Gjendet shëndosh fëmija i rrëmbyer Zatriqi

[ARIANI_TB]

Prishtinë, 3 mars - Zyra për informim e Policisë së Kosovës para pak çastesh njoftoi se është gjetur fëmija i rrëmbyer 5-vjeçar i familjes Zatriqi. Ai i është kthyer familjes dhe gjendja shëndetësore e tij është e mirë, thuhet në njoftim, por shtohet se për shkak të natyrës së ndjeshme të rastit tash për tash nuk mund të bëhen publike detajet e hetimeve. Fëmija i Skender dhe Violeta Zatriqit, që të dy mjekë me profesion, ishte rrëmbyer rreth orës 7 e 30 minuta të mëngjesit të së enjtes në rrugën “Hilmi Rakovica” në Prishtinë.
Sipas informatave të para fëmija ishte rrëmbyer nga një person i moshës madhore derisa po flinte në dhomën e tij të gjumit. Me këtë rast rrëmbyesi e kishte rrahur nënën e fëmijës.

[Prometeu2]

Shkrim i botuar ne KD me date 11.03.2011

Rrëmbyesit e fëmijës kishin kërkuar 100.000 euro

Prishtinë, 11 mars – Derisa po shijonte gjumin e mëngjesit, krejt afër së ëmës, Y. Zatriqi, pesë vjeç, ishte gjetur në duart e një rrëmbyesi.
Nga ai nuk kishte mundur ta ndante as e ëma Violeta, ndonëse kishte përdorur të vetmin mjet që kishte në atë moment – thonjtë, me të cilët ia kishte shqyer fytyrën rrëmbyesit, derisa kishte përfunduar pa ndjenja në tokë krejt e gjakosur. Tashmë i papenguar më nga askush dhe me fëmijën në dorë, rrëmbyesi Bashkim M. kishte dalë nga shtëpia për të hipur në veturë, në të cilën po e priste shoku i tij, Valon H.
Të veshur vetëm me pizhame dhe krejt i zbathur, pesëvjeçarin tashmë dy burra po e largonin nga familja në drejtim të panjohur, duke shpresuar të bënin pazar në këmbim të jetës së tij. Pa ushqim e pa terapinë e rregullt mjekësore, Y. Zatriqi ishte mbajtur nga dy rrëmbyesit nga ora 7:30 deri në orën 16:00, kur edhe ishte lënë i lirë si rezultat i pamundësisë së rrëmbyesve për të dalë nga Prishtina, për shkak të postblloqeve të shumta që ishin vënë nga Policia e Kosovës.
Një javë më vonë, dy rrëmbyesve të fëmijës, Gjykata e Qarkut në Prishtinë ua ka caktuar të enjten nga një muaj paraburgim nën akuzën se kanë kryer katër vepra penale të rrëmbimit në bashkëkryerje, lëndim i lehtë trupor, detyrim në tentativë dhe armëmbajtje pa leje.
Valon H. (1980) i lindur në Istog, me vendbanim afër shtëpisë së familjes Zatriqi, në rrugën “Hilmi Rakovica” në Prishtinë, baba i tre fëmijëve, me profesion farmacist, dhe Bashkim M., (1982) nga Vrella e Istogut, tashmë janë vënë prapa grilave për rrëmbimin e fëmijës së kirurgut Skënder Zatriqi të enjten e kaluar. Rrëmbimin e kishin kryer me qëllim të përfitimit financiar në vlerë të paktën 50 mijë euro.
Policia të enjten ka dorëzuar në Prokurorinë e Qarkut në Prishtinë kallëzimin penal një kopje të të cilit e ka siguruar “Koha Ditore” kundër dy të dyshuarve. Në bazë të këtij kallëzimi Gjykata u ka caktuar paraburgimin sipas kërkesës së prokurores, Fikrije Krasniqi. Në të përshkruhet e gjithë ngjarja nga dita e rrëmbimit të fëmijës deri ditën e arrestimit të të dyshuarve.
Farmacisti Valon H., është një ndër fqinjët e parë të familjes Zatriqi. Ai kishte për qëllim që të përfitonte materialisht, e për ta arritur këtë kishte zgjedhur që të rrëmbente fëmijën e vetëm të çiftit të kirurgëve Zatriqi.
Të enjten e kaluar, rreth orës 7 e 30 në shtëpinë e familjes Zatriqi në Prishtinë kishte hyrë Bashkim M., posa e kishte parë se nga shtëpia kishte dalë Skënder Zatriqi. Ai ishte ngjitur në katin e dytë të shtëpisë në një nga dhomat e gjumit ku po flinte djali pesë vjeç në shtratin e tij të vogël. Në shtratin tjetër ndodhej edhe e ëma, e cila kur i kishte hapur sytë e kishte parë së në dhomë ndodhej një person krejt i panjohur. E ëma Violeta kishte reaguar fillimisht duke i thënë: “Çka po lyp ti, kush je?” Mysafiri i paftuar i ishte përgjigjur duke ia tërhequr vërejtjen që të mos fliste, duke e çuar dorën në brez ku dyshohet se ka pasur armë me qëllim kërcënimi.
Sipas dëshmive të Violetës, pa vonuar shumë Bashkim M., kishte tentuar ta rrëmbente djalin, mirëpo ishte ballafaquar me rezistencën e së ëmës së tij, e cila fillimisht i kishte hedhur një batanije në kokë, e pastaj ia kishte futur thonjtë në fytyrë, duke i shkaktuar gërvishtje të dukshme. Mirëpo, ai ishte kundërpërgjigjur, duke e goditur gruan e cila po luftonte e vetme për ta shpëtuar të birin, me goditje të forta në kokë me një mjet që dyshohet të ketë qenë shufër metalike. Pasi e kishte alivanosur gruan, Bashkimi kishte rrëmbyer djalin në krah, kishte dalë nga shtëpia për t’u futur në veturën “Mercedes” të klasës E. Aty po e priste shoku i tij, Valon H., i cili është edhe pronar i veturës. Me të hipur në të, ata largohen në drejtim të qendrës së qytetit.

Nisja e hetimeve

Posa kishte marrë pak veten, mjekja Violeta Zatriqi kishte alarmuar fqinjët dhe kishte thirrur policinë, duke njoftuar për rrëmbimin e të birit. Policia ishte aktivizuar duke angazhuar njësi policore të specializuara në terren për të bllokuar hyrje-daljet e qytetit Prishtinës dhe për të kontrolluar veturat. Duke e parë gjithë këtë “rrethim” dhe pamundësinë për të dalë nga qyteti, Valon H. e Bashkim M. ishin ndalur në parkingun te “Santeja” në Prishtinë. Pas parkimit të veturës, të dyshuarit kishin mbuluar veturën me një mbulesë. Për disa orë në të kishte qëndruar Bashkimi dhe djali i rrëmbyer deri rreth orës 16:00.
Sipas kallëzimit penal, të dyshuarit, duke parë se nuk kishin mundësi të largimit, e kishin hedhur fëmijën nga vetura në tokë, duke e lënë të shtrirë, të zbathur e të veshur vetëm me pizhame, ndonëse temperaturat ishin nën minus pesë gradë. Ata ia kishin mbathur në drejtim të panjohur, derisa fëmija i mërdhirë e i traumatizuar kishte ecur rreth 200 metra zbathur dhe kishte takuar dy persona, nga të cilët kishte kërkuar ndihmë. Më ta gjetur djalin në këtë gjendje, qytetarët kishin njoftuar policinë, e cila sapo e kishte identifikuar djalin e kishte dërguar te prindërit e tij, të cilët si mjek me profesion i kishin ofruar ndihmë mjekësore, derisa vërehej se kishte probleme shëndetësore.
Pas gjetjes gjallë të djalit të rrëmbyer, Policia tashmë ishte e fokusuar vetëm në zbulimin dhe kapjen e autorëve. Pasi kishin bërë planin operativ në konsultim me prokuroren, Fikrije Krasniqi, policia kishte nisur grumbullimin e informatave të nevojshme. Fillimisht, organet e rendit kanë siguruar pamjet e kamerave të ndryshme në qytet përfshirë edhe nga ato të sigurisë së banesës së kryeministrit Hashim Thaçi, i cili jeton jo më shumë se 50 metra nga familja Zatriqi. Si rezultat i filmimeve policia arrin të sigurojë dëshmi se në rast janë të përfshirë të paktën dy persona, duke identifikuar edhe veturën “Mercedes” ngjyrë hiri metalike, e cila para se të ndodhte rrëmbimi kishte qarkulluar tri herë rreth shtëpisë së viktimës, ndërsa në kohën e rrëmbimit ishte parkuar afër shtëpisë. Në ato pamje të kamerave shihet Bashkim M., duke hyrë në shtëpi dhe duke dalë nga ajo me fëmijën në dorë për t’u futur në veturë e për t’u larguar nga aty.
Me leje të prokurores, Policia, po ashtu, kishte aplikuar masat e fshehta ndaj numrave të telefonit të familjarëve të viktimës me qëllim të sigurimit të provave, duke e ditur se të dyshuarit do të kontaktonin me familjarët. Dy ditë pas rrëmbimit, më 5 mars, të dyshuarit i kishin dërguar një mesazh nga një numër i Maqedonisë në numrin e Violetë Zatriqit, duke i kërkuar 50 mijë euro. Ata po i jepnin edhe afat që të nesërmen në orën 19:00 duhej t’ua dërgonte paratë te Stacioni i trenit në Pejë, në të kundërtën kamata do të dyfishohej në 100 mijë euro, ose djali do të rrëmbehej prapë dhe do t’i vritej. Ata shkruanin se nëse nuk e bënin këtë, djali i tyre “do t’u dërgohej në qese të zezë copë-copë”.
Me autorizim të Policisë, e cila edhe po e siguronte 24 orë familjen Zatriqi, Violeta po u përgjigjej këtyre mesazheve kërcënuese duke kërkuar kohë për pagesën dhe duke kërkuar që afati të shtyhej pasi nuk i kishin paratë. Më 6 mars në orën 21 e 52 paratë ishin dërguar në vendin e caktuar, rrëmbyesit kishin dërguar një mesazh tjetër po nga numri i Maqedonisë në telefonin e Violetës, duke i thënë se tashmë duhej të paguante 100 mijë euro, sepse, sipas tyre afati kishte kaluar. Ata urdhëronin që pagesa të bëhej menjëherë, duke ia përsëritur fjalët kërcënuese, duke tentuar që me çdo kusht që këtë familje ta mbanin në ankth me qëllim që të bëhej pagesa e kërkuar më së largu të premten.

Kontakti me autoritetet maqedonase

Policia e Kosovës kishte vënë kontakte me autoritetet maqedonase për të kërkuar të dhëna se në emër të kujt ishte i regjistruar numri i telefonit + 38970642672. Informacionet që kishin marrë tregonin se numri fillimisht ishte aktivizuar në Maqedoni e pas orës 15:00 kishte hyrë në Kosovë. Kjo gjë është arritur të verifikohet dhe ishte konstatuar se i dyshuari Valon H. në orën 15:24 më 5 mars kishte hyrë nga Maqedonia në Kosovë përmes pikës kufitare në Glloboçicë. Pasi ishte marrë leja nga prokurorja Krasniqi që të kontaktohet me organet maqedonase, ishte identifikuar numri serik i aparatit të celularit IMEL-354351044976120, në të cilin ishte futur sim kartela e Maqedonisë. Si rezultat i aplikimit të masave të fshehta ishin siguruar transkriptet e të dyshuarit. Në bazë të pamjeve të kamerave të siguruara më parë ishte identifikuar një veturë, e cila besohej se ishte pikërisht ajo me të cilën ishte transportuar 5-vjeçari. Pronar i veturës ishte Valon H.. Duke i analizuar të dhënat e siguruara nga masat e fshehta dhe duke analizuar pozicionin e antenave që shfrytëzoheshin nga numri i telefonit të Maqedonisë nga dy pozicione, ajo e banesës së tij dhe vendin ku punonte në Lypjan në barnatore, ishte konstatuar vendndodhja dhe lëvizja e Valon H.. Më 8 mars Policia kishte organizuar një operacion rreth orës 14:00, duke shkuar në barnatoren e Valonit në Lypjan, ku edhe e kishin arrestuar. Në xhepin e tij i ishte gjetur sim kartela e Maqedonisë, nga e cila ishin dërguar mesazhet telefonike, ndaras nga aparati telefonik, i cili ishte gjetur në tavolinë dhe që përputhej numri i tij serik, siç kishin raportuar autoritetet maqedonase, në të cilin ishte futur kartela. Policia kishte futur këtë kartelë në telefon dhe kishte dalë se të dhënat përputheshin si me numër telefoni, ashtu edhe me numër serik. Në kartelë është gjetur edhe mesazhi telefonik i dërguar nga Violeta. Gjatë kontrollit të barnatores, Policia kishte gjetur dhe konfiskuar dy pistoleta, një thikë ushtarake, dy telefona tjerë celularë me kartela, një lap-top dhe vetura “Mercedes E 320”. Njëkohësisht ishte bërë edhe kontrollimi i shtëpisë në Prishtinë, ku ishin gjetur 57 fishekë kalibrash të ndryshëm.
I rënë në duar të Policisë, Valon H. kishte pranuar se e kishte rrëmbyer Y. Zatriqin bashkë me Bashkim M., i cili në atë moment gjendej në Pejë. Me udhëzim të Policisë i dyshuari kishte kontaktuar shokun e tij Bashkimin dhe kishte lënë takim në Pejë në parkingun e një qendre tregtare, ku edhe ishte arrestuar. Pasi janë intervistuar, Valon H. është mbrojtur në heshtje, ndërsa Bashkim M. e ka pranuar se i ka kryer veprat penale. Nga dita e enjte ata ndodhen në paraburgim në pritje të ngritjes së aktakuzës dhe fillimit të gjykimit.