Kosovë, Kushtetuesja rrëzon Pacollin President
PRISHTINË- Gjykata Kushtetuese e Kosovës ka rrëzuar sot zgjedhjen e Behxhet Pacollit si President. Sipas organit të drejtësisë, votimi për Pacollin president është anti-kushtetues.
Lajmi bëhet publik nga mediat kosovare. Koha.net shkruan, “Gjykata Kushtetuese, njëzëri, vendosi që të shpallë Kërkesën të pranueshme dhe, me shumice votash, dhe me dy gjyqtarë mospajtues, shpall se Vendimi i Kuvendit të Republikës së Kosovës, Nr. 04-V-04, lidhur me zgjedhjen e Presidentit të Republikës së Kosovës, me datë 22 shkurt 2011, është jo kushtetues pasi që është në kundërshtim me kërkesat e nenit 86 të Kushtetutës së Republikës së Kosovës dhe parimet demokratike të mishëruara aty”,- thuhet në vendimin e Gjykatës.
Pacolli u zgjodh president më 22 shkurt të këtij viti me votat e PDK-AAK-së, ndërsa opozita nuk e votoi. Por, në komunikatë nuk saktësohet nëse Pacolli do ti nënshtrohet edhe një herë procedurës së rivotimit në Kuvend, apo duhet të zgjidhet një president i ri. Padia kundër procedurës për zgjedhjen e Pacollit në krye të shtetit u dorëzua në 1 Mars nga LDK dhe disa deputetë të AAK-së. Sipas kësaj padie gjatë zgjedhjes së Pacollit janë shkelur katër nga gjashtë pikat e nenit 86 që përcaktojnë procedurën e zgjedhjes së presidentit të Kosovës. Është shkelur edhe vetë statusi i presidentit i përshkruar në Kushtetutë si dhe neni 70 që flet për mandatin e deputetëve.
Menjëherë pas vendimit të Gjykatës së Kosovës, deputetja e LDK-së Vjosa Osmani, njëra prej hartuesve të kërkesës drejtuar Gjykatës Kushtetuese për antikushtetueshmërinë e zgjedhjes së Presidentit Pacolli, deklaron për NEWS24 3 argumentat që do të rrëzonin më pas Presidentin Pacolli.
“Ishte një kërkesë dorëzuar Gjykatës Kushtetuese për të interpretuar procedurën e ndjekur, ishte në përputhje me nenin 86 të Kushtetutës Kërkesa e 34 deputetëve të Kuvendit të Kosovës është mbështetur në 3 argumente kryesore: E para ka qenë që në momentin e votimit, pasi ishin dy raundet e para, në Kushtetutë kërkohen 2/3 e votave, që nënkupton se duhet të jenë 2/3 e të gjithë deputetëve në sallë. Por në procesin e zgjedhjes së Presidentit Pacolli në sallë ishin vetëm 67 deputëtë. Argumenti i dytë, ishte mungesa kundër kandidatit, dispozitat kushtetuese kërkojnë që të ketë më shumë se një kandidat sipas kërkesës sonë. Argumenti i tretë ka të bëjë me ndërprerjen e votimit pas raundit të dytë. Ne nuk dimë ende cilat nga argumentat tona ka pranuar gjykata, të mërkurën pasdite do kemi edhe përgjigjen përfundimtare nga gjykata”,- u shpreh Osmani për NEWS24.
Sipas saj, “Duhet të ketë konsensus mes forcave politike për zgjedhjen e Presidentit, që nuk ka ekzistuar. Nuk dimë nëse gjykata do ti prpozojë ndonjë masë Kuvendit apo do t’ja lërë në dorë Kuvendit që të vendosë cdo bëhet. Atë do ta marrim vesh vetëm të mërkurën pasi është e vqështirë të parashikohet se cfarë ka vendosur gjykata Kushtetuese.
(m.a/BalkanWeb)
Përgjigju Duke Cituar
Postuar më parë nga Gogi
Krijoni Kontakt