Këshilltari i lartë politik për çështje të komuniteteve i kryeministrit Hashim Thaçi, Srdjan Sentic, ka gjasa që të bëhet diplomati i parë serb në Kosovë. Ai pritet të emërohet zëvendësambasador në Londër gjatë muajt qershor.
Paralajmërimin për emërimin e Senticit në këtë pozitë e kanë bërë zyrtarë të lartë të Ministrisë së Punëve të Jashtme. Ata nuk e kanë përjashtuar mundësinë e emërimit edhe të diplomatëve të tjerë nga radhët e komuniteteve pakicë, por nuk kanë veçuar ndonjë emër konkret.
“Sentic pritet të dërgohet në Londër. Ai mund të jetë i pari diplomatë serb por jo edhe i vetmi nga radhët e komuniteteve pakicë”, ka thënë një nga zyrtarët e lartë të Ministrisë së Punëve të Jashtme.
Sentic, të martën, nuk është përgjigjur në numrin zyrtar të telefonit, por në vend të tij është përgjigjur dikush tjetër duke thënë se ai tash e ka një numër privat të cilin nuk mund ta tregojë.
Sentic është i lindur në Gjilan dhe është jurist i diplomuar. Përpara se të angazhohet si këshilltar i kryeministrit Thaçi, ai ka qenë këshilltar i lart i përfaqësuesit special të sekretarit të përgjithshëm të OKB-së për Kosovë.
“Koha Ditore” ka insistuar të merrte një qëndrim zyrtar nga ministri i Jashtëm, Hoxhaj, për punën e Senticit, mirëpo, një gjë e tillë ka qenë e pamundur të realizohej të martën. I pakontakueshëm ka qenë edhe këshilltari i tij për media, Artan Behrami. /Telegrafi/
Krijoni Kontakt