EULEX: Përgatitje për konfiskimin e pasurisë së paligjshme

[skipetar]

18:33 / 28.06.2011
Konfiskimi i pasurisë së paligjshme po rezulton si mënyra e duhur për të ecur përpara në mbarë botën për ta luftuar krimin e organizuar dhe korrupsionin. EULEX-i të martën filloi një program 12-mujor trajnimi për gjykatësit, prokurorët dhe hetuesit vendorë e ndërkombëtar në Kosovës lidhur me konfiskimin e pasurisë së paligjshme.

Sipas një komunikate për media të EULEX-it, programi ka për qëllim t’i shfrytëzojë kompetencat për konfiskim të cilat rrjedhin nga ligji ekzistues si mjet standard në luftën kundër krimit të organizuar dhe korrupsionit. Po ashtu do të shërbejë për përgatitjen e rrugës për zbatimin e legjislacionit të ri në këtë fushë.

Pas punëtorisë së parë të organizuar në selinë e EULEX-it, në të cilën kanë marrë pjesë më shumë se 30 pjesëmarrës, këshilltari kundër korrupsionit i EULEX-it, George Mills, tha se seminari i sotëm shënon fillimin e suksesshëm të një procesi për shfrytëzimin më të mirë të konfiskimit të pasurisë së paligjshme dhe përgatitjes për legjislacionin e ardhshëm.

Pjesëmarrësit u pajtuan që shfrytëzimi i kompetencave për konfiskim mund të jetë një armë efektive në luftën kundër krimit të organizuar dhe korrupsionit. Ata i këmbyen përvojat dhe mendimet e tyre lidhur me zbatimin më të mirë të legjislacionit.

“Konkretisht, sipas ligjit në fuqi, konfiskimi i pasurisë së paligjshme nënkupton që kriminelët e ndëshkuar jo vetëm që dënohen dhe për shembull shkojnë në burg, por pasuria e tyre e fituar në mënyrë të paligjshme dhe jeta luksoze u merret po ashtu. Këtë edhe e presin qytetarët e ndershëm nga sundimi i ligjit”.

Legjislacioni i ri anekënd botës është tani duke futur në përdorim ligje të reja për konfiskim pa qenë personi i dënuar, të cilat nganjëherë quhen “ligje kundër mafias”. Kjo ua mundëson hetuesve të zbatojnë një qasje më të fuqishme të “përcjelljes së gjurmëve të parave”. /Telegrafi/

[skipetar]

Gazeta Express
Nga Jeton Musliu më 30 qershor 2011 në ora 08:28

EULEX ka paralajmëruar se pas tre muajsh do të ndërmerren hapat e parë në luftën kundër krimit ekonomik. Në fillim të vjeshtës, organet gjyqësore do t’ua konfiskojnë pasurinë njerëzve që e krijuan atë në mënyrë të paligjshme. Burime të Express nga misioni europian thonë se këto masa janë detyrime ndërkombëtare për Kosovën.

Ai që në Kosovë është pasuruar ilegalisht “brenda natës”, në mënyrë legale brenda ditës tjetër mund të mbetet i varfër.

Rezultatet e para të kësaj mënyre të re të veprimit të drejtësisë kundër krimit të organizuar ekonomik pritet të shihen pas tre muajve të ardhshëm.

Kështu së paku shpresojnë zyrtarë të EULEX-it, pas takimit të parë që kanë pasur të martën me dyer të mbyllura me prokurorë dhe gjyqtarë vendorë në ndërtesën e këtij misioni në Prishtinë.

Takime të tilla në formë sesionesh dhe këshillimesh, hetuesit e EULEX-it do të mbajnë një herë në javë për 12 muajt e ardhshëm, në mënyrë rotative me të gjithë prokurorët dhe gjyqtarët e vendit.

Në takimin e parë të këtij lloji, rreth 30 prokurorë dhe gjyqtarë vendorë e ndërkombëtarë kanë dhënë arsyet e tyre përse nuk e kanë përdorur kurrë deri më tash ngrirjen e pasurisë apo aseteve të atyre që dyshohen se janë pasuruar brenda natës.

Sipas tyre, dy janë arsyet përse ata nuk e kanë zbatuar të drejtën që u jep ligji.

Prokurorët janë arsyetuar se këtë nuk e kanë bërë për shkak se bashkë me policinë gjatë tërë kohës kanë qenë të preokupuar se si të gjejnë prova për të dëshmuar aktakuzën.

Ndërkohë, gjyqtarët janë shprehur se nuk e kanë zbatuar këtë të drejtë për shkak se kanë qenë të përqendruar më shumë në mbarëvajtjen e procesit gjyqësor që ai të jetë i drejtë dhe i paanshëm.

Është çudi se si në këtë rast asnjë prej tyre nuk e ka përmendur frikën apo kërcënimet që mund të kenë, kur ndaj dikujt merret vendim për ngrirje të aseteve dhe pasurisë.

Zyrtarë të EULEX-it kanë thënë për Express se takimi në sesionin e parë me prokurorë dhe gjyqtarë, lidhur me fillimin e konfiskimit të pasurive të personave që akuzohen për vepra penale të krimeve ekonomike, ka qenë mjaft interesant.

“Por, kemi parë disponim te shumë prokurorë që të nisin të zbatojnë këtë të drejtë që u jep ligji ”, thotë një zyrtar i EULEX’it, i pranishëm në ditën e parë të këtij trajnimi.

Sipas tij, është e vështirë të niset ngrirja e pasurisë dhe aseteve të dikujt që akuzohet apo është nën hetim, por kjo duhet bërë sepse shumica e prokurorëve dhe gjyqtarëve kanë treguar se nuk kanë njohuri se si ta bëjnë këtë.

“Përfundimisht, Brukseli dhe Washingtonit e kërkojnë këtë dhe ne do të jemi prapa tyre për t’i ndihmuar”, shpjegon ky zyrtar për Express.

Për më tepër, ky tashmë duket të jetë edhe detyrim ndërkombëtar. Kosova ka nënshkruar një marrëveshje të tillë që duhet ta zbatojë.

Ministri i Drejtësisë, Hajredin Kuçi, më 15 prill të këtij viti, në Brdo të Sllovenisë ka vënë firmën në dokumentin që obligon Kosovën në luftën kundër krimit ekonomik, e që përfshihet edhe detyrimi për ngrirjen dhe konfiskimin e pasurisë.

Këtë marrëveshje e kanë nënshkruar të gjitha vendet e Ballkanit Perëndimor, sepse është parë se problemet politike që shtetet kanë ndërmjet vete janë ndihmesë për rrjetet e krimit të organizuar.

Në këtë rast, zyrtarët e EULEX’it presin që ligjeve ekzistuese t’u shtohen edhe ato të rejat, të cilat do të rregullonin ngrirjen e pasurisë dhe deklarimin e saj nga ana e personave të ndryshëm edhe në rast se nuk janë nën akuzë.

Pra, në këtë rast, nëse shteti dyshon se një person është pasuruar në mënyrë të paligjshme, pasuria e tij do të ngrihej derisa ai të sqaronte mënyrën e prejardhjes së saj.

Pas marrëveshjes së Brdos, në këtë drejtim kanë nisur të punojnë edhe vendet e rajonit, ndërkohë që këtë praktikë më së shumti e përdor Irlanda, e pasuar nga Britania e Madhe e më pas Italia.

Mbajtjen e këtij takimi e ka konfirmuar një ditë më parë edhe EULEX’i përmes një komunikate për media, sipas të cilëve konfiskimi i pasurisë së paligjshme po rezulton si mënyra e duhur për të ecur përpara në mbarë botën në luftë kundër krimit të organizuar dhe korrupsionit.

“Programi 12-mujor trajnimi për gjykatësit, prokurorët dhe hetuesit vendorë e ndërkombëtarë në Kosovës, lidhur me konfiskimin e pasurisë së paligjshme, ka për qëllim t’i shfrytëzojë kompetencat për konfiskim, të cilat rrjedhin nga ligji ekzistues si mjet standard në luftën kundër krimit të organizuar dhe korrupsionit”, ka sqaruar EULEX’i.

Duke treguar disponimin e prokurorëve dhe gjyqtarëve pas këtij sesioni trajnimi, EULEX’i sqaron se ata janë pajtuar që shfrytëzimi i kompetencave për konfiskim mund të jetë një armë efektive në luftën kundër krimit të organizuar dhe korrupsionit.

“Konkretisht, sipas ligjit në fuqi, konfiskimi i pasurisë së paligjshme nënkupton që kriminelët e ndëshkuar jo vetëm që dënohen dhe shkojnë në burg, por pasuria e tyre e fituar në mënyrë të paligjshme dhe jeta luksoze u merret po ashtu. Këtë edhe e presin qytetarët e ndershëm nga sundimi i ligjit”, sqaron EULEX’i në komunikatën për media.

[DYDRINAS]

Kosova me se pari duhet te shpalle nje amnisti fiskale.

[skipetar]

Kosova me se pari duhet te shpalle nje amnisti fiskale.

Punë e kryer. Tjetër?