Familjet në fshat, por edhe në zonat periferike të qytetit që kanë marrë në përdorim trojet e ish-ndërmarrjeve bujqësore pas ‘92-shit, do të bëhen pronarë të ligjshëm të tyre, pa paguar asnjë tarifë.Komisioni i Ligjeve miratoi dje projektligjin e ardhur nga qeveria. Kushti i vetëm për këto familje që të sigurojnë tapinë është që toka të jetë shfrytëzuar nga përfituesit ose të jetë e banuar prej tyre pas marrjes në përdorim. Me gjithë ndryshimet në ligj, nuk përfitojnë prej tij të gjithë ata persona që përdorin një tokë që ka pronar ose që është në proces shqyrtimi nga Agjencia e Kthimit dhe Kompensimit të Pronave. Ndryshimet ligjore që u miratuan në Komisionin e Ligjeve parashikojnë edhe kompensimin financiar për të gjithë ata që e kanë paguar një herë tarifën e marrjes në pronësi. “Projektligji ka për qëllim rregullimin e situatës juridike për familjet bujqësore apo individët, subjekte të përfitimit te tokës në pronësi që e përdorin atë faktikisht, por për shkaqe të ndryshme s’e kanë në pronësi. Projektligji përkufizon edhe përdoruesit edhe shfrytëzuesit e tokës bujqësore. Pra, konsideron si të tilla familjet bujqësore apo individët që janë banorë të komunës ose bashkisë dhe në asnjë rast s’kanë ndryshuar vendbanimin që nga 1.10.1992″, tha relatori i projektligjit, deputeti Enkelejd Alibeaj. Por, gjatë diskutimit, deputetët e PD-së hasën disa problematika dhe kërkuan që ato të kufizoheshin me ligj. Së pari, ata hoqën një pjesë të nenin që u lejon komunave dhe bashkive verifikimin nga ana e tyre, si kusht për të marrë tapinë dhe së dyti, kërkuan qartësinë e ndarjes së tapisë nga këshilli komunal ose bashkiak. Sipas relacionit, qëllimi i këtij projektligji është rregullimi i situatës juridike për familjet apo individët, subjekte të përfitimit të tokës bujqësore në pronësi, të cilët e përdorin dhe e shfrytëzojnë atë faktikisht, por që, për shkaqe të ndryshme, nuk janë pajisur me tituj pronësie. Ndryshimet e propozuara janë një domosdoshmëri për shkak se fenomeni i mosplotësimit të akteve të marrjes së tokës në pronësi zë një peshë të madhe në problematikën e krijuar, si rrjedhojë e paqartësisë së vetë legjislacionit të ndarjes së tokës bujqësore apo zbatimit jo korrekt të tij. Ligji aktual i dha të drejtën familjeve që e kishin marrë tokën bujqësore në përdorim, ta kalonin atë në pronësi pa shpërblim, por vetë ligji ka shumë paqartësi në formulimin e tij. Kështu, nëpërmjet nenit 5 të projektligjit amnistohen rastet ku, për shkak të moszbatimit të procedurave të kalimit të tokës bujqësore nga përdorimi në pronësi, rrezikohej që subjekteve që në këto raste e kanë marrë pronësinë, t’u shfuqizohej ajo. Për të mos e zvarritur pafundësisht këtë proces, është propozuar që ai të përfundojë brenda një afati 1-vjeçar nga data e hyrjes në fuqi e akteve nënligjore në zbatim të këtij ligji. Nisur nga sa më sipër, është hartuar propozimi nëpërmjet të cilit u jepet zgjidhje pjesës më të madhe të problemeve.
Diskutimet në Komision
Enkelejd Alibeaj: Përfitojnë ata që e kanë tokën bujqësore në përdorim dhe e shfrytëzojnë atë, por kanë mungesa në plotësimin e dokumentacionit të përdorimit ose të pronësisë. Janë banorë të komunës apo bashkisë në momentin e hyrjes në fuqi të këtij ligji dhe në asnjë rast nga data 1.10.1992 nuk kanë ndryshuar vendbanimin e tyre, sipas regjistrit të gjendjes civile.
Majlinda Bozgo: Administrata e komunës së bashku me kryeplakun apo kryesitë e fshatrave do të bëjë evidentimin e përfituesve dhe të sipërfaqeve, të cilat më vonë do të kontrollohen nga administrata e komunës dhe miratohen me vendimin e këshillit të komunës.
Ilir Rusmali: A e kemi inventarin e plotë të subjekteve të sipërfaqeve dhe të koordinatave të tyre që do të preken nga ky ligj. E dispononi apo jo?
Majlinda Bozgo: Komisioni qeveritar i tokës nuk e disponon një inventar të tillë.
Viktor Gumi: Ndarja e tokës do të bëhet me vendim të këshillit bashkiak ose komunal. Por, nisur nga eksperienca e deritanishme me ndarjen e ndihmës sociale, mendoj se duhet parë, sepse anëtarët e këshillit kanë ardhur në mbledhje me listat e tyre.
Panorama
ERALD KAPRI
Përgjigju Duke Cituar
Postuar më parë nga Brari
Krijoni Kontakt