LDK-AAK, dallavere në shesh

[Kosovelli]

11 nëntor 2011 - Tenderi prej afro 250 mijë eurosh, për ndërtimin e sheshit “Skënderbeu” në Pejë, i ishte dhënë nga kjo komunë, që udhëhiqet nga AAK-ja, kompanisë “Vraga” të Asdren Gashit, vëlla i deputetit të LDK-së, Arben Gashi, ani pse sipas Ligjit për Parandalim e Konflikt të Interesit, ai e kishte të ndaluar që të mbante 100 për qind të aksioneve në një kompani private, sa ishte zyrtar shtetëror. Siç ishte nisur i jashtëligjshëm, projekti ka vazhduar i tillë. Tash, Auditori Gjeneral ka gjetur një sërë shkeljesh.

Lidhjes Demokratike të Kosovës (LDK) dhe Aleancës për Ardhmërinë e Kosovës (AAK) nuk i ka funksionuar vetëm koalicioni në qeverisje në nivel qendror. Ani pse kanë kaluar disa vite që më nuk janë në koalicion, atyre u ka ecur mbarë “koalicioni për tenderë” në Komunën e Pejës, e cila udhëhiqet nga Ali Berisha i AAK-së dhe atë duke shkelur shumëfish ligjin.

Dallaveret në këtë drejtim, atyre ua ka nxjerrë në shesh Zyra e Auditorit të Përgjithshëm (ZAP), në projektin për rregullimin i sheshit “Skënderbeu” në qytetin e Pejës. ZAP gjeti aty një sërë shkeljesh, që ishin bërë nga kompania “Vraga”, pronë e Asdren Gashit, zyrtar i lartë në Ministrinë e Punëve të Jashtme (MPJ) dhe vëlla i deputetit të LDK-së, Arben Gashi.

[Kosovelli]

Auditori: Komuna e Pejës keqpërdori taksat e donacionet

Prishtinë, 8 nëntor - Komuna e Pejës ia ka dhënë një kompanie të papërgjegjshme tenderin në vlerë prej mbi 240 mijë eurosh, ka konstatuar Zyra e Auditorit të Përgjithshëm. Fondet për rregullimin e sheshit “Skënderbeu” në Pejë ishin siguruar nga Qeveria e Kosovës dhe UN-HABITAT-i, një agjenci e Kombeve të Bashkuara dhe i ishin dhënë nga Zyra e Prokurimit e Komunës së Pejës kompanisë “Vraga”, e cila sipas auditorëve nuk i kishte plotësuar kriteret për të fituar këtë tender publik. Auditimi i veçantë, sipas raportit të publikuar në faqen zyrtare të ZAP-it, ishte kryer pasi që kjo ishte kërkuar nga vetë Komuna e Pejës, pasi që donatori nuk do të lëshonte pagesën e fundit në vlerë prej mbi 7 mijë eurosh pa u bërë një auditim i projektit. Auditorët kanë rekomanduar agjencinë UN-HABITAT që të mos bëjë pagesën e fundit pa u zbatuar kontrata në tërësi.

“Rekomandojmë donatorin UN-HABITAT që të mos paguaj situacionin e fundit pa u siguruar se pllakat e plasaritura janë riparuar dhe se logo, numrat, dhe shkrimi janë vendosur mbi tabelën me figurat e shahut sipas marrëveshjes”, thuhet në këtë raport të auditimit.

Përkundër këtyre shkeljeve, një komision përgjegjës i projektit, më 24 qershor të këtij viti kishte konstatuar se puna ishte kryer në pajtim me kontratën. Komuna nuk ka kundërshtuar gjetjet e auditimit sipas këtij raporti, por është zotuar se do të zbatojë rekomandimet e dhëna nga ZAP-i.

Auditimi i kryer prej datës 20 deri më 22 shtator të këtij viti ka konstatuar po ashtu se oferta e kompanisë “Vraga”, e cila ishte vlerësuar nga Komuna e Pejës si më e favorshme në fakt ishte e papërgjegjshme.

Edhe përkundër moskryerjes së punëve nga kjo kompani, Komuna e Pejës nuk kishte aplikuar penallti ashtu siç përcaktohet në kontratën mes palëve.

“Ende mbetet një numër pikëpyetjesh në lidhje me dhënien e kontratës kompanisë ‘Vraga’ (gjerësisht në “Kohën Ditore”).