Shtëpia e nipit të Myslym Pezës, bazë armësh e kokaine
MAPO
Thimi Samarxhiu 08-06-2011 11:11
Tiranë- Shtëpia e nipit të heroit të Luftës Nacionalçlirimtare, Myslym Peza shërbente si një depo e municioneve të rënda. Një numër i madh automatikësh, fishekësh, granatë-hedhës e snajperë, së bashku me një sasi droge dhe përzierësish lënde narkotike janë sekuestruar aty pas konfliktit të armatosur që Armand Peza pati me fqinjin e tij, oficer të repartit RENEA. Arsenali i armëve dhe lënda narkotike është bllokuar pas kontrollit të ushtruar në banesën e Pezës, i cili u arrestua dy net më parë së bashku me mikun e tij, Xhimi Hasanbega, pas konfliktit që patën me efektivin e RENEA-s, Adi Pojani.
Gjatë këtij kontrolli, efektivët e policisë arritën të zbulonin një sasi të madhe municioni dhe armësh, të cilat ishin fshehur në banesën e vjetër, pak metra larg shtëpisë ku banon deputeti socialist, Dashamir Peza. Gjithçka nisi pas një denoncimi të ardhur nga banorët e fshatit Pezë e Madhe, të cilët raportonin në polici se kishte pasur një konflikt të armatosur në atë zonë. Forca të shumta të policisë u nisën për në vendngjarje mbrëmjen e së hënës, ndërsa ata u përforcuan nga efektivë të RENEA-s, të cilët ishin njoftuar nga ana tjetër se objekt i sulmit ishte një koleg i tyre.
Menjëherë, forcat e policisë nisën punën për arrestimin e personave përgjegjës, të cilët më pas u identifikuan si Armand Peza dhe Xhimi Hasanbega. “Arrestimi tyre u realizua në Pezën e Madhe të Tiranës, pas një konflikti për motive të dobëta. Ata kanë kanosur me armë Adi Pojanin dhe më pas kanë dëmtuar me armë zjarri automjetin e tij si dhe lokalin në pronësi të një tjetër shtetasi në këtë fshat” - bëri të ditur zëdhënësja e Policisë së Tiranës, Alma Katragjini. Hetimet e mëtejshme zbuluan se shkak i këtij konflikti ishin problemet e vjetra të pronësisë mes Pezës dhe Pojanit.
Pas arrestimit të dy personave përgjegjës për këtë ngjarje, forcat e policisë ushtruan kontroll në banesën e Armand Pezës, ku, pasi hynë aty, panë një arsenal të tërë armësh, të cilat nisnin që nga automatikët, snajperët e deri te granatahedhësi. Gjithashtu, u zbulua dhe një sasi e madhe pluhuri, i cili pas analizave u vërtetua se ishte 200 gr kokainë dhe 20 kg përzierës për heroinë. I gjithë ky arsenal ishte i fshehur në banesën e vjetër të Myslym Pezës, në të cilën jetonte nipi i tij Armand Peza.
Nga ana e saj, Policia e Tiranës menjëherë pas zbulimit të armëve, i nisi ato për në laboratorë për të kryer verifikime nëse ato janë përdorur apo jo në ngjarje të tjera kriminale. Ndërkohë, burime jozyrtare bëjnë të ditur për MAPO-n se janë ngritur dyshimet se Armand Peza dhe Xhimi Hasanbega mund të jenë pjesëtarë të një prej grupeve më të rëndësishme kriminale në vend, emri i të cilit nuk bëhet i ditur për arsye hetimore. Kjo pistë është në proces hetimi, pasi agjentët janë duke punuar për të gjetur lidhje të tyre me anëtarët e tjerë të bandës. Materialet në ngarkim të tyre do t’i kalojnë Prokurorisë së Rrethit Gjyqësor Tiranë, për veprat penale të “plagosjes së rëndë me dashje”, “prodhimi dhe mbajtja pa leje e armë luftarake”, “shkatërrimi i pronës me zjarr” dhe “prodhim dhe shitje të lëndëve narkotike”. Gjithashtu bëhet e ditur se grupi hetimor i ngritur për këtë ngjarje është duke vijuar punën për të zbuluar prejardhjen e sasisë së drogës si dhe aktivitetin e mëparshëm të dy të ndaluarve.
Përgjigju Duke Cituar
Postuar më parë nga saura
Krijoni Kontakt