Raporti amerikan për 21 janarin: Policia bëri detyrën, organizatorët para drejtësisë

[HELEN OF TROY]

Dy plumba në zarf i janë dërguar gazetarit që publikoi videon ,kur gardistët që ruanin Kryeministrinë qëlluan ndaj qytetarëve demonstrues.

Këtë e ka thënë mbrëmjen e kaluar gazetari Artan Hoxha në emisionin “Top Story”.Hoxha,i cili drejton emision “Xhungël” në News 24 ,ka thënës e në adresë të tij ka shkuar një zarf me dy plumba 9 mm,të njëjtët me ata që u ekzekutuan demonstruesit.

Sipas News24 ,ky kërcënim me plumba vjen disa ditë pas publikimit të videos,ku dukej vrasja e dy protestuesve,duke identifikuar edhe gardistin që qëlloi.
“Kryeministri i vendit më ka kujtuar si çakallin e Sigurimit të Shtetit. I them kryeministrit se kur është rrëzuar regjimi komunist kam qenë vetëm 15 vjeç dhe s’mund të kem qenë bashkëpunëtor i tij. Gjithashtu, nga momenti kur publikova pamjet unë nuk mund të komunikoj lirisht me punonjësit e administratës shtetërore. Jam kërcënuar me telefon dhe më ka ardhur një zarf me 2 plumba 9mm, që përdoren nga Garda. E kam marrë si një mesazh që unë të mos dëshmoj ato që kam parë”, ka shtuar Hoxha.

Hoxha ka thënë në Top Story se policia që në fillim nuk ishte në gjendje të bllokonte grupet që filluan trazira. “Ka pasur pjesëtarë civilë të policisë që kanë qenë para kordonit policor dhe kanë ndërhyrë në disa momente. Para se të fillonte demonstrata kishte një prani të madhe të policisë së rendit dhe grupeve të gatshme. Prapa kryeministrisë ishin forcat e FNSH-së”, ka treguar Hoxha. Sipas tij, në momentet e para kur protestuesit ishin mbledhur para kryeministrisë, ka qenë një grup që po shkaktonte trazira, të cilin policia nuk arriti ta bllokonte.

“Para se të niste konflikti është dukur një grup personash që janë aktivizuar para kordonit. Por trupat e policisë nuk e kanë menaxhuar dot këtë grup. Kur forcat e FNSH-së kanë ndërhyrë i kanë parë trupat e policisë ta marrin teritorin pa këmbëngulur për shpërndarjen e protestuesve”, ka deklaruar Hoxha. Emisioni “Xhungël” solli pamje ekskluzive vrasjeve të dy protestuesve nga gardistët./Balkanweb/

[Albo]

Nis manifestimi homazh i opozitës

Ka nisur në bulevardin “Dëshmorët e kombit” manifestimi homazh i opozitës në nder të 3 viktimave të demonstratës të 21 janarit.
Demonstrata homazh ka nisur nga ura e Lanës pranë hotel “Dajti” për të vazhduar më pas me një marshim deri tek kryesia e Kuvendit.

Në krye të kortezhit janë vendosur tre të rinj me portretet e të vrarëve në demonstratë ndërsa më pas vijojnë edhe drejtuesit më të lartë të opozitës si kreu i PS-së Edi Rama, kreu i grupit parlamentar i PS-së Ruçi dhe deputetët socialistë të cilët mbajnë në duar lule dhe qirinj.

Në manifestimin e sotëm nuk ka fjalime dhe parrulla. Parrulla e vetme është në vendin ku u vranë tre veta në 21 janar, ku shkruhet në shqip dhe në anglisht fjala "Drejtësi"

Ndërkohë në bulevardin para kryeministrisë janë vendosur fotografitë e tre viktimave të demonstratës së 21 janarit si dhe janë vendosur edhe lule në vendet ku ata u vranë.


Homazhe për tre viktimat e demonstratës së 21 janarit

Qytetarë të shumtë i janë bashkuar thirrjes së opozitës për një demonstratë homazh për të nderuar tre viktimat e 21 janarit.

Kortezhi i homazheve i kryesuar nga shefi i opozitës, tashmë është ndalur në vendin kur është janë vrarë tre demonstruesit ndërkohë që shihen edhe familjarët e viktimave me tufa me lule.

Tubimi duket paqësor deri në këto momente ndërsa muzika funebër shoqëron demonstratën përkujtimore për viktimat Hekuran Deda, Ziver Veizi dhe Faik Myrtaj.



Demostrata, viktimat nderohen me lule

Vijon lëvizja masive e manifestuesve, ku kryetari i PS, Edi Rama ndodhet mes manifestuesve, por i rrethuar nga shumë truproja. Ndërkaq, spikat prania e forcave të policisë për të ruajtur sigurinë e institucioneve, ndërkohë që selia e kryeministrisë është rrethuar me tela me gjemba.

Deputetët opozitarë si Taulant Balla, Shegushe Ligori, Pandeli Majko, Ilir Beqja, Edurd Shalsi etj po parakalojnë me tufa me lule në dorë e duke ndezur qirinj në nderim të tre viktima të 21 janarit.

ORA News

[Albo]

Kryeministri Berisha takohet me Kryetarin e radhës së OSBE-së dhe Zëvendës Ministrin e Jashtëm të Lituanisë zotin Evaldas Ignatavičius


Kryeministri Berisha priti sot në takim Kryetarin e radhës së OSBE-së dhe Zëvendës Ministrin e Jashtëm të Lituanisë zotin Evaldas Ignatavičius ku i bëri një paraqitje të situatës së krijuar si pasojë e protestave të dhunshme dhe përpjekjeve për përmbysjen e institucioneve të zgjedhura në mënyrë demokratike.

Kryeministri Berisha i bëri zotit Ignatavičius një ekspoze mbi reformën konsensuale zgjedhore, zhvillimin e zgjedhjeve të lira e të ndershme të certifikuara ndërkombëtarisht dhe përpjekjeve dështuara të kryetarit të Partisë Socialiste për të deligjitimuar këto zgjedhje për më shumë se një vit e gjysmë.

Kryeministri Berisha theksoi se për shkak të këtij dështimi zoti Rama ka vazhduar të abuzojë me apelin e komunitetit ndërkombëtar për të gjetur zgjidhje në përputhje me kornizën kushtetuese dhe brenda institucioneve demokratike, dhe me një skenar të mirë përgatitur ka përshkallëzuar situatën nëpërmjet veprimesh të dhunshme dhe antikushtetuese.

Kryeministri pasi shprehu mbështetjen e plotë për një hetim të gjithanshëm, profesional dhe të paanshëm të tentativës së dhunshme për rrëzimin e qeverisë, i shprehu zotit Ignatavičius shqetësimin se Prokurorja e Përgjithshme me veprimet e njëanshme që ka ndërmarrë po bllokon dhe dëmton këtë hetim. Në këtë kontekst ai vlerësoi asistencën e menjëhershme të autoriteteve të Shteteve të Bashkuara në dhënien e ekspertizës gjatë hetimit si një garanci për një hetim profesional dhe të paanshëm.

Zoti Ignatavičius vlerësoi lart vendimin e kryeministrit për mosmbajtjen e mitingut të planifikuar për ditën e shtunë. Ai u shpreh se është e domosdoshme ulja e toneve dhe vendosja e një dialogu politik brenda Parlamentit. Ai gjithashtu shprehu gatishmërinë e OSBE-së për të asistuar në këtë proces.

Kryeministri siguroi gjithashtu për vendosmërinë e qeverisë shqiptare për mbrojtjen e Kushtetutës, të shtetit ligjor dhe institucioneve demokratike në vend, përkarshi çdo tentative për shkeljen e tyre. Gjithashtu ai i përsëriti zotit Ignatavičius ftesën e bërë zyrtarisht OSBE-së për vëzhgimin e zgjedhjeve të 8 Majit duke kërkuar dërgimin e sa më shumë vëzhguesve ndërkombëtarë për të dëshmuar angazhimin e plotë të autoriteteve shqiptare për mbajtjen e zgjedhjeve sipas standardeve më të larta ndërkombëtare.

Kryeministria
27/01/2011

[Albo]

Konferencë për shtyp e Kryeministrit Berisha


Të dashur qytetare e qytetarë shqiptarë,

Bashkëkombës e bashkëkombëse të mi kudo që jeni,

Jam sot këtu para jush për t’ju informuar mbi zhvillimin e dy ditëve të fundit, pas dështimit të puçit, të përpjekjes pesë orë për të marrë me dhunë Këshillin e Ministrave, më datën 21 janar. Gjatë kësaj periudhe, janë mbledhur të dhëna të shumta direkt nga burimet më të besueshme se banditëve, kriminelëve, delikuentëve që 5 orë me radhë u vërsulën me barbarinë më të madhe ndaj Policisë së Shtetit, Gardës së Republikës, për të sjellë me dhunë Haxhi Qamilin e haxhi qamilët në karrigen e kryeministrit, u janë dhënë 200 deri në 300 dollarë secilit për dhunën që do përdornin, u është dhënë garancia e plotë se do të përmbyset qeveria, sepse misioni i tyre ishte përmbysja me çdo kusht e Sali Berishës dhe qeverisë së tij legjitime.

Disponohen të dhëna të plota për sasitë e eksplozivit, tritolit dhe kallashnikovëve, me të cilët do të realizohej sulmi final për të hyrë në ndërtesë. Disponohen të dhëna të plota mbi armët e sofistikuara, çadrat-pistoletë, stilolapsat-pistoletë, thikat me helm që do përdoreshin në stadet e caktuara të këtij grushti shteti, të kësaj përpjekjeje të turpshme për të marrë pushtetin me dhunë. Disponohen të dhëna se grupe ndofta gjer në 10, grupe 5-she u stërvitën ditë të tëra në zona të ndryshme, për të ndërmarra sulmin. Disponohen të dhëna se ky puç u financua me së paku 2 milion dollarë në të gjitha përgatitjet.

Disponohen të dhëna për gjithçka ndodhi ato pesë orë në bunkerin e krimit, bunkerin bllokmenëve të drejtuar nga Edvin Rama, në kullën e Fidelit. Edi Rama e puçistët ishin të rrethuar nga të gjitha anët me veshë e sy të ndershëm. Gjithçka ata kanë bërë ato pesë orë, çdo gjë do t’u zbardhet qytetarëve shqiptarë. Të gjitha urdhrat, e dhëna nga bllokmenët që po shihnin ëndrrën e tyre të bëhej realitet, janë të evidentuara. Disponohen të dhëna për ndarjen paraprake të posteve të qeverisë së re. Ishin përcaktuar edhe ata që do të merrnin Ministrinë e Brendshme që do ishte Tom Doshi, Ministrinë e Kulturës do ta merrte njeriu, të cilin e motra e të plagosurit do ta nxirrte si kriminel nga dhoma, sepse e kishte sjellë në turma duke i premtuar se do ta bënte kryetar komune, pra, kultura ishte përcaktuar për Zogajn, te Drejtësia çakalli që bërtiste për 13 mijë viktima. Kjo është vetëm njëra pjesë e kabinetit që do instalohej.

Disponohen të dhëna për të gjithë komunikimin në stadin B të puçistëve njëri me tjetrin, në përpjekjet e tyre në panik të madh, në lemeri të plotë, ju e patë se pati prej tyre që nuk e nxorën fytyrën para mediave nga frika se do t’u lexohej në ballë puçi i shëmtuar që udhëhoqën e organizuar.

Jam këtu gjithashtu për t’ju informuar ju, qytetarë shqiptarë që me qëllim të faktoj vendosmërinë time që çdo qytetar në këtë vend të përgjigjet, të hetohet, të jetë ndën ligj, pasi unë kisha ftuar ndrikullën e puçit të vazhdojë hetimin, e ftova Prokuroren e Përgjithshme këtu para jush, në datën 21 janar, t’ju informoj sa vijon. Miq të shquar të këtij vendi, të cilët në tërësi kuptuan se çfarë fshihej prapa arrestit pa asnjë hetim të zinxhirit të tërë të komandës së Gardës Kombëtare, kuptuan se çfarë fshihej para këtij akti, pas një angazhimi shumë të fortë, pardje pasdite arritëm në marrëveshje, që secili nga oficerët e Gardës të paraqitej para prokurorit dhe natyrisht, në këtë paraqitje do bëhej deklarata e do të anulohej urdhri i arrestit. Kjo ishte një marrëveshje e qartë si kristali. Por tre orë mbrapa, kjo marrëveshje u shkel me urdhër që mori zonja Rama, duke faktuar se nuk respekton asnjë normë, asnjë moral, asnjë standard. Natyrisht, e bëri këtë me urdhër. Shumë e vështirë të besohet një karakter kaq i ulët që vetë të pranojë një marrëveshje, e cila kurrë nuk mund të shkelej. Oficerët e Gardës u paraqitën me dinjitet, siç ishte marrëveshja. Hanxharët, në kundërshtim me të, donin t’i vinin në arrest. Me këtë akt u faktua edhe një herë se cila është pavarësia e institucionit të akuzës.

Të dashur qytetarë e qytetare,

Kjo përbën një akt jashtëzakonisht të rëndë, një lojë me fate tuaja, të sigurisë suaj e vendit në tërësi. Unë kam qenë në vetvete i vendosur që çështja të trajtohet në institucion, por puçistët, të tmerruar nga akti i tyre, bëjnë gjithçka që t’i përdorin institucionet në mbrojtje të puçit. Ai që dha urdhër të shkelet marrëveshja, e bërë në një moment kritik ditën e mërkurë pasdite, dëshmon se është në frikë e panik të tmerrshëm për veprën që ka kryer. Vlerësoj shumë faktin se përveç ekspertëve, do të ketë edhe prokurorë të një vendi mik në hetimin e këtij problemi. I jam shumë mirënjohës qeverisë së Shteteve të Bashkuara për ndihmën që u jep shqiptarëve. Kjo nuk është ndihmë për qeverinë, pro një ndihmë për një komb mik, i cili duhet të dijë të gjithë të vërtetën për këtë ngjarje të shëmtuar që ka ndodhur më 21 janar, ditën për drekë.

Sikundër falënderoj me shumë mirënjohje të gjithë ata qytetarë që sjellin në shenjë besimi të plotë tek qeveria e vendit, tek kryeministri, informacione të një rëndësie të dorës së parë. I garantoj se duke pasur mbrojtje të plotë e totale, ato do të vihen në dispozicion të vlerësimit të të gjitha institucioneve respektive, parlamentit, Policisë Kriminale, Prokurorisë, natyrisht sipas rendit. Ftoj çdo qytetar të kontribuojë me ato çka di për këtë puç të shëmtuar që ka fytyrën e Edi Ramës dhe jo vetëm të atij. Garantoj qytetarët se rendi kushtetues është i fortë, se rendi kushtetues nuk përfaqësohet nga ata, të cilët përdhosin Kushtetutën dhe kolltukun ku i ka vendosur populli shqiptar.

Sot, kryepuçisti Edi Rama ka thirrur sërish protestë. Thirrjeve të gjithanshme të intelektualë, qytetarëve, biznesmenëve, të rinjve shqiptarë, por edhe thirrjeve të sinqerta të miqve të Shqipërisë, pa përjashtim në union, qeverisë së Shteteve të Bashkuara, Bashkimit Europian, qeverive të vendeve mike për të mos mbajtur mitingun ai ju përgjigj njëlloj, siç përgjigjej i ati i tij shpirtëror Enver Hoxha. Unë ju deklaroj këtu se do respektohet plotësisht dhe ju do të jeni aty, e drejta e protestës, se qytetarët shqiptarë nuk kanë e nuk do të kenë asnjë lloj kufizimi në të drejtën e tyre të protestës paqësore. Kjo është forca e demokracisë së këtij vendi. Ky është përcaktimi i qeverisë legjitimi të këtij vendi. Ndaj ne nuk kemi asnjë shmangie, pavarësisht nga sulmi puçist pesë orësh, në respektimin e kësaj të drejte. Sikundër garantoj se aktet e dhunës do të përballen me ligjin, ligjin dhe vetëm ligjin. Aq sa është e pacenueshme, e paprekshme e drejta e protestës paqësore, po aq e paprekshme, e pacenueshme janë vlerat dhe institucionet kushtetuese të vendit.

Kryepuçiti që rrethoi për pesë orë Këshillin e Ministrave, me një grup horrash të ndryrë në bunker, rrugaçë, banditë e kriminelë të armatosur më revole, gurë e hunj ndaj kryeministrisë, duhet ta ketë të qartë se çdo tentativë tjetër, - vërtetë, ai sot ka futur në xhep Prokurorinë e vendit dhe ka marrë paralajmërimin që mos ta keqpërdorë dhe me këtë i ka bërë një dëm kolosal vetes së tij - detyra e qeverisë është të mbrojë çdo qytetar dhe qeveria do ta bëjë këtë, por në rast se kryepuçisti Edi Rama tenton për herë të dytë, do të përballet me pasoja që ia vetë nuk mund t’i imagjinojë. Ai që ka përvetësuar të 7-at në një akt makabër, të 7-at janë familjare, të 7-at janë nderimi më intim dhe unë bashkohem me familjet e viktimave në ngushëllimin tim edhe në të 7-at, por nxjerrja e të 7-ve për qëllime makabre të atij që i solli njerëzit të paguar për të marrë Këshillin e Ministrave, është një vrasje për së dyti, është një profani, është një zhvarrosje e të ndjerit. Megjithatë, ky është morali i tij, është zgjedhja e tij.

Ndaj jam këtu për të garantuar shqiptarët se do të respektohet çdo e drejtë e cilitdo. Kjo është forca e demokracisë sonë. Do të përballesh me ligjin cilido që dhunon atë e institucionet, se kryeministri i tyre e çdo zyrtar, sa herë të kërcënohen institucionet e shtetërore të këtij vendi, do jenë në krye të detyrës në mbrojtje të tyre me çdo çmim. Ne jemi burra e gra që nderojmë detyrën tonë. Nderi dhe detyra janë një e të pandarë.

Pyetje: Zoti Kryeministër, ju përmendët të gjitha ato që organizuan puçin e datës 21 janar. Keni të dhëna paraprake se edhe sot, pavarësisht se kreu i PS-së Edi Rama ka garantuar për një protestë homazh, mund të përdoren akte dhune?

Kryeministri Berisha: Të dhënat e mia janë të shumta, të shumanshme, të shumëllojta. Qytetarët kanë një përgjegjësi të lartë të denoncojnë çdo veprim, çdo akt, çdo përpjekje. Thirrja dhe ftesa ime është që të mos bëhet kush vegël e verbër e pushtetit të një njeriu që do ta marrë atë me dhunë. Protesta paqësore, respektimi dhe garantimi i saj është detyrimi më madhor i Kryeministrit dhe i qeverisë. E theksova se me aq forcë sa do të garantojmë çdo protestë paqësore, sepse është ligji dhe Kushtetuta që i njeh ato, po me aq forcë do të garantojmë çdo institucion dhe po me aq forcë do të reagojmë ndaj çdo dhunimi të ligjeve dhe Kushtetutë së vendit.

Dua t’ju informoj se Prokuroria e Shtetit nuk ka hapur çështje penale për sulm dhe rrethim të një institucioni kushtetues. Prokuroria e Shtetit dhe jo vetëm ajo vazhdon të përdorë emrin e kod të operacionit - ngjarja në bulevard. Më duket se ka edhe romane e novela me - ngjarja në bulevard, të cilat janë në tërësi ‘love affair’. Por ‘ngjarja në bulevard’ është maska e puçistëve, të cilët kishin vendosur që, pasi të merrnin Këshillin e Ministrave, të mos e quanin puç dhe marrje pushteti me dhunë, por një ‘love affair’ në bulevardin “Dëshmorët e Kombit”. I garantoj se do të marrin përgjigjen që meritojnë, por me institucionet.

Pyetje: Zoti Kryeministër, ju sapo thatë se Prokuroria nuk ka hapur ndonjë hetim, ndërkohë që jeni shprehur vazhdimisht i bindur se përgjegjësit do të marrin përgjigjen e merituar ligjore. Mund të na e thoni se si do jetë kjo përgjigje?

Kryeministri Berisha: Ky shtet ka institucione, ka parlament, ka qeveri. Ne po bëjmë gjithçka që t’i nxjerrim nga paraliza këto institucione. Në hetim po i bashkohet dhe një hetim ndërkombëtar nga më të shkëlqyerit, jo vetëm me ekspertë, por edhe me prokurorë. Ne kemi besim të plotë, por, natyrisht, parlamenti në çdo kohë mund të mblidhet dhe mund të marrë vendimet që i duhet për vendin. Deri më tani gjithçka e kemi bërë në përputhje të plotë me germën dhe frymën e Kushtetutës. Dhe gjithçka do e bëjmë në këtë përputhje.

Pyetje: Zoti Kryeministër, edhe sa kohë duhet që shqiptarët të jetojnë me ankthin e protestave dhe se çdo të ndodhe me to, ndërkohë që mund të ketë një zgjidhje politike mes palëve.

Kryeministri Berisha: Zgjidhja është - pa ndëshkimin e pucit, me të gjithë organigramën e tij, kriza persiston si një rrezik në këtë vend. Unë nuk mund t’i dezinformoj qytetarët shqiptarë. Në qoftë se ndokush mendon se Sali Berisha mund të bëj ‘deal’ me puçistë, këtë ta harrojë në mënyrën më kategorike. Ka qenë 21 ditë në bulevard, ka pasur tolerancë totale për bllokimin dhe për protestën. Ka pasur zero tolerancë për koncesion politik. Puçistëve nuk u bëhen, duhet të marrin përgjegjësitë e tyre Pasi të marrin përgjegjësitë ligjore, atëherë situata do të shkojë drejt, të ulen në parlament, të vazhdojë jeta parlamentare dhe të gjitha rrugët i kanë të hapura për zgjidhje. Zgjedhjet do të jenë në vitin 2013. Madje do shoh të dielën më të fundit. Që se kam ndërmend zakonisht, se herë i afroj me një apo dy javë.

Pyetje: Zoti Kryeministër, ju thatë se dispononi të dhëna për armë zjarri, etj. Këto të dhëna janë prova, a ka sekuestruar policia gjëra të tilla që ju përmendët?

Kryeministri Berisha: Gjithçka është në diskrecionin e të dhënave.

Pyetje: A përfshihet Shërbimi Informativ Shtetëror në dhënien e këtyre të dhënave tek ju?

Kryeministri Berisha: Këto janë të dhëna nga burime tërësisht të tjera.

Pyetje: A mund të na sqaroi edhe një herë çështjen e gardistëve. Si u prish marrëveshja dhe se kush e dha urdhrin? Ju thatë ai dha urdhrin.

Kryeministri Berisha: Shkoni dhe pyesni shkelësit e marrëveshjes.

Pyetje: Na duhet një identifikim, se kush e dha urdhrin që ta pyesim.

Kryeministri Berisha: Zonjë ka një komision hetimor parlamentar. Unë po them që kjo është bërë kështu. Shkoni pyesni atë që shkeli marrëveshjen dhe që dëshmoi se ç’përfaqëson. Shkoni pyesni se çfarë e detyroi atë të vetëposhtërohet në një shkallë të tillë. I pyesni. Unë them ka ndodhur kjo dhe jam i detyruar të them, sepse shqiptarët duhet të dinë çdo gjë. Asgjë nuk mund të mbetet pa u thënë. Unë ju them edhe tjetrën se dokumenti i botuar në gazetën Shekulli mbi ekspertizën është dërguar në selinë e Partisë Socialiste nga zonja. Gazetës Shekulli nuk ia ka dhënë direkt, por nëpërmjet selisë së Partisë Socialiste. Është dokumenti që dëshmonte se plumbi është i shtypur. U treguan të pamend me atë botim.

Pyetje: Ju thatë se parlamenti mund të marrë vendimet e veta.

Kryeministri Berisha: Sigurisht dhe në çdo kohë. Ky vend ka ligje. Lexoni ligjet e këtij vendi. Parlamenti po heton. U mblodh dhe bëri një hap kushtetues. Parlamenti, në Kushtetutë dhe ligje të tjera, ka të gjitha kompetencat për të mbrojtur vendin nga çdo puç i brendshëm, se i jashtëm tani jemi aleatë të NATO-s dhe e kemi këtë avantazh historik të jashtëzakonshëm.

Pyetje: Ndoshta ky komision mund të kërkojë shkarkimin e Prokurores së Përgjithshme. Por a jeni i sigurt që do të firmosë Presidenti?

Kryeministri Berisha: Ju lutëm, të mos e paragjykojmë komisionin. Ta lëmë atë të hetojë Kryeministrin, Presidentin, kryeprokurorin, ministrat e të gjithë me radhë. Është një moment në të cilin komisioni do hetojë çdo personalitet të këtij vendi, në interesin më të mirë të së vërtetës së hidhur të datës 21 janar. Komisioni hetimor parlamentar është një komision shumë serioz dhe ka nisur punën me intensitet të madh. Jam i bindur se të gjitha institucionet, në detyrimin Kushtetues, do të bashkëpunojnë plotësisht me këtë komision, i cili në këtë çështje përfaqëson vullnetin më të lart të kombit shqiptar.

Pyetje: A janë më në fuqi urdhër-ndalimet për komandantët e Gardës, pas prishjes së marrëveshjes që thoni ju?

Kryeministri Berisha: Unë thashë se mos më pyet a janë lëshuar nja 7-të të tjera.

Pyetje: Zoti Kryeministër, ju përmendët një sërë mjetesh luftarake, të cilat qenkan bërë gati për t’u përdorur atë ditë. Këto të dhëna që ju keni, do t’ia vini në dispozicion Prokurorisë apo Komisionit hetimor parlamentar?

Kryeministri Berisha: I patë dhe vetë ombrellat se si drejtoheshin. Këto të dhëna do të kalojnë në Komisionin hetimor parlamentar, do të kalojnë në Policinë Kriminale, do ndjekin rrugën e verifikimit të tyre. Këto janë procedura, por Prokurorisë nuk do t’i fshihet asgjë. Policia Kriminale ka urdhër të prerë që të çojë gjerat në prokurori. Ju duhet të dini dhe po jua shpjegoj se është fakt i pamohueshëm se ai që duhet të ishte institucioni i pavarësisë, Prokuroria, është shndërruar në një vegël të ngjarjes së bulevardit. Kështu thotë. Por është fakt i pamohueshëm se duke vlerësuar gravitetin e madh të kësaj çështjeje, një qeveri mike e kombit shqiptar iu përgjigj në mënyrën më të shpejtë kërkesës për të kontribuar në hetim. Unë jam shumë i kënaqur me këtë dhe kam shumë besim tek kjo. Hetim të plotë si për viktimat që mbetën në sulmet e papërmbajtura për të marrë me dhunë Këshillin e Ministrave, si për ata që urdhëruan sulmin ndaj kësaj ndërtese, si për ata që financuan, si për ata që i pajisën. Ju duhet të dini se unë jam këtu për t’ju thënë se janë pothuajse të plota pistat, linjat e transparencës së këtij puçi. Institucionet nuk duhet të identifikohen me një person, as edhe me dy. Ne qoftë se ndonjë Haxhi Qamil mendon se nga karrigia e tij mund të qeverisë me të gjitha pushtetet apo t’i marrë ato me dhunë, ai do të marrë atë që thotë ligji. Një gjë është e sigurt dhe do e them këtu: në paranojën e tij Edvin Kristaq Rama nuk do të njohë asnjë kufi e asnjë të ndalur. Gjatë tre ditëve, atij i kanë telefonuar personalitete shumë të rëndësishme. Unë nuk jam këshilltar i askujt, por unë e parashihja në mënyrën më të qartë se atij sa më shumë i telefonon, aq më shumë lartësohej dhe i dukej vetja më i rëndësishëm. Ju garantoj se në qoftë se atij do i telefononte personaliteti numër një i Europës, do t’i thoshte jo, se jam unë mbi ty. Në qoftë se do t’i telefononte personaliteti më i madh i botës, do t’i thoshte jo, se ti nuk e di rrethanat, i di unë ato. Unë dhe Zoti i dimë ato. Në qoftë se do t’i telefononte Zoti e t’i thoshte lërë atë demonstratë, përgjigja do të ishte – i plotfuqishëm jam unë dhe jo ti. Kështu që kjo është ajo çka unë dua t’ju them për të. Por ai ka zgjedhjet e veta. Unë jam këtu për të garantuar shqiptarët se rendi kushtetues është i fortë, se vlerat janë të garantuara, se tronditja që ky krijoi me aktin e tij të shëmtuar dhe me 2-3 zyrtarë të tjerë që turpëruan detyrën, zyrën, flamuri, besimin, nuk kanë asnjë të ardhme.

Pyetje: Në dijeninë tuaj, a do të duhej që Presidenti i Republikës të mblidhte Këshillin e Sigurimit Kombëtar?

Kryeministri Berisha: Për çfarë ta mblidhte, për ngjarjen në bulevard? Si ta mblidhte Presidenti për ngjarjen në bulevard? Sepse për Presidentin ishte ngjarje në bulevard, në kafenetë e bulevardit. Për të ishte ngjarje në bulevard. Do t’ju them një gjë, meqenëse po më pyet për këtë. Nga çdo skaj i këtij vendi, nga çdo qoshe e këtij vendi, nga çdo skaj i Europës, nga çdo qoshe e Europës, nga çdo skaj i planetit dhe nga çdo qoshe e planetit, falë mediave, të gjithë panë një dhunë barbare pesë orëshe. Jo të gjithë e kuptuan se çfarë ndodh. Bënë interpretime të ndryshme, por burrat dhe gratë e të gjitha bindjeve, e të gjitha moshave, e të gjitha qytetërimeve, e të gjitha regjimeve, panë një dhunë barbare mbi policinë. Disa menduan demonstratë të madhe, paçka se ata ishin 200- 300 horra. Pati një person, një personalitet, i cili nuk pa asnjë dhunë e ky ishte Shkëlqesia e Tij, Bamir Topi, i cili në komunikatën e parë të lëshuar nga zyra e tij, në 12 rreshta nuk citon një herë të vetme fjalën dhunë. Këto dhe të tjera janë çështje të Komisionit hetimor parlamentar. Unë bëra publike atë që e ka bërë vetë publike zoti Topi. Ditën e parë, zoti Topi nuk pa policë që gjuheshin barbarisht, nuk pa policë që u hidhej flaka për t’u djegur, nuk pa policë të shtrirë për tokë dhe kafshët u vërsuleshin me tërbimin më të madh. Nuk pa flamurin që një bandit e hodhi si leckë dhe një hero veshi gjoksin me të. Nuk i pa. Në komunikatën e tij, ju lutem lexojeni, ekziston çdo gjë tjetër, por fjala dhunë nuk ekziston. Po them një të vërtetë shumë të trishtë, shumë të hidhur, por kjo është një e vërtetë që do të dalë. Komisioni hetimor parlamentar do hetojë çdo gjë, rreth gjithsecilit. Nuk them dot më tepër, por kjo besoj se është një gjë që meriton. Ka të tjera të vërteta pas, por nuk janë çështje të konferencës së shtypit. Kjo ishte për mua.

Pyetje: Zoti Berisha, ju u shprehët të vendosur teksa thatë se zgjedhjet parlamentare do të mbahen në 2013. Sa kaq opozita gjatë gjithë protestave apo demonstratave të saj kërkon largimin e kësaj qeverie. Marrim në rast se ajo nuk futet në zgjedhje, cili do të jetë qëndrimi i mazhorancës?

Së dyti, Ministri i kulturës ka dalë dhe ka deklaruar se demonstratat e ditëve të fundit dhe në rast se do të ketë të tjera nga ana e opozitës, mund të dëmtojnë rëndë imazhin për turizmin. Cili është mendimi juaj?

Kryeministri Berisha: Së pari, detyra ime është të respektoj opozitën. Opozita jeton një nga ditët e saj më të zeza në historinë e saj, në historinë e partisë së saj, që nga themelimi në ’41 e deri më sot. Kjo është e vërtetë. Kjo është çështje e opozitës dhe jo e imja. Detyra ime është ta respektoj dhe të respektoj çdo vendim që merr, të reagoj ndaj çdo vendimi, në përputhje me ligjet, Kushtetutën dhe vlerat e vendit.

Së dyti, ky zotëri, pasi dështoi në bllokimin vizave për shqiptarët, ndërmori sulmin e zgjidhjes finale, shpalli zgjidhjen finale, që ishte përmbysja dhe eliminimi i një qeverie të zgjedhur me votë të lirë. Ky zotëri nuk fshehu asgjë. Ai u tha shqiptarëve se Sali Brisha ose do të pranojë zgjidhjen që ma diktonte ai, ose do të ecë mbi kufoma. Kjo është e dëgjuar dhe e lexuar nga të gjithë shqiptarët. E dëgjuat më datë 20 janar dhe e shkruar më datën 21 janar. Ai realizoi atë që realizoi, duke i krijuar një damkë të pallogaritshëm imazhit të Shqipërisë, duke larguar e dekurajuar për të ardhur miliona të huaj që po prenotonin në mënyrë të papërmbajtur hotelet dhe apartamentet në këtë vend, për të kaluar sezonin turistik. Por përsëri pas dimrit vjen pranvera. Përsëri ne qëndrojmë dhe do ta ngremë vendin në lartësinë që meriton. Ky është përcaktimi ynë absolut. 2-3 puçistë kurrë nuk mund të nëpërkëmbin këtë vend. Mund të djegin disa makina, mund të ngrenë disa tulla nga bulevardi, mund të paguajnë 200-300 bashibozukë, mund të persistojnë me njerëzit që i kishin droguar. Ne kemi të dhëna se një pjesë e mirë e tyre kishin marrë substancë në klube në Laprakë. I keni parë vetë. Policia po punon, po bën punë shumë të mirë në identifikimin dhe ndalimin e tyre. Prokuroria po fsheh provat, por harron se ata prapë arrestohen, sepse janë filmimet. Gjithçka u zhvillua para teleobjektivave të qindra kamerave dhe sistemeve të filmimit të institucioneve tona.

Faleminderit!”


Kryeministria
28/01/2011

[Albo]

Demonstrata, mijëra qytetarë bëjnë homazhe para Kryeministrisë

15:51- Mijëra qytetarë vazhdojnë të bëjnë homazhe përpara selisë së Kryeministrisë në bulevardin "Dëshmorët e Kombit" ku gjatë demonstratës së një jave më parë mbetën të vdekur 3 persona. Demonstrata homazh e organziuar nga opozita po shoqërohet nga një pjesmarrje masive qytetare. Prej orës 14: 00 kur dhe nisi marshimi janë dhe shumë qytetarë që presin në rradhë për të lënë lule apo për të ndezur një qiri në vendet ku u vranë Hekuran Deda, Faik Myrtaj dhe Zyber Veizi.


15:00- Vazhdojnë homazhet në bulevardin 'Dëshmorët e Kombit'. Kreu i opozitës Edi Rama është ndalur dhe ka vënë lule në vendin ku u vranë Hekuran Deda, Faik Myrtaj dhe Zyber Veizi një javë më parë. Së bashku me kreun socialist të gjithë qytetarët po vendosin tufa me lule.


14:30
Në fillim të bulevardit janë rreshtuar anëtarët e FRESSH-it me fototgrafitë e tre viktimave dhe kurora lulesh. Pas tyre ndodhen familjarët, më pas ndodhet lideri i opozitës me Edi Ramën dhe popullin. Gazetarët e "Shekulli"-t raportojnë se e gjithë qendra e Tiranës është e mbushur me njerëz.


13:59
Ka nisur marshimi homazh drejt Kryeministrisë. Qytetaret me ne krye kreret e opozites jane nisur nga qendra e Tiranes drejt selise se kryeministrise, ku do te kryhen homazhe ne nderim te tre viktimave te 21 janarit.


13:18
PS fillon shpërndarjen e disa rripave të verdhë që do të mbahen në krah nga ana e FRESSH-it. Janë rreth 500 vetë të cilët pritet që të mbajnë qetësinë në demonstratë dhe të orientojnë njerëzit që do të marrin pjesë në demonstratën-homazh. Në sfond është vendosur një muzikë funebër që do të vazhdojë gjatë gjithë protestës. Janë vënë disa objekte anas rrugës në mënyrë që demonstruesit të mos prekin policinë


13:00
Njerëzit janë mbledhur turma-turma në bulevard. Sheshi para kryeministrisë është ndarë në dysh me hekura të kanë vendosura nga punonjësit e bashkisë, në mënyrë që të realizohet që njerëzit të vijnë nga një anë dhe të largohen nga ana tjetër. Ka shumë forca policie. Nga krahu i bulevardit janë forcat e policisë së rendit, nga krahu i piramidës ndodhen forcat e ndërhyrjes së shpejtë
Në zonën e Zogut të Zi raportohet se ka shumë njerëz që presin në këmbë për t'u nisur drejt qendrës e më pas drejt bulevardit


12:00
Ka filluar të boshatiset nga makinat, sheshi në të cilin do të zhvillohet demonstrata homazh. Forca të shumta policore ndodhen në shesh duke marrë masa për zbrazjen e sheshit, në pritje të demonstratës-homazh në nderim të të vrarëve të një jave më parë, pikërisht në të njëjtin vend. Policia Rrugore po merr masat për largimin e makinave nga
bulevardi "Dëshmorët e Kombit", ndërsa sipas të dhënave, qarkullimi do të ndalohet plotësisht rreth orës 13:30.
Gjithashtu, bëhet e ditur që edhe mediave u është kërkuar të vendosen në një tjetër pozicion, ndryshe nga ai ku ishin vendosur gjatë demonstratës së 21 janarit. Edhe pse një ditë e ftohtë dhe me shi, pritet që demonstrata e sotme - homazh të ketë një numër shumë të madh pjesëmarrësish.


Gjithashtu, para selisë së PS kanë mbërritur me dhjetëra qytetarë në pritje të fillimit të manifestimit-homazh. Kanë mbërritur edhe buqeta dhe kurora me lule në kujtim të të vrarëve si sot një javë më parë. Kurorat mbanin mbishkrime në nderim të demonstruesve të vrarë, të vetmet parulla që pritet të shihen sot gjatë tubimit-homazh të opozitës.


***

PS: Qytetarët, lutje dhe respekt, asnjë përgjigje ndaj provokimeve

Anëtarja e Asamblesë Kombëtare të PS-së, Megi Ajtyresa, u ka bërë thirrje sot të gjithë pjesëmarrësve në demonstratën-homazh që të mos i përgjigjen asnjë lloj provokimi, teksa kërkoi respekt për policët në detyrë. "Opozita e bashkuar i bën thirrje çdo qytetari pjesëmarrës në demonstratën homazh që të vijë me rrobat e zisë, me lulet e nderimit dhe me qiririn e lutjes për një paqe të madhe sociale mes shqiptarësh.
Asnjë thirrje, asnjë përgjigje ndaj çfarëdo provokimi gjatë ecjes në rrugët e Tiranës, asnjë shprehje tjetër veç respekti për çdo polic që sot është në detyrë.
"Policia e Shtetit është e ftuar të bëjë pa asnjë ngurrim të gjithë punën e domosdoshme të saj dhe çdo demonstrues është i thirrur të jetë mirëkuptues e bashkëpunues me policinë.
"U lutemi të gjithëve të respektojnë drejtimin e lëvizjes dhe të mirëkuptojnë ngadalësinë e ecjes në kushtet e posaçme që imponon solemniteti i homazheve të sotme.
"Këto janë orë të rënda për Shqipërinë. E gjithë bota i ka sytë nga ne. Të gjithë ne, demonstrues e policë, duhet të japim sot mesazhin e një populli të qytetëruar në rrugën e rivendosjes së demokracisë", përmbylli Ajtyresa. Edhe dje në një konferencë për shtyp kreu i PS-së, Edi Rama, kërkoi nga të gjithë pjesëmarrësit që të shmangnin provokimet dhe të ndiqnin paqësisht kortezhin në nderim të tre të vrarëve.

Shekulli

[Albo]

Presidenti Topi takon ish-Presidentët e Shqipërisë, Rexhep Meidani dhe Alfred Moisiu


28 janar 2011

Presidenti i Republikës, Prof. Dr. Bamir Topi priti sot dy ish-Presidentët e Shqipërisë, Rexhep Meidani dhe Alfred Moisiu, me të cilët zhvilloi një bisedë të përqendruar në situatën politike të krijuar dhe rolit të Kryetarit të Shtetit, në respekt dhe zbatim të Kushtetutës, për zgjidhjen sa më të shpejtë dhe efikase të mosmarrëveshjeve politike dhe nxjerrjes së vendit nga gjendja e patolerueshme e hendekut politik mes palëve, përshkallëzimit të gjuhës së urrejtjes edhe në drejtim të institucioneve të larta kushtetuese e të pavarura të vendit.

Nga ana e tyre, dy ish-Presidentët vlerësuan lart rolin moderator dhe të ekuilibruar të Presidentit të Republikës, Bamir Topi dhe apelet e vazhdueshme të tij për partitë politike, ku bëhet thirrje për vendosjen e dialogut politik, konstruktiv, thelbësor në shërbim të interesave të vendit dhe të qytetarëve të tij si garant i Kushtetutës dhe i unitetit të popullit.

Zoti Meidani dhe zoti Moisiu u shprehën se mbështesin fort rolin e Kryetarit të Shtetit duke nëvizuar rëndësinë e institucioneve të pavarura, theksuan nevojën urgjente për rikthim në normalitetin politik institucional si dhe që politika dhe udhëheqësit politike duhet të ndalin menjëherë çdo sulm ndaj institucioneve të pavarura kushtetuese. Njëkohësisht u vu në dukje domosdoshmëria për t’u lënë hapësirën dhe kohën e nevojshme organeve të specializuar ligjore që të zhvillojnë një hetim tërësor, profesional, transparent e të paanshëm.

Pasi u dënua dhuna e ngjarjeve të 21 janarit dhe sulmet verbale kundër institucioneve, rendit publik dhe vetë jetës së qytetarëve, në takim u theksua nevoja jetike e shtyrjes apo anulimit të çfarëdolloj tubimi masiv publik që mund të shkaktojë ngjarje të padëshirura, e ruajtjes së gjakftohtësisë dhe komunikimeve me tone të qeta, të maturuara dhe mendimet vizionare në frymën e Kushtetutës së Shqipërisë – që do të ishin hapat e parë konkretë në kërkim të zgjidhjes së drejtë për të dalë nga kjo gjendje, e cila cënon demokracinë në vend dhe dëmton rëndë imazhin e Shqipërisë në botë.

Presidenca

[Albo]

Përfundon protesta-homazh

Ka përfunduar protesta-homazh në nderim të viktimave që humbën jetën në demonstratën e 21 janarit.

Edhe personat e fundit që kanë marrë pjesë në këtë manifestim paqësor kanë vendosur lule dhe ndezur qirinj në vendet ku tre viktimat e tragjedisë humbën jetën.

Fillimisht në fotografitë e tre të rënëve kanë vendosur lule familjarët dhe krerët e opozitës, të cilët u kanë lënë radhën edhe qytetarëve të tjerë që me lule në duar dhe të përlotur kanë nderuar viktimat.

Pjësëmarrësit pasi mbaruan nderimin e viktimave u shpërndan qetësisht.

I gjithë manifestimi është kryer nën drejtimin e përfaqësuesve të opozitës të cilët të pajisur me shirita të verdhë në krahë, kanë orientuar qytetarët.

Homazhi ka pasur një interesim të madh edhe nga mediat ndërkombëtare që kanë pasqyruar këtë manifestim paqësor.

Top Channel

[Albo]

Hetimet për 21 janarin, mbërrijnë në Tiranë ekspertët amerikanë

TIRANË- Vetëm pak kohë pas përgjigjes pozitive të SHBA për ndihmë teknike në hetimet e 21 janarit, mbërrijnë në Tiranë një grup specialistësh të dy byrove amerikane të hetimit, FBI dhe ATF.

Ata janë paraqitur dje në Prokurorinë e Tiranës në përgjigje të kërkesës së Prokurorisë shqiptare për ndihmë teknike në hetimin e ngjarjeve të 21 janarit.

Ata mësohet se kanë marrë kontakt me dy prej prokurorëve të cilët po drejtonin hetimet në lidhje me incidentet me pasoja, që shoqëruan demonstratën e pak ditëve më parë.

Takimi i djeshëm i ekspertëve amerikanë me prokurorët shqiptarë mësohet se ka qenë i karakterit teknik. Ata janë informuar për ndihmën që mund të japin në hetimet e drejtuara nga Prokuroria shqiptare, si dhe kanë hartuar një plan të përbashkët pune me grupin shqiptar të hetimit.

Panorama

[Albo]

Viktima u qëllua me predhë 9mm, gardisti qëlloi me Kallashnikov

TIRANE - Të dhënat e deritanishme janë kontradiktore për njërin prej personave të vrarë pranë Kryeministrisë në Tiranë, i cili është parë edhe në videot e publikuara në media. Kështu, viktima që shikohet në video, me rroba të zeza dhe që bie përtokë në kohën kur qëllohet me armë nga një gardist përbri tij brenda oborrit të Kryeministrisë, është vrarë me plumb 9 mm. Një plumb i tillë përdoret zakonisht në pistoletat dhe në disa armë të vogla, automatikë të shkurtër, që vihen në përdorim për luftë, në distancë të shkurtër. Gardisti që shfaqet duke qëlluar me armë, në kohën kur ky person bie përtokë para portës metalike të Kryeministrisë, sipas videos dhe interpretimit që bëjnë ekspertët, ka qenë duke qëlluar me Kallashnikov. Sipas specialistëve, duket qartë se arma me të cilën qëllon gardisti është Kallashnikov, pasi edhe nga kamerat që kanë kryer regjistrimin, është parë se arma nxirrte sasi të madhe flake e baruti nga tyta e saj. Sipas specialistëve, Kallashnikovi ka një predhë prej 7.62 m/m dhe jo 9 mm, siç janë predhat që kanë goditur viktimat. Kjo kontradiktë pritet të shpjegohet nga hetimet që po zhvillohen në proces gjatë kryerjes së akt-ekspertimeve në vendin e ngjarjes, si dhe gjatë analizimit të predhave dhe gëzhojave në skenën e krimit. Ndërkohë, një numër prej 81 gardistësh që kanë pësuar lëndime ditën e ngjarjes, kanë refuzuar të paraqiten tek mjekësia ligjore, për t'iu nënshtruar ekzaminimit. Prokuroria, tri ditë më parë evidentoi plagosjen e 81 gardistëve dhe u kërkoi atyre të kryenin raport mjeko-ligjor për të dokumentuar dëmtimet që u janë shkaktuar. Por gardistët kanë refuzuar të paraqiten në zyrat e mjekësisë ligjore. Prokuroria ka kërkuar të shqyrtohet mundësia që akt-ekspertimi të bëhej në ambientet e Gardës, por mjekët ligjorë kanë thënë se ekzaminimet jashtë zyrave të tyre nuk janë në praktikën e punës.

Panorama

[Albo]

PS: Dhunë barbare ndaj demonstruesve në polici

Partia Socialiste akuzoi dje Policinë e Shtetit se ka keqtrajtuar në komisariate të arrestuarit e demonstratës së 21 janarit. Deputetja Olta Xhaçka, e shoqëruar nga dy pjesëmarrës në demonstratë që ishin arrestuar, tregoi se "të arrestuarit janë rrahur e torturuar barbarisht nga policë me uniformë dhe banditë me xhinse e xhupa lëkure në shkelje të plotë të çdo ligji". "Por ka sot me qindra dëshmitarë që kanë gjetur guximin të dëshmojnë për dhunën kriminale, që është ushtruar ndaj tyre gjatë arrestimit dhe gjatë qëndrimit nëpër rajone policie. Kjo është një sjellje e denjë për çdo regjim fashist në botë, të cilën ne do ta dokumentojmë për t'i treguar jo vetëm publikut shqiptar, por edhe mbarë botës sesi sillet regjimi i Sali Berishës me njerëzit që guxojnë të protestojnë kundër tij", u shpreh Xhaçka. Deputetja socialiste akuzoi kryeministrin se "po përpiqet të rikthejë kohën e spiunëve duke paguar dëshmitarë për të provuar atë grushtin imagjinar të shtetit, që ka parë në ëndërr Saliu". Të pranishëm dje gjatë deklaratës së Xhaçkës, ishin dhe dy ish të ndaluar nga policia. Altin Çoça, një invalid dhe epileptik, dëshmoi se është dhunuar në mënyrë të përsëritur nga forcat e rendit e më pas është braktisur nga ata në Spitalin Ushtarak, pa ndjenja. "Ishim duke ndenjur qetësisht në demonstratë, në atë kohë filluan të na gjuanin. Më rrahu policia, më gjuajti me shkopa dhe me shkelma. I thashë që jam invalid, ata vazhduan të më gjuanin përsëri, derisa më lanë pa ndjenja. Isha gati duke vdekur. Më çuan tek spitali numër 2 dhe më mbajtën 3 ditë aty", u shpreh dje Çoça. Ndërsa Altin Bala është dhunuar barbarisht gjatë shoqërimit në komisariat e më vonë edhe aty, derisa për shkak të plagëve në kokë është shoqëruar edhe ai në spital. a.l

Panorama