidë. Ato do të shiten në të gjitha agjencitë ‘Western Union’, por edhe në të gjitha pikat e shitjeve të gazetave”.

Këtë herë nuk do të ketë bileta “online”, sepse, sipas Zallës, është prishur marrëveshja me kompaninë që u ka mundësuar fansave kuqezinj blerjen e tyre në mënyrë elektronike. Por, në fakt, a janë të mjaftueshme vetëm tri ditë, nga data 4 deri më 7 shtator, për joshjen e adhuruesve të Kombëtares, sidomos për një ndeshje, ku kundërshtari nuk ka një emër të madh që garanton dyndje të tifozerisë.

Në fakt, kjo është në traditën e FSHF-së për ndeshjet e Kombëtares, pasi kjo procedurë është ndjekur thuajse gjithnjë. Por nëse marrim parasysh shembullin e Zvicrës për ndeshjen që do të luajë ndaj Shqipërisë më 11 shtator (ku do të jemi ne skuadra që nuk ngjall interes për fansat zviceranë), atëherë duhet të themi se afati i shkurtër është një pengesë për thithjen e sa më shumë tifozëve në “Qemal Stafa”. Federata zvicerane, e cila afërmendsh ka një organizim shumë herë më të mirë se sa kjo e jona, i ka hedhur në treg biletat për sfidën e 11 shtatorit prej më shumë se dy javësh, aq sa na ka dhënë mundësinë edhe ne shqiptarëve të ankohemi për diferencimet që ajo po bën me favorizimin vetëm të zviceranëve, që të shmangë praninë e shumë fansave kuqezi në stadiumin e Lucernës.

Jo pak problem mbeten edhe çmimet jo shumë të arsyeshme. Ato nuk janë ulur aspak, ndonëse është ndeshja e parë dhe me një kundërshtar jo me shumë emër. Biletat në tribunën kryesore do të kushtojnë 50 mijë lekë të vjetra (32 euro), ndërsa karshi, në tribunën D2, që përkon në qendrën e fushës, bileta do të ketë çmimin 10 mijë lekë të vjetra (7 euro). Dy tribunat e tjera ballore, D1 dhe D3 do të kenë çmimin 7 mijë lekë të vjetra (3 euro), ndërsa çmim modest dhe i pranueshëm është vendosur për tribunat anësore, pas portave, vetëm 2 mijë lekë (pak më shumë se 1 euro).

[Qyfyre]

Paguhet fatura, Kombëtarja ka drita

Më në fund mbërrin një lajm i mirë. Ndeshja zyrtare për eliminatoret e Botërorit 2014 mes Shqipërisë dhe Qipros do të luhet në një “Qemal Stafa” të ndriçuar jo më nga drita e gjeneratorit të FSHF-së, por nga energjia elektrike e ofruar nga CEZ-i.

Gjithçka është rikthyer në normalitet vetëm pas zgjidhjes së konfliktit mes kompanisë çeke të shpërndarjes së energjisë elektrike dhe FSHF-së, i cili bëri që të luhen me gjenerator miqësorja Shqipëri-Moldavi dhe finalja e Superkupës së Shqipërisë mes Tiranës e Skënderbeut.

Në fakt, CEZ nuk ka bërë asnjë lëshim nga sa kishte kërkuar më parë. Por sikurse është mësuar dje nga burime pranë kësaj kompanie, palët kanë mundur të gjejnë gjuhën e përbashkët vetëm, pasi është shlyer përfundimisht borxhi prej 756,934.36 lekësh bashkë me kamatën, të gjitha fatura të papaguara përgjatë viteve 2008, 2010, 2011, 2012.

Shlyerja

Palët kanë mundur të gjejnë gjuhën e përbashkët gjatë ditës së djeshme vetëm pasi është shlyer përfundimisht borxhi prej 756,934.36 lekësh bashkë me kamatën