Apeli liron “peshkun e madh” të drogës, nje shtetas turk, i cili arratiset

[Albo]

Një shtetas turk, i konsideruar si “peshku i madh” i trafikut ndërkombëtar të drogës, është lënë i lirë pak ditë më parë nga Gjykata e Apelit të Tiranës.Togat e zeza të Apelit kanë ndryshuar masën e mëparshme të sigurisë “arrest me burg me afat” të turkut Abdulselam Turgut, 44 vjeç, në atë të “arrestit shtëpiak”. Sipas vendimit të Gjykatës, “lirimi” ishte bërë për shkak të problemeve shëndetësore të të arrestuarit.
Turgut është arrestuar më 18 shkurt 2011 në Aeroportin e Rinasit. Prangosja e tij është bërë për llogari të Drejtësisë gjermane. Në këtë shtet Turgut akuzohet se ka trafikuar një sasi prej 1 tonësh lëndë narkotike të llojit heroinë, në vitin 2009. Ndërkohë bëhet e ditur se 44-vjeçari është në kërkim nga pesë shtete të Europës, po për akuza në lidhje me trafikun e drogës. Aktualisht, Drejtësia shqiptarë është në pritje të dokumentacionit të nevojshme nga ana e palës gjermane, me qëllim ekstradimin e turkut në Gjermani.

“LIRIA”

Vënia në pranga e Abdulselam Turgutit në Aeroportin e Rinasit është mbajtur në sekret të plotë nga Policia e Shtetit. Në momentin e ndalimit, autoriteteve policore të aeroportit u është konfirmuar me anë të një e-mail-i nga ana e Interpol-Tiranës se 44-vjeçari ishte i kërkuari i Interpolit. Pas arrestit Turgut është përcjellë në Gjykatën e Tiranës, e cila më 20 shkurt ka caktuar masën e sigurisë “arrest me burg me afat 40 ditor” ndaj tij. Në vendimin e Gjykatës së Tiranës kërkohej që në lidhje me këtë vendim të njoftohej edhe ministri i Drejtësisë. Ndërkohë që me ankimimin e dosjes në Apel më 4 mars 2011, masa e sigurisë ndaj turkut është ndryshuar. Burime pranë Gjykatës së Apelit bënë të ditur shkaqet e ndryshimit të masës së sigurisë. Sipas gjykatës, në dokumentacionin e paraqitur nga prokuroria ishte vetëm urdhër-arresti për turkun. Në seancë është provuar vetëm që Turgut ishte në hetim në shtetin gjerman, po nuk është paraqitur ndonjë akt me akuzë zyrtare në ngarkim të tij. Gjithashtu ka rezultuar se turku 44-vjeçar ka pasur një kartelë mjekësore si i sëmurë me zemër dhe për këtë shkak i nevojitej asistencë e përditshme mjekësore. Gjithashtu, si argument pro nga gjykata është parë edhe fakti që shtetasi turk e ka pasaportën të bllokuar.

ARRESTIMI

Në vendimin Gjykatës së Shkallës së Parë për caktimin e masës së sigurisë ndaj turkut Turgut, sqarohet momenti i ndalimit të tij në Rinas. “Rezultoi se në datën 18.02.2011, rreth orës 15:00, gjatë përpunimit të pasagjerëve të linjës ajrore ‘Turkish-Airlines’, nga ana e kontrollorëve të planizuar në kabinat e hyrjes për Republikën e Shqipërisë është bllokuar shtetasi turk Abdulselam Turgut. Ky veprim është kryer për arsye se nga kontrolli që është bërë në sistemin e Interpolit ka rezultuar me statusin ‘Wanted purpose: arrest’, e në këto kushte, pas kontaktit me ZQK të Interpol-Tiranës, është konfirmuar me një e-mail se ky shtetas është shpallur në kërkim ndërkombëtar nga Interpol-Wiesbaden (Gjermani), me urdhrin europian të arrestit të lëshuar në datën 21.09.2009, me akuzën e trafikimit të heroinës, opiumit, me qëllim ekstradimin e këtij shtetasi në Gjermani”, thuhej në vendimin e gjykatës.

INSPEKTIMI

Burime pranë Këshillit të Lartë të Drejtësisë bënë të ditur dje nisjen e një inspektimi në Gjykatën e Apelit të kryeqytetit. Mësohet se inspektimi do të shqyrtojë rrethanat dhe kushtet e dhënies së vendimit që ka ndryshuar masën e sigurisë nga “arrest me burg me afat 40 ditor”
në “arrest shtëpiak”
për turkun.

Marikaj, dy veta në pranga me 15 kg kanabis

TIRANE – Policia e Tiranës arrestoi dje dy persona, të cilët po trafikonin në drejtim të kryeqytetit 15 kilogramë bimë narkotike. Operacioni u zhvillua në Marikaj, në momentin kur një makinë tip “Fiat”, me targë DR 4093 F, po udhëtonte në drejtim të kryeqytetit. Pas ndërhyrjes së policisë, në bagazhin e makinës është gjetur sasia prej 15 kilogramësh bimë narkotike, kanabis sativa, e cila kishte si destinacion shitjen në tregun e Tiranës, por edhe jashtë kufijve të vendit. Sipas burimeve zyrtare të policisë mësohet se janë arrestuar: Mustafa Zajmi, 20 vjeç dhe Edmond Kabetaj, 23 vjeç, banues në Sukth të Durrësit. Sipas të dhënave operative të policisë, bima narkotike dyshohet të jetë kultivuar në një fshat të Burrelit, ku Zajmi dhe Kabetaj kishin banuar para disa vitesh. Për kryerjen e operacionit policia ka përdoruar metodat operative dhe gjurmuese.

Turgut, i lidhur me “grupin e Shijakut”, trafikoi 450 kg heroinë

Mediat turke shkruanin dje se shtetasi Abduselam Turgut nuk ka udhëtuar rastësisht në Shqipëri. Si një trafikant ndërkombëtar droge, mesa duket ai ka pasur edhe më parë bashkëpunëtorë shqiptarë. “Hyrriet” shkruante dje se Abdulselam Turgut ka pasur lidhje me një grup shqiptarësh të arrestuar për sasi të mëdha heroine. Sipas medias turke, personat që kanë pasur lidhje me turkun kanë qenë Hekuran Hoxha dhe Xhemaim Posmacciu. Në Turqi mësohet se këta shtetas, në bashkëpunim me Abduselam Turgut, ishin akuzuar për trafikimin e një sasie prej 30.5 kilogramësh heroinë të pastër. Prokurori turk i çështjes ka pohuar se Abdulselam Turgut ka pasur një marrëveshje me shtetasit shqiptarë për trafikimin e ngarkesës së drogës nëpërmjet Shqipërisë në Europën Perëndimore. Nga ana tjetër, shtetasit shqiptarë që përmenden në median turke si të lidhur me “peshkun e madh” të narkotrafikut kanë dosje penale edhe në Shqipëri. Më 10 shtator 2010, Prokuroria e Krimeve të Rënda arrestoi pesë persona të akuzuar për trafik ndërkombëtar narkotikesh. Aksioni u zhvillua në qytetin e Shijakut, ku ranë në pranga shtetasit Hekuran Hoxha, 38 vjeç nga Shijaku, i cili njihet me pseudonimin “Roni”; vëllai i tij, Fatbardh Hoxha, 37 vjeç; Alket Hatija, 35 vjeç, me origjinë nga Berati dhe banues në Shijak; Saimir Gjepali, 34 vjeç, nga qyteti i Shijakut, si dhe Mentor Shehu nga fshati Pobrat i Beratit, i cili njihej me pseudonimin “Toku”. Në këtë dosje u mor një masë sigurimi edhe për shtetasin Lutfi Shabani, i njohur si “Ben Çami”. Sipas hetimeve të prokurorisë, gjatë viteve 2003-2004 policia italiane ka kapur dhe sekuestruar në brigjet Apenine rreth 450 kilogramë heroinë, origjina e së cilës ishte nga Shqipëria dhe konkretisht nga Durrësi, ku ishte nisur nga të arrestuarit.\


Panorama
ARMAND BAJRAMI

[Albo]

Tiranë, arratiset bosi turk i drogës, i liruar nga Apeli

Arratiset shtetasi turk Abdulselam Turgut, i shpallur në kërkim ndërkombëtar për trafik droge dhe i liruar nga Gjykata e Apelit të Tiranës në datën 4 mars 2011.Burime nga prokuroria kanë thënë dje se shërbimet e Policisë Gjyqësore nuk e kanë gjetur shtetasin turk në katin e tetë të godinës te Kthesa e Kamzës në Tiranë. Sipas vendimit të Gjykatës së Apelit, të shpallur nga gjyqtarët Gjin Gjoni, Hysni Demiraj dhe Agron Papajani, shtetasi turk duhej të qëndronte në “arrest shtëpie” në dispozicion të procedurave të ekstradimit. Ai u arrestua në Aeroportin e Rinasit në datën 18 shkurt 2011, pasi kontrolli i policisë gjeti se shtetasi në fjalë ishte shpallur në kërkim ndërkombëtar nga Interpoli gjerman dhe ishte në statusin “Wanted” (i kërkuar). Burime nga Prokuroria e Përgjithshme thanë dje se sipas verifikimeve të kryera ditën e djeshme, shtetasi turk nuk është gjetur në godinën ku duhej të qëndronte në zbatim të vendimit të dhënë nga Gjykata e Apelit. Gjykata e Shkallës së Dytë në Tiranë kishte rrëzuar kërkesën e prokurorisë për mbajtjen e shtetasit turk në burg deri në përfundim të procedurës së ekstradimit në Gjermani. Apeli vlerësoi se prokuroria nuk kishte paraqitur provat e nevojshme për mbajtjen në arrest me burg të shtetasit turk. Ndërkohë, provat e prokurorisë në Apel ishin: shkresë nr. 197 prot., datë 19 shkurt 2011, informacion mbi referimin e veprës penale (dy fletë), procesverbal i kapjes së shtetasit turk, procesverbal i arrestimit të shtetasit turk, procesverbal i kontrollit fizik të shtetasit turk, procesverbal i sekuestrimit të provave materiale, dokumente në gjuhën turke, tri fletë, fletë e-mail i drejtuar Interpolit (2 fletë), fletë Interpoli me të dhënat e shtetasit turk (3 fletë), ekstrakt i QKR i përkthyesit Ilirjan Sh., vendim për vlerësimin e sekuestrimit, shkresë nr. 679/1 prot., datë 20 shkurt 2011, dy fletë, shkresë nr. 439/1, KI prot., datë 19 shkurt 2011 (2 fletë). Gjykata e Apelit mësohet se e ka lënë të lirë shtetasin turk me argumentin se prokuroria, madje, kishte shkelur ligjin duke kërkuar mbajtjen e tij në burg edhe në shkallën e parë. Sipas Gjykatës së Apelit, Konventa Europiane për Ekstradimet kërkon që prokuroria të paraqesë në gjykatë kërkesën ose fotokopjen e saj, për ekstradimin e shtetasit të arrestuar. Gjykata e Apelit ka pretenduar se një kërkesë e tillë nuk është paraqitur para trupit gjykues, duke dhënë kështu masën “arrest shtëpie” për një shtetas turk që praktikisht nuk kishte shtëpi në Shqipëri. Duke iu referuar “mungesës së provave”, Gjykata e Apelit ka vendosur që shtetasi turk të mbahej në arrest me afat 40-ditor në godinën e ndodhur në Kthesën e Kamzës, Tiranë, në katin e tetë të saj. Në vendimin e Gjykatës së Apelit nuk ka asnjë adresë apo të dhënë tjetër identifikuese për “shtëpinë” ku duhej të qëndronte në arrest shtetasi turk.

Turgut kishte lidhje me trafikun e 450 kg heroinë

Personi që është nxjerrë nga burgu me vendim të Gjykatës së Apelit të Tiranës, shtetasi turk Abdulselam Turgut, është akuzuar në Turqi për tentativën e trafikimit nëpërmjet Shqipërisë të një ngarkese prej 30.5 kilogramësh heroinë. Media turke “Hyrriet”, ka shkruar se Abdulselam Turgut ka pasur lidhje me një grup shqiptarësh të arrestuar për sasi të mëdha heroine. Sipas medias turke, personat që kanë pasur lidhje me Turgut kanë qenë Hekuran Hoxha dhe Xhemaim Posmaçiu. Në Turqi mësohet se këta shtetas, në bashkëpunim me Abduselam Turgut, ishin akuzuar për trafikimin e një sasie prej 30.5 kilogramësh heroinë të pastër. Prokurori turk i çështjes ka pohuar se Abdulselam Turgut ka pasur një marrëveshje me shtetasit shqiptarë për trafikimin e ngarkesës së drogës nëpërmjet Shqipërisë në Europën Perëndimore. “Partnerët e shtetasit turk, gjatë viteve 2003-2004, akuzohen se kanë trafikuar 450 kilogramë heroinë nga Shqipëria, e cila është kapur në Itali.


Panorama
Trazhgim Sokolaj

[Albo]

Spahiu: Skandaloz “arresti i shtëpisë”, ndryshim ligjit

Pak ditë pasi bosi turk i drogës, Abdulselam Turgut, u arratis pasi Gjykata e Apelit në Tiranë e liroi duke vendosur për të “arrest shtëpie”, nënkryetari i KLD-së, Kreshnik Spahiu, kërkon ndryshime në ligj.Ai kritikoi vendimet e dhëna nga gjykata të ndryshme në vend në lidhje me masën e sigurisë “arrest shtëpie”, masa të cilat, sipas tij, janë skandaloze. “Në 95 për qind të rasteve ato nuk kontrollohen. Ka një mungesë të theksuar të bashkëpunimit mes Gjykatës, Prokurorisë dhe Policisë Gjyqësore për këto çështje. Në situatën aktuale ku ndodhemi ka ardhur koha që të ndryshohet Kodi i Procedurës Penale në Shqipëri në lidhje me masat e sigurisë”. Kështu u shpreh nga qyteti i Shkodrës, nënkryetari i KLD-së, Kreshnik Spahiu, në analizën vjetore të Gjykatës së këtij rrethi.
Duke nënkuptuar raste konkrete, siç është edhe ai i fundit, kur bosi turk i drogës mori arratinë pasi u lirua nga Apeli, Spahiu theksoi se ka ardhur koha që të bëhen ndryshime në ligj në lidhje me masat e sigurisë, me qëllim që të vendoset drejtësia. Ai theksoi se është e nevojshme që të bëhen ndryshime të shpejta në Kodin e Procedurës Penale për t’u parashikuar mënyra e zbatimit të masës së sigurimit “arrest shtëpie”. Kjo nuk do t’i linte as hapësira dhe as diskreticion Gjykatës, Prokurorisë apo Policisë Gjyqësore për t’u futur në antagonizëm të mënyrës se si zbatohet kjo masë. “Duhet një tryezë dhe debat transparent i gjykatës me të gjitha organet e tjera për mënyrën se si do të realizohet zbatimi i kësaj mase, derisa të realizohen ndryshimet e mundshme në Kodin e Procedurës Penale, ndryshime të cilat kërkojnë një kohë të posaçme edhe për shkak të rrethanave”, u shpreh më tej Spahiu. Duke folur më pas për Gjykatën e Shkodrës, gjatë fjalës së tij nënkryetari i KLD-së u shpreh se kohët e fundit është vërejtur një diversitet juridik i vendimeve mes Gjykatës së Shkallës së Parë dhe asaj të Apelit të këtij rrethi, diversitet që sipas tij po shndërrohet në antagonizëm. Po t’i referohemi 2010-s, për çështjet penale të ankimuara në Apel të Shkodrës rezulton se janë lënë në fuqi rreth 70 për qind e vendimeve të shkallës së parë. Ndërkohë që 30 për qind janë cenuar e nga këto 7 për qind janë prishur. Spahiu, në këtë analize vjetore të Gjykatës së Shkodrës shoqërohej nga dy anëtarë të KLD-së, Neshat Thana dhe Dritan Halluni. Ai kërkoi nga gjyqtarët e Shkodrës rritjen e standardit të gjykimit, rritjen e profesionalizmit, respektimin e solemnitetit të gjykimit në gjykata, shmangien e gjykimeve në zyrat e gjyqtarëve etj.

“Dënime të ashpra vrasësve për gjakmarrje”

Nënkryetari i KLD-së, Kreshnik Spahiu, u kërkoi dje gjyqtarëve të Shkodrës dënime më të ashpra për të gjithë personat që kryejnë vrasje në emër të gjakmarrjes. Deklarata e Spahiut vjen pasi në qytetin verior gjakmarrja është kthyer në një fenomen që po shqetëson të gjithë opinionin. Edhe pse shifrat për vitin 2010 kanë treguar rënie, nënkryetari i KLD-së kërkoi vendime më të ashpra ndaj të gjitha krimeve në emër të gjakmarrjes. “Ashpërsi ndaj një vepre me rrezikshmëri të lartë shoqërore, siç është vrasja për gjakmarrje. Kjo plagë e thellë, e përhapur në qarkun e Shkodrës, duhet kuruar me të gjitha mjetet. Një politikë e ashpër dënimi që duhet aplikuar në çdo rast, për autorët e këtyre veprave penale në mënyrë që të pakësohen sadopak krimet e kësaj natyre”, u shpreh ai.


Panorama
SHKODER/ RIDVAN DIBRA

[Albo]

Zbulohet hoteli që strehoi Abdulsalem Turgut

TIRANE-I shumëkërkuari i pesë shteteve, i cili u arrestua në Rinas për llogari të policisë gjermane dhe që u lirua nga Gjykata e Apelit, ka mundur të arratiset pikërisht nga vendi më i sigurt kufitar i vendit tonë, Rinasi.
E perditshmja Gazeta Shqiptare zbulon se Turku Abdulsalem Turgut ka “gabuar” në fshehjen e tij nga policia shqiptare vetëm momentin e daljes nga hoteli në të cilin është strehuar për dy javët e qëndrimit në “arrest shtëpie”, masa me të cilën u dënua nga apeli i Tiranës.
Një dokument i femrës 38 vjecare që e ka shoqëruar në “arratinë” e tij turkun e trafikimit të 1 ton heroine, ka zbuluar jo vetëm kohë qëndrimin në këtë hotel, por edhe rrugëtimin e tij dhe të shtetases kurde me të cilën ka ndarë dyjavëshin e fshehjes nga policia e shtetit shqiptar, e cila bëri të ditur ditë pas lirimit të tij se po e kërkonte te apartamenti në afërsi të “Casa Italia” por nuk e gjente dot.

Policia pas zhurmës që u konsiderua skandal e renditi emrin e Abdulsalem Turgut në listën e të kërkuarve të Interpolit, por referuar dokumentimit që del nga firmosja e ardhjes dhe e largimit të gruas që qëndroi me të në hotel, datat e vendosura aty tregojnë se i kërkuari i Gjermanisë është larguar nga hoteli në orën 19:00 të mbrëmjes së 17 marsit, ku mesditën e po kësaj dite, një “shkëndijë” që del nga KLD-ja, ndriçon vendimin që kishte dhënë Apeli më datë 4 mars për turkun 44- vjeçar.

(d.b/BalkanWeb)