KOHA për BASHKIM

[ismani]

Më 5 maj, Lëvizja Qytetare ZGJOHU! shënon 5 vjetorin e themelimit. Në këto 5 vite të funksionimit, kemi ndërmarrë shumë beteja për t'i mbrojtur shqiptarët në Maqedoni dhe për t'i avancuar të drejtat e tyre. Këto beteja i kemi ndërmarrë në bashkëpunim me qytetarët, organizatat partnere, me mediat dhe me partitë politike shqiptare.



Me krenari qëndrojmë para jush sot pasi që funksionimi jonë 5 vjeçar i dha jetë shoqërisë civile shqiptare, sfidoi shoqërinë e partizuar dhe promovoi qytetari aktive. ZGJOHU! bahskë me partnerët e Lëvizjës protestoi kundër dhunës dhe padrejtësive, vendosi themelet e dialogut të mirëfillitë politik, mbushi sheshin me njerëz dhe flamuj kombëtar çdo 28 nëntor, çdo vit përkujtoi sakrificën shqiptare, institucionalizoi Plisin, rigjallëroi rrënjët ilire të këtyre trojeve, bashkoi të gjitha partitë, mediat dhe organizatat në shkallët e Akademisë së Shkencave në Shkup, afroi Shkupin me Prishtinën dhe Tiranën. Bashkë me shumë faktorë të tjerë, arritëm që politikës provinciale shqiptare t'ia hapim horizontet e shikimit dhe veprimit duke e sjell aty ku duhet të mirret hisja që na takon, në Shkup. Politika shqiptare duhet të institucionalizohet dhe t'i vejë në shërbim institucionet e vendit për të avancuar të drejtat e qytetarit.



Gjithashtu luftuam tendencat përvetësuese të figurave më të mëdha të kombit dhe njëkohësisht parandaluam asgjësimin e rrënjëve tona shekullore. Shoqëria civile shqiptare ja preu rrugën politikave asimiluese që kishin për qëllim përsëritjen e fushatave që dëbuan shqiptarët nga Velesi, Prilepi, Manastiri, Ohri.



Në këtë përvjetor, jemi të vetëdishëm që fuqia jonë është e kufizuar vetëm në identifikimin dhe sfidimin e diskriminimit dhe problemeve në shoqërinë tonë. Si pasojë e mungesës së fuqisë ekzekutive, edhepse identifikonim problemet dhe ofronim zgjidhje të qëndrueshme, e kishim të vështirë t'i zgjidhim të gjitha ato çështje gjatë 5 viteve të kaluara. Në të shumtën e rasteve kemi korrur fitore edhe pa patur pushtet, por vetëm zgjuarsi dhe vullnet si në rastin e ligjit për natalitet, enciklopedisë, kishës në shesh, apo në Kala. Të gjitha të arriturat tona u bënë falë përkushtimit të pashoq të çdo aktivisti dhe mbështetësi, të sakrificës tonë e cila u bekua me përkrahje të parezervë nga qytetarët, e frymës së re që sfidoi metodat e vjetra të politikbërjës, të filozofisë së re të veprimit dhe të bashkëpunimit me qytetarin, u bënë si rezultat i vullnetit të pashuar të rinisë për të ardhme më të mirë dhe për të kërkuar gjithnjë më tepër.



Ndërsa sot, në vigjilje të zgjedhjeve të parakohëshme, jemi tubuar këtu para jush dhe para gjithë opinionit për ta promovuar nismën tonë të re. Këtu, para simbolit më të madh të unitetit shqiptar dhe kryetrimit të kombit tonë, Gjergj Kastrioti Skënderbeu, gjetëm frymëzimin për t'i angazhuar të gjitha kapacitetet tona rinore, shoqërore, intelektuale dhe familjare në avancimin e pozitës së shqiptarëve në Maqedoni dhe këtë mund ta bëjmë vetëm nëpërmjet të kyçjes tonë të drejtpërdrejt në të gjitha proçeset, përfshirë edhe zgjedhjet. Sot, nga Shkupi Dardan themi që ka ardhur KOHA për BASHKIM. Ne, aktivistë të shoqërisë civile, intelektual të rinj, studentë, përfaqësues të komunitetit të biznesit, njerëz që na mbështesin dhe shumë të tjerë që janë me ne dhe do të na bashkangjiten, kemi vendosur që të kyçemi drejtpërdrejt në proçesin zgjedhor me përpjekje për t'a unifikuar dhe përqëndruar votën shqiptare sepse është Koha për tu Bashkuar dhe për tu bërë një. Ne do të nisim bisedime me të gjitha partitë politike shqiptare, do t'ju ofrojmë mbështetjen dhe kapacitetet tona dhe do të kërkojmë që bashkarisht ta faktorizojmë votën shqiptare dhe me forca dhe fytyra të reja ta marrim hisen që na takon.



Pas kërkesave të panumërta nga përkrahësit tanë, pas konsultimeve me miqte tanë dhe duke gjetur frymëzim tek figura më unifikuese e kombit shqiptar, Skënderbeu, e kemi gjykuar si mëse të nevojshme të themelojmë dhe regjistrojmë listën e pavarur të quajtur Koha për Bashkim e cila do të hap forum me partitë shqiptare dhe do t'ju ofrojë partneritet nëpërmjet përpjekjeve tona për të bashkuar sa më tepër parti politike shqiptare në zgjedhjet e qershorit. Konsiderojmë që sot është koha për tu bashkuar, sot është koha për të dal më të fortë, sot është doemos të bashkëpunojmë sepse nesër do të jetë vonë. Gjykojmë që, në rrethanat e sotme, vota shqiptare nuk duhet të fragmentohet dhe të humb në fuqi dhe për këtë arsye kemi vendosur të bashkëpunojmë me partitë politike për ta institucionalizuar hisen tonë, por po që se nuk arrijmë gjuhë të përbashkët me partitë politike, ne në asnjë mënyrë nuk do të kontribuojmë në përçarjen e votës, por do të bëhëmi kritikuesi i tyre më i madh dhe nuk do t'i falim për asnjë gabim të vetëm.



Nga këtu, në emër të të gjithë neve, familjeve tona dhe përkrahësve tanë, dua të apeloj deri tek të gjithë qytetarët që të dalin masovikisht në këto zgjedhje si asnjëherë më parë dhe të na mbështesin në këto përpjekje sepse nuk do ti zhgënjejmë dhe do të bëjmë çmos që secili nga ju të krenohet me përfaqësuesit e tyre politik të cilët me përgjegjësi do të punojnë që bashkarisht të dalim në dritë.



Zoti i bekoftë shqiptarët