Arrestohet në Vlorë Albino Prudentino, një nga krerët e mafies italiane

[Albo]

FSHIHEJ NE VLORE-Mafiozi italian,dialogu me RENEA para arrestit

OPERACIONI "KALIPSO"/Albino Prudentino, 59 vjeç, u arrestua në banesën e tij në Vlorë, pas një operacioni të forcave speciale të policisë shqiptare, koordinuar nga Prokuroria e Përgjithshme, Shërbimi Informativ Shqiptar dhe Prokuroria e Antimafias në Leçe të Italisë. Një grup prej 23 oficerësh të Repartit të Neutralizimit të Elementëve të Armatosur, u nis pak para mesnatës në drejtim të Vlorës, për realizimin e aksionit të koduar “Kalipso”. Policia shqiptare u mbështet edhe nga oficerët e Antimafias italiane, që morën pjesë në arrestimin e të shumëkërkuarit Albino Prudentino. Rreth orës 01:00 pas mesnate, forcat speciale rrethuan tri pallate, pranë njëri-tjetrit në bregdet, në afërsi të Shkollës së Marinës, në Vlorë. Bosi i “Sacra Corona Unita-s”, që ishte edhe shënjestra e policisë, ndodhej në apartamentin e tij në katin e tretë të pallatit. Në katin e parë të kësaj ndërtese ndodhet restoranti “Piazza Italia” dhe një piceri, në pronësi të 57-vjeçarit. Ndërkohë që në katin e dytë ishte një ambient me kompjuterë pokeri, që së shpejti do të kthehej në kazino. Asnjë prej oficerëve që morën pjesë në operacion nuk ka qenë në dijeni se kush ishte personi që po arrestohej, me përjashtim të drejtuesit të operacionit në repartin RENEA dhe shefes së Antimafias në Prokurorinë e Leçes, e cila u ndodh personalisht në Shqipëri për të ndjekur aksionin. “Goditja” ishte llogaritur të kryhej në orën 04:00 dje në mëngjes, pasi në të njëjtën orë do të ekzekutoheshin edhe 10 urdhër-arreste të tjera të Gjykatës së Leçes. Shtatë prej këtyre arresteve u ekzekutuan në Itali dhe një në Tajlandë. Të gjithë personat e kërkuar u kapën në befasi, pa pasur mundësi të komunikonin me njëri-tjetrin.

Arrestimi i mafiozit në Vlorë

Në orën 03:50, skuadra speciale e RENEA-s, me kaska në kokë dhe armë të drejtuar në derën e apartamentit të Albino Prudentinos, ishte në gatishmëri për të ndërhyrë. Drejtuesi i operacionit i bie ziles së apartamentit dhe brenda pak sekondash dera hapet nga bosi i “Sacra Corona Unita-s”, i veshur me pizhame, i cili në momentin kur pa tytat e armëve që i ishin drejtuar u shtang për disa sekonda. “Ka ndonjë problem?”. Këto ishin fjalët e vetme në gjuhën shqipe, me të cilat ai iu drejtua policisë. “Jemi policia. Si quheni?” Vazhdon dialogun drejtuesi i operacionit. “Albino Prudentino...”, vjen menjëherë përgjigja e italianit dhe më pas ndërhyn policia: Jeni i arrestuar. Prudentino vendos të kërkojë disa shpjegime në lidhje me vendimin për ta arrestuar, pyetur sërish drejtuesin e operacionit. “Kam ndonjë problem nga drejtësia shqiptare? Keni urdhër arresti?”. “Nga drejtësia shqiptare jo, por nga ajo e vendit tuaj, po”, ka qenë përgjigja e policisë. Drejtuesi i aksionit ka treguar dokumentin: Urdhëroni urdhër-arrestin”. Në kohën kur Prudentino vështronte urdhër-arrestin në ngarkim të tij, policia bën gati prangat dhe një grup tjetër futet për të kontrolluar banesën. Bosi i “Sacra Corona Unita-s” nuk bëri asnjë rezistencë, shpjeguan burimet, por u nis përkrah forcave speciale për të zbritur shkallët e pallatit. Pas disa hapash u kujtua për një kërkesë të fundit. “A mund të kthehemi në shtëpi, të marr ilaçet e mia të diabetit?”. I kapur nga krahët dhe i prangosur nga oficerët e policisë shqiptare, Prudentino lejohet të futet edhe një herë në apartamentin e tij, merr ilaçet e më pas shoqërohet me makinat e policisë deri në Drejtorinë e Policisë së Tiranës, ku aktualisht pret vendimin për ekstradimin.

Të arrestuarit

1. Albino Prudentino, 59 vjeç
2. Giuseppe Ercole Penna, 36 vjeç
3. Bruno Bembi, 48 vjeç
4. Nicola Nigro, 36 vjeç
5. Giovanni Vicientino, 48 vjeç
6. Maurizio Vicientino, 34 vjeç
7. Angelo Cavallo, 38 vjeç
8. Tiziano Maggio, 33 vjeç

Djali i mafiozit,shtëpi në Vlorë

Forcat e policisë, të informuara edhe për vendndodhjen e djalit të bosit të “Sacra Corona Unita-s”, kanë ndërhyrë në të njëjtën kohë edhe në vilën e Albino Prudentinos, djali i të arrestuarit. Ndaj tij nuk kishte asnjë mandat arresti, por policia ka kryer kontroll në banesën e tij në Vlorë, për të verifikuar nëse mund të gjente armë, lëndë narkotike apo ndonjë objekt tjetër të jashtëligjshëm. Vila e djalit të mafiozit ndodhet edhe ajo në zonën e Ujit të Ftohtë, në Vlorë, pranë pallatit ku banonte 59-vjeçari. Djali i të shumëkërkuarit jetonte aty me gruan dhe fëmijët e tij prej disa vitesh, pasi kishte ndërtuar vilën luksoze.

Bllokohen pronat

Menjëherë pas arrestimit të 59-vjeçarit me shtetësi italiane në qytetin e Vlorës, policia shqiptare ka nisur procedurat për bllokimin e pasurive të tij. Sipas burimeve nga policia, shtetasi italian mund të hetohet në Shqipëri për akuzën e pastrimit të produkteve të veprës penale, duke qenë se ka dyshime sipas të cilave ai ka përdorur paratë e aktivitetit mafioz për përfitimin e pronave në Vlorë.

Prudentino, telefonata me Provenzanon

Albino Prudentino, i prangosur dje në Vlorë, ishte arrestuar më parë më 10 janar të vitit 2001, në Athinë të Greqisë. Atëherë ai akuzohej për kontrabandë cigaresh në shifra marramendëse. Hetimet pas arrestimit të tij zbuluan të fshehtat që po kurdiseshin nga klani mafioz puliez i Sacra Corona Unita, për të dominuar veç Pulias edhe zonën e Leçes. Dhe ky fakt u zbulua pas përgjimit të një bisede telefonike të zhvilluar nga i arrestuari në Vlorë, Albino Prudentino me bosin e bosëve të “Cosa Nostra-s”, Bernardo Provenzano. Ky i fundit ndodhet në burgjet italiane, ku ruhet me masa të rrepta sigurie, pas arrestimit 3 vjet më parë. Për 60 vjet ai kishte qenë në kërkim nga policia italiane, duke u konsideruar bosi më i madh i mafias, pas arrestimit të Toto Riina-s.

Panorama

[Albo]

Jeta e mafiozit në Vlorë, superbiznes te “Uji i Ftohtë”

Ai ishte Albino Prudentino, 59 vjeç, një nga njerëzit më të kërkuar në Itali i arratisur nga Leçe dhe i vendosur në qytetin bregdetar të Shqipërisë, ku kishte nisur një jetë të re, plot shkëlqim. Italiani i akuzuar si anëtar i mafias, me zgjuarsi kishte blerë katet e para të pallatit ku ishte vendosur piceria dhe restoranti luksoz, jo më larg se 100 metra nga deti dhe më pak se 50 metra nga rruga kryesore që të shpie tek Uji i Ftohtë. Në katin e parë të pallatit, ndërtim i viteve të fundit, ishte vendosur restoranti, piceria dhe pastiçeria. Në katin e dytë ambienti ishte shfrytëzuar për vendosjen e pajisjeve kompjuterike për videopoker, ndërsa në katin e tretë të pallatit ndodhej apartamenti ku shtetasi italian jetonte me familjen e tij. Aktivitetet e tij në biznes, Albino Prudentino, 59 vjeç i filloi të paktën dy vjet më parë, ndërkohë që në nëntor 2009 hapi dyert për klientët restoranti, piceria dhe pastiçeria. Klientët nuk kanë qenë të shumtë në numër për shkak të çmimeve të larta, por cilësia siç përshkruajnë banorët e Vlorës ka qenë maksimale dhe shërbimi po ashtu sikurse ushqimet, tipik italian. I shumëkërkuari në Itali brenda dy viteve kishte krijuar profilin e një biznesmeni, që më zgjuarsi kishte ikur nga vendi i lindjes dhe ishte vendosur në qytetin e Vlorës për të qenë pranë detit dhe për t’iu përkushtuar një investimi fitimprurës. Shumë prej banorëve të zonës së Ujit të Ftohtë në Vlorë e njohin 59-vjeçarin dhe e përshkruajnë si një biznesmen i zakonshëm. Asnjë dyshim nuk kishte krijuar Albino Prudentino gjatë dy viteve të qëndrimit të tij në qytetin e Vlorës.

Biznesi në Vlorë

Sipas informacioneve të policisë, shtetasi italian Albino Prudentino, ishte i regjistruar në taksa dhe në tatime në qytetin e Vlorës dhe kryente rregullisht detyrimet ndaj shtetit. Pasi ka hyrë në Shqipëri në mënyrë ilegale rreth dy vjet më parë, 59-vjeçari ka investuar fillimisht në blerjen e tri kateve të pallatit, një prej ndërtimeve më të reja dhe më luksoze të zonës. Katin e parë e ka shfrytëzuar për restorant, piceri dhe pastiçeri. Më tej në katin e dytë ishin vendosur në disa salla, makina kompjuterike për lojëra pokeri. Sipas përgjimeve të bëra nga Policia italiane për telefonatat që kryente 59-vjeçari në Vlorë, ka rezultuar se ai po planifikonte ndërtimin e një kazinoje fitimprurëse në katin e dytë të pallatit, sipër restorantit dhe pastiçerisë. Ai u ka thënë disa bashkëpunëtorëve italianë në biseda telefonike se do të investonte në ndërtimin e kazinove, pasi e shikonte si një aktivitet mjaft fitimprurës.


Jeta në Shqipëri

Policia është duke verifikuar dokumentet e blerjes së pronave në Vlorë, por dyshimet janë se të paktën prej tre vitesh, shtetasi italian ka lëvizur rregullisht në Shqipëri. Ai ka hyrë në vendin tonë me identitet të rremë në kohën kur ka blerë ambientet e pallatit ku kishte vendosur biznesin e tij dhe disa muaj më vonë, është kthyer sërish në vendin tonë për të kryer formalitetet, duke marrë në pronësi objektet. I kërkuari si anëtar i mafias ka filluar investimin, duke ndjekur nga afër punimet që kryheshin dhe më pas ka marrë menaxherë dhe personel italian për restorantin dhe pastiçerinë. Gjatë gjithë kohës së qëndrimit të tij në Shqipëri, i shumëkërkuari besohet se ka lëvizur rregullisht për në Greqi e madje edhe në Itali duke përdorur identitet të rremë e duke i shpëtuar kështu ndjekjes së policisë.


“Lojërat e fatit,e jo cigaret sjellin para”

Në vitin 1999 Albino Prudentino është përgjuar teksa fliste me një nga kapot e mafies italiane, Bernardo Provenzano. Nga biseda policia dokumentoi “këshillat” e Provenzanos për të hequr dorë nga kontrabanda e cigareve. “Të ardhurat nga lojërat e fatit dhe video-pokerit të hapin mundësi të reja për trafikun e drogës. Kjo për shkak se këtë veprimtari nuk e njohin shumë njerëz”, kjo është një pjesë e bisedës dhe këshillës që bosi i “Cosa Nostras”, Provenzano, i dha atij të “Sacra Corona Unita”, Prudentinos. Edhe ky i fundit kishte shprehur në këtë bisedë vendimin e tij për të hyrë në aktivitetin e kazinove, duke lënë sipërmarrjet e paligjshme në kontrabandën e cigareve, duke e konsideruar këtë aktivitet më pak fitimprurës se kazinotë.


Klani “Sacra Corona Unita”

Organizata mafioze “Sacra Corona Unita”, ku bënte pjesë edhe i arrestuari i djeshëm në Vlorë, është krijuar në Itali në vitin 1981. Bazat kryesore të saj janë në zonën e Pulias, ndërkohë që influenca kriminale është zgjeruar në disa zona të Italisë. Prokuroria e Përgjithshme tha dje se italiani i kapur në Vlorë akuzohet se ka kryer veprat penale: “Bashkëpunim kriminal të tipit mafioz”, “Trafik droge”, “Grabitje në rrethana rënduese”.

Panorama

[Albo]

Shefja e Antimafias së Leçes, në Tiranë për aksionin “top sekret”

TIRANE – Operacioni për arrestimin e anëtarit të mafias italiane, i cili u kap dje në qytetin e Vlorës është përgatitur në sekret të plotë dhe në një koordinim të pazakontë mes autoriteteve italiane dhe shqiptare. Një prokurore e Antimafias së Leçes ka mbërritur pak ditë më parë në Tiranë dhe ka kërkuar një takim me drejtuesit e Prokurorisë së Përgjithshme. Në këtë takim, prokurori i Leçes ka bërë me dije informacionet sipas të cilave një shtetas italian i shumëkërkuar për krime mafioze ndodhej në qytetin e Vlorës. Prokuroria italiane ka kërkuar bashkëpunim për arrestimin e tij, duke kërkuar konfidencialitet në zbatimin e urdhër-arrestit. Burime nga policia kanë sqaruar dje se vetë shefja e Prokurorisë së Antimafias së Leçes, ka mbërritur prej disa ditësh në Shqipëri. Ajo ka njoftuar Prokurorinë shqiptare, e cila ditën e martë ka vënë në dijeni drejtuesin e Drejtorisë së Përgjithshme të Policisë, duke kërkuar zbatimin e urdhrit të arrestit të lëshuar nga gjykata italiane me 20 shtator 2010. Drejtuesja e lartë e Prokurorisë së Antimafias së Leçes informoi policinë shqiptare edhe për rrezikshmërinë që paraqiste 59-vjeçari dhe kujdesin me të cilin duhej vepruar për të shmangur ndonjë arratisje të mundshme të tij. Në mbledhjen e zhvilluar në prani të disa drejtuesve të Prokurorisë së Përgjithshme, Shërbimit Informativ dhe Policisë së Shtetit, si dhe përfaqësuesve të policisë italiane, është detajuar plani operacional. Për të mbajtur sekret detajet e zbuluara nga Shërbimet Inteligjente italiane dhe SHISH, u vendos që operacioni për arrestimin e Albino Prudentinos t’i besohej RENEA-s. Ky repart, me urdhër të drejtuesve të lartë të policisë, dërgoi në Vlorë 23 efektiva specialë që realizuan operacionin. Nga burime zyrtare të policisë është njoftuar dje se aksioni u koordinua nga efektiva të Antimafias italiane, nga Prokuroria e Përgjithshme, Shërbimi Informativ Shqiptar, Drejtoria e Përgjithshme e Policisë dhe skuadrat speciale italiane të njësisë GOS.

Panorama

[Albo]

Prudentino, biznes me mbesën e Sali Berishës

Tedi Blushi

Shpresa Breçani, mbesa e kryeministrit Sali Berisha, figuron eksperte kontabël e një prej 3 kompanive të themeluara në vendin tonë nga Albino Prudentino , njëri prej drejtuesve kryesorë të organizatës kriminale mafioze “Sacra Corona Unita”, i cili u arrestua dje në Vlorë për llogari të drejtësisë italiane. Bëhet fjalë për kompaninë e njohur në fushën e lotarive dhe basteve sportive “Bet Plus”. Nga të dhënat që ofron ekstrakti i regjistrit tregtar të saj, rezulton se 45 për qind të aksioneve të kësaj kompanie i zotëron pikërisht 35 vjeçari Angelo Prudentino, djali i supermafiozit italian. Kompania “Bet Plus” është themeluar në datën 1 dhjetor 2008. Në po të njëjtën ditë rezulton të ketë filluar punë pranë saj edhe mbesa e kryeministrit Berisha. Afati i emërimit të saj në detyrën e ekspertes kontabël të autorizuar ka qenë njëvjeçar, pra deri në datën 1 dhjetor 2009. Aksionerë të tjerë në këtë kompani figurojnë Arqile Sota, ish drejtor në Ministrinë e Jashtme, biznemseni i njohur Lulëim Sallaku, shtetasit italianë Francesco Fornelli e Giuseppe Palma etj. Statusi i “Bet Plus”-it aktualisht është i pezulluar, çka do të thotë se aktiviteti i saj në fushën e basteve sportive nuk ushtrohet më. Selia e kësaj kompanie ndodhet në Tiranë, më konkretisht në adresën rruga e Elbasanit, pranë Ambasadës amerikane, Pallat i ri, kati i 3-të”.


Shpresa Breçani

Është vajza e Hajrie Breçanit, motrës së kryeministrit Berisha. Kjo është hera e parë që një familjar kaq i afërt i shefit të qeverisë rezulton i përfshirë në biznese që drejtohen nga një organizatë kriminale mafioze, nga më të rrezikshmet në Europë, sikundër është “Sacra Corona Unita”. Emri i Shpresa Breçanit është i njohur për opinionin publik shqiptar. Gjatë hetimeve që prokuroria shqiptare nisi ndaj biznesmenit serbo-boshnjak, Damir Fazlliç, i cili dyshohej se pastronte para në vendin tonë, u zbulua se mbesa e kryeministrit Berisha ishte eksperte kontabël e dy kompanive të tij, respektivisht “Alpha” dhe “Rompetrol”. Ndërkohë gjatë hetimeve për tragjedinë e Gërdecit, rezultoi se Shpresa Breçani kishte audituar pasqyrat financiare të viteve 2006-2007 të ndërmarrjes “MEICO” dhe të Uzinës së Poliçanit.

Dy kompanitë
Angelo Prudentino, djali i njërit prej drejtuesve kryesorë të “Sacra Corona Unita”, është themelues edhe i dy kompanive të tjera në vendin tonë. Konkretisht, ai zotëron 80 për qind të aksioneve të “Betting System Albania”, si edhe 50 për qind të aksioneve të kompanisë “Cazino Italia”. Kompania “Betting System Albania” është themeluar në datën 12 shkurt 2010 dhe statusi i saj është aktiv. Objekti i veprimtarisë së saj është “shërbime nëpërmjet internetit, për parashikimin e zhvillimit të lojërave të fatit, kazinove, basteve, garave të ndryshme të të gjitha llojeve. Prodhim i materialeve, lëndëve të para dhe prodhim i makinave elektronike të lojërave të fatit”. Selia e kësaj kompanie ndodhet në Tiranë, në adresën rruga e Durrësit, tek “ProCredit Bank”, Laprakë. Ndërsa kompania tjetër e Prudentinos, “Cazino Italia” është themeluar në 11 shkurt 2010. Objekti i veprimtarisë së saj është “Administrim i agjencive për mbledhjen dhe transmetimin e të dhënave me ndihmën e sistemeve informatike dhe të telekomunikacionit”.

Gazeta Shqiptare

[Albo]

Bosi mafioz, arrestimi në momentin e largimit

Gerti Xhaja

Arrestohet në momentin që mendonte të ikte nga “sarajet” pranë Ujit të Ftohtë në Vlorë, mafiozi që drejtonte në kazinotë paratë e Sacra Corona Unita. Ka qenë një veprim i menjëhershëm i repartit Special RENEA, në orën 4:00 në të gdhirë të ditës së djeshme që ka “zgjuar” në befasi italianin 59-vjeçar Albino Prudentino, djalin e tij Angelo, me të shoqen dhe familjen. Operacioni i koduar “Calipso” u iniciua nga karabinieria dhe Prokuororia Distrutuale e Anti-mafias në Leçe, dhe u ekzekutua nga Policia e Shtetit. Angelo, dhe të shoqëruarit e tjerë janë lënë të lirë, dhe në pranga është dërguar drejt Tiranës vetëm Prudentino, për të cilin kishte një urdhër arresti të lëshuar nga gjykata e Leçes. Vendimi mban datën 20 shtator për akuzat për bashkëpunim kriminal të tipit mafioz, trafik droge dhe grabitje në rrethana rënduese. Në Vlorë për të drejtuar operacionin kishin shkuar zëvendësdrejtori i përgjithshëm i Policisë Agron Kuliçaj, komandanti i repartit RENEA, Luigj Vata, si dhe ishin të pranishëm titullarë të drejtorisë dhe hetimit të krimit në Vlorë. Në rolin e vëzhguesit në operacion ishin edhe dy oficerë italianë. Hetimet nisën nga Prokuroria e Anti-mafies në Leçe e skuadrën ROS të karabinierisë në vitin 2007, për familjen mafioze Vitale, që drejtohej nga Antonio Vitale dhe që kishte përfshirë aktivitetin e tij në dy kanale, Piemonte dhe Kalabri, ndërsa drogën e shpërndante në Rimini. Prudentino, rezultoi si personi që drejtonte kompanitë e basteve ku investoheshin paratë. Ai u arrestua në vitin 2005 në një aksion të policisë italiane ku pati dhe shkëmbim zjarri, Prundetino doli vetëm pas pak muajsh dhe siç duket mendoi se ia hodhi drejtësisë.
Skuadrat RENEA, ishin ndarë në dy grupe dhe deri në orën 04:00 të mëngjesit mbanin të rrethuar godinën 3-katëshe “Piazza d’Italia”, si dhe vilën ku ndodhej familja e Prudentinos, të cilat ndodheshin në një distancë prej 250 metrash në vijë ajrore nga njëra-tjetra. Ndërhyrja ishte programuar të kryhej njëkohësisht nga të dyja skuadrat. Skuadra e parë, kishte planifikuar dhe një grup që të ndërhynte nga ballkoni në rast se Prundetino nuk do i bindej urdhrit për t’u dorëzuar. Burime të Gazetës janë shprehur se nuk është nevojitur ndërhyrja e këtij grupi. Prudentino, pasi ka hezituar për një çast, më vonë është bindur që të hapte derën e katit të tretë të godinës së kazinosë, për t’u dorëzuar. Edhe në vilën e tij, i biri dhe familjarët e tjerë nuk kanë bërë rezistencë ndaj forcave të RENEA-s. Gjithsesi, burimet sqaruan se të shoqëruarit e tjerë nuk përbënin interes për hetimin dhe për këtë janë lënë të lirë. Prudentino është transportuar më pas nga RENEA, për në ambientet e drejtorisë së Policisë së Tiranës. Gjatë rrugës mësohet se nuk ka nxjerrë thuajse asnjë fjalë, ndoshta në pritje të kontaktimit me ndonjë prej hetuesve të akuzave të ngritura ndaj tij.

Gazeta Shqiptare

[Albo]

Pranga mafiozit italian, tri ditë para hapjes së kazinosë

Gjatë operacionit “Calipso” u prangosën nëntë persona dhe u shpallën në kërkim dy të tjerë

Ishte planifikuar të investoheshin paratë e “Sacra Corona Unitta”
Një ndër krerët e organizatës mafioze italiane, “Sacra Corona Unitta”, është kapur në Shqipëri vetëm pak ditë para se të hapte një kazino, ku do të bëhej pastrimi i parave nga trafiku i kokainës. Albino Prudentino, i njohur për aktivitetin kriminal, kishte rreth një vit që kishte ardhur në Shqipëri, ku mbulonte gjithë aktivitetin e kësaj organizate në vendin tonë. 59-vjeçari është zbuluar nga Shërbimi Informativ, i cili kishte informacione prej kohësh për mafien italiane që po investonte në Shqipëri, në bashkëpunim me operacionet speciale të policisë italiane, si dhe me agjencitë e instaluara pranë Ministrisë së Brendshme. Operacioni për kapjen e tij është realizuar nga forcat speciale RENEA në një apartament, në katin e tretë të një pallati tek “Uji i Ftohtë” në Vlorë, ndërkohë që familja e tij jetonte pak metra më tutje në një vilë. Njëkohësisht me të, në orën 04:00 të mëngjesit janë arrestuar edhe tetë bashkëpunëtorë të tij, shtatë prej të cilëve janë kapur në Itali, ndërsa një tjetër në Tailandë.

Albino Prudentino
59-vjeçari Prudentino njihej si kontaktues i organizatës mafioze “Sacra Corona Unitta” dhe shef i kontrollit të aktivitetit të kësaj organizate në Shqipëri. I njohur nga policia italiane që prej vitit 1998, ai nuk ishte kapur më parë. Në vitin 1999, pas goditjes së kësaj organizate, ai ishte larguar në Greqi, ku ishte arrestuar për herë të parë, por nuk u realizua ekstradimi i tij, për arsye se nuk kishte prova për implikim në mafia. Në vitin 2001 ai u largohet forcave të policisë në Patra dhe pas një ndjekje disaorëshe, policia helene arriti ta vendosë në pranga. Ai u dyshua për vrasje dhe për vendosje bombe në Greqi, por ato akuza nuk u vërtetuan. Kështu, më 21 qershor të vitit 2002, Gjykata e Athinës e liroi nga akuza për vrasjen e biznesmenit grek Yiannis Yiatrakos dhe nga akuzat për dy vendosje bombash në vitin 2000 po në Greqi. Sidoqoftë, Prudentino, në atë kohë 51 vjeç, u dënua me 16 muaj burg vetëm për mbajtje dokumentesh false. Ai u arrestua afër Patras në janar të vitit 2001, një muaj pasi ishte arrestuar Francesco Prudentino, 53 vjeç, po për të njëjtat akuza. Ky i fundit ishte dënuar me 6 vjet burg në Romë, një javë para se të dënohej Albino dhe të dy dyshoheshin që në atë kohë për lidhje me “Sacra Corona Unitta”.

Ardhja në Shqipëri
Rreth një vit më parë ai dyshohet se ka ardhur në Shqipëri, për të shtrirë aktivitetin kriminal të kësaj organizate. Pas bashkëpunimit me rrjetin në Itali, ai ka blerë një vilë tek “Uji i Ftohtë” në Vlorë, pak pa mbërritur në Orikum, në të cilën jetonin djali dhe gruaja e tij. Pak metra më tutje, në një pallat pesëkatësh kishte një apartament dhe një lokal ëmbëlsirash. Aty do të hapte edhe një kazino për pastrimin e parave të mafies. Ajo do të promovohej ditën e premte, më 1 tetor. Por kjo ishte pikasur nga Shërbimi Informativ Shqiptar, të cilët kishin paralajmëruar për investime të mafies italiane në Shqipëri. Madje, kështu është identifikuar vendqëndrimi i tij, ku më pas është bashkëpunuar me Antimafien italiane për ta mbajtur nën vëzhgim.

Kapja nga RENEA
Dy ditë më parë është planifikuar goditja e grupit prej 11 vetash, që kishin riformuar organizatën kriminale pas goditjes së saj. Kështu, forcat speciale RENEA kanë shkuar afër banesës së tij që mbrëmjen e së martës. Ata kanë rrethuar pallatin, ndërkohë që në katin e tretë qëndronte i vetëm Prudentino. Në orën 04:00 të mëngjesit, forcat speciale kanë shpërthyer derën dhe kanë hyrë brenda. Ai nuk ka kundërshtuar dhe menjëherë i janë vënë prangat. Gjatë kontrollit në banesë, policia i ka gjetur 13 celularë, një sërë dokumentesh banke dhe shumë materiale të tjera, që janë sekuestruar. Ndërkaq, policia ka shoqëruar edhe familjen e tij, por nuk ka rezultuar se ata janë të implikuar në këtë aktivitet kriminal dhe janë lënë sërish të lirë. Djali dhe gruaja e mafiozit italian kanë kërkuar shpjegime për orë të tëra dhe në përfundim u është treguar se ai dyshohet si një ndër drejtuesit e “Sacra Corona Unitta”. Gjatë marrjes në pyetje ai nuk ka pranuar të tregojë asgjë për hetuesit shqiptarë dhe as për ata italianë.

Shqip

[RAPTILOID]

Motra e ministres së Integrimit është anëtare e këshillit mbikëqyrës ndërsa kunati, aksioner i kompanisë me 20%

TIRANË- Albino Prudentino, një nga krerët e mafias italiane ka ndërtuar biznese të shumta në Shqipëri duke u lidhur me të afërm të kabinetit qeveritar. Në letrat zyrtare të kompanisë shfaqet fillimisht emri i Shpresa Breçanit, vajzës së motrës së kryeministrit Berisha dhe më pas emri i motrës dhe kunatit të ministres Majlinda Bregu. Madje kunati i ministres së Integrimit, Majlinda Bregu i është bashkuar familjes Prudentino në biznesin e lojërave të fatit në Shqipëri. Në shkurt të këtij viti, Angelo Prudentino krijon kompaninë në të cilën kunati i ministres Bregu zotëron 20 për qind të aksioneve ndërsa motra e saj, prezantuesja Ornela Bregu rezulton të jetë anëtare e këshillit mbikëqyrës të kompanisë "BETTING SYSTEM ALBANIA". Angelo Prudentino rezulton të jetë disa herë i arrestuar, dhe sipas hetuesve italianë, dyshohet se përdorte paratë e organizatës mafioze "Sacra Corona Unita" për të investuar në lojërat e fatit, kjo nuk e ka penguar aspak atë të krijojë kompani me njerëz të afërt që janë sot në pushtet.


Dokumentet zyrtare të shtetit shqiptar tregojnë se motra e ministres së Integrimit, Ornela Bregu, është anëtare e këshillit mbikëqyrës ndërsa i shoqi zotëron 20 për qind të aksioneve të kopanisë "BETTING SYSTEM ALBANIA". Kompania është krijuar më 1 mars të vitit 2010 dhe z. Ervis Gjeçaj jo vetëm që zotëron 20 për qind të aksioneve të kësaj kompanie, por rezulton të jetë edhe përfaqësuesi ligjor i saj. Kompania e krijuar me vullnet të lirë ndërmjet Angelo Prudentinos dhe Ervis Gjeçajt ka për objekt të veprimtarisë së saj gjithçka që ka të bëjë me lojërat e fatit në Shqipëri.


Kështu, sipas ekstraktit zyrtar të krijimit të shoqërisë, ajo operon në fusha si:"Shërbime në softuerë nëpërmjet internetit për parashikimin e zhvillimit të lojërave të fatit, të kazinove, basteve, garave të ndryshme të të gjitha llojeve. Prodhim i materialeve lëndëve të para dhe prodhim i makinave elektronike të lojërave të fatit. Zhvillim i lojërave të fatit, lojërat aritmetike, loto, keno, bingo, proto, xhoker, baste, lotari, lojëra elektronike, lojëra fati sportive, të cilat janë konkurs për parashikimet sportive të të gjitha lojërave sportive si ato që luhen me këmbë me dorë, në ujë, për gjetjen e rezultateve të ndeshjeve, të futbollit ose të lojërave të tjera sportive të të gjitha llojeve".
Shoqëria rezulton të ketë filluar menjëherë aktivitetin e saj ndërkohë që në nisjen e veprimtarisë e motra e Ministres ka mbikëqyrur në bazë të dokumenteve të gjithë aktivitetin e kompanisë. Ndërsa Angelo Prudentino referuar dokumentacionit zyrtar, rezulton të ketë 80 për qind të aksioneve të shoqërisë që ka selinë në kryeqytet.


Të gjitha këto biznese, sipas hetuesve italianë që ndihmuan në arrestimin e Prudentinos, kanë prejardhje nga paratë e pista të krimeve të "Sacra Corona Unita" në Itali. Sipas ligjeve shqiptare, këto pasuri duhet të sekuestrohen por deri më tani burimet zyrtare të Policisë Shqiptare pohojnë se nuk ka nisur ende ndonjë hetim mbi aktivitetin dyvjeçar të Albino Prudentinos, apo të njerëzve të afërm me të.
**********

Breçani: E dhashë borxh emrin..

Shpresa Breçani, vajza e motrës e kryeministrit Berisha, ka pranuar dje faktin që është ekspertja kontabël e shoqërisë së bosit të mafias italiane, Albino Prudentino, por sipas saj "vetëm sa ka vënë në dispozicion emrin e saj".
"Një prej aksionerëve më kërkoi leje që të vendoste emrin tim si Eksperte Kontabël e shoqërisë. Këtë kërkesë e pranova për kortezi duke qenë që ky është një veprim ligjor formal dhe i rëndomtë në momentin e krijimit të shoqërisë, por që nuk krijon për mua angazhimin e certifikimit të saj, për sa kohë që shoqëria me një vendim asambleje nuk nënshkruan një kontratë shërbimi me mua. Theksoj se, përveç lejimit të citimit të licencës sime në momentin e krijimit, në asnjë moment nuk kam qenë eksperte kontabël e kësaj shoqërie dhe nuk kam ofruar shërbime të karakterit profesional",- thuhet në njoftimin e Brecanit.

Në shtypin e ditës në Tiranë janë botuar sot dokumenta të shumtë që provojnë se mbesa e Berishës Shpresa Breçani ka shërbyer si eksperte kontabël në një nga kompanitë e mëdha të basteve të hapura në Shqipëri nga Albino Prudentino, një prej drejtuesve kryesorë të organizatës kriminale mafioze "Sacra Corona Unita".
Prudentino u arrestua dje në qytetin e Vlorës për llogari të drejtësisë italiane.
Prudentino, 59 vjeç jetonte në Shqipëri prej kohësh dhe kishte themeluar tre kompani në fushën e basteve dhe kazinove

Emri i Shpresa Breçanit (vajza e motrës së kryetarit të qeverisë shqiptare S.Berisha) nuk është i panjohur për opinionin publik shqiptar. Znj.Breçani ka punuar dhe si eksperte kontabël e dy kompanive të biznesmenit serbo-boshnjak, Damir Fazlliç, të cilin kryeministri Berisha e ka quajtur mik të ngushtë familjar përpara Kuvendit të Shqipërisë.
I njëjti emër, pra ai i Shpresa Breçanit, del edhe si audituese e pasqyrave financiare të ndërmarrjes "MEICO" dhe të Uzinës së Poliçanit.

Kompanitë e basteve të Prudentinos egzistojnë zyrtarisht të regjistruara në Qendrën Kombëtare të Regjistrimit në Tiranë nën emrin e djalit të tij Anxhelo Prudentino, 35 vjeç. Në "Bet Plus" Prudentino zotëron 45 për qind të aksioneve, në "Betting System Albania" zotëron 80 për qind të aksioneve dhe në "Cazino Italia", 50 për qind të aksioneve.
Prudentino dhe 11 të tjerë u arrestuan nga repartet speciale të ROS (policisë italiane) dje në kuadër të operacionit antimafie Calypso.
****************

Raporti i SHISH në Kuvend paralajmëroi se paratë e pista të vendeve të huaja po investoheshin në Shqipëri. SHISH: Mafia po sponsorizon lojërat e fatit dhe politikanët

Kambanat e alarmit për shtrirjen e organizatave mafioze në Shqipëri ranë në korrik të këtij viti në një raport të paraqitur nga SHISH në parlament. Aso kohë raporti i paraqitur në Kuvend nga kreu i SHISH, Bahri Shaqiri, u mbajt sekret ndërkohë që ka qenë opozita ajo që bëri publik disa detaje të tij. Ne raport thuhej se mafia, krimi organizuar dhe shërbimet sekrete të vendeve të huaja, kanë sponsorizuar emërimin dhe ngjitjen në karrierë të qeveritarëve dhe politikanëve ne Tirane. Sipas raportit të SHISH, këta persona vazhdojnë ende të mbajnë lidhje të ngushta me sponsorizuesit e tyre, mafian, krimin e organizuar dhe shërbimet sekrete të vendeve të huaja.
Në raportin e paraqitur nga drejtori i SHISH, Bahri Shaqiri, para deputetëve të Komisionit të Sigurisë Kombëtare të Kuvendit thuhej se organizatat mafioze kalabreze ndërveprojnë me shtetas shqiptarë nga një qark ndër më të mëdhenjtë e më të pasurit në Shqipëri. "Grupe kriminale kazaleze (napoletane) po shprehin dëshirën të investojnë në Shqipëri në drejtim të ngritjes apo blerjes së kazinove, ashtu siç në Malin e Zi dhe Maqedoni"

Gazeta shekulli

[RAPTILOID]

Deri me mafien Italiane esht ngatrru sala hahahaha

[juanito02]

Skane faj jo e kane nga padija, edhe gerdecin e bene nga padija, edhe fazllicin nga padija, edhe prudention po nga padia.
Kokpalaret jane si arapi fukara qe kur i dhane nje kade me vaj ulliri hengri sa hengri i tha dhe mikut na ha dhe ti.

[mesuesi_1]

policia shqiptare beri arrestimin e personit ne momentin qe shteti italian leshoi urdher nderkombetar arresti ..... ai nuk kishte kryer krime ne Shqiperi dhe per me teper ai jetonte me emer te rreme ne Vlore ....