Kuvendi i Kosovës 2011

[gimche]

AKR;

Behxhet Pacolli,

Ferid Agani,

Mimoza Kusari-Lila,

Agim Çeku,

Muhamet Mustafa,

Ibrahim Makolli,

Myzejene Selmani,

Sevdije Lama.

Në radhë të parë Koalicioni për Kosovë të Re dhe jo AKR.
E dyta, keta deputetet e selektuar do t'ua lëshojnë vendin e tyre deputetëve të rinj. Amir Ahmeti (PD), Jeton Svirca (PD), Gëzim Kelmendi (PD) dhe Suzana Novobërdaliu (AKR).

[Dar_di]

Në radhë të parë Koalicioni për Kosovë të Re dhe jo AKR.
E dyta, keta deputetet e selektuar do t'ua lëshojnë vendin e tyre deputetëve të rinj. Amir Ahmeti (PD), Jeton Svirca (PD), Gëzim Kelmendi (PD) dhe Suzana Novobërdaliu (AKR).

AKR është subjekti më i madh politik që i prinë këtij koalicioni prandaj, duke u bazuar në këtë pikë, janë përfshirë edhe deputetët e tjerë të subjekteve politike më të vogla. Pranohet që ky koalicion njihet si "Kosova e re".

Me gjithë shpejgimin e dytë që keni dhënë, reflektohet që mbase nuk e keni lexuar temën në fjalë, sepse ka kohë që ky informacion është sjellur në këtë temë, madje që në ditën kur është marrë ky vendim i prurjeve të reja të deputetëve, sipas radhitjes së votave që kanë marrë në zgjedhje.

Gjithë të mirat!

Dar_di

[Dar_di]

Një minutë heshtje për pilotët e vrarë amerikanë

Seanca e sotme e Kuvendit të Republikës së Kosovës, dënoi ashpër aktin e djeshëm të vrasjes së dy pilotëve ushtarakë amerikanë në aeroportin e Frankfurtit nga Arid Uka. Në emë të deputetëve, kryekuvendari Jakup Krasniqi u shprehu ngushëllimet më të thella popullit amerikan dhe familjeve të pilotëve të vrarë. Deputetët pastaj nderuan me një minutë heshtje dy viktimat e aktit të çmendur të kosovarit Uka në Frankfurt.


Miratohet buxheti për mars, sigurohen rrogat

Parlamenti i Kosovës ka miratuar në seancën e sotme kërkesën Qeverisë për buxhetin e muajit mars, me çka mundësohet dhënia e rrogave shërbuesve civilë për këtë muaj.

Propozimi i qeverisë për miratim të këtij mini-buxheti ka marrë edhe votat e deputetëve opozitarë, megjithë vërejtjet e tyre. Kryetari i Grupit parlamentar të AAK-së, Ardian Gjini tha se mënyra se si u propozua ky projektbuxhet tregon se qeveria e Thaçit po mundohet të fshehë dështimet për rritjen e rrogave, ashtu siç kishte premtuar.

Kryeministri Thaçi, ndërkaq, tha se mosdhënia e rrogave është “rezultat i zvarritjeve të procesit zgjedhor nga ata që kërkuan përsëritje të votimeve”.

Aleanca Kosova e Re gjatë këtyre punimeve kërkoi që të ndryshojë procesverbali i seancës, kur është votuar qeveria e re. Ibrahim Makolli kërkoi që vota e Pacollit të shpallet e pavlefshme. Por një gjë e tillë nuk u miratua nga deputetët.

Seanca e sotme ndër më të shkurtat e Kuvendit të Kosovës përfundoi me informatën e kryeministrit Thaçi për fillimin e procesit negociator me Serbinë dhe kërkesën e tij drejtuar deputetëve, shoqërisë civile dhe individëve të tjerë që të japin kontributin e tyre në këtë proces, si dhe me leximin e emrave të deputetëve të rinj, të cilët do të zënë vend në ulëset e parlamentit në vend të deputetëve të zgjedhur në poste ministrore, të cilët është dashur të heqin dorë nga mandati i deputetit.

KOHA Ditore

[Dar_di]

Kuvendi miraton rezolutën pa opozitën

Me 63 vota pro, 48 kundër dhe 1 abstenim, Kuvendi ka miratuar rezolutën për bisedimet me Serbinë. Rezoluta është miratuar pa mbështetjen e opozitës.Gjatë paradites Grupet Parlamentare nuk arritën të harmonizojnë tekstin e rezolutës lidhur me bisedimet Kosovë - Serbi dhe mandej është zhvilluar një debat në seancën e sotme të Kuvendit, ku deputetët e pozitës dhe opozitës kanë shfaqur qëndrimet e tyre lidhur me bisedimet. Në emër të PDK-së, si propozuese e rezolutës, deputeti Adem Grabovci tha se dy takime me opozitën kanë dështuar që të rezultojnë me harmonizimin e tekstit të saj, ndaj u kërkua nga Kuvendi që të votohet versioni i propozuar nga PDK-ja. Paraprakisht, deputeti i AAK-së, Daut Haradinaj, e cilësoi këtë dialog të dëmshëm për Kosovën. Po ashtu, edhe Visar Ymeri i Vetëvendosjes u pozicionua kundër bisedimeve. Edhe grupi më i madh opozitar, ai i LDK-së, nuk e ka mbështetur rezolutën, pasi në tekstin e saj nuk janë përfshirë propozimet e kësaj partie politike.

Rezoluta u tha se do t'i japë një rol shtesë Kuvendit në mbikëqyrjen e procesit të filluar të bisedimeve ndërmjet Qeverisë së Kosovës dhe asaj të Serbisë.

Në seancën e sotme është miratuar vendimi për formimin e komisioneve parlamentare, ndërsa është ngritur edhe çështja e vrasjes së Leutrim Musliut nga Uglari i Gjilanit, me ç’rast është kërkuar zbardhja sa më e shpejtë e rastit.

KOSOVA SOT

[Dar_di]

Opozita e pozita përplasen për buxhetin

Kuvendi i Kosovës, në seancën plenare të së premtes, ka filluar debatin për Projektligjin për Buxhetin e vitit 2011, në të cilin përfshihet edhe ngritja e pagave. Projektbuxheti është paraqitur para ligjvënësve nga kryeministri Hashim Thaçi, ndërsa ministri i Financave, Bedri Hamza, e ka arsyetuar dhe ka dhënë më shumë detaje rreth ndarjeve buxhetore.

Kryeministri Hashim Thaçi ka ftuar deputetët të votojnë buxhetin, që sipas tij, do të tejkalonte prapambetjen shekullore, pasi siç tha ai punëtorët në Kosovë deri më tash kanë marrë ndihma sociale dhe jo paga.

“Përsëris punëtorët e Kosovës, nuk kanë pasur paga, deri tash janë shërbyer me ndihma sociale prandaj ne bashkërisht duhet ta ndryshojmë këtë gjendje”, ka thënë Thaçi. Projektligji, në vete përmban edhe privatizimin e Postë-Telekomit, gjë që pritet të kundërshtohet nga opozita.

Komisionit Parlamentar për Legjislacion dhe Gjyqësi, në mbledhjen e të mërkurës, ka marrë vendim të rekomandojë heqjen e nenit 4 nga drafti i Ligjit për Buxhet, ngase sipas tyre marrja e aprovimit në këtë formë është në kundërshtim me frymën kushtetuese dhe ligjet në fuqi të vendit.

Deputeti i Partisë Demokratike të Kosovës, Halit Krasniqi, ka kërkuar që të diskutohet për arrestimin e nëntë ish-pjesëtarëve të Ushtrisë Çlirimtare të Kosovës në komunën e Malishevës dhe lëshimin e fletarrestit për deputetin Fatmir Limaj. Krasniqi ka paraqitur para deputetëve të dhëna për luftën, masakrat dhe dëmet që janë shkaktuar në komunën e Malishevës.

Ndërkaq, Liburn Aliu nga Lëvizja Vetëvendosje, ka thënë se për t'u ndaluar persekutimi i ish-pjesëtarëve të UÇK-së, duhet të ndryshohet Kushtetuta e Kosovës.

Kryeparlamentarit Jakup Krasniqi i është dashur disa herë t'u ndërhyje deputetëve që mos ta zgjasin fjalën e tyre, ngase edhe deklarimet e deputetëve ishin jashtë rendit të ditës dhe për këtë edhe deputeti i LDK-së, Sabri Hamiti i ka bërë vërejtje kryeparlamentarit Krasniqi.

"Po shkelet Rregullorja e punës së Kuvendit, të cilën ju u përpoqet ta arsyetoni, por në rast se Kryesia në bashkëpunim me grupet parlamentare ka diskutuar dhe është marrë vesh që meqenëse ekziston një pikë e rendit të ditës, është vendosur që nuk ka deklarime jashtë rendit të ditës, nuk ka pyetje parlamentare, është dashur t'u thoni deputetëve që nuk mund të deklarohen", ka thënë Hamiti.

Deputeti i PDK-së Berat Buzhala ka kritikuar kritikuesit e buxhetit, e në veçnati ata që sipas tij janë kundër ngitjes së pagave.

Mirëpo, Naser Osmani nga radhët e Lidhjes Demokratike të Kosovës pohoi se ky Projektbuxhet është i bazuar në interesa të ngushta politike, dhe pa interes zhvillimor.

Sipas tij, ky dokument nuk siguron qëndrueshmëri ekonomike.

Visar Ymeri, nga lëvizja Vetëvendosje vlerësoi se vendi ka mungesë të madhe të prodhimit. Duke theksuar gjendjen e rëndë ekonomike e sociale në vend, Ymeri tha se “ky mjerim është bërë kafshatë që nuk kapërdihet për qytetarët e Kosovës”.

Ymeri ka thënë më herët po ashtu se neni i 4-t i Ligjit për Buxhetin tenton ta kontrabandojë privatizimin e PTK-së pa kaluar nëpër diskutimin dhe miratimin apo mosmiratimin e privatizimit në Kuvend, siç e kërkon ligji.

Ndërkaq, Ardian Gjini nga Aleanca po ashtu ka kritikuar ashpër Qeverinë e Kosovës, duke thënë se flasin diçka tjetër, e bëjnë diçka tjetër. Ai tha se AAK-ja e mbështet projektbuxhetin nëse në leximin e dytë hiqet neni IV që ka të bëjë me privatizimin e PTK-së dhe nëse rishikohet ndarja e buxhetit nëpër komuna, pasi sipas tij nuk është i drejtë.

Edhe deputetë të tjerë nga radhët e opozitës kritikuan Projektbuxhetin, duke thënë se nuk siguron qëndrueshmëri ekonomike dhe duke kritikuar qeverinë për politika të papërgjegjshme.

Ndërkaq, për dallim nga opozita, Adem Grabovci nga radhët e Partisë Demokratike të Kosovës tha se Grupi parlamentar i këtij subjekti është pro projektbuxhetit, që sipas tij i hap rrugë zhvillimit ekonomik.

Edhe Ibrahim Makolli, nga Aleanca Kosova e Re që është në bashkëqeverisje me PDK-në tha se në parim e mbështesin Projektbuxhetin pasi përmban komponentë me rëndësi.

KOHA Ditore

[Dar_di]

Miratohet Buxheti

Kuvendi i Kosovës, në seancën e së enjtes, ka miratuar prjektbuxhetin e Kosovës për vitin 2011.

Me gjithë kundërshtimet e ashpra të opozitës, Kuvendi i Kosovës, me 66 vota pro, 25 kundër dhe 12 absetime, miratoi projektbuxhetin.

Kundërshtimet e opozitës kishin të bëjnë me nenin 4 i cili ka të bëjë me hapjen e rrugës për privatizimin e Postë-Telekomit të Kosovës.

Dokumenti për buxhetin parasheh 1 miliardë e 264 milionë euro të hyra buxhetore, ndërsa 1 miliardë e 434 milionë euro shpenzime.

Këtu përfshihet edhe rritja e pagave për sektorin publik, ndërsa parashihet rritje ekonomike për 5.5 për qind.

ZËRI

[Dar_di]

Kuvendi miratoi themelimin e Komisioneve për ndryshime

Kuvendit i Republikës së Kosovës me 76 vota për, 6 kundër dhe 4 abstenime miratoi sot themelimin e dy Komisioneve, të cilët do të merren me ndryshimet kushtetuese dhe Ligjit për zgjedhjet e përgjithshme.

Ligjvënësit kanë miratuar me shumicë votash formimin e dy komisioneve që do të merren me ndryshimet kushtetuese dhe me ndryshimin e Ligjit për zgjedhjet. Deputetët e kanë mbështetur formimin e këtyre komisioneve dhe inicimimin e ndryshimeve, duke besuar se më këtë do të përmirësohet infrastruktura ligjore dhe do të ketë një proces më të mirë zgjedhor. Ndërkaq Lëvizja Vetëvendosje ka theksuar ndryshimet kushtetuese duhet të shkojnë përtej ndryshimit të mënyrës së zgjedhjes së presidentit të vendit.

Të gjitha grupet parlamentare janë deklaruar se do të jenë pjesë e punës së këtyre komisioneve, përfshi edhe Lëvizjen Vetëvendosje, e cila megjithatë nuk ka lënë pa bërë vërejtje për procedurën e formimit të këtyre komisioneve.

Shefi i GP të Vetëvendosjes, Visar Ymeri ka thënë se kjo lëvizje ka kërkuar vazhdimisht që të bëhen ndryshimet e Kushtetutës së Kosovës, ngase sipas tij, kjo kushtetutë është e ngushtë për aspiratat e popullit të Kosovës.

“Ndryshim i Ligjit për zgjedhjet është obligim institucional e ai duhet të shkojë përmes Komisionit për legjislacion, por në bazë të marrëveshjes së tri partive politike tërë ky proces është shtrembëruar. Ne konsiderojmë se duhet të përmendet që nuk ka qenë ligji faktori kryesor për manipulimin dhe vjedhjen e votave më 12 dhjetor, por pikërisht shkelja e ligjit dhe në këtë drejtim. Lëvizja Vetëvendosje pavarësisht që nuk pajtohet me këtë procedurë se si po shkohet për këto dy ndryshime, e konsideron të rëndësishme pjesëmarrjen, pasi që fusha me të cilën merren këto komisione janë të rëndësisë jetike për Kosovën. Nëse ndryshimi i Kushtetutës përfundon vetëm me mënyrën e zgjedhjes së presidentit, atëherë nuk janë ndryshime këto. Ndryshimet duhet të jenë thelbësore që e shndërrojnë atë në dokumentin më të lartë të një shteti sovran”, ka thënë Ymeri.

Ndërkaq deputetja e AAK-së, Donika Kada-Bujupi ka kërkuar që të përfshihet në këto komisione edhe grupi grave, duke thënë se në këtë mënyrë gratë do t’i përfaqësojnë standardet dhe kriteret e femrave në të dy dokumentet që do të ndryshohen.

Sidoqoftë, me 76 vota për, 6 kundër dhe 4 abstenime, Kuvendi ka miratuar dy komisionet që kanë dalë nga marrëveshja ndërmjet PDK-së, LDK-së dhe AKR-së. Këto komisione do të kenë nga nëntë anëtarë, ndërsa njëri do të drejtohet nga pozita tjetri nga opozita.

BOTA SOT

[Dar_di]

Nga mbledhja e Kuvendit të Republikës së Kosovës

E Enjte, 28.04.2011

Kuvendi i Republikës së Kosovës ka mbajtur sot mbledhjen e rregullt plenare, gjatë të cilës deputetët kanë miratuar në parim gjashtë projektligje, Planin e veprimit të Kuvendit për integrime evropiane për vitin 2011 dhe Rezolutën për angazhimin e Kosovës drejt integrimit në Bashkimin Evropian.

Në këtë mbledhje, e cila u udhëhoq nga dr. Jakup Krasniqi, kryetar i Kuvendit (një pjesë të mbledhjes e udhëhoqi nënkryetari Xhavit Haliti), pyetjeve të deputetëve iu përgjigj kryeministri Hashim Thaçi dhe zëvendëskryeministrja Edita Tahiri.

Duke folur për procesin e decentralizimit, kryeministri Hashim Thaçi theksoi se ky proces është në rrugë të mbarë të përmbyllet shpejt. Ai tha se Kuvendi ka krijuar Komisionin për Ndryshime Kushtetuese, jo vetëm për mënyrën e zgjedhjes së presidentit, por edhe për ndryshime substanciale që do ta përmbyllin pavarësinë e mbikëqyrur.

Sa i përket autostradës, kryeministri Thaçi tha se është i gatshëm të jap llogari për çdo vendim të Qeverisë. Duke folur për devijimin e trasesë së autostradës, ai theksoi se do të kursehen 350 milionë euro.

Përkitazi me kërkesat për debat parlamentar për krimet e pasluftës në Kosovë, kryeparlamentari Krasniqi kërkoi që të kuptohen drejt detyrat e Kuvendit të Kosovës, si institucion përfaqësues, ligjvënës dhe mbikëqyrës. Krasniqi tha se nëse dikush ka lëndë dhe fakte për ta akuzuar dikë, duhet të drejtohet në prokurori, ndërsa Kuvendi të mos shndërrohet në trup policor, prokurorial apo gjyqësor.

Kuvendi pastaj vazhdoi me agjendën e miratimit të projektligjeve.

Projektligji për ndryshimin dhe plotësimin e Ligjit për noterinë, i cili i prezantua nga zëvendëskryeministri dhe ministri i Drejtësisë, Hajredin Kuçi, u miratua në parim nga deputetët pasi mori mbështetjen e përfaqësuesve të grupeve parlamentare dhe të komisionit përkatës. Tutje, Kuvendi miratoi në parim Projektligjin për shërbimet e sigurisë private, i cili u prezantua nga ministri i Punëve të Brendshme, Bajram Rexhepi, Projektligjin për ndryshimin dhe plotësimin e Ligjit për shoqëritë tregtare, Projektligjin për ndryshimin dhe plotësimin e Ligjit për akreditim, Projektligjin për ndryshimin dhe plotësimin e Ligjit për tregtinë e brendshme, që u prezantuan para deputetëve nga ministrja e Tregtisë dhe Industrisë, Mimoza Kusari – Lila, si dhe Projektligjin për gjendjen civile, që e prezantoi ministri Rexhepi.

Plani i veprimit të Kuvendit për integrime evropiane, për vitin 2011 dhe Rezoluta për angazhimin e Kosovës drejt integrimit në Bashkimin Evropian, që i prezantoi kryetari i Komisionit për Integrime Evropiane, Lutfi Haziri iu nënshtruan një debati nga ana e deputetëve dhe në fund morën miratimin e tyre.

Përmes kësaj rezolute, Kuvendi i Republikës së Kosovës rikonfirmon zotimin e institucioneve të Republikës së Kosovës për përmbushjen e kritereve dhe standardeve të kërkuara për integrim në Bashkimin Evropian dhe gatishmërinë për thellimin e bashkëpunimit me BE-në me synim të fuqizimit të pozitës së Kosovës në proceset e integrimit evropian.

[Dar_di]

Kuvendi lejon vazhdimin e bisedimeve me Serbinë

Kuvendi i Kosovës nuk e miratoi pikën e parë të mocionit të propozuar nga lëvizja Vetëvendosje për ndërprerjen e bisedimeve me Serbinë. Për pikën e parë të këtij mocioni që ka të bëjë me ndërprerjen e bisedimeve me Serbinë, kundër votuan 56 deputetë, për 21 dhe abstenuan 5 deputetë.

Mirëpo, deputetët e Kuvendit të Kosovës miratuan pikën e dytë, që thotë se “Qeveria të ndërmarrë hapa konkretë për të shtrirë autoritetin e shtetit të Kosovës në të gjithë territorin e saj, veçanërisht në veri”.

Kjo pikë e rendit të ditës u miratua me 71 vota për, 17 kundër dhe 1 abstenim.

Edhe pika e tretë e mocionit të Vetëvendosjes, që thotë se “Qeveria e Kosovës të informoj rregullisht, çdo tre (3) muaj Kuvendit e Kosovës për përpjekjet e saj për të vendosur kontroll në tërë territorin e Kosovës”, është miratuar, dhe atë me 85 vota për, 5 kundër dhe 4 abstenime, raporton Telegrafi.


Thaçi: Kosova ka vijat e kuqe për Serbinë

Kryeministri i Kosovës Hashim Thaçi është paraqitur në interpelancë te cilën e ka kërkuar Lëvizja ”Vetëvendosje” rreth çështjes së bisedimeve ndërmjet Kosovës dhe Serbisë.

Fillimisht lideri i ”Vetëvendosjes” Albin Kurti ka paraqitur disa pyetje për të cilat ka kërkuar përgjigje nga kryeministri Thaçi, për bisedimet në mes Kosovës dhe Serbisë.

Kurti kërkoi të jepen sqarime pse Kosova domosdo duhet të bisedoi me Serbinë, ai kërkoi të bëhen publike bisedat se çka është biseduar me Rober Cooper gjatë mesit të vitit 2010 dhe pse Kosova nuk po vendos masa reciprociteti me Serbinë, si dhe a ka platformë të qartë të bisedimeve, raporton RTK.

Kryeministri Thaçi duke i u përgjigjur Kurtit, tha se Kosova ka vijat e kuqe në bisedimet me Serbinë, e që sipas tij do të thotë se statusi i Kosovës dhe integriteti territorial i saj janë të pa prekshme.

Ndërsa rreth platformës është përgjigjur se rezoluta e cila është aprovuar nga Kuvendi i Kosovës është platforma e bisedimeve në mes të Kosovës dhe Serbisë. Thaçi ka ripërsëritur se dialogu është teknik dhe jo politik.

Në këtë pjesë të seancës folën edhe shefat e Grupeve Parlamentare. Ndërkaq, tekstin e mocionit që do të propozohet për votim nga Lëvizja Vetëvendosje rekomandohet që të ndërpriten bisedimet me Serbinë.

Po ashtu kërkohet që Qeveria të ndërmarrë hapa konkretë për të shtrirë autoritetin e shtetit të Kosovës në të gjithë territorin e saj, veçanërisht në veri dhe Qeveria e Kosovës të informoj rregullisht, çdo tre muaj Kuvendin e Kosovës për përpjekjet e saj për të vendosur kontroll në tërë territorin e Kosovës.

ZËRI

[Dar_di]

Nga mbledhja plenare e Kuvendit të Republikës së Kosovës

E Premte, 06.05.2011

Arsyetimin e këtyre marrëveshjeve e ka bërë ministri i Financave, Bedri Hamza, të cilat i ka vlerësuar shumë të rëndësishme për zhvillimin ekonomik, për zhvillimin e infrastrukturës dhe përparimin teknologjik të vendit. Në emër të Komisionit për Parlamentar për Buxhet dhe Financa ka folur kryetarja e këtij komisioni, Safete Hadërgjonajs, e cila i ka ftuar deputetët që t’i miratojnë këto marrëveshje. Në emër të grupeve parlamentare marrëveshjet i kanë mbështetur: Ismet Beqiri, Ardian Gjini, Petar Miletiq, Ibrahim Makolli, dhe Duda Balje. Marrëveshjet i ka mbështetur edhe shefi i Grupit Parlamentar Vetëvendosje!, pos Marrëveshjes me UNCTAD (Agjenci e specializuar e Kombeve të Bashkuara për projektin softueri ASYCUDA), duke e quajtur atë marrëveshje që buron nga Plani i Ahtisarit.

Në fund me shumicë votash të deputetëve janë miratuar (ratifikuar): Marrëveshja për financim dhe grante ndërmjet Qeverisë së Republikës së Kosovës dhe Bankës Botërore e 11 marsit 2011, Marrëveshja në mes Qeverisë Republikës së Kosovës dhe UNCTAD, Marrëveshja për financimin e projektit për regjistrimin e pasurisë së patundshme dhe kadastër në mes Qeverisë Republikës së Kosovës dhe Shoqatës ndërkombëtare për zhvillim, Marrëveshja në mes Qeverisë Republikës së Kosovës dhe KfW- Frankfurt am Main dhe Kompanisë së Ujësjellësit Regjional-Prishtina, Marrëveshjen bilaterale ndërmjet Qeverisë së Republikës së Kosovës dhe Qeverisë së Dukës të Madh të Luksemburgut dhe Marrëveshjen për financimin e projektit për modernizimin e sektorit publik në mes Qeverisë Republikës së Kosovës dhe Shoqatës ndërkombëtare për zhvillim.

Në vazhdim të seancës është zhvilluar debat parlamentar lidhur me gjendjen e sigurisë dhe sundimin e ligjit në Kosovë, sipas kërkesës së deputetit Nait Hasani, të mbështetur nga deputetë të tjerë. Arsyetimin e kërkesë për debat parlamentar e kas bërë parashtruesi i saj, z. Hasani. Ai ka folur gjerësisht për gjendjen sigurisë në Kosovës, të cilën e ka vlerësuar të keqe, sidomos në pjesën veriore të Kosovës, në të cilën, siç është shprehur ai, është dhunuar siguria fizike e njerëzve, është shkatërruar pasuria e tyre dhe është shkelur Kushtetuta e Kosovës. Hasani ka shprehur tone kritike për UNMIK-un dhe EULEX-in, të cilët kanë qenë apo janë përgjegjës për sigurinë në Kosovës, prandaj edhe të asaj pjese të vendit. Ai ka shfaqur shqetësimin e tij për veprimet e Ministrisë së Punëve të Brendshme të Serbisë dhe të Shërbimit inteligjent të saj në territorin e vendit tonë. Ai i ka kritikuar edhe institucionet e vendit për, siç thotë, lejimin e degradimin shpirtëror dhe politik të njerëzve tanë.

Zëvendëskryeministri dhe ministri i Drejtësisë, Hajredin Kuçi, ka dhënë një informatë për sundimin e rendit e të ligjit në Kosovë, duke u përqendruar në masat që ka ndërmarrë qeveria e Kosovës dhe ministria të cilën e udhëheq për sundimin e ligjit në Kosovë. Ai ka përmendur Strategjinë për hulumtimin e krimeve të luftës, kthimin e gjyqtarëve në gjykatat në Veri, zbatimin e Ligjit për gjykatat, Ligjit për Prokurorinë, Ligjit për Këshillin Gjyqësor dhe Ligjit për Këshillit Prokuirorial, si dhe zbatimin e instrumenteve të tjera të drejtësisë. Ai ka folur edhe për masat që ka ndërmarrë Ministria e Drejtësisë për meremetimin e godinave të gjykatave, masat që ka ndërmarrë për sundimin e ligjit në Kosovë, siç është Strategjia për pakësimin e lëndëve nëpër gjykata, rritjen e masa të sigurisë në burgjet e Kosovës dhe mbrojtjen e të drejtave të të burgosurve. Kuçi ka theksuar sponsorizimin e hulumtimit të krimeve të luftës, e të krimeve të tjera. Ai ka përmendur, ndërkaq, edhe me raportet që ka në këtë plan me EULEX-in me ICO-në e me faktorë të tjerë të interesuar.

Ministri i Punëve të Brendshme, Bajram Rexhepi, ka paraqitur para deputetëve një raport për gjendjen e sigurisë në Kosovë. Ai gjendjen e sigurisë e ka përshkruar të qetë dhe stabile, duke e cilësuar si të brishtë, sidomos në pjesën veriore të vendit. Ministri i Brendshëm ka pohuar se gjendja është nën kontroll, falë institucioneve përgjegjëse të sigurisë: Policia e Kosovës, EULEX-i dhe KFOR-i. Ai ka vlerësuar se marrëdhëniet ndëretnike në Kosovë kanë shënuar ngritje, pos në pjesën veriore, në të cilën herë pas here ngrihen tensione ndëretnike të inskenuara nga incidente të organizuara nga grupe kriminale, të financuara nga regjimi serb, i cili e trimëron popullsinë serbe të atjeshme që të mos integrohet në shoqërinë e Kosovës. Në funksion të përmirësimit të gjendjes së sigurisë Rexhepi ka përmendur strategjitë nacionale: kundër krimit të organizuar, kundër trafikimit të qenieve njerëzore, luftës kundër terrorizmit etj. Ai ka garantuar deputetët s Policia e Kosovës është e aftë dhe e përgatitur që ruajë rendin gjendjen e sigurisë, duke përfshirë edhe ruajtjen e kufijve të Kosovë.

Kryetari i Grupit Parlamentar i PDK-së, Adem Grabovci, e ka quajtur të vlefshëm këtë debat parlamentar që ka për qëllim të evidencojë lëshimet e institucioneve të Kosovës. Veriu i Kosovës, është bërë pika më e ndjeshme në Kosovë, ka pohuar Grabovci, i cili ka kërkuar nga EULEX-i që rendi dhe ligji të sundojë edhe në veri të vendit.

Kryetari i Grupit Parlamentar të LDK-së, Ismet Beqiri, strategjitë e përmendura nga ministrat i ka quajtur fjalë në letër. Siguria dhe sundimi i ligjit janë larg asaj që e dëshirojmë dhe që na nevojitet, ka theksuar ai, duke u shprehur i shqetësuar për vjedhjen e Dhomës së Dëshmisë në Policinë e Kosovës.

“Kosova vazhdon të jetë vend i pambrojtur, sidomos në Veri”, ka theksuar Rexhep Selimi, në emër të Grupit Parlamentar Vetëvendosje!, duke shprehur shqetësimin për kufijtë e pambrojtur dhe të pakontrolluar të vendit dhe për mosfunksionimin e zinxhirit komandues të Policisë së Kosovës.

“Në veri të Kosovës kemi të bëjmë me një agresion kriminal të një shteti tjetër “, ka theksuar Ahmet Isufi në emër të grupit Parlamentar të AAK-së, duke shtuar se vetura me regjistrime të huaja qarkullojnë pa i ndalur kush. Ai ka ngritur shqetësimin për depërtimin e shpeshtë të xhandarëve serbë në zonën kufitare në juglindje të vendit, si dhe për gjendjen e shqiptarëve në Luginën e Preshevës.

Shefi i Grupit Parlamentar të koalicionit për Kosovë të Re , Ibrahim Makolli, sistemin e sigurisë në Kosovë e ka vlerësuar të ndërtuar mbrapsht. Ai ka tërhequr vëmendjen se sa vjen e keqësohet gjendja e sigurisë nëpër shkollat tona, në të cilat përdoren edhe substanca narkotike.

Në këtë frymë dhe me tone shumë kritike ka vazhduar debati për gjendjen e sigurisë dhe e sundimit të ligjit në Kosovë. Folësit në këtë temë kanë qenë të shumtë, siç kanë qenë të shumta edhe shqetësimet e tyre për gjendjen e sigurisë dhe të sundimit të ligjit.

Pas fjalëve përfundimtare të zv.kryeministrit Kuçi, të ministrit Rexhepi dhe parashtruesit të kërkesës për debat parlamentar, z.Hasdani, deputetët me shumicë votash kanë miratuar raportin me rekomandime për gjendjen e sigurisë dhe të sundimit të ligjit në Kosovë.

Në përfundim të seancës së sotme deputetët kanë shqyrtuar dhe miratuar Raportin vjetor i Komisionit të Pavarur për Miniera dhe Minerale, për vitin 2010.

Kuvendi i Republikës së Kosovës