TEMA ONLINE, 1 Shkurt, 2012
Sikleti i Lulëzim Bashës në Uashington
Nga Mero Baze
Lulëzim Basha zbuloi atë që e kuptuam pa folur një ditë më parë. Pas takimit të tij me Zëvendësndihmësin e Sekretarit të Shtetit, Philip Reeker, ai iu referua vetëm profilit të tij si bashkiak, ndërsa zoti Reeker iu referua vetëm faktit që zoti Basha ishte aty dhe ai e kishte takuar. Por gjatë intervistës tek Zëri i Amerikës Lulëzim Basha zbulon jo dhe aq padashje të vërtetën e hidhur. Paskëshin folur për peshën që 21 Janari ka në të ardhmen perëndimore të Shqipërisë dhe sidomos në plotësimin e 12 kritereve të Bashkimit Evropian!!! Gjuha e spërdredhur e Bashës dhe përpjekja për të quajtur viktima të pafajshme katër qytetarët e vrarë më 21 janar, në diferencë nga vlerësimi si “kokëpalarë” që u ka bërë Berisha dhe Meta, shpjegon qartë atë çfarë Lulëzim Basha ka dëgjuar në Uashington për të ardhmen e qeverisë shqiptare.
Por a ka fuqinë e lajmësit ky njeri?
Jo, dhe jo tërësisht për faj të tij. Nga natyra e tij servile dhe gënjeshtare, ai natyrisht që nuk e transmeton lajmin në gjithë ngjyrat që e merr në Uashington dhe as ndikon dot tek Berisha për ta kthyer në axhendë pune. Por më shumë se sa tek veset e tij, problemi qëndron tek veset e Berishës. Berisha është aq i stërvitur me Uashingtonin, sa problemin më të madh që ka është se nuk do të dëgjojë mesazhe sy më sy, pasi ka aftësinë që t’i lexojë ato dhe pa i dëgjuar. Një nga arsyet përse ai i mbylli derën në vitin 1996 Ndihmës/sekretarit Amerikan të Shtetit, Timothy Worth, ishte pikërisht pasi e dinte çfarë do t’i thoshte. Kjo situatë e rëndon atë psikologjikisht dhe në të tilla raste ai bën gjithçka që lajmësi të mos mbërrijë kurrë në zyrën e tij.
Dhe për t’ia bërë më të lehtë Bashës mospërcjelljen e porosisë në zyrën e tij, ai doli dje përmes zëdhënëses së vet për të çuar në ekstrem qëndrimin ndaj kryeprokurores, ekspertizës së FBI, dhe opozitës. Ai shpalli armiqësore ekspertizën që konsideron se vrasjet janë bërë me dashje dhe akuzoi Ina Ramën se për intervistën televizive ishte konsultuar me Edi Ramën. Kjo bëhej pak orë më parë, pasi Arvizu do të merrte realisht përsipër se ishte konsultuar ai me kryeprokuroren dhe Fevziun për intervistën, dhe është ai që mbron ekspertizën e SHBA për 21 janarin. Duke e ditur fare qartë këtë situatë, Berisha doli publikisht për të bërë bashkë jo Edi Ramën me Ina Ramën, por Arvizunë me opozitën shqiptare, dhe për të delegjitimuar ekspertizën e FBI dhe rekomandimet politike të Uashingtonit.
Nxitimi i tij për të nxjerrë zëdhënësen pikërisht për të kundërtën e atyre që ai pret t’i sjellë Lulëzim Basha nga Uashingtoni dhe ambasadori i SHBA nga Tirana, është mënyra se si Berisha i mbyll derën problemit, është mënyra se si ai nuk ballafaqohet me të, por me pasojat e çuarjes në ekstrem të krizës.
Kolegu im, Mustafa Nano, mendon se Basha ka ndryshuar gjuhën nga presioni i Uashingtonit, të tjerë dyshojnë se ai bën lojë. Në fakt ai thjesht nuk di ç’të bëjë. Nuk është duke bërë as lojë dhe as ndonjë punë për Berishën. Si një njeri që nga Berisha ka përfituar vetëm privilegje, para dhe pushtet, ai është tani në udhëkryqin e tij të parë, pasi duhet të zgjedhë mes asaj që ai shikon në Uashington dhe asaj që ka prodhuar pushteti i tij dhe Berishës në Tiranë. Nuk duhet të kemi iluzione se kemi të bëjmë me dikë që po mendohet si të tradhtojë Berishën, por kemi të bëjmë me një kanakar që nuk ka provuar të menaxhojë krizat e Berishës, por vetëm të vjelë pushtetin e tij.
Është torturë e madhe t’i kërkosh sot Lulëzim Bashës se pse flet ashtu si foli dhe akoma më torturë e madhe ta pyesësh se çfarë duhet të bësh në këtë rast. Ai është në hallin e tij të parë të madh, pasi nuk di kujt t’ia thotë ato që ka dëgjuar. Në fillim vendosi të mos ia thotë askujt, pastaj u detyrua t’i thotë me gjysëm zëri tek Zëri i Amerikës… Por më tej mos prisni. Për të mos ia hapur fare atë bisedë, Berisha i tregoi nga Tirana se si duhet të flasë në këto raste. “Ndrea Prendi është një hero që ka hedhur në Lanë ëndrrën e Edi Ramës për karrige”, “ata që thonë se gardistët janë vrasës (e ka thënë FBI) janë njerëz të Edi Ramës”.
Natyrisht Lulëzim Basha kishte folur ndërkohë që Berisha i tregoi si duhet folur. Edhe ambasadori Arvizu e kishte paranjoftuar që do mbronte kryeprokuroren. Ndaj Berisha thjesht dëshiron të lërë larg derës së tij këto zëra. Ai nuk do të dëgjojë asgjë që nuk dëshiron. Mesazhet e Uashingtonit, përcjellë në zarf me dyllë përmes Bashës, kanë për të mbetur në duart e Lulëzim Bashës. Nëse guxon të bisedojë me Berishën për këtë çështje, do të prishet me të dhe ai këtë nuk e bën kurrë. Edhe kaq ka rrezikuar shumë. Ka dëgjuar që Atë nuk e duan. Po të mendosh se rrotull tij ka shumë njerëz që nuk duan të dëgjojnë asgjë të keqe për të, ose të tjerë si Topalli që dhe kur dëgjon “ua përplas në fytyrë”, duhet të mendojmë se Lulëzim Bashës do t’i duhet shumë punë të rikuperojë gabimin që ka dëgjuar fjalë të pahijshme për Atë. Aq servil dhe i përulur sa është, besoj se do t’ia arrijë.
Përgjigju Duke Cituar
Postuar më parë nga Duaje Siveten
Krijoni Kontakt