Programi i kandidatit Lulzim Basha per Tiranen

[DYDRINAS]

Bashkia, masat që do të merren për Liqenin


Nënkryetari i Bashkisë, Panariti flet për ndërhyrjet për normalizimin e situatës. Ndalimi i hedhjes së inerteve dhe i ujërave të zeza dhe rivendosja e lidhjes me Liqenin e Farkës

Nënkryetari i Bashkisë së Tiranës, Edmond Panariti inspektoi sot Liqenin Artificial, sëbashku me grupin e punës që ka ngritur Bashkia në lidhje me situatën e krijuar nga ulja e nivelit të ujit dhe ndotja e tij.

Z.Panariti tha se Bashkia gjendet para një situate të trashëguar, megjithatë po merren të gjitha masat për normalizimin e gjendjes.

Ndërhyrjet e Bashkisë janë në 3 drejtime; ndalimi i shkarkimit të ujërave të zeza në Liqen nga baret dhe restorantet; bllokimi i hedhjes së inerteve nga firmat e ndërtimit që ushtrojnë aktivitetin në atë zonë si dhe në afatgjatë, nisja e punës për aktivizuar kanalin që e lidh Liqenin Artificial me atë të Farkës, gjë që mundëson ekuilibrin hidrik dhe mosrënien e nivelit të ujit.

Pas inspektimit, Panariti u shpreh para medias:

“Problemet e liqenit të Tiranës dhe ekosistemit të tij janë probleme të vjetra dhe të mbartura prej shumë vitesh. Ka ardhur koha që këto probleme duhen ballafaquar energjikisht.

Problemi i parë është i karakterit hidroteknik, sepse liqeni prej vitesh e ka shkëputur furnizimin e tij nga liqeni i Farkës. Ne kemi ndërmarrë një plan studimi, për të bërë ç’është e mundur që kjo lidhje me liqenin e Farkës të rivendoset, sepse në këtë mënyrë ruhet bilanci hidrik, oksigjenohet liqeni dhe bën të mundur gjallërimin e jetës (siç e shikoni jeta akuatike e liqenit është pothuajse inekzistente).

Nga ana tjetër, problem madhor është ndalimi kategorik i mbartjes së Liqenit me inerte dhe mbetje të ngurta, gjë që për fat të keq po ndodh edhe këto ditë. Ne i kemi dërguar një mesazh shumë të qartë firmave të ndërtimit, që ta ndalin menjëherë këtë praktikë shkatërruese për këtë ekosistem, përndryshe do të përballen me sanksione të forta ligjore.

Një problem tjetër shumë i rëndësishëm që ka të bëjë po kështu, me ruajtjen e bilancit hidrik të Liqenit është edhe administrimi korrekt i digës së Liqenit, gjë e cila do të bëhet nga Bashkia e Tiranës. Ka qenë një problem i mbajtur pezull, sepse është akoma në një proces gjyqësor, por ne së shpejti do ta marrim në administrim dhe do të bëjmë investimet e mundshme.

Një problem tjetër madhor shumë i rëndësishëm që ka një impakt negativ në Liqen dhe sistem është shkarkimi i ujërave të zeza. Të gjithë lokalet, bizneset që operojnë, të gjithë apartamentet e banimit që operojnë rreth e rrotull Liqenit kanë marrë një mesazh të qartë, që brenda një kohe të shkurtër, një periudhe dy javore, të ndërpresin kategorikisht shkarkimet e ujërave të zeza në Liqen gjë e cila ka çuar edhe në një asgjësim të jetës ujore të Liqenit, të cilën ne nuk do ta lejojmë. Do të jemi shumë energjikë, shumë të rreptë, me fuqinë që na jep ligji, për ta ndaluar këtë makabritet, që po ndodh në kurriz të këtij ekosistemi.

Një tjetër problem shumë i rëndësishëm është edhe disiplinimi i trafikut. Nuk do të lejohet absolutisht asnjë automjet privat, qoftë edhe automjet shërbimi për të qarkulluar në zonën pedonale, përveç automjeteve të autorizuara, me orare të kufizuara. Çdo shkelje do të dënohet rreptësisht. Qytetari i Tiranës ka të drejtë për të kaluar week-endin apo edhe ditët e javës, në zonën pedonale e cila është në shërbim të tij dhe që do i shërbejë natyrisht të gjithë banorëve të kryeqytetit”, - tha Panariti.

Menjëherë pas krijimit të situatës problematike në Liqenin Artificial, Bashkia e Tiranës ngriti një grup pune, për analizuar situatën dhe për të marrë masa. Gjithashtu, Bashkia e Tiranës mori në konsideratë dhe sensibilizimin që bëri media në këtë rast.


05.10.2011

Faqja zyrtare e Bashkisë së Tiranës

[DYDRINAS]

Tirana me plan të ri urbanistik


Plani i ri urbanistik që i ka munguar kryeqytetit prej afro një dekade, pritet të shndërrohet në rregullatorin e kaosit që ka përfshirë qytetin e Tiranës.

Bashkia e Tiranës ka nisur punën për hartimin e tij duke premtuar se brenda 10 muajve, kryeqyteti do të ketë një produkt të gatshëm për zhvillimin urban.

Këshilltari i kryeministrit për çështjet urbane Flamur Kuçi, njëkohësisht edhe pjesëtar i grupit teknik të punës për hartimin e këtij plani, shprehet se puna ka nisur dhe do të përfundojë brenda afateve.

Deri më sot, Tirana ka patur vetëm studime pjesore të paharmonizuara të cilat nuk e kanë zgjidhur konfliktin artificial mes qytetit dhe qytetarëve, nuk e kanë zgjidhur problemin e trafikut dhe të grackave të tjera me të cilat ndeshen qytetaret e Tiranës, por sipas z. Kuçi, e kanë dërrmuar fushën e urbanistikes gjatë këtyre viteve.

Ky plan që është premtuar të ndërtohet në një frymë të gjerë bashkëpunimi dhe koordinimi edhe me komunat dhe bashkitë rreth Tiranës, synon sipas kreut të bashkisë së kryeqytetit të jetë guri i themelit për zhvillimin urbanistik të Tiranës.

bota sot

[BlueBaron]

Pashe ca nga pikat e planit te Lul Bashes. Me pelqyen dhe ishin kurajoze. Por u habita nga mungesa e shifrave. Mungonte nje studim per numrin e udhetareve qe do te shfrytezojne rrjetin publik urban dhe interurban te trasportit. Duke pasur nje ide rreth numrit te udhetareve behen edhe perllogaritjet ne kosto dhe rekuperimi i tyre.

Shpresoj shume qe trasporti publik ne Tirane ne planin Basha te jete mundesisht sa me i lire per te thithur sa me shume qytetare qe preferojne trasportin publik.


Inshallah o Zot ...

[Brari]

Basha e Sequi përurojnë rrugën e re pedonale


Kryetari i Bashkisë, Lulzim Basha inauguroi dje rrugën "Murat Toptani", financuar nga Bashkimi Evropian, ku i pranishëm ishte edhe ambasadori i BE, Etore Sequi. Në fjalën e tij, kryebashkiaku Basha shprehu mirënjohjen për financimin e BE, vlerësoi se Tirana është mundësia më e mirë për investimet e BE. "Në këtë mbrëmje tetori, jemi mbledhur për një ngjarje shumë të veçantë dhe shumë të bukur, aq të bukur sa çdokush këtu besoj, do të preferonte të ishte një dukuri e përhershme në qytetin tonë. Me ndihmën bujare të Bashkimit Europian, taksapaguesve europianë, të inxhinierëve dhe arkitektëve europianë dhe me dedikimin e stafit të Bashkisë së Tiranës, të Ministrisë së Kulturës, të profesionistëve këtu në Tiranë, ne jemi sot dëshmitarë të rehabilitimit të një prej rrugëve më të vjetra dhe më historike të Tiranës, rruga 'Murat Toptani'", tha Basha. Ai vlerësoi se ky është një inaugurim pa risk, pasi prej disa muajsh qytetarët e Tiranës e kanë provuar, shijuar dhe e kanë aprovuar plotësisht ndërtimin e kësaj rruge me kapacitetet më bashkëkohor që mund të imagjinohet. "Por ashtu si në gjithë procesin e integrimit europian të vendit, pyetja që shtrohet është: A është ky një standard i arritur vetëm njëherë, apo një standard i përhershëm në qytetin tonë?! Zoti Ambasador, unë dua t'ju siguroj se për Bashkinë e Tiranës, ky është vetëm fillimi i një bashkëpunimi të frytshëm me Bashkimin Europian. 100 metra më tej, po zhvillohen me shpejtësi punimet për rehabilitimin e Sheshit 'Skënderbej'. Pas disa ditësh, ne do të hapim konkurrimin për zgjerimin e arteries kryesore të qytetit, në fakt zgjatimin e bulevardit kryesor të qytetit, nga Stacioni aktual i Trenit, deri në rezervuarin aktual të Paskuqanit. Po kështu, ne do të lançojmë me miratimin e Këshillit Bashkiak, brenda javës së parë të nëntorit, tenderin teknik për segmentin e Unazës nga Shkolla Teknologjike, tek Qendra 'Kristal'", vijoi më tej kryebashkiaku.


Së shpejti, data për tenderin e dizajnit teknik të tramit


"Së shpejti, do të bëjmë të ditur edhe datën e hapjes së tenderit për dizajnin teknik të tramit të Tiranës. Sfidat janë të mëdha, por po kështu janë edhe oportunitetet. Le ta shijojmë këtë mbrëmje dhe rrugë të mrekullueshme dhe mos të harrojmë se na pret shumë punë, por edhe mundësi të mëdha përpara, për të treguar se bashkëpunimi midis Tiranës dhe Bashkimit Europian funksionon shumë mirë dhe se Tirana është oportuniteti më i mirë, ku mund të investojë Bashkimi Europian", u shpreh kryebashkiaku Basha.







Kryetari i Bashkisë shpall tre angazhimet kryesore për cilësinë e jetës akademike në kryeqytet

Basha: Korpuse të reja universitare në Tiranë

"Përfshirja në planin urbanistik të godinave dhe ambienteve të reja studentore, ngritja e një fondi me të paktën 1 milion euro për stazhin e studentëve, si dhe hartimi i Kartës së Studentit, një dokument që parashikon lehtësi të ndryshme financiare për studentët e Tiranës", këto do të jenë tre angazhimet kryesore të Kryetarit të Bashkisë, Lulzim Basha për cilësinë e jetës akademike në Tiranë. Me rastin e fillimit të vitit të ri akademik, kryebashkiaku Basha uroi studentët e Universitetit të Tiranës dhe foli për marrëdhënien e re mes Bashkisë së Tiranës dhe botës akademike në kryeqytet. "Sot është një ditë e veçantë për studentët, pedagogët, stafin akademik e shkencor anembanë vendit, është një ditë e veçantë, sepse mbi 54 mijë studentë, mbi 5000 pedagogë e kërkues shkencorë në universitetet e Tiranës nisin sot vitin akademik dhe s'ka si të mos jetë një ditë shumë e veçantë për qytetin e Tiranës, edhe për mua personalisht, si Kryetar i Bashkisë. Vura re me kënaqësi gumëzhimin e veçantë të Tiranës sot në mëngjes, që është treguesi i parë i intensitetit të ri, me të cilin qyteti nis ditën e sotme dhe me të cilën do të nisë me dhjetëra e qindra ditë të tjera të këtij viti akademik. Është një ditë e veçantë, sepse ka ardhur koha që bota universitare e Tiranës dhe qyteti i Tiranës, të nisin një partneritet të ri, të nisin një marrëdhënie të re, për të cilën jemi zotuar bashkërisht dhe për të cilën po bëjmë të gjithë përgatitjet. Kjo marrëdhënie e re duhet të karakterizohet në radhë të parë, nga vetëdijësimi i qytetit të Tiranës, i Bashkisë së Tiranës, i çdo qytetari të Tiranës, për pasurinë e jashtëzakonshme që paraqet bota universitare e Tiranës. Nuk ka krenari më të madhe për mua si Kryetar i Bashkisë, se sa të them se në qytetin tim ka mbi 54 mijë studentë dhe mbi 5000 staf pedadogjik", tha Basha. Ai theksoi se kjo pasuri e jashtëzakonshme është edhe një energji e madhe, në planet e zhvillimit të qytetit të Tiranës. Kryebashkiaku Basha theksoi se do të jetë i angazhuar bashkërisht me studentët për të filluar ndërtimin e Tiranës evropiane të shekullit të 21. "Në këtë plan të madh, sigurisht që qyteti duhet të mbajë përgjegjësitë e veta karshi jush dhe unë dua t'ju informoj, se ne jemi në rrugë të mbarë për të përfunduar një nga premtimet e mia kryesore Kartën bashkiake të Studentit, për çdo student të Universitetit të Tiranës dhe të të gjithë universiteteve që rezidojnë në këtë qytet. Kjo Kartë Studentore do të jetë në duart tuaja dhe do të ofrojë një gamë të gjerë shërbimesh, lehtësirash, që nga transporti publik, tek jeta kulturore, tek shërbimet e infrastrukturës ushqimore e shumë të tjera. Po kështu, ne po punojmë së bashku me Këshillin Bashkiak, anëtarë të të cilit janë edhe pedagogë të nderuar të Universiteteve të Tiranës, për një nga hapat më të rëndësishëm, jo vetëm për brezin tuaj, por për shumë breza të tjerë të ardhshëm, sepse është një hap që nuk do të bëhet për zgjedhjet e ardhshme, por do të bëhet për brezin e ardhshëm, hartimin e planit të ri urbanistik të Tiranës. Në këtë plan, një nga ngjyrat më të rëndësishme urbanistike do të jetë ngjyra e kampusit, apo kampuseve dhe korpuseve të reja universitare, në qytetin e Tiranës", tha kryebashkiaku Basha, duke shtuar se së shpejti do të hidhen hapat e parë, në urën e rëndësishme që lidh botën akademike me botën e punësimit. Në fjalën e tij, kreu i Bashkisë Basha tha se kjo është ditë e veçantë, sepse vitin akademik e nisin mbi 54 mijë studentë, mbi 5000 pedagogë e kërkues shkencorë në universitetet e Tiranës, ndërsa theksoi se ka ardhur koha që bota universitare e Tiranës dhe qyteti i Tiranës, të nisin një partneritet të ri.

Bashkia, 1 milion euro buxhet për stazhet e studentëve

Kryebashkiaku Basha theksoi se do t'i paraqesë Këshillit Bashkiak një buxhet prej jo më pak se 1 milion eurosh për programin e stazheve, për të gjithë studentët që studiojnë në Tiranë. Kreu i Bashkisë u shpreh se ky investim bëhet për të rritur punësimin, i cili është angazhimi numër një i tij. "Në buxhetin e vitit 2012, unë kam si qëllim t'i paraqes Këshillit Bashkiak të Tiranës, një buxhet prej jo më pak se 1 milion eurosh për programin e stazheve, për të gjithë studentët që studiojnë në Tiranë. Kjo shumë, e cila jam i sigurtë, të paktën do të dyfishohet, por ndoshta edhe trefishohet nga kontributet e institucioneve të tjera private apo publike, do të përdoret ekskluzivisht, për të hapur një vend praktike për këdo student që e dëshiron atë, në institucionet publike, siç është vetë Bashkia e Tiranës, apo vetë institucionet qendrore të shtetit, por po kështu, në të gjithë gamën e madhe të ofertës të sektorit privat, nga korporatat tek kompanitë e vogla dhe të mesme, tek bankat, organizatat joqeveritare, tek institucionet e kulturës, në mënyrë që çdo student i Universitetit të Tiranës apo universiteteve të tjera në Tiranë, të gjejë mundësinë për të hedhur hapat e parë drejt punësimit të tij dhe të saj, si një qëllim madhor dhe prioritet kryesor i Lulzim Bashës si Kryetar i Bashkisë së Tiranës", tha Basha. Ndërsa theksoi se çdo investim që Bashkia bën tek studentët e Tiranës, ajo do të marrë më shumë jo vetëm në vlerë materiale, por dhe në projektet e zhvillimit të qytetit. Basha tha se në hartimin e planit urbanistik Bashkia pret përfshirjen e plotë, jo vetëm të arkitektëve dhe urbanistëve, inxhinierëve ndërtimorë etj., por të çdo kapaciteti intelektual, akoma në bankat e universiteteve, apo i sapodiplomuar, profesor me përvojë, apo në hapat e parë të kërkimit shkencor.

Elis KUÇI





Si do të ndryshojnë taksat në Tiranë


Kategoria e biznesit të vogël me paketën e re fiskale të Bashkisë së Tiranës përfiton një ulje të barrës fiskale. Nëpërmjet kësaj pakete të re fiskale, tarifa e pastrimit do të ketë një nivel të përcaktuar me ligj dhe jo si më parë, ku punonjësit e Drejtorisë së Taksave mund të spekulonin. Duke filluar nga viti i ardhshëm fiskal, çdo biznes i vogël (BV) do të paguajë si tarifë pastrimi 10 përqind të taksës që paguan si biznes i vogël. Ulja e barrës fiskale për biznesin e vogël do të krijojë premisa për hapjen e vendeve të reja të punës. Ndërsa për biznesin e madh dhe atë VIP ulja e tarifave do të jetë në varësi të llojit të aktivitetit të subjektit tregtar, por jo të gjitha subjektet që përfshihen në këto kategori kanë përfituar ulje të tarifës së pastrimit. Ndryshime ka pësuar edhe taksa e tabelës, taksë kjo që aplikohet për të gjitha subjektet që vendosin një emërtim të subjektit në pamjen ballore të njësisë ku zhvillojnë veprimtarinë, ku evidentohet emri dhe lloji i veprimtarisë së subjektit me sipërfaqe deri në 4 m2. Kjo taksë me ndryshimet ligjore që janë bërë si për tabelat në gjuhë shqipe dhe të huaj do të bëhet 120 lekë/vit. Ndërsa më parë kjo taksë ishte 1.500 lekë në vit për tabelat në shqip dhe 3.000 në vit për tabelat e shprehura në gjuhë të huaj. Me ndryshimet e reja, tabelat reklamuese do të jenë 45 mijë lekë/m2/vit. Kjo taksë do të paguhet pranë QKR-së. Taksa e tabelës paguhet nga të gjithë subjektet, të cilët vendosin emërtimin e subjektit në pamje ballore të njësisë ku zhvillohet veprimtaria. Në rast se një subjekt ka më shumë se një tabelë pavarësisht nga vendndodhja, vetëm njëra do të konsiderohet për qëllime identifikuese, ndërsa të tjerat do të konsiderohen për qëllime reklamuese. Taksa për çdo hotel apo për shërbime të tjera të këtij lloji do të jetë 3% e çmimit të fjetjes. Tarifa për shërbimin në fushën e transportit të pasagjerëve dhe mallrave, si dhe dhënien e lejeve për ushtrim aktiviteti shfuqizohet. Dhënia e lejeve për transport mallrash apo pasagjerësh, e cila ka qenë 2.000 lekë, shfuqizohet, pra, ky shërbim duke nisur nga viti i ardhshëm do të ofrohet falas. Dhënie leje për veprimtari servisi automjetesh, lavazhe apo parkingut nga 10.000 lekë me paketën e re fiskale shfuqizohet. Si këto shërbime janë edhe disa shërbime të tjera, që kanë të bëjnë me këtë fushë që do të ofrohen falas. Po ashtu të gjitha shërbimet që ofrohen nga Bashkia e Tiranës për lejet e ndërtimit dhe të shfrytëzimit, kontrollin e themeleve, kontrollin e karabinës apo aktkontrolli i përfundimit të punimeve apo azhurnimi i gentplaneve do të ofrohen falas. Pasi është shfuqizuar tarifa e urbanistikës, nga fillimi i fazës së shërbimit që nis me marrjen e lejes së sheshit të ndërtimit deri te dhënia e lejes së shfrytëzimit për çdo objekt. Sipas ligjit të pushtetit vendor, niveli i taksave vendore mund të ulet apo dhe të rritet deri në nivelin 30 përqind. Pra, mundësia më e madhe është që me këtë paketë të re fiskale, bizneseve, por edhe kategorisë së familjarëve mund t'u ulen taksat deri në nivelin e 30% që janë aktualisht. Paketa e fundit fiskale për Tiranën, e cila solli ndryshimin e taksave dhe tarifave vendore, është bërë në vitin 2007, ku u rishikuan pothuajse të gjitha taksat vendore dhe u bë një rritje progresive për tri vite radhazi. Duke shtuar në këtë mënyrë barrën fiskale që duhet të paguante biznesi i vogël e jo vetëm, por edhe kategoria e familjarëve, ku taksa e gjelbërimit dhe tarifa e pastrimit u rritën për dy vite, nga 2008-2010, dyfish. Por me paketën e re fiskale niveli i taksave pëson ulje. Kështu, ulje pritet të ketë tarifa e pastrimit për familjarët, por edhe për bizneset; veç kësaj edhe taksa e gjelbërimit për bizneset pritet të ketë një ulje, po ashtu edhe taksa vendore mbi biznesin e vogël mund të rishikohet.


Shfuqizohen disa tarifa bashkiake për familjarët


Mbërrin në Këshillin Bashkiak të Tiranës paketa e re fiskale, e cila ul taksat dhe tarifat për familjet kryeqytetasve. Ndryshimet më të mëdha që janë bërë në këtë paketë fiskale është revokimi i rreth 60 tarifave administrative dhe shërbimi, ku nga 64 tarifa administrative mbesin vetëm 7 të tilla dhe nga 17 tarifa shërbimi mbeten 14 tarifa. Qytetarët kryeqytetas nuk do të paguajnë më për shërbimet që marrin pranë njësive bashkiake, siç është vërtetimi për banor lagjeje, për ndarje apo bashkim familjar, por edhe për përgatitjen e dosjeve për strehim apo privatizim. Ndërsa për detyrimet që kategoria e familjarëve i paguan Bashkisë së Tiranës gjatë një viti janë në nivelet e mëparshme. Taksa e pastrimit mbetet në nivelin e 5 mijë lekëve në vit po ashtu edhe taksa e gjelbërimit vijon të jetë 500 lekë.

Ndryshimet

Kategoria e familjarëve nuk do të ketë asnjë ndryshim të taksave që paguan çdo vit ndaj Bashkisë së Tiranës. Kjo, pasi nga llogaritjet e kryera nga strukturat e Bashkisë së Tiranës, është parashikuar që niveli i tarifës së pastrimit për kategorinë e familjarëve të jetë po aq sa ka qenë, 5.000 lekë në vit. Po ashtu edhe taksa e gjelbërimit vijon të jetë 500 lekë në vit. Shfuqizim ka pasur tarifa për mbjellje peme, bli ose rrap në "Rrugën e të dashuruarve", si dhe për mbjellje mimoze apo ulliri në "Kopshtin e të dashuruarve", i cili ndodhet brenda Parkut të Liqenit. Gjithashtu qytetarët që duan të aplikojnë për statusin e të pastrehut, apo të plotësojnë dokumentat për strehim me paketën e re fiskale nuk do të paguajnë asnjë tarifë. E njëjta gjë është aplikuar edhe për ata që duan të përgatisin dosjet për privatizim. Bashkia e Tiranës mosndryshimin e nivelit të taksave për kategorinë e familjarëve e argumenton me faktin e kostos së madhe të shërbimit të pastrimit, i cili në një vit kap shifrën 1 miliard lekë. Sipas të dhënave nga Drejtoria e Pastrimit rezulton se kategoria e familjarëve zë rreth 60% të kostos së shërbimit të pastrimit, ndërsa biznesi 40% të saj, ndaj për këtë në kategorinë e familjarëve nuk është bërë asnjë ulje e kësaj takse.


Afatet e pagesave për tarifën e pastrimit


Familjarët

Për kategoritë e familjarëve taksat do të paguhen në dy këste. Kësti i parë paguhet brenda datës 30 prill, ndërsa kësti i dytë paguhet brenda datës 30 shtator. Për çdo familje të krijuar rishtaz, afati i pagesës së tarifës së pastrimit do të jetë 30 ditë nga dita e regjistrimit të saj në zyrën e gjendjes civile të njësisë bashkiake përkatëse dhe detyrimi tatimor do të llogaritet nga muaji korrent i regjistrimit. Për kategorinë familjare detyrimi llogaritet dhe paguhet për familje. Për të llogaritur detyrimin për tarifën kjo kategori duhet të paraqesë pranë agjentit tatimor përkatës çertifikatën familjare të lëshuar nga zyra e gjendjes civile.


Bizneset

Për kategorinë "Biznes" detyrimi paguhet brenda datës 20 prill. Afati i pagesës për detyrimet e lindura pas datës 20 prill është 30 ditë pas lindjes së detyrimit. Për subjektet e regjistruara rishtazi detyrimi tatimor do të llogaritet për çdo njësi ku subjekti kryhen aktivitet nga muaji korrent i regjistrimit pranë QKR. Nëse subjekti tatimpagues pushon veprimtarinë gjatë vitit, detyrimi tatimor llogaritet duke shumëzuar taksën për vitin e plotë kalendarik me numrin e muajve të plotë gjatë të cilëve veprimtaria është kryer.

Elis KUÇI

[Brari]

Basha: Agolli, i pandikuar nga interesa të çastit
Lajmi i Fundite Enjte, Tetor 13th, 2011

TIRANË- Në përvjetorin e 80- të lindjes së shkrimtarit të madh, Dritëro Agolli, kreu i bashkisë së Tiranës, Lulzim Basha i ka bërë një vizitë në shtëpi.

Një tufë lulesh, urimet e rastit dhe një bisedë e ngrohtë me Agollin dhe bashkëshorten e tij në këtë ditë të shënuar. Basha ka vlerësuar lart figurën e Agollit dhe rolin e tij në letërsinë shqipe.

“Dritëro Agolli është ndër shkrimtarët më të mirë të letërsisë sonë. Ai është njeri me vizion të kthjellët, të qëndrueshëm dhe i pandikuar nga interest e çastit” ka thënë Basha gjatë vizitës në familje.

Për nder të shkrimtarit, Akademia e Shkencave në bashkëpunim me ministrinë e Kulturës ka organizuar një veprimtari të posaçme për anëtarin e saj të nderuar.

Agolli ka rrëfyer sot në “Panorama” për jetën dhe krijimtarinë, pengjet e tij, përplasjen me Mehmet Shehun për librin që tronditi kohën “Shkëlqimi dhe rënia e shokut Zylo” dhe arsyet e ftohjes me shkrimtarin Ismail Kadare.

[DYDRINAS]

Ndërtuesit me Boden: Ok hipotekimit të shpejtë të pallateve

15 Tetor 2011

Dje gjatë ceremonisë së 10-vjetorit të Shoqatës së Ndërtuesve

Nismën e ndërmarrë nga kryebashkiaku i Tiranës, Lulëzim Basha, për përshpejtimin e procesit të hipotekimit të pallateve, ndërtuesit kanë gjetur vend ta vlerësojnë edhe dje në ceremoninë e 10-vjetorit të Shoqatës së Ndërtuesve të Shqipërisë. Sipas ndërtuesve, kjo është një nismë e ndërmarrë në kohën e duhur dhe për t’i dhënë shtysë sektorit të ndërtimit për të dalë nga kolapsi që ka mbërthyer pas stokut të banesave që nuk shiten. Përshpejtimi i procesit të hipotekimit shihet nga ndërtuesit si një mënyrë për të sjellë më shumë kapital për këto të fundit dhe më shumë para për ekonominë. Në ceremoninë e 10-vjetorit të Shoqatës së Ndërtuesve të Shqipërisë ishte i pranishëm edhe ministri i Financave, Ridvan Bode, i cili vlerësoi rëndësinë që ka sektori i ndërtimit në ekonomi dhe mbështetjen që duhet t’i jepet. “Unë jam tërësisht në të njëjtin opinion me ju se vështirësitë që hasni aktualisht kërkojnë një vëmendje dhe një bashkëpunim më të gjerë, për fuqizimin e mëtejshëm të partneritetit për të cilin unë falënderoj dhe shoqatën tuaj, për të kapërcyer vështirësitë e përkohshme dhe për t’i dhënë qëndrueshmëri në kohë industrisë së ndërtimit, dhe kur flasim për këtë industri nuk e kemi fjalën thjesht për ndërtuesit, por dhe për ata që prodhojnë materialet e ndërtimit”, u shpreh Bode. Nisma për përshpejtimin e hipotekimit të dhjetëra pallateve në Tiranë shihet nga sektori i ndërtimit, por edhe nga biznesi në tërësi, si një mënyrë për të marrë frymë lirisht nga borxhi në të cilën kompanitë janë zhytur pas post-krizës. Shumë prej tyre, vit pas viti u detyruan që të zvogëlonin apo të mbyllnin kantieret, ndërkohë që problemi i hipotekimit ka qenë refren i deklaratave publike të bëra shpesh prej tyre. Të dhënat e fundit të publikuara nga institucionet në vend, si Banka e Shqipërisë apo INSTAT, reflektojnë një situatë të përmirësuar.

700 milionë euro

është vlera e përafërt që llogarit Bashkia e Tiranës se mbahet peng nga pallatet e pahipotekuar në kryeqytet. E gjithë kjo shumë që do të çlirohet nga shitjet do të shkojë për sektorin e ndërtimit dhe për ekonominë.

panorama

[DYDRINAS]

Taksat, Bregasi: Basha e mbajti premtimin


14 Tetor 2011


Biznesi ka reaguar pozitivisht ndaj uljes së numrit të taksave dhe tarifave që Këshilli Bashkiak miratoi një ditë më parë. Presidenti i “Biznes Albania”, Luan Bregasi, shprehet se në këtë nismë vlerëson dy aspekte, atë të faktit që kryebashkiaku Basha po mban premtimet që bëri gjatë fushatës dhe, në anën tjetër, kjo lehtëson biznesin. “Në filozofinë time si sipërmarrës, por edhe si president i shoqatës ‘Biznes Albania’, është mentaliteti i sipërmarrësve se është më mirë që ky vend të ecë me taksa të ulëta dhe me një bazë të gjerë tatimpaguesish. Ky vendim i ri i Këshillit Bashkiak, kam përshtypjen, përveçse do të lehtësojë taksat e asaj kategorie që tashmë paguan, por do të fusë në sistemin e taksave edhe individë, kompani, qytetarë, të cilët për shkak të ngarkesës së lartë, kanë preferuar t’i fshihen Bashkisë”, shprehet Bregasi. Ai thekon se biznesi po ndjek me vëmendje punën e kryebashkiakut Basha dhe se heqja e disa dhjetëra taksave dhe tarifave është një premtim i dytë i mbajtur pas asaj të memorandumit për hipotekimin e pallateve me leje. Në të njëjtën linjë ka qenë dje edhe fjala e kreut të Dhomës së Tregtisë dhe Industrisë në Tiranë, Nikolin Jaka, për vendimin e Këshillit Bashkiak për taksat. Gjatë një konference për shtyp, Jaka theksoi se ky vendim vjen në vazhdën e premtimeve të mbajtura. “Përshëndesim vendimin e marrë dje nga Bashkia e Tiranës për heqjen dhe reduktimin e 60 taksave, duke e konsideruar këtë një ogur të mirë për sipërmarrjen dhe qytetarët, pasi vjen në vazhdën e premtimeve elektorale të mbajtura nga kryetari i ri i Bashkisë së Tiranës”, u shpreh Jaka, duke sjellë në vëmendje dhe rastin e memorandumit.

60 taksat

Këshilli Bashkiak vendosi dy ditë më parë heqjen e 60 taksave dhe tarifave që qytetarët apo bizneset paguanin në Tiranë. Në total, numri i këtyre taksave ishte 84 të tilla, ndërsa me vendimin e marrë së fundi mbeten në fuqi për t’u paguar rreth 24 taksa dhe tarifa. Heqja e këtyre taksave është premtuar nga Basha gjatë fushatës elektorale.

panorama