1 tetor 2011 ora 15:00 jeni te mirepritur ne fillimin e shkolles shqipe ne Parma.

[juelda]

FILLIMI I VITIT SHKOLLOR 2011-2012 DHE OBJEKTIVAT QË DO TË REALIZOHEN
pubblicata da Shkolla shqipe - "Scanderbeg Parma" - Itali il giorno giovedì 29 settembre 2011 alle ore 12.46

FILLIMI I VITIT SHKOLLOR 2011-2012 DHE OBJEKTIVAT QË DO TË REALIZOHEN

Shkolla shqipe e Parmës fillon vitin e ri shkollor në datën 1 tetor 2011.

Kjo shkollë hyn tashmë në vitin e tretë të jetës së saj. Ajo nis misionin e saj fisnik me parimin e qartë: Gjuha shqipe është boshti i ruajtjes së identitetit kombëtar.

Sivjet mbyllëm vitin shkollor me një rritje cilësore dhe sasiore të saj, 23 nxënës morrën dëftesën e merituar të frekuentimit të shkollës. Kjo në sajë të përvojës së vitit të kaluar por edhe të organizimit me të mirë të mësimdhënies, vënies së objektivave të qarta si dhe në sajë të bashkëpunimit shoqatë-mësues-prindër.

Të rejat e këtij viti mësimor kanë të bëjnë me organizimin më të mirë të punës, shtimin e një ambjenti tjetër i cili do të bëjë të mundur zhvillimin e mësimit në dy klasa të veçanta.

Gjithashtu dhe shtimi i personelit mësimdhënës me një mësuese te re si dhe përsosja e programeve mendojmë se do të rritë ndjeshëm nivelin e mësimdhënies për këtë vit shkollor.

-Shkolla fillon në 1 tetor 2011 dhe mbaron me festën e 1 qershorit dhe ndarjen e dëftesave shkollore.

-Mësimi zhvillohet ditën e shtunë në orën 15:30 deri 17:30. Në orën 16:30 fëmijët pushojnë 5 min e hanë zemër.

-Çdo prindër që sjell fëmijën në shkollë duhet ta dorëzojë atë tek mësuesi i radhës, dhe po nga ai do të marrë pas mësimit.

-Mësimi është falas dhe mësuesit janë vullnetarë.

-Mjetet mësimore për fëmijët dhe ambjenti shkollor do të sigurohen nga shoqata.

Struktura:

-Nga ana strukturale shkolla ka dy klasa. Në njërën klasë do të mësohen njohuritë elementare të gjuhës shqipe , duke filluar nga alfabeti. Këtu do të bëjnë pjesë fëmijë të moshave të vogla si dhe ata fëmijë që pavarësisht nga mosha nuk dinë të shkruajnë dhe lexojnë në shqip. Kjo klasë do të drejtohet nga dy mësueset e ciklit të ulët Alma Babamusta e Anora Zuna.

Në klasën tjetër do të mësojnë të gjithë fëmijët që dinë të flasin mirë shqip dhe kanë nevojë të thellojnë njohuritë në gjuhë, lexim, histori, gjeografi etj. Në këtë klasë do të japin mësim Brunilda Hoxha gjuhë shqipe, Anila Kadija letërsi, Durim Lika histori-gjeografi, Elvira Lika muzikë e tradita shqiptare.

Programi mësimor:

Programet lëndore do të hartohen nga mësuesit përkatës. Këtu do të kihet parasysh ndërtimi i temave mësimore cilësore dhe tërheqëse, duke përdorur mjete bashkëkohore dhe në përshtatje me nivelin e fëmijëve tanë. Boshtin kryesor do ta zërë gjuha shqipe me 30 orë, letërsia shqipe me 16 orë të njohurive , histori-gjeografi 8 orë ,muzikë e tradita shqiptare 8 orë.

Përveç programit mësimor që do të zbatohet me përpikmëri, një vend të rëndësishëm gjatë vitit shkollor do të zënë dhe aktivitetet.

-Fëmijët do të festojnë bashkë me të rriturit festën e flamurit, duke u paraqitur me një program të veçantë nën drejtimin e mësuesve të tyre.

-Festat e fundvitit ku do të jenë të pranishëm dhe prindërit. Haresë së festës do t’i shtohen dhe dhuratat për fëmijët.

-Festa e mësuesit dhe festa e nënës.

-Festa e madhe e 1 qershorit që mbyll dhe vitin shkollor me dhënien e dëftesave.

Përveç këtyre një nga objektivat e këtij viti është ngritja e grupit teatral, ku do të aktivizohen të gjithë fëmijët.

-Eskursione në pika turistike, vizita në familje shqiptare ku fëmijët dëgjojnë në shqip rrëfenjat e të rriturve për Shqipërinë, etj.

-Ngritja e këndit të traditës popullore shqiptare në shkollë, si dhe forcimi dhe vazhdimësia e këndit të bibliotekës.

Një vëmendje e veçantë do t’i kushtohet relacionit me prindërit. Janë planifikuar 3 diskutime të hapura me prindërit gjatë vitit, përveç kontaktit të vazhdushëm për mbarvajtjen e fëmijve.

Pra, synimi ynë final për vitin e ri shkollor është: Një mësimdhënie cilësore dhe bashkëkohore e përshtatur me kushtet tona të emigracionit.

VIDEO NE YOUTUBE: http://www.youtube.com/user/skanderbegparma


Adresa e shkolles:

Piazzale Pablo

43126 Parma - PR

Tel: +39 0521291583

Cell: +39 3470815900