"Buti"

[Brari]

Përgjimet e “seksit”, ja si funksiononte rrjeti

» Dërguar më: 02/08/2011 - 13:01



Klodiana Lala

Mjaftonte një telefonatë, pagesa prej 50 eurosh dhe në shtrat mund të fusnin një prostitutë minorene. Tre të rinj shfrytëzonin të dashurat e tyre, dy prej tyre minorene, për të ushtruar prostitucion me klientë të ndryshëm, mes tyre dhe shtetas nga Kosova. Takimet caktoheshin përmes telefonit. Me klientët kontaktonte njëra nga prostitutat, e cila më pas u siguronte punë dhe mikeshave të saj. Pasi caktohej ora e takimit, minorenet prostituta merreshin në makina luksoze nga klientët e tyre. Fitimet që merrnin nga prostituimi ua dorëzonin tutorëve, të cilët i shpenzonin në kazino. Të implikuarit në këtë veprimtari kriminale, pasi u vëzhguan dhe përgjuan ditë të tëra, u vunë në pranga. Vetëm pak ditë më parë, një treshe gjykuese e kryesuar nga Manjola Xhaxho, cilësoi fajtor dhe dënoi të pandehurit, Elis Tafa, Emiljano Rrapushi, Faket Begani, për akuzën e “prostitucionit në rrethana rënduese”. Ndërsa, Klevis V, Zerina M, Florinda C., u dënuan për ushtrim prostitucioni me gjobë. Më poshtë po botojmë pjesë të vendimit të gjykatës së Tiranës, ku zbardhet i gjithë mekanizmi sesi tutorët vepronin për t’u gjetur klientë tri prostitutave minorene, si lidheshin me klientët, sa paguheshin dhe në cilat hotele qëndronin...
Hetimet
Që në krye të herës, në vendimin e gjykatës saktësohet se për të hedhur dritë mbi veprimtarinë kriminale, të dyshuarit janë vëzhguar e përgjuar në ambiente publike, si dhe u janë përgjuar bisedat telefonike. “Për hetimin e këtij procedimi penal janë aplikuar metoda të veçanta hetimi, si vëzhgime në ambiente publike, përgjime bisedash telefonike, për të pandehurit Emiliano Rrapushi, Elis Tafa, Zerina M. dhe Florinda C.”, thuhet në vendimin e gjykatës. Si rezultat i këtyre metodave të hetimeve është bërë e mundur më datë 19.11.2010 kapja e të pandehurave Florinda C. (e mitur) dhe Zerina M. në ambientet e një hoteli në rrugën Tiranë-Durrës bashkë me dy shtetas kosovarë, Burim H. dhe Mefail G., ku të pandehurat ushtronin prostitucion me këta shtetas. Pasi janë kapur nga forcat e policisë shtetasit kosovarë, kanë sqaruar se Mefaili kishte telefonuar të pandehurën Zerina M. në telefonin e saj me nr.0695214xxx, numër që e kishte ruajtur që prej disa kohësh kur kishte kryer marrëdhënie seksuale me të kundrejt pagesës. Gjatë bisedës që kanë bërë në telefon kanë rënë dakord që e pandehura Zerina të merrte me vete edhe një femër tjetër, sepse Mefaili kishte me vete një shokun e tij. Pasi janë takuar të katërt në ambientet e hotelit, kanë rënë dakord që të paguajnë nga 50 euro secili për të kryer marrëdhënie me të pandehurën Zerina dhe shoqen e saj, të pandehurën Florinda C. për një orë. Kur kanë shkuar të katërt në një dhomë të këtij hoteli dhe kanë qenë duke diskutuar me njëri-tjetrin në lidhje me pazarin, ka hyre menjëherë policia, e cila po i mbante në vëzhgim dhe përgjim telefonik të dyshuarat prej disa kohësh.
Të pandehurat
E pandehura Zerina M. shprehet se ushtron prej disa kohësh prostitucionin. Këtë gjë, sipas saj e di edhe i dashuri i vet, i pandehuri Emiljano Rrapushi, i cili i ka kërkuar të heqë dorë nga këto gjëra. Por ajo vazhdonte të ushtronte prostitucion pa dijeninë e tij. E pandehura Florinda C., në praninë e psikologut dhe të avokatit mbrojtës, shprehet se ka qenë e fejuar me të pandehurin Elis Tafa prej një viti. Ai nuk e ka detyruar të kryente prostitucion. Ndërsa në deklarimet e saj të dt. 19.11.2010, ajo deklaron të kundërtën, por këto deklarime janë marrë pa praninë e avokatit dhe janë dhënë nga Florinda në cilësinë e personit ndaj të cilit zhvillohen hetimet dhe për pasojë janë absolutisht të pavlefshme.
Shfrytëzimi
Duke u bazuar në deklarimet e të pandehurave, transkriptet e përgjimeve telefonike, vëzhgimeve, fotografimeve dhe filmimeve, rezulton se të pandehurit Emiljano Rrapushi dhe Elis Tafa shfrytëzojnë për prostitucion Zerina M. dhe Florinda C., kryesisht duke kryer aktet seksuale me pagese në hotel “Arlandi” në zonën e Freskut. Paratë e fituara nga ushtrimi i prostitucionit administrohen nga shtetasit e dyshuar më lart, të cilët kanë lidhje të ngushta me njëri-tjetrin. Transporti i femrave apo dhe i klientëve për në hotele të ndryshme të qytetit bëhet nga klientët me mjetet e tyre apo me taksi. Nga ana e policisë janë mbajtur nën mbikqyrje të fshehtë të pandehurit Emiljano Rrapushi, Zerina M., Lori (Florinda) C. dhe Elis Tafa, ku ka rezultuar se e pandehura Zerina kryen aktivitetin e kundraligjshëm me anë të telefonit celular, ku janë konstatuar raste kur ajo ka marrë në punë edhe Lorin. Po ashtu, Lori ka pasur dy raste vetë në një hotel pranë Liqenit Artificial. E pandehura Zerina ka punuar kryesisht vetëm me kliente të identifikuar nga ana e policisë gjyqësore, në hotelet “Vivi la Vita”, “Arlandi”, “Sheraton” etj. Në dy raste ajo ka marrë me vete në punë dhe një vajzë të njohur me emrin Keti, e cila në pamje të parë duket e moshës rreth 17 vjeç, me numër telefoni 06856 xx xxx, si dhe një femër tjetër rreth 30 vjeç, e panjohur nga ana e policisë. Nga ana e policisë është bërë i mundur identifikimi i shtetases Keti, e cila rezultoi se është e pandehura Klevis V. e mitur. Gjatë mbajtjes nën mbikqyrje dhe kryerjes së veprimeve të tjera procedurale është provuar se të pandehurat Klevis V., Zerina M. dhe Florinda C., shfrytëzohen për qëllime prostitucioni nga të pandehurit Faket Begani, Emiliano Rrapushi dhe Elis Tafa.
Vëzhgimi
Në procesverbalin e mbajtjes nën mbikqyrje të fshehtë, datë 21.10.2010, e pandehura Zerina M., pasi takon një person të cilin e thërriste Ilir, pranë stadiumit “Selman Stermasi”, ka marrë 100 euro në dorë prej tij, ka shkuar tek hotel “Sheraton”, ku qëndroi rreth 30 minuta. Më pas ka dalë dhe ka shkuar tek ‘Lloto Sporti’ tek “Rruga Ura”, ku qëndronte i pandehuri Emiliano Rrapushi dhe ia ka dhënë në dorë shumën prej 100 eurosh. Policia ka mbajtur nën vëzhgim dhe dy të pandehurat e tjera. Kështu, më datë 23.10.2010 të pandehurat Zerina M. dhe Klevis V., kanë shkuar tek hotel “Arlandi” pranë restorant “Fresku”, dhe kanë kryer marrëdhënie seksuale me pagesë me dy shtetas me një automjet tip “Mercedes” me targa DR 7 xxx E, më pas Zerina qëndroi tek ‘Rruga Ura’, ndërsa Klevisi shkoi tek shinat e trenit tek ‘3-shi’.
Përgjimet telefonike
Në bisedën e zhvilluar midis Zerinës dhe Emilianos, ajo i thotë të lajmërojë Lorin se ka një punë tek Liqeni, ai përgjigjet se nuk ka telefon, atëherë i thotë t’i thotë Elisit dhe Emilianos, dakord do dal ta gjej unë. Në procesverbalin e mbajtjes nën mbikqyrje të fshehtë datë 10.11.2010, e pandehura Klevis Vrapi, pasi kryen marrëdhënie seksuale me një klient me mjetin tip “Mercedes Benz” me targa Tr 4xxx N, tek hotel “Lubjana” në autostradën Tiranë-Durrës, doli nga hoteli në këmbë dhe pasi kaloi shinat e ‘3-shit’, u takua me të pandehurin Faket Begani dhe paratë e fituara nga ushtrimi prostitucionit ia dha atij në dorë. Po ashtu, në rastet e mbajtjes nën mbikqyrje rezultonte se e pandehura Klevis Vrapi çdo natë shkonte në banesën e të pandehurit Faket Begani. prapa shkollës “Kol Jakova”.
Përgjimet ambientale
Nga përgjimi ambiental, i kryer midis të pandehurit Elis Tafa dhe Emiliano Rrapushi më datë 22.11.2010, ndër të tjera midis tyre ka pasur biseda si: Elisi i thotë mos kanë dyshime, Emiliano i thotë se nuk e dinte, më pas pyesnin njëri-tjetrin, duke thënë se mos ishin kapur gocat, po ashtu thonë se po nuk ishin gocat prezent, nuk kanë se çfarë t’u bëjnë. Të dy vendosin të thonë se i kishin të fejuara. Po ashtu thonë se kur femrat i kanë marrë në telefon, i kanë thënë se do të sjellë pesëdhjetë mijë lekë; unë pa lekë isha, i thonë. Elisi i thotë se nuk kanë fakte. Elisi e pyet nëse kishte gjë tek telefoni. Emiliano në një moment i thotë Elisit, “ajo është edhe e vogël more”.
Paratë
Në vendimin e gjykatës thuhet se e pandehura Zerina M. ushtronte prostitucion nëpërmjet të pandehurit Emiljano Rrapushi, i cili e shtynte dhe ndërmjetësonte duke i gjetur asaj klientë. Fitimet e siguruara nga ky aktivitet i kundraligjshëm, i merrte i pandehuri Emiljano, i cili i shpenzonte ato duke luajtur në kazino. Gjatë vëzhgimeve ka rezultuar gjithashtu se e pandehura Zerina M., i kishte gjetur klientë disa herë edhe të pandehurës Klevis V. Të dyja këto ushtronin prostitucion në hotele të ndryshme. Nga përgjimet është vërtetuar se e pandehura Klevis V. shfrytëzohej nga i pandehuri Faket Begani. Nga përgjimi i numrit të disponuar prej saj 068 56 xx xxx ka rezultuar se ky person e shtynte atë vazhdimisht të kryente prostitucion, me qëllim përfitimin e të ardhurave të kundraligjshme. Ai i kërkonte Klevisit të dilte për “Buti” - një shprehje komunikimi kjo që tregonte kryerjen e një marrëdhënieje seksuale. Ndërmjet të pandehurve Faket Begani dhe Klevis V., kjo shprehje është përdorur në mënyrë frekuente para dhe pas çdo marrëdhënieje seksuale me pagesë. Sipas raportit të shërbimit me datë 10.11.2010 të policisë gjyqësore, rezulton se në orën 18:30, e pandehura Klevis V. ka dalë nga hotel “Lubjana” që ndodhet te mbikalimi i Kamzës në autostradë dhe ka shkuar tek shinat e trenit në vendin e njohur, “Treshi”. Aty ka takuar të pandehurin Faket, të cilit i ka dhënë dorazi disa kartëmonedha të prerjeve 1000-lekëshe. Nga raporti i shërbimit më datë 22.11.2010 dhe nga rezultatet e përgjimit, rezulton se rreth orës 18:30 të kësaj dite, Klevis V. ka dalë nga hotel “Edisen”, që ndodhet tek shinat e trenit dhe ka shkuar në afërsi të një bilardoje ku ka pranë banesën edhe Faket Begani. Pasi është takuar me të, ai i ka thënë se “ato lekë do m’i japësh tek shtëpia dhe jo këtu në rrugë”. Rasti i fundit kur e pandehura Klevis Vrapi ka kryer prostitucion është ai i datës 26.11.2010, kur rreth orës 12:20 të kësaj dite ka dalë tek shinat e trenit dhe aty ka hipur në një automjet tip ‘BMË X 5’ që drejtohej nga A.L. Së bashku kanë shkuar tek hotel “Real Park” në autostradë, ku aty Klevisi ka hyrë brenda nga dera e pasme, ndërsa Afrimi nga dera kryesore. Pasi kanë shkuar në dhomën nr.3 të katit të dytë, janë kapur në flagrancë nga forcat e policisë.


gsh

-