Iowa simoter

[Gameness]

Iowa simotër

Përkundër protestave serbe, përfundon suksesshëm samiti i parë midis shtetit Iowa dhe Kosovës. Zyrtarë të Qeverisë së Kosovës presin rezultate konkrete bashkëpunimi me këtë shtet të rëndësishëm amerikan, si në shkëmbime ushtarake dhe investime të përbashkëta në shëndetësi dhe bujqësi.
Nga Express më 14 gusht 2011 në ora 10:18

Një delegacion i lartë shtetëror i Kosovës po qëndron këto ditë në shtetin amerikan të Iowas, ku është pritur me nderime të larta nga lidershipi ushtarak dhe civil i shtetit që dihet si “hambari i Amerikës”.

Vizita është e para e organizuar nga Qeveria amerikane në kuadër të programit special të partneritetit në mes të Gardës Kombëtare dhe FSK-së. Programi është iniciuar që në fillim të mandatit të qeverisë në muajin mars dhe synon “binjakëzimin” e Kosovës me shtetin e Iowës. Iowa është shtet me popullsi të vogël, por me potencial të jashtëzakonshëm bujqësor duke qenë prodhuesi më i madh amerikan i misrit, grurit dhe bagëtisë.

Në Iowa janë duke qëndruar ministri Agim Çeku me oficerë të lartë të FSK-së, ministri i Shëndetësisë, Ferid Agani, si dhe zëvendësministri i Punëve të Jashtme, Petrit Selimi dhe ai i arsimit, Nehat Mustafa.

Delegacioni u prit nga gjenerali Orr i Gardës Kombëtare të Iowës dhe guvernatori Branstad i shtetit të Iowës. Gjatë qëndrimit në Iowa, delegacioni ka takuar edhe partnerët e ardhshëm institucionalë në ushtri, shëndetësi dhe arsim.

Programi i binjakëzimit të shteteve amerikane me shtete partnere në fushën e ushtrisë nuk ka kaluar pa protesta dhe kundërshtime serbe. Dihet që edhe vetë Republika e Serbisë ka përfituar nga ky program, duke qenë partnere e një shteti tjetër të Ohios, me anë të së cilës, ushtria serbe ka përfituar trajnime oficerësh dhe profesionalizëm të kuadrit teknik dhe ushtarak si dhe investime. Në mars të këtij viti, State Departamenti dhe Ministria e Mbrojtjes e SHBA-së kanë propozuar që edhe Kosova të marrë pjesë në Programin shtetëror të partneritetit, duke e çiftëzuar Kosovën me shtetin e Iowës, që gjendet në pjesën qendrore të Amerikës.

Qëllimet e programit janë të lidhen shtetet individuale amerikane me shtete partnere nga bota, duke krijuar mundësi dhe interesa të përbashkëta në të gjitha nivelet ushtarake, shoqërore dhe ekonomike. Marrëveshja fillestare është nënshkruar nga Ministria e Punëve të Jashtme, përkatësisht ambasadori Avni Spahiu dhe guvernatori i Iowës, Terry Branstad, i cili është edhe ndër politikanët më jetëgjatë në politikën amerikane, që ka shërbyer si guvernator gati dy dekada.

Nënshkrimi i programit asokohe u përcoll me protesta të ashpra nga Qeveria e Serbisë, e cila e kundërshtoi involvimin e FSK-së dhe Kosovës në programin që i ka themelet në bashkëpunimin ushtarak në mes të Gardës Kombëtare dhe ushtrive përkatëse të shteteve partnere. Serbia u përpoq që nëpërmjet shteteve mike të NATO-s të parandalojë nënshkrimin e një kontrate të tillë të bashkëpunimi, por tentativat e tilla as që u dëgjuan në Washington DC dhe vetë shtetin e Iowës.

Gjatë qëndrimit në Iowa, ministri i FSK-së dhe ish-gjenerali Agim Çeku tha për Express se, “në thelb të bashkëpunimit qëndrojnë marrëdhëniet ushtri me ushtri”. Sipas ministrit Çeku, “marrëdhëniet e mira në mes të SHBA-së dhe Kosovës tani do të konkretizohen, sepse Kosovës i është caktuar një partner zyrtar, me të cilin do të organizohen trajnime, shkëmbime, seminare dhe do të punohet shumë që FSK-ja të inkorporojë në punën e vet standardet e Gardës Kombëtare të Iowës, me të cilën në një mënyrë është binjakëzuar”.

Ministri Çeku po ashtu shpreson se hap konkret i mëtutjeshëm do të jetë edhe futja e FSK-së në kontingjente paqeruajtëse amerikane, “për të rritur nivelin e profesionalizmit dhe gatishmërisë së forcës kosovare, e cila pret transformime të mëtutjeshme në shërbim të Kosovës”.

Zëvendësministri i Punëve të Jashtme, Petrit Selimi ka deklaruar se, “Marrëveshja e partneritetit e nënshkruar me Iowën krijon mundësi të jashtëzakonshme të bashkëpunimeve në mes të institucioneve kosovare dhe atyre të Iowës, në fushat më kryesore për Kosovën, si bujqësi dhe shëndetësi, dhe krijon një platformë konkrete të shkëmbimeve afatgjate midis SHBA-së dhe Kosovës”.

Guvernatori Terry Branstad deklaroi se është i kënaqur që Iowa ka fituar një partnere si Kosova, me të cilën kanë shumë të përbashkëta dhe paralajmëroi një vizitë Kosovës me investitorë të shtetit të vet.

Gjatë qëndrimit në Iowa, delegacioni kosovar pati mundësi të njihet edhe me procesin zgjedhor në Amerikë, i cili do të lansohet këtë javë më në shtetin e Iowës, i cili është tradicionalisht i pari në tërë SHBA-në që cakton kandidatët kundërshtarë të ciklit elektoral presidencial. Me këtë rast, delegacioni pati rast të takohet edhe me kandidatët kryesorë republikanë, si Mitt Romney, me të cilin u bisedua për mundësitë e bashkëpunimit dhe vetë programin e partneritetit Kosovë – SHBA.

Iowa është shtet i cili është specializuar në bujqësi. Ka vetëm tre milionë banorë, është prodhuesi i dytë pas Kalifornisë, i grurit, sojës dhe misrit. Rendimentet e krijuara nga fermerët e Iowës të kulturave bujqësore janë ndër më të lartat në tërë botën. Po ashtu, është e njohur për krijim të energjisë me erë, prandaj pritet që rezultatet e para të bashkëpunimit të fokusohen në bujqësi, energji të ripërtërishme, por edhe në shëndetësi.

Ministri Agani, i cili do të vazhdojë qëndrimin në SHBA për t’u takuar edhe me zyrtarë të Bankës Botërore, ka vizituar në Iowa spitale dhe qendra të shëndetësisë si dhe është takuar me sekretarin e Shtetit për Shëndetësi, për të diskutuar projekte të bashkëpunimit. Edhe zyrtarë të Ministrisë kosovare të Bujqësisë u takuan me sekretarin e Shtetit të Bujqësisë, ndërsa zëvendësministri i Arsimit pati takime me Universitetin shtetëror. Takimet u përcollën edhe nga zëvendësministri i MPJ-së, Selimi dhe ambasadori i Kosovës, Spahiu.

Megjithatë, beneficuesi më i madh pritet të jetë mu FSK-ja që u dëshmua edhe me një pritje të jashtëzakonshme që iu bë delegacionit kosovar në bazën më të madhe ushtarake në Iowa, ku me orkestër dhe në prani të oficerëve të lartë, gjenerali Orr i Gardës Kombëtare u zotua se në vitet që vijnë, partneriteti do të sjellë fryte dhe vëllazërim të dy formacioneve dhe popujve.

Si hap i parë konkret pritet shkëmbimi i oficerëve të ndërlidhjes në mes të Iowës dhe Kosovës, të cilët do të qëndrojnë në baza të përhershme në shtete përkatëse për të iniciuar projektet dhe procedurat kryesore të bashkëpunimit.