Studentet muslimane te medrese nderojne Shqiperine ne Amerike

[~Geri~]

Shkenca flet shqip nëpërmjet medresistëve shqiptarë, këta shkencëtarë të rinj...
Nxënës të medresesë “Liria”, Cërrik kanë marrë pjesë në Olimpiadën Ndërkombëtare të Teknologjisë së Lartë, organizuar në Teksas, SHBA prej dt. 4 deri më 9 maj 2011. Në këtë aktivitet ku u paraqitën 400 projekte me 1.100 pjesëmarrës, gjenitë tanë me projektet e tyre kaluan pa vështirësi fazën e parë duke tërhequr e bërë për vete jo vetëm jurinë, por edhe autoritetet e shumta shkencore e akademike.



Nxënësit shqiptarë jo vetëm që arritën në fazën finale, por u shpallën fitues me zbulimet e tyre interesante. Në garën që kishte pjesëmarrës të ardhur nga 70 vende të botës, Blerant Ismaili dhe Gerardo Braho morën medalje ari, kurse dyshja Alfir Qosja dhe Agri Tusha morën medalje argjendi.
Fituesit e vendit të parë Blerand Ismaili, Geraldo Braho, lidhur me projektin e tyre u shprehën:
“Në qytetin tonë hidhen 20.000 ton skorje hekuri. Ky material nuk përdoret për shkak se është shumë i dëmshëm për mjedisin si pasojë e substancave të dëmshme në skorje. N.q.s. ky material bie në kontakt me lumenjtë ose fushat e mbjella shkatojnë një dëm që është i vështirë për t’u rikuperuar ose pothuajse i parikuperueshëm. Mjedisi dhe ekonomia do kishin përfitime të mëdha n.q.s. do e përdornim skorjen e hekurit.
Industria e betonit është një nga industritë që përdor masë të madhe të resurseve natyrore. Dëmi që i shkaktohet mjedisit nga betoni mud të reduktohet duke përdorur këto resurse në mënyrë efektive dhe të prodhojmë beton të fortë dhe rezistent. Përdorja e mbetjeve dhe materialeve dytësore në vend të resurseve natyrore do të na shërbente shumë.



Prandaj, përdorimi i nënprodukteve dhe mbeturinave si material për përmirësimin e betonit sjell fitime në ekonomi dhe mjedis. Në këtë studim ne kemi ekzaminuar dëmet në mjedis dhe ekonomi të skorjeve të hekurit që më pas ta përdorim në procesin e prodhimit të betonit. Kemi prodhuar mostra betoni duke futur sasi të ndryshme të skorjeve të hekurit në vend të rërës së lumit. Kemi matur cilësinë e rezistencës së presionit të betonit. Rezultatet na treguan që rezistenca e betonit varet në sasinë e skorjeve të hekurit që përdorim. Rritja maksimale e rezistences së betonit arrihet duke perdorur 10% skorje hekuri.”
Rezultaten e dy nxënësve vërtetuan se përdorimi i skorjeve të hekurit në vend të rërës së lumit rrit rezistencën e betonit.
Ndërsa Alfir Qosja dhe Alban Paja, të cilët zunë vendin e dytë, konkuruan me projektin “Përfitimi i detergjentit alternativ nga kërcelli i lules së diellit”. Në studimin e tyre ata shfrytëzuan kërcellin e lules së diellit për prodhimin e një detergjenti alternativ.
Dy medresistët e talentuar tregojnë se në fillim mblodhën kërcejtë e lules së diellit dhe pastaj morën pjesën e bardhë që ndodhet në brendësi të tyre. Pjesët e bardha i copëtuan më pas në pjesë më të vogla dhe pastaj i thanë në temperaturë 120-135 gradë Celcius. Kërcejtë e tharë i sitën dhe përftuan pluhurin që u përdor në heqjen e disa njollave të vështira si: njolla e çajit, kafes dhe yndyrës. Sipas tyre, rezultatet e marra ishin shumë në favor të detergjentit natyral.
Alfir Qosja dhe Alban Paja mendojnë se nëse njerëzit në të gjithë botën do të përdornin detergjentin 100% organik pa asnjë përbërës kimik, do të shmangnim efektet negative që shkaktohen nga detergjentët e zakonshëm dhe do të kishim përfitime të pallogaritshme në ekonomi dhe sidomos në mbrotjen e mjedisit dhe shëndetit tonë.
Kjo nuk është hera e parë që nxënës të medreseve të vendit, konkurojnë me sukses në konkurse e olimpiada shkencore, duke arritur rezultate të kënaqshme. Me përfaqësimin e tyre dinjitoz në këto veprimtari, ata kanë nderuar e ngritur lart jo vetëm veten e tyre dhe shkollën, por dhe shoqërinë dhe kombin shqiptar.
Nxënësit fitues pasi janë kthyer fitimtarë në atdhe kanë bërë edhe një vizitë në Komunitetin Mysliman i Shqipërisë, ku janë pritur nga kryetari i KMSH-së Haxhi Selim Muça dhe Kryesia e KMSH-së, nga të cilët kanë marrë urimet më të mira, duke iu uruar atyre suksese në rrugën e Islamit dhe e shkencës, ky binom i pandarë i medreseve tona në Shqipëri.