Thuaj JO produkteve serbe! Mos e ushqe kontrabanden!

[Gameness]

Alarm në “Simpo” dhe në “Alfa plam”

Beograd,18 gusht – Drejtori i përgjithshëm i kompanisë “Simpo” të Vranjës Slaxhan Disiq dhe ai “Alfa plam”, Velin Iliq për B92 kanë thënë se e kanë vështirë që të kompensojnë rreth katër milionë euro sa kanë humbur kompanitë e tyre që nga mbyllja e kufirit me Kosovën.
“Vjet në Kosovë kemi plasuar prodhime në vlerë prej dy milionë euro, kurse në gjysmën e parë të vitit qarkullimi ishte rritur. Tash nuk shohim asnjë mënyrë se si ta kompensojmë këtë humbje”, ka deklaruar Disiq.
Ai shton se vendimi për embargo do të jetë edhe më i dëmshëm pasi ndodhë në kohën kur në Kosovë po qëndron një numër i madh i shqiptarëve që punojnë në Evropën Perëndimore.
“Ne sinqerisht shprehim keqardhje se sallonet tona në Prishtinë dhe në Gjilan janë të zbrazura, kurse shtëpitë e tjera tregtare të Kosovës nuk mund të bashkëpunojnë me ne”, shton ai.
Industria metalike “Alfa plam” për shkak të afërsisë gjeografike ka qenë shumë e lidhur me tregun Kosovës.
“Nga ky treg kemi realizuar deri në dy milionë euro në vit”, thotë Velin Iliq, drejtor i “Alfa Plam”.
“Problem edhe më i madh për ne është se po e humbim këtë treg. Këtë vakuum do ta plotësojnë prodhuesit nga Maqedonia, Sllovenia, Kroacia, Turqia, madje edhe nga Kina”, ka thënë drejtori i ndërmarrjes “Simpo”. (Qendra.info)

[Gameness]

(bejn me shum deme 400 milion euro se sa 400 tabore...)

Ndërmarrësit serb akuzojnë shtetin

Beograd, 19 gusht – Një muaj pasi që Kosova ka mbyllur kufijtë për mallrat nga Serbia, ka nisur një luftë rajonale për të zënë tregun që e mbulonte ky shtet, shkruan gazeta e Beogradit “Blici”.
Oda Ekonomike e Kroacisë me të madh po bënë listën e ndërmarrësve të interesuar që do ta shoqërojnë kryeministren kroate Jadranka Kosor gjatë vizitës së saj të parë në Kosovë. Shans për të marrë pjesën e tortës serbe gati gjysmë milioni euro që dikur e kishte Serbia, ndërmarrësit kroat e kanë kah fundi i gushtit. Mediat kroate shkruajnë se më shumë interesim ka nga industria ushqimore dhe ajo e plastikës. Ky reagim i shpejtë i fqinjëve i ka befasuar ndërmarrësit serb. Si thonë, nuk bëhet fjalë për një treg të parëndësishëm.
“Keni një zbrazësi, një pjesë të tregut prej rreth 400 milionë dollarë, të ciln tani duhet ta mbuloni. Është mënjanuar konkurrenti i deritashëm kryesor, Serbia, kurse nevojat janë urgjente. Të gjithë mundohen që ta shfrytëzojnë këtë shans”, vlerëson Zoran Bojoviq nga Oda Ekonomike e Serbisë.
Ai pret që gjatë ditëve që po vijnë për në Kosovë do të nisen edhe shumë delegacione ekonomike të vendeve të rajonit, kurse lufta për tregun që mbulonte Serbia aspak nuk do të jetë e lehtë.
Kompanitë vendore (serbe), posaçërisht nga industria ushqimore , të cilat një sasi të madhe të artikujve të tyre i kanë shitur në Kosovë, tash janë në “pat pozicion” dhe fare nuk iu pëlqejnë zhvillimet aktuale.
“Të gjithë e shfrytëzojnë fatkeqësinë serbe deh ka shans që kompanitë nga rajoni tërësisht ta marrin tregun e Kosovës. Nëse merren vesh, malli kroat nëpër shitore do të gjendet brenda 24 orësh”, thotë Rodoljub Drashkoviq, drejtor i kompanisë”Swissline”, e cila plasmanin më të madh të produkteve të veta e kishte në Kosovë.
Kompanitë vendore po shënojnë humbje të mëdha për shkak të embargo kosovare.
“Shpresoj se shteti do të ketë vesh dhe do të na kompensoj humbjet që kemi në Kosovë. Kimi humbur një pjesë të tregut dhe rreth 20 milionë euro të hyra. Ky nuk është problem i vetëm, meqenëse ne aktualisht nga Kosova kërkojmë katër milionë euro dhe nuk dijë si do t’i arkëtojmë”, ankohet Drashkoviq.
Kompania “Bambi” nga Banati , për shkak të bllokadës, secilin muaj humbë nga 200 milionë euro, thotë drejtori i saj Miroslav Miletiq, të cilat nuk mund t’i zhvendosin në tregjet e tjera për një kohë të shkurtër.
“Kjo nuk është asgjë kontestuese,këtë e kemi parë edhe më herët. Produktet kroate janë të pranishme në tregun kosovar, por tash atyre u shtë hapur edhe një hapësirë e zbrazët ku mund të ndërhyjnë”, sqaron Miletiq.
Për dallim nga “Bambi”, kompaji “Imlek” qysh para një viti ka ndërprerë dërgesat për në Kosovë, meqenëse problem ishin vulat e reja. Pushteti në Kosovë kërkonte që në prodhimet e saj, në vendin për importuesin të shënohet Republika e Kosovës. Qeveria serbe këtë nuk e ka lejuar, prandaj “Imlek” ka ndërprerë të dërgoj qumësht dhe produkte të tij.
Treg i madh: Se Kosova nuk është tre i parëndësishëm për kopanët serbe vet shifrat flasin. Secilin viti këtu janë plasuar mallra në vlerë prej 400 milionë dollarësh, Në gjysmën e vitit ishin 200 milionë dollarë, kurse tash gjithçka është bllokuar. “Në bazë të të dhënave mund të konstatojmë se nëse vazhdon embargoja, humbjet potenciale në fund të vitit mund të jenë së paku 250 milionë dollarë”, thotë Zoran Bojoviq nga Oda Ekonomike e Serbisë. (Qendra.info)

[Gameness]

Huruglica: Doganat nuk duhet t’i besohen EULEX-it


11:59 / 19.08.2011

Shefi i Doganave të Kosovës, Naim Huruglica, nuk e sheh kthimin e doganierëve të EULEX-it në Jarinjë dhe në Bërnjak si zgjidhje të problemeve doganore që aktualisht ekzistojnë mes Kosovës dhe Serbisë.

Huruglica thotë se EULEX-i e ka dëshmuar për tre vjet rresht se nuk mund të kryejë punën si duhet në atë pjesë, prandaj nuk ka nevojë që t’i jepet një shans i dytë, edhe sikur një gjë e tillë të kërkohet si zgjidhje kompromisi gjatë procesit dialogues në Bruksel.

Huruglica siguron se pas aksionit të 25 korrikut në veri, produktet “Made in Serbia”, me përjashtim të ndonjë rasti të vogël, më nuk janë duke hyrë në Kosovë. Në intervistën e dhënë për “Kohën Ditore” ai shpreh bindjen se produktet serbe tani nuk po kërkohen as nga vetë kontrabandistët. Me rreth 600 doganierë që ka,

Huruglica thotë ta ketë të vështirë që ta mbulojë tërë vijën kufitare të Kosovës. Por, ai beson se me këto kapacitete është në gjendje që brenda tri ditësh t’i kthejë në funksion pikat 1 dhe 31. Si drejtor ai është impresionuar edhe me gatishmërinë që kanë treguar oficerët doganorë për t’iu përgjigjur pozitivisht ftesës për të shkuar në veri.

Kreu i doganave nuk është i sigurt nëse do të marrë pjesë në raundin e ri të bisedimeve në Bruksel, në të cilin takim pritet të bisedohet për vulat doganore, por kjo nuk e pengon që ta shprehë në mënyrë të prerë qëndrimin e tij se vulat e Doganave të Kosovës nuk duhen ndryshuar për hatër të Serbisë. Ai është optimist se edhe sivjet do ta realizojë planin e Qeverisë për të hyrat e parashikuara nga Doganat, me gjithë lartësinë buxhetore që është caktuar. /Telegrafi/

[Gameness]

Gjermania përkrahë zhvillim ekonomik të Kosovës

15:41 / 19.08.2011

Ministri i Financave, Bedri Hamza, priti të premten në takim njohës Ambasadorin e Gjermanisë në Prishtinë, Ernst Reichel, me të cilin biseduan për bashkëpunimin e ardhshëm ndërmjet Republikës së Kosovës dhe Republikës Federale te Gjermanisë.

Ministri Hamza ka falënderuar Ambasadorin gjerman për kontributin jetik dhe përkrahjen e vazhdueshëm të shtetit gjerman qw i ka dhënë Kosovës, sidomos gjatë vitit 1999, e cila i hapi perspektivë zhvillimit të mëtejme të Kosovës si një vend i lirë dhe gjithashtu mbështetjen e vazhdueshme politike dhe diplomatike.

Ai më tej e njoftoi ambasadorin për objektivat dhe aktivitetet kyçe të ministrisë, sidomos në lidhje me buxhetin e shtetit dhe trendët pozitive të rritjes së të hyrave.

Ndërsa, Ambasadori gjerman, Ernst Reichel, tha se Republikës Federale e Gjermanisë do të vazhdoj përkrahjen e zhvillimit ekonomik të Kosovës, përmes investimeve dhe përkrahjes politike të shtetit të Kosovës. /Telegrafi/

[Gameness]

Reciprociteti, nuk dëmtohet tregu farmaceutik

Barnat me prejardhje nga Serbia, pas masave të reciprocitetit, po zëvendësohen me ato nga vendet e rajonit dhe shtetet e BE’së. Farmacistët premtojnë se në Kosovë nuk do të mungojë asnjë produkt mjekësor.

Nga Express më 20 gusht 2011 në ora 16:10

Masat e reciprocitetit me Serbinë nuk e kanë dëmtuar tregun farmaceutik në Kosovë, thotë kryetari i Shoqatës se Farmacisteve të Kosovës, Kadri Bytyqi.

Sipas tij, janë disa produkte më shumë të kërkuara nga pacientët, por që nuk janë të pa zëvendësueshme.

“Çka ka pas me të shitur kanë qenë infuzionet siç njihen në popull që kanë ardhur nga Serbia për arsye se kanë pasur një çmim më të lirë, por tani kanë sjell dhe janë orientuar nga Greqia dhe vendet e Bashkimit Europian dhe po i sjellim pa problem dhe me çmime të njëjta”, thotë Bytyqi, për RTK.

Ndërsa, Dardane Meha, farmaciste, thotë se ka raste kur pacientët kërkojnë barna që janë me prejardhje nga Serbia.

“Pacientet akoma i kërkojnë, por ne jemi duke u munduar t’i zëvendësojmë me fabrika tjera. Ka zëvendësime, mirëpo për një numër të caktuar nuk ka zëvendësim. Si p.sh janë disa barna që janë të nevojshme shumë siç është nitroglicerina, e cila merret mbas atakut të zemrës e që nuk është e regjistruar fare”, thotë Meha.

Nga ana tjetër, zëdhënësi i Ministrisë së Shëndetësisë, Faik Hoti, tha se nuk ka barna të pazëvendësueshme.

“Regjistri aktual në Kosovë, i cili për herë të parë është publikuar vitin e kaluar është pasuruar edhe me 184 lloje të barnave të reja. Ka mundësi të zëvendësimit të këtyre barnave kryesisht me barna të Evropës dhe nuk mund të ndihet fare mungesa e barnave. Kështu që arsyetimi se ende po mbahen produktet serbe sepse ato po i kërkojnë pacientet faktikisht nuk qëndrojnë”, thotë Hoti.

Dyshimet se ka barna të paregjistruara, janë evidente tha zëdhënësi Hoti, sipas të cilit, inspektorati shëndetësor është në kërkim të gjetjes dhe ndëshkimit të tyre.

[illyrian rex]

Kryetari i Odës ekonomikë të Kosovës, Safet Gërxhaliu - Reciprociteti po sjell fryte
20.08.2011

Një muaj më parë, më 20 korrik, qeveria e Kosovës vendosi të ndalojë importimin e mallrave nga Serbia si një kundërpërgjigje ndaj ndalimit që ajo u kishte bërë mallrave nga Kosova pas shpalljes së pavarësisë së kësaj te fundit. Kryetari i Odës ekonomikë të Kosovës, Safet Gërxhaliu në një bisedë për Zërin e Amerikës tha se masat e ndërsjella tashmë po i japin frytet e tyre.

“Kjo po manifestohet çdo ditë e më tepër, qoftë në aspektin politik apo ekonomik, por mbi të gjitha në psikologjinë e konsumatorit dhe biznesmenit kosovar. Është një rritje enorme e konsumimit të prodhimeve vendore, është një shtim enorm i punësimit, që ka qenë një ndër problemet më të mëdha dhe mbi të gjitha është krijuar një opinion i ri që Kosova mund të jetoj në aspektin ekonomik edhe pa Serbinë, po ashtu edhe nga aspekti politik”, ka thënë Gërxhaliu në një bisedë për Zërin e Amerikës.

Gërxhaliu thotë se ndalimi i importeve nga Serbia nuk ka krijuar boshllëk në tregun e Kosovës. Shtetet e rajonit janë vënë në përpjekje për të fituar tregun dhe për të zëvendësuar importet nga Serbia që në vitin 2010 kishin arritur në rreth 320 milion euro.

“Vendet kyçe që e kanë bërë zëvendësimin, janë vendet evropiane. Është në rend të parë Shqipëria, Maqedonia Bullgaria dhe Turqia, por edhe vendet tjera që vërtet e kanë gjetur këtë boshllëk që të plasojnë prodhimet e veta dhe në qoftë se kishte për tu bërë një analizë e asaj se kush humb, atëherë me siguri ekonomia serbe do të jetë ajo e cila ka pësuar më së shumti. Duhet të kuptohet edhe një qasje psikologjike e konsumatorit, kur një treg humbet njëherë është shumë vështirë të kthehet dhe jam i mendimit se me këto procese politike dhe me këtë dozë të radikalizmit serb ndaj Kosovës, atëherë ekonomia serbe me të vërtetë ka humbur në këtë drejtim dhe do të jetë shumë e vështirë që të kthehet”, ka thënë Gërxhaliu.

Ndalimi i importeve nxiti shqetësime për mundësinë e shtimit të kontrabandës së mallrave serbe. Gërxhaliu thotë se kjo çështja varet shumë nga vullneti politik. “Unë e kam thënë në të kaluarën dhe po e përsëris se kontrabanda në Kosovë do të ndalohet një qind për qind atëherë kur grupe të caktuara politike në Kosovë do ta minimizojnë dëshirën për të përfituar nga kontrabanda. Për kontrabandë, për dashuri, për luftë gjithmonë duhet të jenë dy palë. Me siguri se çdo kontrabandistë në këtë drejtim e ka një mbështetje nga qarqe të caktuara politike dhe fati i tyre është në duart e qarqeve të caktuara politike, sa janë të gatshëm që ta sakrifikojnë interesin e tyre”.

telegrafi.com

[Gameness]

Beqaj takon Berishën: Të rrisim bashkëpunimin

Qendra.info

Tiranë, 22 gusht - Një plan zhvillimi dhe bashkëpunimi ekonomik në rritje midis dy vendeve ishte në qendër të një takimi mes kryeministrit Berisha dhe ministrit të Zhvillimit Ekonomik të qeverisë së Kosovës, Besim Beqaj.
Beqaj shprehu besimin se me kushtet e reja të krijuara në Kosovë, bashkëpunimi i sektorit privat të dy vendeve ka mundësi të rritet edhe më shumë, nga shfrytëzimi i hapësirës së krijuar nga ndalimi i produkteve serbe.
Sipas tij, nxitja e bashkëpunimit mes dy vendeve duhet të synojë si fushën e investimeve ashtu edhe atë tregtare.
Nga ana e tij, kryeministri Sali Berisha shprehu kënaqësinë e tij për vendimet e rëndësishme të qeverisë së Kosovës, në lidhje me privatizimet në fushat strategjike, të cilat përbëjnë dhe bazën e reformave themelore ekonomike.
Duke iu referuar shembullit të Shqipërisë e cila, sipas kryeministrit, falë privatizimeve arriti të rriste të ardhurat për frymë, ai i quajti vendimet e qeverisë së Kosovës, të guximshme.
“Synimi final i të dy vendeve është dhe duhet të jetë rritja e të ardhurave për frymë dhe përmirësimi i standarteve të jetesës. Bashkëpunimet tregtare, në fushën e energjisë, si dhe në fushën e bujqësisë dhe agro-biznesit”- tha kryeministri Berisha
Në fushën e energjisë, ndërtimi i linjave të transmetimit si ajo Tiranë-Prishtinë , jo vetëm forcon integrimin e sistemeve energjetike, por rrit edhe efiçencën e funksionimit të tyre, duke kursyer 20% të burimeve energjitike, u theksua në takim.

[Gameness]

Heqja e TVSH ndihmon eksportin

Prishtine, 23 gusht - Për të qenë produktet kosovare më konkurruese në raport me produktet e shteteve tjera, sipas ekspertëve të çështjeve ekonomike dhe përfaqësuesve të bizneseve kosovare, Kosova duhet të ketë një treg më të favorshëm në aspektin e klimës biznesore dhe të ketë investime më të mëdha të huaja.

Bizneset duan përmirësim të ambientit afarist
Alban Zogaj nga Instituti “Riinvest” thotë se pa përmirësimin e politikave fiskale, produktet kosovare nuk do të mund të jenë konkurruese, dhe në këtë mënyrë nuk do të mund të eksportohen.

“Çka duhet bëhet që të kemi një rritje në eksportit t tonë e që pastaj e rregullon bilancin tregtar tepër të disfavorshëm të Kosovës. Çështje kyçe në rritjen e eksportit është rritja e konkurrueshmërisë së ndërmarrjeve kosovare. Ndërmarrjet kosovare duhet të jenë më konkurruese në tregun ballkanik dhe në atë evropian, në mënyrë që produktet kosovare të shiten ne tregjet e rajonit, por edhe ne tregjet e Evropës”, thekson Zogaj.

Në gjysmën e parë të këtij viti, sipas të dhënave të Bankës Qendrore të Kosovës, eksportet shënuan normë vjetore të rritjes prej 18.6 për qind, duke arritur vlerën prej 168.1 milionë euro, ndërsa importet shënuan rritje vjetore prej 16.5 për qind dhe arritën vlerën prej 1.09 miliardë euro.

Sipas raportit të BQK-së, efekti i rritjes së eksporteve vazhdon të eliminohet nga rritja e importeve për sa i përket ndikimit në vlerën e bilancit tregtar, duke pasur parasysh se importet janë rreth 6.5 herë më të larta sesa importet.

Arian Zeka, nga Oda Ekonomike Amerikane, thotë se një masë që do të ndihmonte në promovimin e eksportit është futja e pakove stimuluese, siç është lirimi i pagesave nga tatimet për ato biznese të cilat kanë një plan të mirë të biznesit, dhe bizneset që bëjnë pjesë në sektorin e prodhimtarisë

“Qeveria do të ishte në gjendje të dilte me një pako të mirë që do të stimulonte zhvillimin e eksportit privat dhe sektorin e prodhimtarisë në vend. Kemi marrë paralajmërime nga qeveria se shumë shpejt do të hyjë në fuqi një pako e re fiskale, e cila përfshinë masa të tilla stimuluese, një prej tyre është që Oda Ekonomike Amerikane e ka kërkuar tash e sa kohë, e kjo është heqja e tatimit mbi vlerën e shtuar për produktet e makinerisë për markat që përdoren për prodhim”, thotë Zeka.

Zeka thekson se kanë pritur që pas raportit “Të bësh biznes” të Bankës Botërore, institucionet e vendit do të punonin më shumë në përmirësimin e ambientit afarist, por siç thotë ai, një gjë e tillë nuk ndodhi, dhe sipas tij, Kosova vazhdon të ketë deficit të lartë tregtarë.

“Çfarë mund të bëjë qeveria e vendit për të përmirësuar ambientin afarist? Mendoj që këto janë indikatorë shumë të qartë. Nuk ka nevojë që qeveria të drejtohet diku tjetër. Mjafton raportin ‘Të bësh biznes’ që publikohet çdo vit nga Banka Botërore. Në bazë të atij raporti, qeveria duhet të merr masa të cilat do të ndikonin në përmirësimin e ambientit afarist”, thotë ai.

Për të ngritur eksportin, edhe Alban Zogaj nga Instituti “Riinvest”, thotë se autoritetet kosovare duhet të bëjnë më shumë në stimulimin e bizneseve vendore.

Ne po e shohim që nuk është punuar shumë në aspektin e klimës biznesore në Kosovë.
Deri më tani, sipas tij, është bërë shumë pak në sektorin privat.

“Ne po e shohim që nuk është punuar shumë në aspektin e klimës biznesore në Kosovë. Kosova renditet shumë poshtë në listën e Bankës Botërore dhe institucioneve tjera ndërkombëtare sa i përket atyre elementeve të bërit biznes në Kosovë”, sqaron ai.

Ndryshe, sipas të dhënave zyrtare të Bankës Qendrore të Kosovës, që nga fillimi i këtij viti deri më tani, Kosova importoi mallra në vlerë prej 1.09 miliardë euro krahasuar me 938.8 milionë euro në periudhën e njëjtë të vitit paraprak./rel/

[Gameness]

Vera shitet lirë, blihet shtrenjtë

Zeri, Lavdim Hamidi | 24-08-2011 11:08 CET

Kosova mund të mburret se vetëm me verëra e ka raportin pozitiv tregtar. Më shumë eksporton sesa që importon. Mirëpo, vlera e importit të verës e tejkalon atë të eksportit, pasi që ajo blihet shumë shtrenjtë e shitet lirë.

Aktualisht eksporti në tregun evropian është shumë i ulët, krahasuar me vitet e 80-ta kur eksporti nga Kosova ka qenë 40 milionë litra në vit, kryesisht në Gjermani. Sipas Ministrisë së Bujqësisë, gjatë luftës në Kosovë sipërfaqja me vreshta u zvogëlua në mënyrë drastike.

Vreshtat e sektorit të ndërmarrjeve shoqërore u shkatërruan plotësisht. Sipërfaqja e vreshtave në Rahovec është sipërfaqja më e rëndësishme e vreshtave, e pastaj sipërfaqja e vreshtave të Therandës.

Në dokumentin e Ministrisë së Bujqësisë, plani për bujqësi, pylltari dhe zhvillim rural 2010-2013, flitet edhe për përpunimin shtëpiak të rrushit në verë, ku thuhet se ekziston një numër relativisht i madh përpunuesish, të cilët nuk janë të licencuar dhe kushtet në të cilat ato bëjnë përpunimin janë shumë të dobëta sa i përket higjienës, si dhe pajisjeve teknologjike.

Sipas këtij dokumenti, tregu aktual karakterizohet me verëra jocilësore me çmime të ulëta, pasi që verërat komerciale duhet të garojnë me prodhimet shtëpiake. “Për të pasur një kthim të arsyeshëm të investimeve në nën-sektor, kërkohet cilësi më e mirë dhe një profil i qartë i verës së tregtuar, karshi verërave shtëpiake.

Ministri i Bujqësisë, Blerand Stavileci, thotë se mund të jetë formulimi jo i drejtë, ku flitet për verëra jocilësore në dokumentin e Ministrisë, mirëpo, sipas tij, vreshtarët kosovarë duhet të orientohen në varietete më cilësore.

Ai sqaron se rrushi i tryezës, që kultivohet në Kosovë, është shumë cilësor dhe do të përkrahet nga Ministria e Bujqësisë. Mirëpo, sipas tij, kërkesa për konsum të verërave ka rënë në nivel global, jo vetëm në tregun e Kosovës.

Në anën tjetër, profesori i vreshtarisë dhe verarisë në Fakultetin e Bujqësisë në Prishtinë, Bedri Dragusha, thotë për “Zërin” se për këtë sektor përkrahja institucionale është zero.

Sa i përket kualitetit të verërave që prodhohen në vend, profesori Dragusha sqaron se ato janë në nivel të njëjtë me verërat që prodhohen në shtetet e rajonit, apo edhe më të mira.

“Lënda e parë për prodhimin e verës në Kosovë është shumë cilësore, po ashtu edhe teknologjia është në nivel të duhur”, shprehet Dragusha. Ai thotë se për të depërtuar në tregun evropian verërat kosovare duhet të ketë një angazhim më të madh edhe të Odës Ekonomike të Kosovës në këtë drejtim, në mënyrë që të ketë bashkëpunim mes prodhuesve të verës në vend dhe në Evropë.

Statistikat zyrtare të Doganave të Kosovës bëjnë të ditur se gjatë vitit 2010 nga Kosova janë eksportuar mbi 2.3 milionë litra verë, vlera e të cilëve ka arritur në rreth 1.5 milion euro. Vera kryesisht është eksportuar në Shqipëri, Kroaci, Zvicër, Gjermani, Britani të Madhe etj.

Vitin e kaluar në Kosovë janë importuar më pak se 120 mijë litra verë, vlera financiare e të cilave ka qenë më shumë se 1 milion e 550 mijë euro.

Ndërsa gjatë vitit 2011 janë eksportuar më shumë se 1.3 milion litra vlerë, vlera e të cilave ka arritur në mbi 897 mijë euro, ndërsa janë importuar 43 mijë litra me vlerë prej 957 mijë euro.

[Gameness]

AKB: Bizneset po rriten pas vendimit për reciprocitet

Koha.net

Prishtinë, 24 gusht - Udhëheqësit e Aleancës Kosovare të Bizneseve gjatë vizitës së bërë disa fabrikave në rajonin e Ferizajt kanë vlerësuar se mungon përkrahja institucionale ndaj prodhuesve vendës. Gjatë qëndrimit, të martën, në fabrikën për prodhimin e gypave “Ferplast”, në Fabrikën e ujit në Kllokot, atë të prodhimit të pijeve joalkoolike dhe energjike “BBF” dhe marketin “Plus”, kryetari i AKB-së, Agim Shahini, ka thënë se këto fabrika janë të përsosura dhe me prodhime shumë kualitative. Ai ka theksuar se pas vendimit të Qeverisë për masa reciprociteti ndaj Serbisë, sipas tij, prodhimet dhe shitjet e këtyre bizneseve kanë shënuar ngritje.

“Këto masa jo vetëm që kanë ndaluar importin enorm dhe të pakontrolluar për nga cilësia, por edhe kanë rritur prodhimin vendës dhe kanë shtuar numrin e të punësuarve”, ka thënë Shahini.

Sipas tij, fabrikat prodhuese kanë nevojë edhe për mbështetje më të madhe institucionale. Ai u ka bërë thirrje të gjitha institucioneve që të konsumojnë dhe të përdorin këto prodhime për cilësinë e të cilave, sipas Shahinit, dëshmon edhe certifikimi me standarde ndërkombëtare.

“Nuk është e lehtë të punojnë këto fabrika aq të suksesshme në tregun e Kosovës, kur dihet se konkurrenca është shumë e madhe, por institucionet duhet të bëjnë reforma më të favorshme të politikave ekonomike, më shumë të promovojmë e të ndihmojmë prodhuesit vendës, aq më shumë do të kemi të hyra, rritje të buxhetit dhe punësime të njerëzve dhe zhvillim ekonomik”, ka thënë Shahini.

Ai ka vlerësuar se investimet milionëshe në këto fabrika tregojnë se prodhimet kosovare janë avancuar shumë shpejt sa i përket besueshmërisë së konsumimit dhe cilësisë së prodhimeve. Shahini ka thënë se njëri ndër problemet kryesore me të cilin po ballafaqohen prodhuesit vendës është energjia elektrike.

Bashkim Krasniqi, pronar i fabrikës së gypave “Ferplast”, ka thënë se çdo vit fabrika e tij shënon ngritje rreth 20 për qind dhe krahas saj bëhet edhe rritja e numrit të punëtorëve. Ai ka thënë se brenda këtij viti në “Ferplast” janë punësuar 10 veta, ndërsa numri i të punësuarve është mbi 60.

“Pas masave të reciprocitetit shihet se kemi ngritje të shitjes së prodhimeve, të cilat nuk janë shtrenjtuar për asnjë cent”, ka thënë Krasniqi. Sipas tij, gjatë këtij viti janë shënuar ngritje të kënaqshme në eksportimin e produkteve jashtë vendit.

Adil Reshani, pronar i fabrikës së ujit “Kllokoti”, ka thënë se tanimë kanë nënshkruar kontratë me Arabinë, derisa rreth 70 për qind e prodhimeve do të dërgohen atje.

“Po ashtu eksportojmë edhe në Zvicër dhe vendet e tjera. Është e vetmja fabrikë që prodhon ujë qind për qind natyral dhe me traditë rreth 50-vjeçare, ndërsa kemi investuar mbi 2.5 milionë euro në teknologji shumë të avancuar”, ka thënë Reshani. Ai ka vlerësuar se pas veprimit të Qeverisë janë rritur kërkesat për shitje, është rritur prodhimi dhe numri i të punësuarve.

Edhe Ismet Mustafa, pronar i fabrikës së pijeve joalkoolike dhe energjike “BBF”, ka thënë masa e reciprocitetit është faktor i ngritjes së prodhuesve vendës, punësimit dhe zhvillimit ekonomik.

“Politikat ekonomike ende nuk janë si duhet dhe kemi probleme me lëndë të parë”, ka thënë Mustafa.

Sylejman Neziri, pronar i “Plus marketit” që mban në rafte vetëm prodhime vendëse, ka thënë se vendimi i ndaljes së prodhimeve serbe është dashur të merrej qysh më herët.

“Kosova mund të mbijetojë pa prodhimet serbe. Prodhimet vendëse që mungojnë i zëvendësojmë me ato shqiptare dhe vendet e tjera”, ka theksuar Neziri.