Studimi: Shqiptaret paguajne me shume se evropianet per sherbimin celular e bankar

[Albo]

Pollo: Tarifat e telefonisë celulare, në nivele skandaloze

Duke i konsideruar ato si skandaloze, në nivele shumë më të larta se rajoni i Ballkanit, ai shtoi se nga ana e kompanive që operojnë në treg duhet të kihet më shumë etikë lidhur me fitimin. "Një analizë e tregut e ndërmarrë nga rregullatori (AKEP) tregon se normat e fitimit të operatorëve mobilë me fuqi të ndjeshme në treg janë jonormale dhe joetike, sidomos kur mbështeten në superçmime për qytetarët e një vendi ku ka ende varfëri", tha Pollo. Ministri nuk nguroi që të etiketonte gjithë historinë e përdorimit të telefonisë celulare në vend si jo pro klientit. "Çmimet e përdoruesit të telefonit celular nuk janë një faqe e lavdishme në historinë e kompanive mobile në Shqipëri. Në këto 10 vite, shqiptarët kanë paguar për celularët e tyre çmime, të cilat, të krahasuara me koston, kudo në botë do të ishin quajtur skandaloze. Megjithë uljet e çmimeve në 2-3 vitet e fundit, përsëri celularët tek ne kushtojnë më shumë se në Ballkan dhe në Europë" deklaroi Pollo. Ndërkaq, referuar nismës që ka marrë AKEP për uljen e tarifave të terminimit, ministri u shpreh se kompanitë duhet të reflektojnë këtë nismë tek ulja e çmimeve për shërbimet që ofrojnë.

Reagimet
Reagimet për tarifat e larta të telefonisë celulare janë zgjuar shpesh së fundmi. Autoriteti i Komunikimeve Elektronike dhe Postare kritikoi në raportin vjetor të një viti më parë se kompanitë kanë një fitim shumë herë mbi normalin. Banka Botërore, në punimin e saj të fundit lidhur me strategjinë e rritjes ekonomike të Shqipërisë, thekson se telefonia celulare është ndër më të shtrenjtat në Europë dhe rajon. Në këtë linjë ka qenë dy ditë më parë edhe reagimi i kryeministrit Sali Berisha, i cili paralajmëroi kompanitë që nëse nuk zbatojnë një kod etik fitimi, do të përballen me rritjen e tatimfitimit. Kreu i qeverisë, në daljen e tij publike me drejtoreshën e Lartë të Bankës Botërore, u shpreh se qeveria ka në dorë që fitimin e lartë të kompanive ta taksojë dhe ta çojë në shërbim të qytetarëve.

AKEP: Tarifat do ulen gradualisht në katër vjet

Në mars të këtij viti do të jetë edhe reduktimi i parë i tarifave për të katër operatorët e telefonisë celulare në vend. Referuar të dhënave të publikuara nga AKEP, të cilat do të marrin edhe konsultimin e nevojshëm publik, sugjerohen disa faza dhe nivele uljeje për tarifat aktuale të telefonisë celulare. Nëse aktualisht tarifa më e ulët që ofrohet sot është 10.5 lekë për minuta nga dy operatorë, në mars kjo tarifë do të zbresë në 8.85 lekë për minutë. Ndërkohë që në shtator të po këtij viti pritet një tjetër reduktim tarifash, që synon përafrimin drejt një tarife me diferenca më të vogla mes tyre për katër operatorët. Tarifa më e ulët ndër operatorët do të jetë 7.57 lekë për minutë, ndërsa më e larta 12.92 lekë për minutë. Në shtator të vitit 2012 do të shtrihet faza tjetër e reduktimit të tarifave, ku më e larta ndër operatorët do të jetë 8.42 lekë për minutë dhe më e ulëta 6.1 lekë për minutë. Në 2013-n, tre prej kompanive të telefonisë celulare do të kenë tarifa të barabarta për thirrjet, ndërsa në 2014-n, të katra kompanitë do të kenë tarifë të njëjtë.


Panorama
NERTILA MAHO

[Albo]

Sms-të e celularëve, Berisha: Të rritet 8 herë tatim-fitimi

Ministria e Financave do të përgatisë ndryshimet në paktën fiskale, të lidhura me tatim-fitimin. Kreu i qeverisë Sali Berisha gjatë mbledhjes së djeshme të ekzekutivit, ka urdhëruar që ndryshimet të bëhen shpejt në mënyrë që t’i jepet fund abuzimeve ndaj qytetarit. Prej tri ditësh, çështja e tarifave të larta të telefonisë celulare është kthyer në kryefjalë të qeverisë, duke pasur si referencë të dhënat e servirura nga Autoriteti i Komunikimeve Elektronike dhe Postare. Në këto të dhëna të përgatitura me konsulencë të huaj, rezulton që tarifat që ofrohen në Shqipëri janë shumë herë më të larta sesa rajoni dhe më gjerë.

Kompanitë Celulare
Kryeministri Sali Berisha u ndal dje në dy kategori shërbimesh, ato të telefonisë celulare dhe ato bankare. Sipas tij, të dhënat e AKEP tregojnë tarifa stratosferike, ndërkohë që ligji që do të hartohet nga Financat, do të rritë proporcionalisht tatim-fitimin, sipas niveleve të tarifave që operatorët zbatojnë në praktikë. “Studimet që AKEP bën me konsulencën ndërkombëtare, dëshmon se operatorët celularë i tarifojnë qytetarët shqiptarë me tarifa stratosferike. Kostoja e një mesazhi është 5.5 lekë dhe këtu konsulenti ka përfshirë edhe 17 për qind të fitimit të kompanisë. Këta operatorë e kanë shndërruar mesazhin në bixhoz e bingo, e shesin me 100 lekë. Ndaj zoti ministër i Financave, tatim-fitimi për çdo sms, do të jetë 7-8 herë më i madh, sesa është sot. Çdo impuls për biseda, do të tatohet në proporcion me herët që është mbi rajonin”, tha kryeministri. Ndërkohë që nga ana tjetër, kreu i qeverisë, i ka kërkuar Ministrit të Inovacionit dhe Teknologjisë së Komunikimit të Informacionit, Genc Pollo që të mbledhë në një takim operatorët e telefonisë celulare për të diskutuar rreth tarifave që aplikojnë këta të fundit.

Bankat
Sistemi bankar ka qenë dje në qendër të deklaratave të kryeministrit, Sali Berisha. Ai theksoi se me kërkesë të qeverisë, Banka e Shqipërisë është përpjekur të mundësojë që bankat në vend të kenë standarde dhe norma të arsyeshme, por ka ende për t’u bërë. Kreu i qeverisë theksoi se fee-të që zbatojnë bankat për shërbimet e tyre janë tejet të larta, çka i garantojnë këtyre të fundit një fitim jashtë normales. “Ne kemi miratuar çdo ligj e do të miratojmë çdo ligj që u nevojitet bankave, për funksionimin e tyre të shëndetshëm e të suksesshëm. Por në mënyrën më të përsëritur, është insistuar që të rishikohen tarifat (fee-të), të cilat përbëjnë gjithsej 2 për qind të të ardhurave të bankës. Të paktën kjo është një statistikë që më është dhënë, ndoshta mund të jetë edhe më shumë. Por është stratosferike”, vlerësoi Berisha. Sipas tij, tarifat që vendosin bankat në vend janë më të larta sesa në rajon dhe kjo nuk do të tolerohet. Edhe në këtë rast, ai i kërkoi ministrit të Financave, Ridvan Bode që të rishikohet tatim-fitimi i aplikuar mbi tarifat apo ndryshe “fee-të” dhe të vihet në zbatim një tatim-fitim i rritur, në proporcion me herët e tarifave më të larta të zbatuara. Ndërkaq, një tjetër detaj që shtoi kreu i qeverisë, lidhej me ligjin hungarez të tatimit të bankave, i cili do të meret parasysh nga qeveria shqiptare si model.


Panorama
NERTILA MAHO