Thuaj JO produkteve serbe! Mos e ushqe kontrabanden!

[Gameness]

marre nga Kosovapress, 7 gusht 2011


Ndihet i lehtësuar që për shumë vite arriti t'i sfidoj produktet serbe

Pronari i Qendrës Tregtare "Plus-Market " nga Ferizaj, Sylejman Neziri, ua ka parë hajrin masave të reciprocitetit me Serbinë, që shteti i Kosovës, ka filluar së fundi t'i aplikojë. Prej pas luftës, ishte qendra e parë në Kosovë, që asnjëherë nuk kishte vendosur asnjë mall me prejardhje nga Serbia.

Shumë herë u sfidua gjatë punës, shpeshherë i ndodhte që t'i mungonin pijet e “Coca-Coles” dhe ai të reagonte publikisht, por gjithmonë ishte optimist se do të vijë një kohë si kjo, që këtyre mallrave t’u bëhet ndalesa nga shteti.

Të dielën, ai nuk e ka fshehur gëzimin, thotë se as kur është shpallur pavarësia e Kosovës nuk ka qenë më i gëzuar.

"Besoni prej se kanë filluar të aplikohen masat e reciprocitetit, puna "Plus Market" është dyfishuar. Unë asnjëherë nuk kam shitur mallra serbe, tash kur nëpër qendrat dhe marketet tjera kanë filluar të paksohen këto mallra, tek unë puna veç është shtuar", thotë Neziri.

Ky afarist i respektuar ferizajas, shpjegon se kjo masë ka qenë dashtë të aplikohet shumë më herët, në mënyrë që nga kjo të përfitojë qytetari por edh shteti.

"Të mirat e këtyre masave janë të shumta, qytetarët fitojnë më së shumti. Prodhimi do të rritet, do të hapen vende të reja të punës, do të rritet cilësia e prodhimit dhe ajo më kryesorja paraja do të mbet këtu. Besoj se nuk do të kemi edhe rezerva për gjëra ushqimore që do t'i konsumojmë, ngase gjithmonë mallrat serbe kanë qenë me prejardhje të dyshimta", shpjegon Neziri.

Edhe konsumatorët e kësaj qendre e kanë vlerësuar lartë qëndrimin e pronarit, duke thënë se edhe përkundër vështirësive që ka pasur, ia ka dal që ta mbajë gjallë këtë qendër dhe t’u sigurojë punë të punësuarve, e që nuk janë edhe të pakët.

Për më tepër, pronari i "Plus-Marketit ", shprehet optimist se këto masa do të mbeten në fuqi gjithmonë, duke konsideruar se për të gjitha mallrat serbe ka alternativa, bile edhe më të mira.

Neziri e ka ngritur shumë herë zërin kundër prodhimeve serbe, duke qenë shpesh edhe sponzorizues i spoteve vetëdijësuese për konsumim të produkteve vendore.

[Gameness]

marre nga Kosovapress, 12 gusht 2011

Vazhdon rritja shkëmbimeve ekonomike, tregtare Shqipëri-Kosovë

Ekonomia e Kosovës dhe Shqipërisë janë të vogla, por të shëndetshme dhe janë duke shkuar drejt rimëkëmbjes, duke iu bërë konkurrencë ekonomive globale dhe kjo tregon sesa fleksibile janë bizneset e dy shteteve, ka thënë kryetari i Aleancës Kosovare të Bizneseve, Agim Shahini.

Të premten ën Tiranë është mbajtur forumi i biznesit Shqipëri-Kosovës, me temë “Rritja e shkëmbimeve ekonomike-tregtare Shqipëri-Kosovë në kushtet aktuale”, i cili u organizua nga Aleanca Kosovare e Bizneseve, Dhoma e Tregtisë dhe Industrisë e Tiranës dhe Universiteti Mesdhetar i Shqipërisë. Me këtë rast Dhoma e Tregtisë dhe Industrisë dhe Aleanca Kosovare e Bizneseve nënshkruan edhe një marrëveshje bashkëpunimi.

Agim Shahini, kryetar i Aleancës Kosovare të Bizneseve, tha se ky forum ka për qëllim rritjen e shkëmbimeve tregtare dhe lehtësirat e bashkëpunimit, ndërsa bizneset duhet të mendojnë për interesat ekonomike.

“AKB-ja, me aleatët po mundohen që prodhimet serbe të zëvendësohen me ato shqiptare. Shkëmbimet janë rritur prej 25 korrikut. Konsumatorët dhe qytetarët e Kosovë po furnizohen me prodhime shqiptare. Prodhuesit e Kosovës kanë rritur prodhimin për 50 për qind në disa sektor, po ashtu edhe punësimin”, tha Shahini dhe ka shtuar se ekonomia e Kosovës dhe Shqipërisë janë të vogla, por të shëndetshme dhe janë duke shkuar drejt rimëkëmbjes duke iu bërë konkurrencë ekonomive globale dhe kjo tregon sesa fleksibile janë bizneset e dy shteteve...

[Gameness]

Shqipëria, bum eksportesh drejt Kosovës


marre nga qendra.info

Prishtinë, 13 gusht - Zbatimi i masave të reciprocitetit me Serbinë ka rritur ndjeshëm në Kosovë importin e mallrave nga Shqipëria. Të dhënat e fundit që raportohen nga biznesi kanë tejkaluar edhe pritshmëritë më optimiste.

"Shqipëria në të kaluarën ka qenë në vend të shtatë dhe të tetë, sa i përket shkëmbimeve tregtare me Kosovën dhe tani del e treta, pas BE-së dhe Maqedonisë", thotë Agim Shahini, kryetar i Aleancës Kosovare të Biznesit.

Kryetari i Dhomës së Tregtisë të Shqipërisë, Nikolin Jaka, deklaron se ka një rritje të dukshme të nivelit të qarkullimit tregtar dhe kjo rritje, sipas tij, vjen kryesisht në sektorin e materialeve të ndërtimit.

Mbyllja e kufijve me Serbinë po e ndryshon hartën tregtare të Kosovës dhe biznesi kosovar do ta orientojë tregtinë drejt Shqipërisë. "Bizneset e Shqipërisë, të të gjithë sektorëve, të vijnë dhe të qëndrojnë në Kosovë", thotë Shahini.

Por, me gjithë situatën e re të krijuar, bizneset sërish ndeshen me pengesa. Muharrem Osmani, një prodhues kosovar i detergjenteve, thotë se tentativat e tij për të eksportuar drejt Shqipërisë dështojnë nga çmimet e larta të referencës që vendos qeveria shqiptare.
Ekspertët e ekonomisë theksojnë se ka ardhur momenti për të politika të reja tregtare që do nxisnin tregtinë mes dy vendeve.

Ministri kosovar për Zhvillim Ekonomik, Besim Beqja, thotë se qeveria e Kosovës është duke ecur në këtë drejtim dhe premton heqjen e të gjitha barrierave.

"Të shkojmë drejt eliminimit të të gjitha barrierave, drejt krijimit të një kuadri ligjor, i cili i mundëson biznesit për t'u zhvilluar, por jo për të dhënë orientim", thotë Beqaj.

[Gameness]

Lajthitja ekonomike e Serbisë

telegrafi

Getoar M. Mjeku

Reciprokimi i Kosovës ndaj ndalimit të eksporteve të saj nga Serbia mund të çojë në humbje të pariparueshme ekonomike për këtë të fundit. Edhe nëse u rikthehet qasja në tregun kosovar, prodhimet serbe mund të mos rimarrin hapin, kur të jenë zëvendësuar nga zgjedhje vendore dhe të importuara nga vende të tjera.

Në përpjekje për të kundërshtuar pavarësinë e Kosovës, Beogradi mori një vendim të guximshëm më 2008: shkeli detyrimet ndaj marrëveshjes për tregti të lirë dhe ndaloi të gjitha prodhimet kosovare. Lëvizja, megjithatë, nuk pati ndikim madhor ekonomik për Serbinë, meqë fqinji i saj i ri kishte pak mallra për të eksportuar.

Beogradi vendosi embargon duke kujtuar se eksportet e tij në Kosovë nuk do të pengoheshin. Por, ndërsa pala serbe u tërhoq nga bisedimet e ndërmjetësuara nga BE-ja, me qëllim të normalizimit të tregtisë mes tjera çështjesh, qeveria kosovare u kundërpërgjigj me masa të ndërsjella, ndonëse me një vonesë prej tre vitesh.

Prodhimi vendor në Kosovë është rritur për 40%, thonë drejtuesit e biznesit, ndërsa doganat lajmërojnë për një rritje të importit nga Shqipëria, Maqedonia, Turqia e shtete të tjera fqinje. Sipërmarrës nga rajoni po ashtu kanë ardhur në Kosovë për t’u njohur me mundësitë që ofron tregu.

Gjendja politike në vend mbetet e tensionuar, meqë Serbia vazhdon të sponsorojë struktura ilegale me qëllim për të zhvatur sovranitetin e Kosovës. Por mbetet shpresë se bisedimet mund të rifillojnë dhe të dy vendet të kërkojnë zgjidhje për mosmarrëveshjen tregtare përmes dialogut.

Sidoqoftë, mund të jetë tepër vonë për Serbinë që të rimëkëmbet në tregun kosovar atëherë, edhe nëse garantohet sërish qasje e lirë dhe e plotë në treg. Mallrat serbe gjithmonë kanë pasur konsum të gjerë në Kosovë, por kur të jenë zëvendësuar nga alternativat vendore e rajonale, mund të jetë e vështirë për to që të rimarrin epërsinë në tregun kosovar.

Ndërthurja e drejtimit të mbrapshtë të ekonomisë dhe nacionalizmit shkatërrimtar nuk janë të panjohura për Serbinë, politikat qeveritare të së cilës kanë dëmtuar mirëqenien e vendit gjatë gjithë historisë moderne. Mes viteve 1880 e 1910, siç kujtojnë autorët serbe, borxhi kombëtar u stërmadhua për 2197 %, duke çuar në përfshirjen e qeverisë në luftëra të kushtueshme agresioni si mënyrë e vetme për të nxjerrë vendin nga kriza financiare.

Regjimi monarkik i mes dy luftërave botërore nuk solli ndonjë përmirësim. Dinastia e Karadjordjevicëve shtypi liritë politike e ekonomike të joserbëve, lejoi vendin të varej financiarisht nga fuqitë e boshtit (Gjermaninë naziste e Italinë e Mussolinit).

Në vitet ’90, klika e korruptuar e Milosevicit arriti përfitime personale marramendëse përmes një hiperinflacioni të paprecedent, ndërsa shpenzimet masive ushtarake për zhvillimin e katër luftërave, si dhe bombardimet e NATO-s lanë një vragë të thellë në ekonominë e Serbisë. Këto megjithatë kanë mundur të shmangen, ashtu siç mund të mënjanonte Beogradi edhe politikën armiqësore ndaj Kosovës, që sot po i sjell humbje të reja ekonomike.

Në anën tjetër, ndalimi i ndërsjellë i mallrave do ta lirojë Kosovën nga varësia ekonomike në një shtet që nuk pranon ta njohë pavarësinë politike të saj. Në të njëjtën kohë, Prishtina është e vendosur t’u japë fund organizatave të paligjshme të mbështetura nga Beogradi, të cilat kanë penguar sundimin e ligjit në Kosovë.

Prandaj, vendimi i Beogradit për të vendosur embargo ndaj fqinjit jugor nuk gjen mbështetje nga pikëpamja ekonomike, por përfitimet politike mund të arrihen. Politika e Serbisë ndaj Kosovës do të ndeshet me dështim fatal, çfarë shpresojmë të shpie drejt rrethanave të reja, në të cilat dy vendet të ndërtojnë marrëdhënie të qëndrueshme e miqësore, duke përfshirë edhe tregtinë e lirë.

[illyrian rex]

Rendimentet e grurit sivjet janë për 35% më të larta
16.08.2011

Me këtë prodhim mbulohen rreth 80% të nevojave të popullatës, që janë 205 kg për kokë banori në vit, tha Ministri i Bujqësisë, Blerand Stavileci....

Rendimentet e grurit sivjet janë për 35% më të larta se vitin e kaluar. Me këto rendimente nevojat për grurë për popullatën e Kosovës përmbushen në masën rreth 80%.

Raporti përfundimtar për fushatën e korrje-shirjes së drithërave të bardha për këtë vit u prezentua nga Ministri i Bujqësisë, Blerand Stavileci, i cili u shpreh i kënaqur me rezultatet.

“Ka qenë një aktivitet dhe fushatë e korrje-shirjeve do të thosha skajshmërisht e suksesshme dhe skajshmërisht e frytshme. Këtë vit mund ta konsiderojmë si vit rekord të rendimentit, të mbulimit të nevojave vendore, të sipërfaqeve të mbjella dhe të korrura dhe të përfituesve të subvencioneve”, tha Stavileci.

Sivjet janë grumbulluar afro 360 mijë tonë grurë, kurse vitin e kaluar ishin afro 220 mijë tonë. Shprehur në përqindje, rendimenti mesatar i grurit në këtë vit është më i lartë për 35%.

Me këtë prodhim mbulohen rreth 80% të nevojave të popullatës, që janë 205 kg për kokë banori në vit, tha ministri.

Ndalimi i importit për shkak të masave të reciprociteti nga Serbia, vendi prej nga është importuar më së shumti, nuk paraqet problem për ministrin. Ai thotë se ka shumë tregje tjera.

“Ne kemi pasur një varshmëri të madhe për sa i përket grurit dhe miellit nga shteti fqinj verior dhe, tash për tash, agrobizneset e ndryshme kanë gjetur kanale alternative nga shtete e tjera, madje edhe për sa i përket farës kanë gjetur farë më cilësore nga vendet e tjera, ndryshe nga ato shabllone të kaluarës”, shtoi Stavileci.

Ndryshe, për sa i përket rendimenteve për hektar, Kosova bashkë me Serbinë qëndron më së miri në rajon. Por, dallimi është tek sipërfaqet e mbjellura, ku vendi ynë qëndron më poshtë.

rtklive.com

[Gameness]

Embargo edhe energjisë nga Serbia

qendra.info

Prishtinë, 15 gusht - Në kuadër të bllokimit të mallrave komercialë që hyjnë nga Serbia, Kosova i vë bllokadë edhe importit të energjisë elektrike nga Serbia.
Drejtori i Korporatës Energjetike të Kosovës, Arben Gjukaj shpjegon se kompania që ai drejton pas vendimit të qeverisë, nuk do të nënshkruajë asnjë kontratë me operatorët serbë për importin e energjisë elektrike.
Fatmirësisht, sipas tij, këtë vit operatorët serbë nuk kanë fituar ndonjë tender për importin e energjisë dhe energjia e cila importohet bëhet nëpërmjet operatorëve të tjerë ndërkombëtarë.
“Prej tyre që kanë fituar tenderin në janar të këtij viti, ka qenë edhe një kompani nga Serbia, por kjo kompani në afatin kur e kemi ftuar për nënshkrim kontrate nuk e ka nënshkruar, d.m.th. kontrata mbetet e panënshkruar dhe ne jemi në arbitrazhe për rregullimin e çështjeve konform ligjit në fuqi”, është shprehur Gjukaj.
Rrjedhimisht, sipas drejtorit të KEK-ut, Kosova nuk importon fare rrymë nga Serbia.
“Për momentin kemi vetëm 3 orë import të energjisë nga një kompani sllovene, ndërsa nga Serbia nuk po marrim asnjë megawat”, theksoi Gjukaj.
Xhukaj bëri të ditur se pas vendimit të qeverisë, KEK-u ka ndërprerë realizimin e rreth 30 kontratave me kompanitë qofshin ato kosovare apo serbe të cilat kryejnë shërbime teknike me mallra me origjinë nga Serbia.
I gjithë ky proçes, sipas sekretarit të përgjithshëm të Odës Ekonomik, reflekton pozitivisht në bashkëpunimin e Kosovës me Shqipërinë në sektorin e energjisë, por edhe me vende të tjera të cilat ofrojnë kontrata më të favorshme.
Pas vendimit të Ministrisë së Tregtisë për bllokimin e importit të mallrave komerciale nga Serbia, ministri i Zhvillimit Ekonomik Besim Beqaj ka nxjerrë një tjetër vendim i cili ekskluzivisht u drejtohet ndërmarrjeve publike në Kosovë për të ndalur çdo marrëveshje me operatorët ekonomike të cilët sjellin mallra me origjinë nga Serbia.

[Gameness]

UNMIK-u i njeh Doganat e Kosovës

16.08.2011/21:38 - E Martë

Misioni i OKB-së në Kosovë, UNMIK ka thënë se i njeh vulat e Doganës së Kosovës. “Përdorimi i këtyre vulave është në përputhje me politkën neutrale, dhe konfirmohet kjo edhe në raportin e Sekretarit të Përgjithshëm të OKB-së, dërguar për Këshillin e Sigurimit”, ka thënë zëdhënës Olivie Salgado.

Ai ka thënë se vulat doganore të Kosovës duhet të pranohen, dhe të gjithë duhet ta respketojnë marrëveshjen e CEFTA-s. Zëdhënësi i UNMIK-ut ka shprehur besimin se kjo çështje do të zgjidhet në rundin e ardhshëm të negociatave. /indeksonline/

[Gameness]

Situata e krijuar në Kosovë, hap mundësi për rritje të këmbimit tregtar

Nga Express më 17 gusht 2011 në ora 15:08

Situata e fundit e krijuar ne Kosovë po hape mundësi për një rritje të këmbimit tregtar me shtete e tjera, ka thënë ministri i Bujqësisë, Pylltarisë dhe Zhvillimit Rural, Blerand Stavileci, pas takimit që pati me delegacionin bullgar të kryesuar nga ministri i Bujqësisë dhe Ushqimit, Miroslav Naydenov.

Një delegacion i Ministrisë së Bujqësisë dhe Ushqimit nga Bullgaria po qëndruar të mërkurën në Kosovë, ku ka zhvilluar një takim me ministrin e Bujqësisë, Pylltarisë dhe Zhvillimit Rural, Blerand Stavileci, ku është biseduar për mundësinë e bashkëpunimit ekonomik dhe tregtar në mes të dyja vendeve.

Ministri Stavileci duke e quajtur këtë takim shumë të frytshëm për shtetin e Kosoëvs, tha orientimi i Qeveris së Kosovës është për të rritur prodhimet vendor, por sipas tij është e natyrshme që të kërkojnë edhe tregje alternative.

Ai po ashtu theksoi se zhvillimet e fundit për vënien e masave të reciprocitetit hapin mundësi të reja për rritje të këmbimit, e tregtarë, duke thënë se vetëm lehtësimet fiskale dhe eliminimi i proceduarave burokratike, mund ta përshpejtojnë dhe ta rrisin këtë këmbim tregtar.

“Situata e fundit e krijuar në vendin tonë hap mundësi për një rritje të këmbimit tregtar me shtete e tjera. Në këtë drejtim njëri nga shtetet potenciale është edhe vet Bullgaria dhe ne si shtet jemi të interesuar që ta rrisim këmbimin tregtar si në vëllim ashtu edhe në strukturë, dhe për këtë qellim mendojmë se marrëveshjet tona reciproke jo vetëm në fushën e bujqësisë, në segmentet e ndryshme kufitare dhe fito-sanitare, por sidomos ato të natyrës fiskale dhe administrative, pra lehtësimet fiskale dhe eliminimi i proceduarave burokratike, mund ta përshpejtojnë dhe ta rrisin këtë këmbim tregtarë”, thotë ai.

Ndërsa ministri i Bujqësisë dhe Ushqimit, Miroslav Naydenov tha se bisedimet e këtij takimi ishin vërtet praktike dhe bëri të ditur se i kishte propozuar kolegëve nga Kosova që të përfitojnë nga përvoja bullgare.

“Ne i propozuam kolegëve tanë që të përfitojnë nga përvoja që kemi ne në Bullgari, dhe u propozuam që shtegun në të cilin ne kemi bërë rrugë, ata të mos e kapin përsëri, por të përdorin shtegun tonë. Ka qenë bashkëpunim në kontrollin veterinar dhe fito sanitarë, në fushën e shkencës bujqësore, në fushën e standardeve të ushqimeve, sepse herët ose vonë shumë prej ndërmarrjeve përpunuesve në Kosovë duhet të përgjigjen standardeve evropiane”, tha ai.

Për më tepër delegacioni nga Bullgaria do të do të marrë pjesë edhe në forumin e organizuar nga Ministria e Tregtisë dhe Industrisë në bashkëpunim me Odën Ekonomike të Kosovës me temë “Mundësitë e bashkëpunimit ekonomik në mes të Kosovës dhe Bullgarisë pas masave të reciprocitetit me Serbinë”.

[Gameness]

Rajoni – në garë për tregun tonë

17.08.2011/19:30 - E Mërkurë

Maqedonia, Kroacia e Mali i Zi po shtyhen për të zënë vend me produktet e tyre në Kosovë, pas masave të reciprocitetit të qeverisë së Kosovës ndaj Serbisë.

“Në periudhën në vazhdim presim një ngritje të ndeshme të përqindjes së produkteve tona në tregun e Kosovës, ka thënë për SETimes, Jadranka Arizankosvka nga Oda Ekonomike e Maqedonisë.

Ndërkohë, ambasadori i Kosovës në Kroaci Valdet Sadiku u ka bërë thirrje bizneseve kroate që të dërgojnë mallrat e tyre në Kosovë, dhe një vizitë e kryeministres Kosor së shpejti pritet të forcojë bashkëpunimin ekonomik.

E zyrtari i Ministrisë së Ekonomisë në Malin e Zi, Goran Scepanovic ka pohuar se ky shtet mund të zëvendësojë produketet në disa fusha si për mishin dhe pijet. /indeksonline/

[Gameness]

Kryeministrja kroate, Jadranka Kosor pritet ta vizitojë Kosovën. Me vete do të sjellë edhe dhjetëra biznesmenë kroatë.

Reciprociteti, ankohen biznesmenët serbë - po humbim

Biznesmenë serbë ankohen për humbjet që janë duke pësuar për shkak të mosplasimit të mallit në Kosovë. Oda Ekonomike e Serbisë thotë se tani zbrazëtia e krijuar do të plotësohet nga fqinjët. Biznesmenët serbë, sidomos druajnë nga vizita e Kryeministres së Kroacisë Jadranka Kosor dhe biznesmenëve kroatë të cilët vijnë në Kosovë më 24 gusht.

Nga Express më 18 gusht 2011 në ora 14:53

Një muaj pasi në Kosovë është vendosur bllokada për mallin e Serbisë, ka filluar lufta rajonale për një pjesë të tregut që e ka mbuluar Serbia.

Oda Ekonomike e Kroacisë është duke përgatitur një regjistër të ndërmarrësve të interesuar të cilët do t’i marrë me vete në Kosovë Kryeministrja e Kroacisë Jadranka Kosor në vizitën e parë në Kosovë.

Sipas të përditshmes serbe “Blic”, shansin që të marrin një pjesë të tregut në Kosovë që vlen gati gjysmë miliardi dollarë biznesmenët kroatë do ta kenë në fund të gushtit.

Edhe pse regjistrat e biznesmenëve kroatë që do të jenë në delegacion me Kryeministren Kosor ende nuk janë gati mediat kroate kanë njoftuar se më të interesuarit janë ata që merren me industrinë ushqimore dhe të plastikës.

Në Serbi vlerësojnë se ky reagim i shpejtë i biznesmenëve kroatë nuk është një befasi pasi bëhet fjalë për një treg të rëndësishëm.

“Keni një zbrazëti, një pjesë e tregut me vlerë prej 400 milionë dollarësh i cili tani duhet të plotësohet. Konkurrenti kryesor i deritashëm Serbia është eliminuar derisa nevojat e tregut janë urgjente. Ky është një rast që duan ta shfrytëzojnë të gjithë”, ka thënë Zoran Bojovic nga Oda Ekonomike e Serbisë.

Se tregu i Kosovës nuk është i parëndësishëm për kompanitë serbe tregojnë edhe shifrat. Gjatë një viti në Kosovës është plasur një mall në vlerë prej 400 milionë dollarësh. Në 6 muajt e parë vlera e mallit ka qenë 200 milionë dhe gjithçka më pas është ndalur.

“Në bazë të këtyre shënimeve mund të përfundojmë se humbja potenciale e Serbisë nëse embargoja vazhdon mund të jetë deri në 250 milionë”, ka thënë Bojovic.

“Të gjithë janë duke e shfrytëzuar fatkeqësinë serbe dhe ashtu si qëndrojnë gjërat tani shanset janë që kompanitë nga vendet e rajonit ta marrin plotësisht tregun e Kosovës. Nëse merren vesh malli kroat do të jenë në raftat e shitoreve brenda 24 orësh, kaq do t’ju duhet të na zëvendësojnë”, ka thënë Rodoljub Draskovic, drejtor i “Swisslion”, kompani me plasmanin më të madh të produkteve në Kosovë.

“Shpresoj që shteti të ketë mirëkuptim dhe të na kompensojë për humbjet në Kosovë”.

Kompania “Bambi” nga Banati për shkak të ndalimit të hyrjes së mallrave serbe, humb rreth 200 mijë euro të cilat sipas drejtorit Miroslav Miletic nuk mund të kompensohen aktualisht.