Kryqomania Si Pjesë E Spektaklit Politik Grek

[forum126]

KRYQOMANIA SI PJESË E SPEKTAKLIT POLITIK GREK


Një garë për të vënë kryqe nëpër vende të dukshme me sa duket tashti po jep frytet e veta. Kryqet e vendosura në jug të vendit dhe skandalet e varrezave në Boboshticë të Korçës dhe Kosinë të Përmetit konfirmuan shqetësimet e kahershme.

Regjistrimi i popullsisë dhe pretendimet e konsullit grek Ikonomu në përvjetorin e OMONIA-s i bëjnë akoma më të qarta pretendimet e grekëve edhe aty ku nuk ka grekë.

Tashmë Regjistrimi i Popullsisë është kthyer në një mollë sherri ndërmjet atyre që e duan këtë vend dhe pretendimeve helene për jugun e vendit tonë. Vërejmë gjithashtu se 2 janë pikat më të nxehta për momentin: varreza e Boboshticës në Korçë, ndërsa tjetra është varreza e Kosinës.

Veçanërisht këto të dyja nuk prekin thjesht vetëm ndjesitë e muslimanëve shqiptarë, por të të gjithë shqiptarëve në veri e në jug, me qenë se ato prekin ndjesitë kombëtare të tyre dhe nuk janë një gjë e thjeshtë për t’u tejkaluar. Gjithashtu mosrespektimi i treguar ndaj varreve të shqiptarëve në Boboshticë të Korçës dhe në Kosinë të Përmetit me pretendimin se ato janë varre grekësh është një tjetër precedent i rrezikshëm politik ndaj kombit shqiptar dhe të gjithë përpjekjeve të rilindësve dhe patriotëve tanë të shquar, që luftuan për ngritjen e Shtetit Shqiptar si, Jani Vreto, Pashko Vasa, Naum Veqilharxhi, Papa Kristo Negovani, Mihal Grameno, Themistokli Gërmenji, Luigj Gurakuqi, Ismail Qemal bej Vlora, Hafiz Dalliu e shumë të tjerë, që sakrifikuan jetën e tyre për atdheun.

Kjo po vërehet ditët e fundit, kur konsulli grek në qytetin e Korçës i deklaroi këto varreza si të “grekëve”, e citojmë: “Grekë, mos u trembni nga regjistrimi i popullsisë, të shpallni origjinën reale dhe të gjithë atyre që janë në dyshim dhe me frikë dhe pyesin veten jam me siguri grek, ju them një gjë, shkoni në varreza dhe shikoni varrezat e etërve dhe gjyshërve tuaj dhe gjuhën në të cilën janë të shkruar dhe merrni vendimin tuaj. Janë në gjuhën greke.” “Po, ekzistojnë grekë në Korçë. Po, vllehtë janë grekë”.

Gjithashtu vija e kryqeve të vendosura në Përmet e Korçë, ku në fund vërehet se është ndjekur vija e rrugës nacionale dhe kryqet të gjithë kryesisht janë të vendosura pranë rrugëve (Boboshticë, Kosinë, Lipë, Kutal, Çarshovë, rruga nacionale Jergucat-Gjirokastër etj), kjo lloj vendosje na kujton krejtësisht një vijë të re të Teodosit, ku kërkohet të dallohet ortodoksia me helenizmin e saj. Kohët kanë ndryshuar dhe e vërteta nuk mund të fshihet me shoshë, pavarësisht këmbënguljes helene për t’i bërë realitet pretendimet mbi 200-vjeçare ndaj trojeve me popullsi të pastër shqiptare.

Është për t’u lavdëruar përpjekja e nënkryetarit të Këshillit të Lartë të Drejtësisë Kreshnik Spahiu, i cili i raportoi dhe i denoncoi përpjekjet e forcave të ndryshme brenda vendit dhe administratës së Shtetit Shqiptar, të cilët i kanë ndihmuar me dashje apo pa dashje synimet dashakeqe helene në jug të vendit për të ndryshuar kombësinë e për të rritur shifrat. Shifrat e minoriteteve mund të ndërrojnë, por përqindjet nuk është se mund të ndryshojnë sipas oreksit të politikanëve grekë.

Edhe propaganda e ulët, se këtë na e kërkon Evropa (regjistrimin e kombësisë dhe fesë) tashmë është një demagogji krejtësisht e pastër, sepse në radhë të parë është antikushtetuese sipas ligjeve të Shtetit Shqiptar e më pas regjistrimi në bazë etnie dhe feje nuk përfshihet në Rregulloren Evropiane të Parlamentit Evropian No. 763/2008 për regjistrimin e popullsisë. Këto dy pyetje janë shtuar nën presion në pyetësorin e përgatitur nga INSTAT dhe jo si standard për t’u plotësuar.

Në Evropë nuk ka asnjë vend, ku shteti të ketë bërë një regjistrim mbi baza besimi dhe etnie, përveç rastit kur kjo gjë realizohet nga agjenci jo-shtetërore të specializuara, apo OJF të karakterit ndërkombëtar, të cilat nuk kanë ndërvarësi nga politika.

Tashmë është plotësisht e qartë që politika greke bën presion mbi Qeverinë Shqiptare, duke i vënë si kusht regjistrimin e popullsisë (me baza kombësie e feje), si shkëmbim për procesin e integrimit të Shqipërisë në BE, ndërkohë që i duhet vetë Greqisë që të integrohet, meqë deri tani është i vetmi vend i BE-së, i cili nuk i njeh minoritetet etnike dhe fetare, madje i shkel të drejtat e tyre dhe kjo është konstatuar shumë më herët. Fakti që Politika Greke refuzon të njohë të drejtat e popullsisë çame dhe gjenocidin e ushtruar mbi të e konfirmon plotësisht këtë gjë.