Zannier e krahasonte Kosovën me Afganistanin

[ARIANI_TB]

Publikuar: 08.07.2011 - 09:41
Prishtinë, 8 korrik – Ish-shefi i UNMIK-ut, Lamberto Zannier, para se ta lëshonte Kosovën ishte përkujdesur që të bënte një krahasim të çuditshëm të Kosovës me Afganistanin. Në disa korrespodenca ndërmjet tij dhe komandantit të KFOR-it, gjeneralit Erhard Buhler, të cilat “Koha Ditore” ka arritur t’i sigurojë nga burime ndërkombëtare, ish-shefi i UNMIK-ut përmend incidentet në Afganistan si arsye për të mbajtur në nivel të lartë sigurinë e stafit të UNMIK-ut në Kosovë. Në një letër dërguar komandantit të KFOR-it lidhur me murin që rrethon selinë qendrore të UNMIK-ut në Mitrovicë, ish-shefi i UNMIK-ut shkruan se muri është i nevojshëm për shkak të sigurisë së stafit të UNMIK-ut dhe kërkon nga KFOR-i që të ndalë Komunën e Mitrovicës nga aksioni për largimin e të njëjtit mur.

“Gjatë një takimi ndërmjet përfaqësuesit rajonal të Mitrovicës me kryetarin e Komunës së Mitrovicës (Avni Kastrati v.j), kryetari ka thënë se ‘zoti Buhler ka thënë se muri nuk është i nevojshëm’”, i shkruante Zannier komandantit të KFOR-it. “Besoj që komandanti ka gabuar kur ju ka cituar juve, pasi që jam i sigurt se ju e kuptoni nevojën për të mbajtur murin, për shkak të sigurisë së stafit të UNMIK-ut”, shkruan më tej Zannier.

Ish-shefi i UNMIK-ut mundohet që pastaj t’ia shpjegojë komandantit të KFOR-it arsyet se pse ky mur është i nevojshëm.

“Më duhet të shtoj se ky aspekt ka një rëndësi edhe më të madhe pas incidenteve tragjike në Mazai-Sharif të Afganistanit, dhe në disa vende të tjera, kur protestat e qeta janë kthyer në të dhunshme dhe kanë shkaktuar vdekjen e stafit të Kombeve të Bashkuara”, shkruan ish-shefi i UNMIK-ut.

Diplomati italian, që sipas burimeve të gazetës letrën e ka shkruar në ditën e fundit të mandatit të tij në Kosovë, ia rikujton komandantit të KFOR-it se është kompetencë e Kombeve të Bashkuara që të vendosin se çfarë masash sigurie nevojiten për stafin e tyre, dhe kërkon nga KFOR-i që të pamundësojë aksionet e mundshme të Komunës së Mitrovicës që të heqë murin rrethues.

Korrespondenca ndërmjet ish-shefit të UNMIK-ut dhe komandantit të KFOR-it ndodh pas një kërkese në letër të kryetarit të Komunës së Mitrovicës, Avni Kastrati, i cili kërkon nga UNMIK-u heqjen e rrethojave me qëllim që të lirohet hapësira publike. Në letër, Kastrati ua kujton zyrtarëve të UNMIK-ut se Komuna ka kohë që ka kërkuar heqjen e murit në mënyrë që në atë hapësirë të zbatohet një projekt i Komisionit Evropian për gjelbërim.

Ndërtesa e UNMIK-ut gjendet në qendër të qytetit të Mitrovicës, disa metra në jug të lumit Ibër. Kryetari i Komunës në letrën e shkruar më 27 qershor, ua jep si afat për heqjen e murit zyrtarëve të UNMIK-ut 6 korrikun. Në të kundërtën, Kastrati paralajmëron se Komuna do të detyrohet që vetë t`i heqë shtyllat e këtij muri.

Shkrimin të plotë lexojeni sot në gazetën “Koha Ditore”.

http://www.koha.net/?page=1,13,61644

[drenicaku]

Valla edhe mu po me duket bash si avganistani

[ardiana luzha]

Qe tja paske marr inati Kosoves .....me dhimbseshe

[benseven11]

Diplomti italian ka te drejte qe muri te mos prishet,pasi nuk ka siguri dhe demostratat nganjehere,mund te kthehen te dhunshme.Nuk mund te garantosh me siguri 100% qe te gjithe pjesetaret ne nje demostrate jane pa arme.Mund te vriten punonjes te kombeve te bashkuara aksidenralisht,ose me paramendim pasi nje ose disa pjestare te demostrates per ndonje arsye qellojne me arme,
Ajo seli e kombeve te bashkuara duhet trajtohet nga komuna e Mitrovices
si nje "ambasade".Ambasadat e kane nje mur rrethues per shume arsye.
Jam i sigurte qe njerez ne pushtet dhe polici ne Mitrovice jane te vetedisjshem qe shume qytetare mbajne neper shtepia arme dhe municion pa leje.
Atehere cfare sigurie mund te kete selia e kombeve te bashkuara pa mur rrethues,kur ka njerez qe mbajne kallashnikove ne shtepia te fshehura pa leje?Krahasimi me afganistanin ka te beje me mundesine ne Kosove qe ashtu si ne Afganistan e kthimit te demostratave,protestave paqesore ne lufte me arme,vrasje dhe kaos.