Calciopoli bis - Edhe Inter me faj

[MaDaBeR]

Tronditet Italia, 19 të arrestuar për trukime



Futbolli italian është zgjuar me lajme shokuese ditën e djeshme. Futbollistë, ish-futbollistë, personazhe të njohura të sportit, janë arrestuar që në orët e para të mëngjesit, ndërkohë që shumë të tjerë janë zyrtarisht në hetim, duke iu bërë edhe kontrolle në shtëpi. Prokuroria e Kremonës ka firmosur urdhër-arrestet për plot 19 persona, mes të cilëve kapitenin e skuadrës së Lacios, Stefano Maurin. Në pranga përfundoi edhe ish-futbollisti i Xhenoas, Omar Milaneto, të gjithë me akuzën për përfshirjen në organizata kriminale dhe paracaktimin e rezultatit të ndeshjeve. Operacioni u krye në Kremona, Breshia, Bolonja dhe Alesandria, ku dhjetë prej personave të arrestuar ishin lojtarë apo ish-lojtarë që janë aktivizuar në Serinë A dhe B.

Arrestimet – Ora 05:30, kur policia ka shkuar në shtëpinë e Stefan Maurit dhe i ka komunikuar atij urdhrin e prokurorisë për ta arrestuar. Deri diku shokuese për vetë operacionin, por edhe e pritshme, duke qenë se emri i mesfushorit ishte përmendur shumë kohët e fundit. Një zgjim aspak i këndshëm edhe për Milaneton, i cili u desh t’u drejtojë duart forcave të rendit, për t’i vënë prangat dhe për ta shoqëruar në polici. Të dy futbollistët dyshohen se kanë bashkëpunuar me njeri-tjetrin, sidomos në sfidën Lacio-Xhenoa. Ndërkohë, Alesandro Pelikori, Paolo Açerbi, Françesko Rupolo, Ivan Tishi, Kristian Bertani dhe Mateo Griti janë të tjerë lojtarë që kanë dalë nga shtëpia e tyre me pranga gjatë paradites së djeshme. Ndërkohë, është përmendur edhe emri i Kristian Vierit në hetime. Ai përfshihet në një telefonatë të Belavistës, i cili thotë se në një tentativë për të trukuar ndeshjen Inter-Leçe, ka dhënë nga 5 mijë euro futbollistëve që do ishin pjesë e manipulimit dhe mes tyre ishte edhe Vieri.

Kontrollet – Antonio Konte është detyruar t’i lejojë forcat e rendit që t’i kontrollojnë shtëpinë, ende pa dalë dielli i ditës së djeshme. Trajneri aktual i Juventusit është në hetim zyrtar për pjesëmarrje në paracaktimin e rezultatit të ndeshjeve gjatë kohës që ishte në krye të skuadrës së Sienës. Por, kontroll i kanë bërë edhe mbrojtësit Dominiko Krishito, i cili në fakt është larguar edhe nga grumbullimi ku ishte me ekipin kombëtar. Shtëpia e kapitenit të Kievos, Serxho Pelisier, gjithashtu është kontrolluar që në orët e para të mëngjesit. Një aksion i furishëm, i urdhëruar nga prokuroria, si vazhdim i operacionit të nisur në dhjetor të vitit të kaluar. Hetimi sa vjen dhe nxjerr fakte të reja, ku në listën e dyshuarve nuk mungojnë as personazhe shumë të njohura të futbollit italian. Italia është në ankth, pasi hija e një “Calciopoli 2” sa vjen e bëhet më e fortë…

Skandali, “bastiset” shtëpia e Kontes



Ashtu siç ishte parashikuar, Antonio Konte ka përfunduar nën shënjestrën e prokurorisë për skandalin e basteve. Në mëngjesin e ditës së djeshme policia ka kontrolluar shtëpinë e trajnerit të Juventusit. Në lidhje me operacionin “Last Bet”, numri një i pankinës së bardhezinjve rezulton nën hetim për krimin e mashtrimit sportiv. Janë sekuestruar kompjuteri i tij dhe telefonat celularë. Përfshirja e Kontes në skandalin e basteve ka ndodhur në periudhën në të cilën ai drejtonte pankinën e Sienës. Ai nuk ndodhej në shtëpi kur hetuesit mbërritën atje dhe ka qenë vëllai i tij Daniele që i ka pritur. Nga kompjuteri autoritetet kanë rikthyer dhe kopjuar informacionet e fshira dhe më pas e kanë lënë sërish në shtëpinë e tij. Ka qenë Filipo Karobio, ai që e ka përfshirë ishtrajnerin e Sienës në trukimin e ndeshjes Novara-Siena të datës 30 prill 2011, duke theksuar se Konte ishte në dijeni.
Avokati dhe krerët e Juves - “Reagimi i Kontes është ai i një njeriu totalisht jashtë kësaj situate. Ai është shumë i vendosur për të treguar mosimplikimin e tij në situatën e përmendur”. Ky është komenti i Antonio De Rendis, avokati i trajnerit të Juventusit. Ndërkohë presidenti i “Exor”-it, Lapo Elkan, ka preferuar të mos bëjë asnjë koment në lidhje me këtë çështje. Të njëjtën linjë ka zgjedhur të ndjekë edhe drejtori i përgjithshëm i Juventusit, Xhuzepe Marota, i cili ka theksuar vetëm faktin që klubi është shumë i qetë.
Nën hetim edhe Bonuçi - Edhe mbrojtësi i Juventusit dhe Italisë, Leonardo Bonuçi, është nën hetim për skandalin e basteve. Futbollisti është shpallur nën hetim formalisht nga Prokuroria e Kremonës por, në fakt, veprimet do të ndërmerren nga Prokuroria e Barit, sepse ajo është marrë drejtpërdrejt me hetimin që lidhet me skuadrën puljeze, në të cilën militonte futbollisti në kohën kur kanë ndodhur ngjarjet. Ka qenë Andrea Masielo, ish-shoku i skuadrës së juventinit te Bari, i cili e ka përfshirë në skandal. Masielo ka rrëfyer se para ndeshjes Udineze-Bari në sezonin 2009-2010, i ka propozuar Bonuçit dhe dy shokëve të tjerë të skuadrës që të trukonin takimin.
Konferenca e Kontes - “Historia ime futbollistike si lojtar dhe si trajner flet qartë. Të kujtojmë ndershmërinë dhe integritetin tim. Me Sienën kemi siguruar ngjitjen në A me sakrifica të mëdha. Unë dhe ish-lojtarët e mi nuk kemi lidhje me trukimet. Ajo që s’kuptoj është se përse nuk është dëgjuar versioni im nga prokurori i Kremonës përpara se të përfundoja nën hetim?!”

Krishito dhe Skuli nën hetim, mbrojtësi jashtë “Euro 2012″

Krishito dhe Skuli nën hetim, mbrojtësi jashtë “Euro 2012″ Domeniko Krishito nuk do të jetë pjesë e kampionatit evropian. Ky vendim është zyrtarizuar nga zëvendëspresidenti i Federatës Italiane të Futbollit, Demetrio Albertini, në konferencën për shtyp. Kjo gjë ka ndodhur pas përfshirjes së tij në skandalin e basteve që kanë tronditur themelet e futbollit italian. Në fakt, gjatë mëngjesit të djeshëm autoritetet policore kanë shkuar në dhomën e futbollistit, duke u përpjekur që të mos shqetësonin shokët e kombëtares që ishin ende në gjumë. Më pas është kontrolluar dhoma e tij në Koverçano teksa të tjerët hanin mëngjes. Mbrojtësi i Zenitit nuk ka marrë pjesë as në stërvitjen e mëngjesit. Ai është nën hetim, por ende nuk ka marrë një ndëshkim nga drejtësia sportive. Në dosjet e hetuesve janë bërë pjesë edhe fotografi të shkrepura nga agjentët e policisë, të cilët kanë qenë në ndjekje të boshnjakut Safet Altiç, i cili tashmë është arrestuar. Në foto shfaqet takimi i bërë të martën, më datë 10 maj 2011, në një restorant të Xhenovës, “Osteria del Coçio”, në një orë kur lokali ishte i mbyllur për njerëzit. Në takim merrnin pjesë dhe sulmuesi Xhuzepe Skuli dhe mbrojtësi i kombëtares Domeniko Krishito. Të dy futbollistët tani janë nën hetim me akuzën e krimit për mashtrim sportiv. Sipas imazheve, me ta janë takuar Safet Altiç, vëllezërit Luka e Stefano Poliçino (titullarë të restorantit), Masimo Leopixi (eksponent i ultrasve të Xhenoas), Fabricio Fileni (një tjetër ultras i kuqebluve) dhe Kujtim Qoshi, shqiptari që mendohet të jetë në grupin e Altiç. Takimi paraprinte ndeshjen Lacio-Xhenoa, trukimi i së cilës theksohet si i sigurt dhe ka shërbyer pikërisht për të rënë dakord për rezultatin dhe për të planifikuar bastet. Takimi përfundoi 4-2, ndërsa pjesa e parë u mbyll 1-1. Për pasojë, Prokuroria ka konfirmuar se edhe Skuli është nën hetim.
Deklarata e Krishitos - “Janë gjëra që të vrasin, por unë do dal nga kjo situatë. Gjëja që më mërzit më tepër është se kjo gjë erdhi para se të dilte lista e të grumbulluarve për ‘Euro 2012′, por gjithsesi nuk besoj se është bërë me qëllim. Takimi me ultrasit e Xhenoas? Po bisedonim në lidhje me atë që ndodhi në derbin e së dielës. Skuli? Është miku im, por nuk kemi biseduar kurrë për Lacio-Xhenoa”.

Lista e të arrestuarave
Stefano Mauri – futbollist i Lacios (arrest me burg)
Omar Milaneto – futbollist i Padovas (arrest me burg)
Kevulah Konteh – ish-lojtar i Piaçencas (detyrim paraqitje)
Injacio Zhoelson – lojtar i Pergokrema (arrest shtëpie)
Alesandro Pelikori – ish-lojtar i QPR-së (arrest me burg)
Paolo Açerbi – futbollist i Viçencës (arrest me burg)
Mateo Griti – futbollist i Albinolefes (arrest me burg)
Ivan Tishi – ish-futbollist i Avelinos (arrest me burg)
Françesko Rupolo – futbollist i Padovas (detyrim paraqitje)
Marko Turati – futbollist i Modenas (arrest me burg)
Kristian Bertani – futbollist i Sampdorias (arrest me burg)
Zoltan Kenesei – ish-futbollist i Tiranës (arrest me burg)
Matias Lazar – ish-futbollist i Tiranës (arrest me burg)
Lazlo Shultc – nënshtetas hungarez (arrest me burg)
Lazlo Straser – nënshtetas hungarez (arrest me burg)
Istvan Borgulja – nënshtetas hungarez (arrest me burg)
Vitorio Gati – nënshtetas italian (arrest me burg)
Luka Burini – nënshtetas italian (arrest shtëpie)
Daniele Ragone – nënshtetas italian (arrest shtëpie)

NDESHJET E HETUARA

31 JANAR 2011
BRESHIA – KIEVO 0-3
Një ndeshje e paracaktuar nga Den, bastvënësi nga Singapori. Ai kishte garantuar fitore të pastër të Kievos dhe se do të shënoheshin të paktën tre gola.

23 PRILL 2011
BARI – SAMPDORIA 0-1
Andrea Masielo i ka rrëfyer policisë se ai iu afrua grupit të “ciganëve” për të trukuar ndeshjen dhe për këtë ka edhe prova. Më 21 prill, sipas një informate të policisë hungareze, Matias Lazar, eksponent i grupit të ciganëve, ka qenë pikërisht në Bari.

12 PRILL 2011
INTER – LEÇE 1-0
Është ndeshja ku Paoloni rrezikoi jetën. Ai u garantoi “ciganëve” se do të kishte më shumë se 3 gola, por Leçe u mund vetëm 1-0. Sipas Erodanit, futbollistët e përfshirë ishin Rosati, Ferrario dhe Vives.

7 MAJ 2011
PALERMO – BARI 2-1
Një nga rastet kur trukimi nuk u realizua. U ra dakord për një fitore të Palermos me dy gola diferencë, ku të përfshirë ishin futbollistë të Barit. Mirëpo Mikoli humbi penallti në minutat e fundit, çka bëri që lojtarët të kthejnë paratë që kishin marrë për trukimin e takimit.

30 JANAR 2011
NAPOLI – SAMPDORIA 4-0
Sipas të penduarit Perumal, i arrestuar në Finlandë, kjo ndeshje ka qenë e trukuar nga mafia e Singaporit. “Më kujtohet që Eng fliste për një fitore të pastër 4-0. Ai vuri bast për fitore me tre gola diferencë të napolitanëve”.

6 SHKURT 2011
BRESHIA – BARI 2-0
Perumal, i cili ka rrëfyer gjithçka në polici, tregon se kjo ka qenë një ndeshje e paracaktuar prej Den. Në fakt, ai ishte mërzitur pas sfidës, pasi priste që Bari të humbiste 3-0 dhe jo 2-0, sepse do kishte fituar më shumë para.

26 SHKURT 2011
XHENOA – ROMA 4-3
Një nga ndeshjet më të çuditshme, për trukimin e së cilës Marko Paoloni thotë se në dijeni ka qenë edhe De Rosi. Për këtë sfidë u vunë plot 2.9 milionë euro baste. Deri në minutën e 50-të, Roma kryesonte 3-0, por më pas mbrojtja pësoi një shthurje të frikshme dhe Xhenoa e përmbysi 4-3.

20 MARS 2011
BARI – KIEVO 1-2
Është ndeshja që i shkaktoi rënien nga kategoria Barit. Andrea Masielo pranon se mori para nga grupi i “ciganëve” që të humbiste sfidën. Bari pësoi dy gola me gabime “trashanike” të mbrojtjes.

3 PRILL 2011
PARMA – BARI 1-2
Bari fiton në mënyrë surprizë, edhe pse kishte rënë ndërkohë nga kategoria. Në dhomat e zhveshjes pati sherr mes lojtarëve. Shumë futbollistë puljezë ishin kontaktuar nga grupi i “ciganëve”. Marko Rosi tregon se Morrone bërtiste, duke thënë: “Nuk e lamë kështu!”.

3 PRILL 2011
KIEVO – SAMPDORIA 0-0
Kjo ndeshje nuk përfshihet në hetimin e Prokurorisë, por ka pasur sinjale të forta nga kompanitë e basteve. U vunë shifra shumë të larta parash që ajo përfundonte barazim.

1 MAJ 2011
BARI – ROMA 2-3
Në këtë ndeshje ndërhyn grupi i sllavëve. Në fakt, përflitet se përveç futbollistëve të Barit, u ofruan para edhe atyre të Romës. Ndeshja u mbyll me sukses, pasi u shënuan pesë gola.

14 MAJ 2011
LACIO – XHENOA 4-2
Sipas Gervasonit, sllavët takuan Maurin nga Lacio dhe më pas Milaneton nga Xhenoa për të vendosur rezultatin. Duhej që të shënoheshin dy gola në pjesën e parë dhe të paktën tre të tjerë në pjesën e dytë. Ilievski më 14 maj ka qenë në fushën stërvitore të Lacios dhe më pas ka shkuar në hotelin e Xhenoas.

22 MAJ 2011
LEÇE – LACIO 2-4
Ilievski ka qenë në hotel “Hilton” të Leçes ditën e ndeshjes. Për këtë sfidë, një nga të arrestuarit e grupit hungarez, Gabor Horvat tha: “Ndeshja e rregulluar nga Ilievski”. Ky i fundit kishte më shumë qejf t’i trukonte takimet që të shënoheshin më shumë se 3.5 gola.

2 PRILL 2011
BRESHIA – BOLONJA 3-1
Një nga ndeshjet ku janë vënë më tepër baste, aq sa kompanitë u detyruan ta pezullojnë më pas. U vunë shifra shumë të larta për fitoren e Breshias dhe që shënoheshin më shumë se 3 gola.

30 PRILL 2011
NOVARA – SIENA 2-2
Këtu flitet përfshirja e Antonio Kontes, i cili ishte trajneri i Sienës në këtë periudhë. Ka qenë vetë Filipo Karobio ai që ka deklaruar se trajneri ishte në dijeni dhe se ishte vendosur që do kishte mbi tre gola.

27 SHKURT 2011
BRESHIA – LEÇE 2-2
Breshia kaloi në avantazh 2-0, por pati “probleme” në mbrojtje, ndaj dhe pësoi dy gola. Një tjetër sfidë ku u shënuan më shumë se 3 gola.

Tare: Kemi besim, gjithçka do qartësohet

Drejtori sportiv i Lacios kja treguar besim se gjithçka do qartësohet dhe i shpreh mbështetje Stefano Maurit. “E kuptoj që tifozët janë të zhgënjyer për atë që po ndodh, por ne kemi besim te puna që po bëhet dhe jemi të bindur që gjithçka do qartësohet. Do mbajmë gjithashtu edhe pozicion tonë”, deklaroi Tare, duke ndjekur linjën e klubit, të cilët bënë të ditur se kanë besim të pastërtia e emrit të Lacios.

Trapatoni: E turpshme! Na njohin si mafiozë

Trajneri italian, Xhovani Trapatoni, tashmë në krye të Kombëtares së Irlandës, ka reaguar ndër të parët për lajmin e serisë së arrestimeve dhe personave nën hetim për trukim rezultatesh. “Këto janë lajme shkatërruese. Nuk ndihmojnë asnjë italian, madje po na e dëmtojnë rëndë imazhin. Nuk dua të dal në konkluzione nëse janë fajtorë apo jo, por tashmë na shohin si mafiozë. Nuk duhet të përgjithësohemi nga individë të caktuar, të cilët, nëse kanë trukuar ndeshje, janë turpi i vendit”, – deklaroi Trapatoni.

Anjeli i del në mbrojtje trajnerit dhe Bonuçit

Andrea Anjeli i ka dalë në mbrojtje trajnerit të tij gjatë konferencës për shtyp të organizuar mbasditen e djeshme. “Është një panoramë shqetësuese për botën e futbollit, të cilën e ndjekim me hidhërim. Por nuk rezulton se Antonio Konte është pjesë e saj. Roli i tij nga sa kemi lexuar është i pakuptimtë, pastaj të gjithë e njohim atë si njeri dhe ndershmërinë dhe integritetin që shfaq përherë. Juventusi si shoqëri dhe unë personalisht jemi në krah të Kontes dhe Bonuçit, të cilët kanë përfunduar nën hetim. Leonardos i uroj që të zhvillojë një Evropian të shkëlqyer. Antonio është dhe do të jetë trajneri ynë”.

ADRIANO GALIANI

“Milani është shumë i qetë” “Ngjarje të tilla na bëjnë të ndihemi keq”. Kështu është shprehur administratori i Milanit, Adriano Galiani, mbi ngjarjet e fundit të skandalit të basteve. “Kemi folur për këtë gjë në asamble, – ka vazhduar më tej Galiani. – Të gjithëve na vjen keq që futbolli është kapur për fyti nga këta njerëz. Duhet të bëhen spastrime njëherë e mirë. Kështu nuk vazhdohet më. Gjithsesi, përfitoj nga rasti të qetësoj tifozët e Milanit, se emri i klubit kuqezi është i pastër”.

LUÇIANO SPALETI

“Është e drejtë që Prokuroria të bëjë detyrën e saj, por Krishiton e njoh mirë dhe përveçse është një lojtar i madh, është edhe një njeri i shkëlqyer. Për këtë nuk kam asnjë dyshim, madje do ta vija dorën në zjarr”. Luçiano Spaleti, trajneri i Zenitit, i ka dalë në mbrojtje Domeniko Krishitos, i përfshirë në skandalin e basteve. “Kam shumë pak dyshime, sepse e njoh se çfarë njeriu është. Gjithsesi, përderisa magjistratura e ka bërë diçka të tillë, duhet parë si do shkojë”.

LUÇIANO MOXHI

“E njoh Antonio Konten, është një njeri që punon dhe përpiqet shumë. Duhet të tregohemi të kujdesshëm përpara se të gjykojmë një njeri që ndoshta më vonë do të deklarohet i pafajshëm. Duhet të mbajmë parasysh se pas tyre qëndrojnë edhe familjet”. Luçiano Moxhi, ish-drejtori i përgjithshëm i Juventusit, ka bërë një koment në lidhje me arrestimet e bëra ditën e djeshme për skandalin e basteve. “Nëse akuzat do të rezultojnë të vërteta, atëherë ka të drejtë Platini kur thotë se këta njerëz nuk duhet të luajnë më”.

KREU I ULTRASVE

Fabricio Fileni, njëri nga krerët e ultrasve të Xhenoas, i cili ka qenë në takimin në restorant me Krishiton dhe Skulin, ka hedhur poshtë akuzat për trukim: “Atë mbrëmje u takuam me Krishiton dhe Skulin. Donim shpjegime për sjelljen e skuadrës gjatë derbit të së dielës së kaluar. Ishim shumë të nxehur. Kurrë nuk kemi folur për para ose për baste. Kjo histori është delirim. Nuk ka asnjë lidhje me bastet. E dija që Krishito ishte për darkë në një restorant dhe shkova të bisedoja për ndeshjen me Sampin”.

Prandeli ankohet: Po më shkatërrojnë skuadrën

Trajneri i Kombëtares së Italisë, Çezare Prandeli deklaron sesituata e krijuar po dëmton rëndë ekipin. “Krishito është në gjëndje të rëndë psikologjike dhe nën presion. Ai preferoi të largohet nga Kombëtarja, për të mos ndikuar te shokët e skuadrës. Bonuçi është më i qetë, por në përgjithësi të gjithë janë të shpërqendruar. Po më shkatërrojnë të gjithë punën e bërë me këto që po bën prokuroria, – u shpreh Prandeli. – Nuk dija asgjë për blicin, gjithsesi nuk arrij të mendoj negativisht për autoritetet dhe tempizmin e tyre. Nuk do guxoja. Gjërat që kanë ndodhur janë një dëm i pabesueshëm, sidomos për ata që bëjnë tifo për ne. Krishito? Nëse do jetë mirë të martën, ndaj Luksemburgut do ta grumbulloj. Ai është shumë i rënduar nga pikëpamja psikologjike. Nuk di më çfarë të them”, – ka përfunduar Prandeli.

Prokurori Martino: Sezoni i kaluar, i manipuluar

“Kemi arrestuar 19 presona por, ajo që është më e rëndësishmja, është prezenca e grupit kriminal të hungarezëve në këtë çështje”. Kështu është shprehur kryeprokurori i Kremonës, Roberto Di Martino, pas arrestimeve mbi skandalin e basteve i cili ka kapur për fyti futbollin italian: “Ne disponojmë prova që ndeshja Leçe-Lacio është trukuar. Nga ana tjetër, dyshojmë se gjatë vitit 2011, 7-8 ndeshjeve të skuadrës së Sienës u është manipuluar rezultati. Si rrjedhojë, nën hetim kemi marrë edhe presidentin e Sienës, Mezaroma, dhe trajnerin Antonio Konte. Ne kemi disa dëshmi të të penduarve, të cilat na bëjnë të besojmë manipulimin e disa sfidave. Besojmë se gjatë kontrolleve që kemi bërë, kemi siguruar prova të mjaftueshme, të cilat vërtetojnë implikimin e tyre në këtë çështje”. Sezoni i kaluar – Prokurori i çështjes, Di Martino, ka dyshimet e tij për sezonin 2010- 2011. Për të cilët konfirmon se prokuroria do të përdorë dorën e hekurt: “Janë të shumta ndeshjet që janë trukuar gjatë atij sezonit. Kemi prova që shumë drejtues klubesh kanë qenë në dijeni të këtyre manipulimeve. Ne dyshojmë që vetëm Sinea mund të ketë manipuluar rezultatin e 7-8 ndeshjeve. Shumë të tjera janë trukuar për sasinë e golave të shënuar. Duke parë sesa shumë takime kanë pasur rezultate të paracaktuara, them me bindje se sezoni 2010-11 kanë qenë i manipuluar”.
Banda e hungarezëve - Di Martino ka shpjeguar edhe rolin që kishte grupi i hungarezëve në këtë çështje: “Ky grup ka zëvendësuar menjëherë bandën e ciganëve. Një pjesë e mirë e grupit të ciganëve kanë përfunduar nëpër burgjet kroate. Megjithatë, si hungarezët edhe sllavët kanë bashkëpunuar me njëri-tjetrin. Sipas përgjimeve telefonike, ata në bisedat e tyre flasin për kombinimin e rezultatit të ndeshjes Leçe-Lacio, por edhe të sfidës Xhenoa-Lacio. Por grupi i hungarezëve ka arritur të manipulojë edhe rezultatin e disa ndeshjeve të tjera të Serisë A, si Bari-Sampdoria”.
Krishito - Kryeprokurorit të Kremonës i vjen keq që kontrolli dhe marrja në pyetje e Krishitos në Koverçiano shokoi futbollistët e tjerë të kombëtares italiane: “Ajo ndërhyrje që bëri policia në Koverçiano nuk duhet të keqinterpretohet. Në shkuam atje vetëm për Krishiton, të cilin duhej ta merrnim në pyetje. Ky problem i përket vetëm Krishitos dhe jo futbollistëve të tjerë të kombëtares. Por, ne nuk mund të lejojmë që futbollistët që janë nën hetim të marrin pjesë në Evropian”.
Alarmi - Di Martino më pas lëshon alarmin duke lënë që të kuptohet se gjatë ditëve në vazhdim mund të ketë arrestime të tjera dhe se listës së futbollistëve nën hetim mund t’i shtohen edhe futbollistë me peshë: “Nuk e di nëse jemi në fillim apo në përfundim të hetimit, por di të them se ky hetim nuk mund të vazhdojë shumë gjatë, pasi zyra ime nuk është në gjendje të mbajë një ngarkesë të tillë. Unë po bashkëpunoj me prokurorët e Romës dhe shpresojmë që të gjithë së bashku të bëjmë një punë të mirë”.

Dy milionë euro për ndeshjen Leçe-Lacio

Burime pranë Prokurorisë së Kremonës kanë konfirmuar se ndeshjet e trukuara u kanë kushtuar shtrenjtë kompanive të basteve italiane. Kompania e basteve “Snai” i ka bërë të ditur Prokurorisë së Kremonës se vetëm në atë kompani përpara ndeshjes Leçe-Lacio, janë luajtur minimalisht 2 milionë euro. Mësohet se banda e hungarezëve të ketë luajtur edhe në kompani të tjera shuma marramendëse. Ndërkohë, prokuroria ka vërtetuar se me anë të përgjimeve telefonike futbollistët e implikuar në manipulimin e këtyre ndeshjeve kanë përfituar nga banda e hungarezëve shumën e 600 mijë eurove. Kjo ishte shuma standarde që kjo bandë paguante për çdo futbollist që pranonte të manipulonte rezultatin e ndeshjes.

Ja çfarë rrezikojnë klubet e shqiptarëve

Në skandalin e basteve në Itali është përfshirë klubi i Sienës së Erjon Bogdanit dhe ai i Lacios së Igli Tares. Por le të shohim më poshtë se çfarë rrezikojnë klubet ku marrin pjesë shqiptarët. Siena arriti t’i shpëtonte rënies nga Seria A, por nëse Prokuroria e Kremonës vërteton fajësinë e klubit bardhezi, atëherë përveç skualifikimit të presidentit Mezaroma, dënimi mund të bjerë edhe mbi skuadrën, duke e zbritur atë në Serinë B. Disi më i rëndë mund të jetë dënimi për Lacion. Nëse klubi bardhekaltër rezulton fajtor, rrezikon të mos marrë pjesë në Ligën e Evropës. Gjykata Sportive italiane, falë ligjeve të saj të rrepta, i ka vënë përpara përgjegjësisë klubet pavarësisht se mund të kenë qenë lojtarët ata që e kanë manipuluar rezultatin e një takimi. Në nenin 4 të kodit të Gjykatës Sportive shkruhet qartë: “Klubet përgjigjen objektivisht për gabimet e drejtuesve dhe futbollistëve të federuar”. Pra, Siena e Bogdanit dhe Lacio e Tares mund të ndëshkohen për faj të disa lojtarëve apo personave të caktuar, duke bërë që sezonin e ardhshëm të vuajnë penalitete.

Nga blici i 1980-tës deri te “pushtimi” në Koverçiano

Policia italiane është paraqitur dje në agim në dyert e “Koverçianos” ku po stërvitet aktualisht përfaqësuesja e Italisë në prag të “Euro 2012″. Motivi i këtij operacioni ka qenë mbrojtësi i kombëtares, Mimo Krishito, i cili rezulton i implikuar në hetimin që ka nisur Prokuroria e Kremonës për skandalin e basteve. Ky blic ka bërë që njerëzit të kujtojnë momentet e 32 viteve më parë, ose më saktë të 23 marsit 1980, kur në Itali plasi skandali i parë i basteve. Asokohe makinat e policisë qarkullonin nëpër stadiumet italiane me gazin në maksimum për të arrestuar të dyshuarit. Ndërkohë agjentët e policisë ishin të zënë me arrestimet e futbollistëve të ndryshëm, si Xhordano, Manfredonia, Uilson, Albertosi dhe Morini. Në përfundim të këtij operacioni u prangosën 10 lojtarë, si dhe presidenti i Milanit, Felice Kolombo. Pas këtij operacioni u arrestua edhe futbollisti i Avelinos, Stendano Pelegrini, të cilit iu vunë prangat 8 minuta përpara përfundimit të ndeshjes. Agjentët e policisë e ndoqën Pelegrinin deri në dhomat e zhveshjes, sepse kishin frikë mos arratisej. Gjashtë vjet më pas arrestohet autori kryesor i atij skandali, napolitani Armando Karbone. Fotot e tij me pranga bënë xhiro në të gjitha gazetat italiane. Më vonë vetë Karbone pohoi fajësinë e tij, duke pranuar faktin se që prej vitit 1984 deri më 1986 ka trukuar rezultatin e disa ndeshjeve të Serisë A dhe të Serisë C2. Pas pohimit të Karbones, gjykata nisi dënimet, ndër të cilët spikati skualifikimi i futbollistit të Lacios, Klaudio Vinaconi, për 5 vjet (ky i fundit atëherë mbulonte postin e koordinatorit në partinë PDL) dhe ai i drejtorit sportiv të Foxhias, Ernesto Bronzeti. Ky i fundit u skualifikua për tre vjet. Por vesi i trukimit të ndeshjeve nga ana e futbollistëve vazhdoi edhe pas këtyre dënimeve. Dhe ne e kemi akoma të freskët kujtimin e arrestimit të kapitenit të Atalantës, Kristiano Doni, dhe lotët e ish-bomberit të Lacios e Bolonjës, Xhuzepe Sinjori. Dhe tani jemi sërish dëshmitarë se si saga e vesit të trukimit të ndeshjeve, për fat të keq, qenka shumë antike.

Ja grupet që trukonin, nuk mungojnë shqiptarët

Për trukimin e ndeshjeve në Itali, kanë qenë grupe të ndryshme që “punonin” dhe shfrytëzonin lidhjet e tyre me futbollistët. Në fakt, ishte i krijuar një zinxhir shumë i fortë, ku nuk mungonte as bashkëpunimi mes grupeve të caktuara, si për shkëmbim të informacioneve, ashtu edhe për vënien e basteve. Në fakt, për të vënë bastet, të gjitha hetimet të çojnë te një emër i vetëm, i quajtur “bosi” nga Singapori, Tang Se, ose siç e thërrasin të gjithë “Dan”.
“Dan” - Kreu i një organizate në Singapor është një nga më të fuqishmit për lidhjet që ka në kampionate të ndryshme. Pas arrestimit të një bashkëpunëtori të tij në Finlandë, u zbulua se ai kishte thuajse në pronësinë e tij dy klube. Gjithsesi “Dan”, ose Tang Se, siç ka emrin e vërtetë, kishte lidhje të forta me futbollistë edhe në Itali, duke paracaktuar jo pak rezultate. Ai, njëkohësisht ishte i lidhur me të gjitha grupet e tjera, për shkak se si ciganët, ashtu edhe shqiptarët apo hungarezët, e telefonin për t’i vënë bastet. Ai cilësohet si një “gjeni” i informatikës dhe arrinte që të shpërndante në pika të ndryshme, një bast prej 1 milion eurosh brenda tre minutash.
“Ciganët” – Si koka e grupit cilësohet të jetë Almir Gegiç, një ish-futbollist, i cili kishte arritur të kishte lidhje me shumë lojtarë të Serisë A dhe B. Nëpërmjet bashkëpunëtorëve, ai bënte blerjen e ndeshjeve apo edhe blerje të informacioneve nga grupet rivale.
Sllavët - Hristijan Ilievski është kreu i grupit të sllavëve. Një ish-pjesëtar i forcave speciale maqedonase ka arritur të jetë një nga personazhet me më shumë influencë. Në fakt, grupi i sllavëve shihet edhe me frikë nga vetë lojtarët pasi, në përgjimet e bëra, zbulohet se ata shprehin se “sllavët” janë të pamëshirshëm, apo se nuk mund t’u dalësh nga fjala. Gjithsesi, Ilievski vetë ka pranuar se ka pasur mjaft tentativa për “t’u vjedhur” paratë nëpërmjet informacioneve të rreme. Edhe pse kërkohet në Itali, ai strehohet i qetë në Maqedoni.
Shqiptarët - Policia nuk ka arritur ta specifikojë, apo të zbulojë një grup për shqiptar, por në hetimin e prokurorisë përmendet se ekziston një i tillë. Lojtarët deklarojnë shpeshherë në përgjime, termin “shqiptarët”. Ndërkohë, në arrestimet e kaluara, në hetim kanë qenë disa shtetas shqiptar. Tashmë, në hetim është vënë shtetasi Kujtim Qoshi, i cili shihet si mik i afër i Safet Altiç. Ky i fundit është një tjetër personazh me potencial në ndikimin e rezultateve.

Bosi i basteve: Si e trukova Serinë A me 30 lojtarë

Hristijan është Ilievski i famshëm, i shumëkërkuari i skandalit të basteve në Itali. E kërkon policia dhe Interpoli. Sipas Prokurorisë së Kremonës, ai është çelësi i gjithë kësaj çështjeje, njeriu që ndikon te futbollistët e Serisë A për të caktuar rezultatet e ndeshjeve, ai që i kontaktonte nëpërmjet mediatorëve të ndryshëm, ai që i priste lojtarët në hotele ose drejtpërdrejt në qendrat e tyre stërvitore me çanta të mbushura me para dhe i bindte, siç thotë vetë ai, me “ofertat klasike të parefuzueshme”. Mëngjesin e 1 gushtit, teksa Xhuzepe Sinjori përfundonte në pranga së bashku me bashkëpunëtorët e tij, ai arratiset nga shtëpia në Çernobio dhe strehohet në Maqedoni, i mbrojtur nga fama e tij dhe nga një duzinë me truproja të armatosura që e thërrasin “bos”. Sipas Hristijanit, zemra e basteve janë vetë futbollistët, dhe jo njerëzit si puna e tij. “Në Angli një gjë e tillë nuk ndodh, ndërsa në Itali po, sepse vetë ata bien dakord me njëri-tjetrin, vënë baste dhe shesin informacionet. Kur na i shesin ne, ose kur i zbulojmë vetë ato, ne luajmë baste të rënda, shumë, miliona euro, ndryshe futbollistët mund t’ia shesin ndonjë tjetri informacionin dhe ta shtrembërojnë rezultatin e paracaktuar. Kujt mund t’ia shesin tjetër? Mafias siciliane ose asaj shqiptare, por edhe hungarezëve ose Xhuzepe Sinjorit, i cili është një nga ‘bosët’ e basteve në Itali. Por, shpesh janë edhe vetë drejtuesit e klubit që bien dakot me njëri-tjetrin. Në sezonin e kaluar të Serisë A, unë isha personalisht në Itali dhe kisha kontakte shumë të forta edhe me klube të mëdha. Duke qëndruar mes shumë emrave të famshëm që drejtojnë ekipet e Serisë A, vetë drejtuesit kishin vendosur përpara kohe se cila skuadër do të fitonte titullin kampion, kush do të shkonte në kupat e Evropës dhe cila skuadër do të zbriste në Serinë B. Me pak fjalë, isha prezent në një ‘festival’ dhe mbeta i mahnitur. Po këta drejtues të mëdhenj më bënë që të kuptoja se në Itali kishte 6 skuadra të sigurta që mund t’i plotësonin kushtet tona, të shtrembëronin rezultatet e ndeshjeve në favorin tonë. Ato janë Sampdoria, Kaljari, Bari, Leçe, Siena e Kievo, dhe falë tyre unë dhe bashkëpunëtorët e mi të afërt kemi bërë një mal me para, fatmirësisht shumë para”, – deklaroi ai. “Një thes me para i kemi bërë me ndeshjen Lacio-Xhenoa (takim i sezonit të kaluar, i përfunduar në shifrat 4-2). Gjërat shkuan kështu: Unë po kërkoja prej disa ditësh të flisja me ndonjë të Lacios, për të pasur informacione të sigurta për takimin, por nuk po ia arrija. Për këtë arsye bëra një vizitë në ‘Formelo’ (qendra stërvitore e Lacios), por as aty nuk munda të takoj njeri. Mirëpo, si me magji, dikush që njihja më tha: ‘Shiko, se ndeshja është bërë tashmë. E ka mbyllur Skuli’. Marrëveshja ishte që ndeshja të përfundonte në shifrat 1-1 në pjesën e parë, ndërsa në të dytën do të luhej një ndeshje e vërtetë, edhe pse në fund Xhenoa i dhuroi nga ana e saj tri pikë Lacios, që i duheshin për të shkuar në Ligën e Kampioneve”, – shtoi Ilievski. I pyetur nëse ishte Zamperini ai që ia dha informacionin, maqedonasi u përgjigj: “Nuk jam një buburrec unë. Emrin e Zamperinit nuk do ta përmend kurrë. Ia kam shkatërruar jetën duke i kërkuar të më jepte disa informacione të Serisë A dhe tani e në vazhdim do ta mbroj deri në vdekje. Unë nuk jam si Xhervazoni, një person që është mësuar të zhvatë të tjerët. Pas aksionit të parë të policisë mbi këtë çështje, Karlo Xhervazoni (mbrojtësi i Piaçencës) donte të shkonte te Mauri (Stefan Mauri, kapiteni i Lacios) dhe më tha: ‘Nëse nuk më jep 1 milion euro do të shkoj në Kremona dhe do të tregoj gjithë të vërtetën’. Por, ajo që unë di me siguri, është se sfida Lacio- Xhenoa është trukuar me ndihmën, ose më saktë me urdhër të Skulit (Xhuzepe Skuli, ish-sulmuesi i Lacios, aktualisht te Xhenoa), fakt ky që më mjaftoi të bëja një thes me para. Por, bashkë me mua, mund t’ju them se edhe gjysma e zonës së Lacios ka bërë para me këtë ndeshje, sepse informacioni ishte shpërndarë në të gjithë krahinën dhe kushdo që kishte mundësi të investonte, ka fituar para të lehta. Këtë jo më kot e konfirmojnë edhe xhirimet e mëdha që kompanitë e basteve patën, ndërkohë që paguan gjithashtu shumë fitues”. Në fund, Ilievski, kapoja i grupit të sllavëve, deklaron se rreth 30 futbollistë janë bashkëpunëtorë të tij. “Kam 30 njerëz të besuar në Itali, futbollistë, me të cilët bashkëpunoj sistematikisht. Nuk është faji ynë që vëmë baste, por i vetë lojtarëve. Ka raste që na kërkojnë vetë”, – përfundoi ai.

Dede e Nallbani: Si e njohim ne “bastexhiun” Kenesei

Janë disi të çuditur nga lajmi që kanë lexuar në gazeta për ish-kolegun e tyre në kohën kur luanin te Tirana. Kjo, sepse si Blendi Nallbani dhe Nevil Dede e mbajnë mend hungarezin, Zoltan Kenesei, si një djalë të shoqërueshëm, të sjellshëm dhe pa vese.
Blendi Nallbani - “Për mua ka qenë një nga lojtarët e huaj më të mirë, me të cilët kam luajtur. Ishte i talentuar por, mbi të gjitha, një djalë fantastik. Nuk e di sesi kanë rrjedhur ngjarjet në jetën e tij dhe, për më tepër, që nga koha kur ai luante te Tirana kanë kaluar disa vite, por realisht më vjen keq që ka përfunduar në këtë mënyrë. Mbaj mend se në atë kohë në Tiranë erdhi bashkë me gruan e tij dhe përgjithësisht ishte një tip mjaft i shoqërueshëm. Një djalë pa vese. Dilnim shpesh për kafe. Nuk di të ketë luajtur ndonjëherë këtu baste, ca më pak që në atë periudhë as në Shqipëri nuk kishte shumë baste”, – u shpreh “Tata”.
Nevil Dede - “E lexova në gazeta për të dhe realisht u çudita. Thuhej se ai ishte i implikuar me rrjetin që po heton sot për sot disa ndeshje në Itali, por edhe në Gjermani e Hungari, çka tregon se ka qenë i futur me kokë në baste. Gjithsesi, unë personalisht e mbaj mend si një djalë buzagaz dhe simpatik. Ishte i shoqërueshëm dhe te Tirana. Falë këtyre vetive, arriti të ambientohej shumë shpejt. Nuk mund të them se ka qenë ndonjë superlojtar, por nga të huaj që kanë ardhur te Tirana deri në vitet e fundit, mund të them se ka qenë pa dyshim ndër më të mirët”, – deklaroi ish-mbrojtësi bardheblu.

[AlbaneZ]

Sa bajat jeni bo me keto shkrime & konkluzione prej "ekspertesh" a thu se jeni ju hetues,prokurohe apo gjykatesit e Italise,pff

Po doli i pafajshem Conte ca m.... do thoni pastaj apo do shkruani si Galian ufoja "Ka ardhur koha per triplete"

[MaDaBeR]

Galliani i bo realitet ca thote. Per 26 vitet qe eshte ne instancat drejtuese te Milanit ka fituar me shume se kushdo tjeter. Do thoja ti rruani leshte po eshte e tullac :P

Tani lajmi eshte se perse po lakohen gjithnje e me shume Lottonerot? Kjo eshte e cuditshme...

[Se7en]

S'kane faj, ende e shofin Conten "nightmare" ne enderr

[AlbaneZ]

Galliani i bo realitet ca thote.

Per here te fundit e ka thene per sezonin qe sapo mbaroi dhe e mbajti llafin

Do thoja ti rruani leshte po eshte e tullac :P

Meqe keni mbaru pune me tullacin ja rruni cik Contes tashi se i ka mjell me shumice,por duroni pak sa te mbarojne hetimet se nuk do kete kohe per ju tashi besoj

[MaDaBeR]

Per here te fundit e ka thene per sezonin qe sapo mbaroi dhe e mbajti llafin




Meqe keni mbaru pune me tullacin ja rruni cik Contes tashi se i ka mjell me shumice,por duroni pak sa te mbarojne hetimet se nuk do kete kohe per ju tashi besoj

Edhe iher, Galliani ka fitu shume me shume se Moggi e Co qe nga viti 85 e kendej. Megjithese Moggi u denu dhe iu vertetun te gjitha akuzat per trukime ndeshjesh, ndikim ne arbitra etj etj, prap Galliani perkunder ketyre abuzimeve nga LottoNerot, triumfoi ne Itali e sidomos ne Europe.

Sa per t'rrujtmen, ne nuk jena si tifozat Juventin, qe merena me rrujtje/mbjellje flokesh. Presidentit e Administratorit tone ja kan rrujt Moggi me Conte & Co qe nga 85 e ktej

[RaPSouL]

Bëni debat si duhet lereni ofendimet dhe provokimet e kota, ato veprime i kuptoj nga minorët nën 15 vjet por jo nga ju, e pastrova temën mos vazhdoni ta banalizoni kushdoqoftë.

Poashtu mundësisht lajme të ndryshme ti sillni në gjuhën tonë Shqipe e jo në Italisht se nuk jemi këtu as në Romë, Milano apo Torino, kaloni bukur.

[MaDaBeR]

Lajmi ne gjuhen Italiane eshte lajmi zyrtar qe del nga shtypi atje dhe eshte me i fresket. Kur lajmi nuk cenon askend nuk ka asnje gje te keqe po te sillet edhe ne gjuhen nga ku buron informacioni. Thoni s'na pelqejne lajmet e fundit

[AlbaneZ]

Madaber edhe ato lajme qe sjell ti nga Panorama Sport lexohen 24 ore me perpara ne faqe dhe gazeta te ndryshme online.

Ps: Te sygjeroj te nderrosh gazete here tjeter sepse Panorama Sport qe lexon ti mer shume artikuj nga Tuttosport

[RaPSouL]

Berlusconi ktyre dhe në ëndërr ju del.
Ç'do "favorizim" i Milani apo disfavorizim i Juves ka lidhje me Berluscën.
Deri dje injoranca ktyre po thonte që dhe SKY e ka Berlusca. :-D

Ndëgjo pak çtë them un ty se ti sigurt as vet nuk e kupton atë që e thua. Kam 2 anëtarë të familjes që kanë doktoruar në Itali për Shkencat Politike dhe askush tjetër nuk mund të njoh politikën Italiane të Berlusconit më mirë se ata.

Berlusconi është njeriu më i përlyer nga të gjitha anët, sdi si ke fytyrë të vish e të bësh gam gam këtu për një njeri të cilin nuk e don i gjithë populli i vet, i cili fiton zgjedhjet dhe vetshpallet kryeministër, ti i ndjek këto gjëra? Apo skanë të bëjnë me sportin, ups harova se me politikë ka të bëjë, bëje një krahasim të thjesht e më thuaj pastaj se ai qenka njeri i pastër.

Aktualiteti shoqëror të tregon një pasqyrë krejtësisht ndryshe, Berlusconi si injorant njeri që është në mbledhje të ndryshme të Bashkimit Europian futet si mafia brenda duke mos përshëndetuar askënd, shoku i tij Putini është figura homologe e njëjt me të.

Prap vazhdon të jetë i pastër apo? Din gjë për pasurinë e tij se në sa triliona sillet? Din ti se Berlusconi ska pasur asnjëher në jetën e vet të bëj me sport por vetëm me biznes?

E din ti si bilbil që bën këtu gam gam dhe vetëm provokon njerzit pa mos bërë një shkrim të denjë, që Berlusconi deri dje as që ka ditur se cilat emra ka Milani në skuadër dhe çfarë transferesh ka bërë?

Kur ja zuri Pato vajzën çu bë menjëher u lëndua dhe vazhdon të jetë i lënduar pse?! Berlusconi i garanton dyfishin e pagës vetëm pse e ka dhëndërr se as që i bëhet vonë për futboll.


Është e kot të flasësh me një tip injorat siç je ti tash do vish këtu do ofendosh dhe do shkruash Conte flokët e mbjellura blla blla blla, ti kemi mësuar shkrimet përmendsh je bë gazi i forumit.