Komisionet parlamentare nisin diskutimin e ligjit për shërbimin e detyruar ushtarak
Kuvendi do rikthejë zborin
Rezervistët, do stërviten një javë në vit
--------------------------------------------------------------------------------
Erl Murati
TIRANE
Shërbimi ushtarak në rezervë apo zbori do të jetë i detyrueshëm për çdo person që ka mbushur moshën 19 vjeç. Katër deri në shtatë ditë në vit secili shtetas do të kthehet në ushtar. Ky projekt po shqyrtohet këto ditë në Komisionin parlamentar të Ligjeve dhe do të miratohet javën e ardhshme në Kuvend.
Kohëzgjatja e shërbimit të detyrueshëm ushtarak do të vazhdojë të jetë 12 muaj. Çdo shtetas shqiptar, nga 19 deri në 27 vjeç, është i detyruar me ligj që për një vit të kryejë shërbimin ushtarak. Kush refuzon ta bëjë këtë, herën e parë do të marrë një gjobë nga 3 mijë deri në 30 mijë lekë dhe, nëse e përsërit refuzimin, atëherë do të procedohet penalisht.
Afati
Anëtarët e komisionit të ligjeve, Arian Starova dhe Taulant Dedja, propozuan dje që shërbimi ushtarak të ulet nga 12 në 9 apo 10 muaj. Por këto propozime u hodhën poshtë nga komisioni, me shumicë votash. "Ju po ktheni zborin, kështu. Të hiqet zbori ushtarak", iu drejtua Dedja komisionit të ligjeve. Një pjesë e komisionit ishte kundër shërbimit në rezervë apo zborit, që i detyron shtetasit që çdo vit të kthehen në ushtarë nga katër deri në shtatë ditë. Por specialistët shpjeguan se miratimi i këtij projekti është një nga objektivat kryesorë të matricës së integrimit të Shqipërisë në NATO. Sipas tyre, çdo mashkull deri në moshën 50 vjeç dhe çdo femër deri në moshën 35 vjeç do t'i rikthehet zborit ushtarak.
Detyrimi
Sipas projektligjit që po shqyrtohet në Kuvend, secili shtetas është i detyruar që, kur mbush 17 vjeç, të paraqitet për t'u marrë në evidencë ushtarake dhe për një kontroll fizik e shëndetësor. Në rast se një qytetar kur thirret ushtar është në një punë çfarëdo, atëherë pas një viti punëdhënësi, qoftë privat apo shtetëror, është i detyruar ta rikthejë atë në vendin e punës. Ligji parashikon që, në rast mobilizimi, thirren ushtarë edhe të rinjtë e moshës 18 vjeç. Ky ligj i ri është pjesë e strategjisë për të reformuar Forcat e Armatosura dhe parashikon që deri në vitin 2010 katër mijë ushtarë të jenë me pagesë.
gazeta shqiptare
Krijoni Kontakt