Rruga e Kombit, pa mbikalime e nënkalime

[OPARI]

Rruga e Obotit, në mëshirë të fatit
Autostrada miliardëshe ka ndarë fshatarët nga tokat dhe qytetarët nga liqeni
Në segmentin e autostradës Fushë-Dukagjin – Kukës – Morinë, me gjatësi 23 km, ka nisur prej disa ditësh ndërtimi i trafik-ndarëseve dhe disa elementëve të sinjalistikës.

Këto punime janë një projekt më vete dhe përbëjnë masën e domosdoshme të sigurisë, pasi pikërisht mungesa e ndarëseve si dhe të mbrojtëseve anës rrugës, ka bërë që në këtë pjesë të autostradës të këtë shumë aksidente ku nuk kanë munguar edhe viktimat.

Specialistët që po kryejnë punimet thonë se, ky proces do të përfundojë më 10 mars dhe se ndarëset rrisin sigurinë për përdoruesit e rrugës.

Autostrada shtrihet tërësisht në zona të banuara, që në periferi të Kukësit e deri në Morinë, ku ndërtuesit janë detyruar të lënë shumë hapësira që nuk lejohen nga kodi rrugor. Shumë hyrje e dalje janë improvizuar nga vetë vozitësit, nga rrugët rurale në autostradë.

Banorët e zonës përgjatë autostradës kanë ngritur shqetësimin e mungesës së mbi dhe nënkalimeve. Në periferi të qytetit kanë mbetur jashtë lidhjes me qendrën administrative dhe me tregun, shumë fshatra. Disa banorë të Gostilit në Kukës tregojnë se, për më tepër ende nuk janë dëmshpërblyer për pronën e zënë nga rruga, ndërsa askush nuk ka menduar të bëjë të paktën një mbikalim për bllokun e banesave që mbeten përtej.

Në zona të tjera, qindra banorë kalojnë përmes korsive të autostradës duke rrezikuar seriozisht jetën e tyre. Por, në këtë segment mungojnë gati kudo mbikalimet apo nënkalimet që rrugët e tjera të lidhen me autostradën. Edhe vetë qyteti i Kukësit nuk ka një rreth-rrotullim funksional për të hyrë në autostradë dhe për të dalë prej saj. Rruga e re ka lënë të izoluar bregun e liqenit dhe kurorën e gjelbër të qytetit.

Kryetari i Bashkisë së Kukësit, Hasan Halili thotë se është i shqetësuar për këtë fakt, dhe sipas tij autostrada do të ketë sërish punime të tjera, ku ai renditi disa mbikalime, sinjalistikën, vendet e parkimit etj.

Situata është edhe më e rëndë në Komunën Tërthore, me fshatrat Përbreg, Gjegjan, Bardhoc dhe Morinë, ku hyrja në autostradë, edhe më tej pas montimit të trafik-ndarëseve, vazhdon të bëhet në mënyrë të parregullt. Po ashtu, kalimi nga një trase në tjetrën bëhet në korridoret e lëna pa trafik-ndarëse brenda trupit të rrugës. Duke qenë se autostrada kalon përmes fshatrave, i ka izoluar këta të fundit nga kullotat, pyjet, tokat bujqësore dhe varrezat. Nuk kanë qenë të rralla rastet kur për të kryer punët e tyre të përditshme, banorëve u është dashur të kapërcejnë autostradën dhe kanë pësuar aksidente.

Vetëm në këtë segment të autostradës, brenda një viti janë shënuar të paktën 10 aksidente me tre të vdekur dhe 20 të plagosur.

Drejtori i Rrugëve Rajonale në Kukës, Arben Basha thotë se edhe më herët, gjatë takimeve me projektuesit është trajtuar edhe çështja e mbikalimeve dhe nënkalimeve si dhe problemi i rreth-rrotullimit në hyrjen e Kukësit, që siç tha ai, ka mbetur i mangët.

“Komuniteti i zonave të banuara dhe pushteti vendor e kanë ngritur zërin për nevojën e ndërtimit të këtyre nyjave integruese me autostradën dhe mesa jemi të informuar, në Drejtorinë e Përgjithshme të Rrugëve ka një projekt të caktuar me të cilin ende nuk jemi njohur”, - tha ai.