LAJMET KRYESORE
Komisioni Hetimor: Hetim veprimtarisë së Policisë Bashkiake në demonstratën e 21 Janarit
27-01-2011 / Gazeta 55
- Policia vë në pranga demonstruesin Agron Troksi, në 21 Janar u lëshua me automjetin e tij tip “Benz” drejt Kryeministrisë
- Gjykata e Tiranës, burg pa afat për Gjin Ndreu dhe Jetmir Prenga
UPDATE- Komisioni Hetimor për ngjarjen e 21 janarit do të kërkojë nga Policia Bashkiake e Tiranës që të jap informacion në lidhje me aktivitetin e efektivave të saj për ngjarjet e dhunshme që ndodhën në demonstratë. Kërkesa është bërë nga deputeti demokrat Enkelejd Alibeaj, i cili tha se drejtuesit e këtij institucioni, si një prej agjencive që ka rol kryesor në kryeqytet, duhet të informojnë Kuvendin. “Policia Bashkiake e Tiranës të na informojë gjatë kohës para demonstratës, gjatë kësaj periudhe dhe pas periudhës së rrethimit të datës 21 janar”- deklaroi Alibeaj. Deputeti Gent Strazimiri u shpreh se ka informacione se efektiva të Policisë Bashkiake të Tiranës kanë qenë në demonstratën e opozitës, por edhe efektiva nga polici bashkiake të qyteteve të tjera si Fieri, Gjirokastra, etj. Kryetari i Komisionit Eduard Halimi deklaroi se “është detyrë që dhe informacioni i Policisë Bashkiake të bëhet pjesë e kësaj çështje”. Nga ana tjetër u kërkua që të merret dhe informacioni nga mediat që kanë mbuluar ngjarjen.
Policia vë në pranga demonstruesin Agron Troksi, në 21 Janar u lëshua me automjetin e tij tip “Benz” drejt Kryeministrisë
Forcat e policisë së Tiranës kanë mundur të vënë në pranga 50-vjeçarin Agron Troksi, banues në kryeqytet, ndaj të cilit prokuroria ka lëshuar dje një urdhër-ndalimi të posaçëm. Kjo pasi më datë 21 janar 2011, nga ora 14.00-16.00, në bulevardin “Dëshmorët e Kombit”, kohë në të cilën u zhvillua edhe demonstrata e dhunshme e opozitës, “ky person në bashkëpunim me persona të tjerë, me automjetin me targë TR 8118 B, i cili është në pronësi të tij, ka hyrë në territorin e objektit të Këshillit të Ministrave”. Siç kujton policia, i arrestuari ndër të tjera ka dëmtuar edhe bankinën penguese që ndodhej në hyrje të Kryeministrisë, si dhe ka kundërshtuar punonjësit e policisë së rendit publik. “Vepra penale në ngarkim të tij, parashikohet si krime nga nenet 236/2 e 150 të Kodit Penal”, bëjnë me dije forcat e policisë lidhur me një fakt të tillë qe u transmetua direkt në TV dhe bëri xhiron e botës.
Gjykata e Tiranës, burg pa afat për Gjin Ndreu dhe Jetmir Prenga
Gjykata e Tiranës ka dhënë burg pa afat për Gjin Ndreun, në bazë të kërkesës të bërë nga Prokuroria. Ndreu është një nga personat që mori pjesë në demonstratën e dhunshme dhe ka dhunuar policët. Ai u lirua herën e parë nga Gjykata pas akuzës për armëmbajtje pa lejë, me argumentin se kishte qenë një çadër. Por ai është riarrestuar një ditë më pas nga polica, për shkak të konfrontimit që ka bërë me një patrullë policie në Tiranë. Kjo ka qenë arsye e ndalimit dhe masa e arresti burg pa afat është dhunim dhe fyerje ndaj forcave të rendit. Ndërsa personi dytë që ka marrë masë arresti burg pa afat është Jetmir Prenga, i cili është arrestuar ditën e demonstratës.
Për të dy këta të ndalur, arrest me burg ka kërkuar prokuroria dhe masa është gjykuar e drejtë nga gjykata, e cila ka marrë vendimin.
Përgjigju Duke Cituar
Postuar më parë nga Mbinjeriu
Krijoni Kontakt