Fshatrat shqiptare ende të bllokuara

[fegi]

Rreth 40 familje shqiptare, që jetojnë në fshatrat Bistricë, Cerajë dhe Koshtovë të Leposaviqit, kanë mbetur të bllokuara si pasojë e barrikadave të ngritura nga serbët në magjistralen Mitrovicë-Leposaviq, përkatësisht në afërsi të fshatit Rudare


Postuar më, 5 shtator 2011 – Rreth 40 familje shqiptare, që jetojnë në fshatrat Bistricë, Cerajë dhe Koshtovë të Leposaviqit, kanë mbetur të bllokuara si pasojë e barrikadave të ngritura nga serbët në magjistralen Mitrovicë-Leposaviq, përkatësisht në afërsi të fshatit Rudare.

Lulzim Hetemi, përfaqësues i banorëve të këtyre tri fshatrave shqiptare, tha se këta banorë prej përfundimit të luftës jetojnë në një gjendje të rëndë. “Sa herë iu teket serbëve i bllokojnë rrugët dhe ne mbetemi të izoluar. Vetëm gjatë këtyre ditëve na është dashur të bëjmë nga pesë orë rrugë këmbë në një drejtim deri në Mitrovicë për t’u furnizuar me artikuj elementarë”.

Sipas tij, prej 25 korrikut kanë mbetur tërësisht të izoluar për shkak të bllokimit të rrugës magjistrale për në Mitrovicë nga strukturat paralele serbe. “Ne qarkullojmë me një minibus prej Mitrovicës, mirëpo gjatë këtyre ditëve ai s’ka mundur të lëvizë, meqë ka barrikada në rrugë, ndërsa ne kemi mbetur të shkëputur nga bota”.

Komuna e Mitrovicës i ka ndihmuar dy herë këta banorë me miell, vaj, sheqer dhe artikuj të tjerë të domosdoshëm, por, Hetemaj thotë se “ne jemi në pozitë shumë të keqe”.

Problemi i këtyre banorëve është theksuar edhe në takimin e sotëm të Komitetit lokal për vlerësimin e sigurisë publike në Mitrovicë. Drejtori për Mbrojtje dhe Shpëtim, Behxhet Bala, tha se problem në veri mbetet bllokimi i shpeshtë i rrugëve nga serbët.

Ai tha se “është shndërruar në dukuri bllokimi i rrugëve pas çdo lëvizje në veri dhe kjo është duke krijuar probleme për qytetarët e rëndomtë”. Në këtë kontekst përmendi banorët e fshatrave shqiptare të Leposaviqit, të cilët prej korrikut kanë mbetur të bllokuar. Sipas Bala-jt, ata kanë probleme të mëdha, meqë ka njerëz me sëmundje kronike, pastaj nxënës që ndjekin mësimet në Mitrovicë etj. (a.jashari)Lajm