Postuar më parë nga
Albo
Shpërndarja e reklamës shtetërore, PS kërkon informacione nga 3 ministri
Fejzi Braushi
Çështja e reklamës shtetërore në mediat private është bërë objekt i debatit parlamentar. Komisioni parlamentar i Medias është përfshirë dje nga debate të ashpra lidhur me këtë çështje, ndërsa mazhoranca nuk ka pranuar të votojë kërkesën e socialistëve për të ngritur një komision hetimor, i cili do të shikonte nga afër të gjitha procedurat e shpërndarjes së reklamës shtetërore në mediat e ndryshme private. Ndërkohë që po gjatë ditës së djeshme, nga selia rozë socialistët kanë akuzuar se qeveria ka shpërndarë shumicën e reklamave në një nga mediat vizive pro saj.
Komisioni
Pavarësisht se ishte mbledhur për të miratuar kalendarin e punimeve, komisioni i Medias është përfshirë në një debat të gjatë lidhur me reklamën shtetërore. Kryetarja e komisionit, Valentina Leskaj, duke iu referuar këtij problemi ka theksuar se ai kërkon një vëmendje të madhe pasi shpërndarja e reklamave ndikon direkt në lirinë e medias. “Duhet të kërkojmë informacion, jo nga perspektiva ekonomike, që me të drejtë e përmendët, por se kur mediat vihen në mënyrë të pabarabartë në treg, cenohet pra liria e medias”, – tha Leskaj. Ndërkohë që deputeti Alfred Dalipi kërkoi që të bëhen publike të gjitha procedurat për shpërndarjen e reklamave në mediat shqiptare, në një kohë që sipas tij kriteri kryesor është shikueshmëria. “Unë dëshiroj që komisioni të kërkojë zyrtarisht pranë këtyre tri ministrive informacion zyrtar, që ne të kemi në dorë mundësisht të gjitha praktikat e përdorura nga këto ministri lidhur me fondet qeveritare që janë përdorur për reklamimin e mediave, përzgjedhjen që u bëhet këtyre mediave nga këto dikastere”, – tha Dalipi. Sipas tij, nëse gjatë këtij hulumtimi konstatohen abuzime, duhet të ngrihet një komision hetimor për këtë çështje. “Nëse unë do të kem dokumentacionin e duhur, do të më çojë në një ushtrim të funksionit tim si parlamentar, ngritjen e një komisioni hetimor lidhur me përdorimin e këtyre fondeve dhe me shpërndarjen e tyre. Tani po i kërkoj zyrtarisht se shifrat janë të frikshme dhe alokimi e shpërndarja që është bërë, është e pabarabartë”, – tha Dalipi. Por deputeti Mark Marku tha se nuk është detyrë e këtij komisioni të hetojë dhe nëse ka shkelje, pasi operatorët mediatikë duhet t’u drejtohen organeve të caktuara. “Procedurat e dhënies së reklamës janë të përcaktuara me ligj dhe në momentin kur verifikohen shkelje ligjore, çdo institucion mediatik ka të drejtë të ankimohet dhe t’u drejtohet institucioneve, prokurorisë, gjykatës etj. Ne po shndërrohemi në gjykatë, nuk jemi gjykatë, çdo deputet ka të drejtë të kërkojë informacion, le ta kërkojë, por nuk merremi ne me mënyrën se si institucionet shtetërore shpërndajnë buxhetin e tyre. Kjo është një çështje që e përcakton ligji, nuk e përcaktojmë ne”, – tha Marku. Në fund votimi nuk u realizua sepse deputetët e mazhorancës nuk ishin prezentë duke mos realizuar kuorumin e nevojshëm, ndërkohë që kishin kërkuar pushim për të marrë vendim.
Shalsi
Ndërkohë nga selia rozë, deputeti socialist Eduard Shalsi ka vijuar denoncimin e tij lidhur me heshtjen e Kryeministrit përballë atij që cilësohet si skandali i reklamave shtetërore. Sipas tij, Kryeministri që ka detyrimin ligjor të japë shpjegime për këto abuzime, vazhdon të heshtë. Shalsi ka shprehur vendosmërinë e Partisë Socialiste për t’i shkuar deri në fund zbardhjes së kësaj çështjeje dhe ka siguruar se në ditët në vijim do të ketë denoncime edhe për ministri të tjera, që kanë shpenzuar sipas tij në mënyrë klienteliste të ardhurat e buxhetit.
MAPO
Përgjigju Duke Cituar
Krijoni Kontakt