Kurti: Jo koalicion me LDK-në

[Disa]

Procesi zgjedhor i 12 dhjetorit ka qenë i përcjellë me shumë parregullsi dhe shkelje ligji në Kosovë, prandaj bëhet fjalë për zgjedhje që nuk ishin as të ndershme, e as demokratike. Për pasojë, këto zgjedhje, të cilat janë të papranueshme, përfunduan me një rezultat të kontestueshëm, ka deklaruar Albin Kurti, lider i Lëvizjes “Vetëvendosje” në një intervistë për “Kosova Sot”. Sipas tij, rezultatet janë të kontestueshme ndër të tjera edhe për shkak se të mbushjes së kutive me vota të parapërgatitura, sidomos në orët e vona të pasdites, me ç’rast u kërcënuan e rrahën vëzhguesit e komisionarët. “Nuk mund ta them në mënyrë të saktë përqindjen e cila na është vjedhur neve, por e di se ajo është shumë më e lartë se kaq. Kjo është bërë në njërën anë nëpërmjet shkeljeve që i përmenda e, në anën tjetër, edhe për shkak se është rritur artificialisht numri i votuesve nëpërmjet keqpërdorimit të votave të tri kategorive: njerëzit që janë në diasporë, të cilët nuk kanë votuar, por del se kanë votuar, minoritetet ku është fryrë së tepërmi numri i tyre si votues, dhe gjithashtu janë njerëzit e vdekur, emrat e të cilëve figuruan si votues. P.sh. Prizreni ka gjithsej 160 qytetarë serbë, që do të thotë rreth 100-120 votues. Mirëpo, KQZ-ja raporton se partitë që përfaqësojnë qytetarët serbë atje kanë fituar 497 vota, çka është rreth 500% e votuesve! Ose, në Fushë-Kosovë ka 800 qytetarë romë dhe ashkali, pra rreth 500-550 votues, ama të dhënat e KQZ-së tregojnë se partitë që i përfaqësojnë këto pakica kanë mbledhur 611 vota, çka do të thotë se kishim një pjesëmarrje prej 111-122%!, thotë z. Kurti.

Në interesimin se me kë do të hynit në koalicion, po qe se do t’u ofrohej, Albin Kurti thotë: “Ne nuk hyjmë në koalicion me asnjërën prej këtyre partive politike, të cilat do të jenë në Parlamentin e ardhshëm të Kosovës, për shkak se ato ose kanë qenë në qeverisjet e pasluftës, ose kanë flirtuar me ato qeveri dhe kësisoj ne i mbajmë ato përgjegjëse për gjendjen në të cilën ndodhemi, gjendje kjo, e cila, siç dihet, karakterizohet nga pasiguria politike, stagnimi ekonomik dhe mjerimi social. Duke bërë koalicion me to, ne do të merrnim përgjegjësi, të cilën nuk e kemi dhe sadopak do t’i rehabilitonim e do t’i shfajësonim ato. "Ne nuk jemi optimistë se LDK-ja ka ndryshuar, mjafton ta shihni listën e saj të kandidatëve për deputetë, e në të njëjtën kohë e dimë që LDK-ja nuk është kundër këtij privatizimit neoliberal në mënyrë thelbësore. Po ashtu, ata kanë deklaruar tashmë se i pranojnë negociatat me Serbinë për çështje teknike. Ndërkaq, ne mendojmë që nuk duhet të ketë kurrfarë negociatash me Serbinë përderisa kjo e fundit nuk e pranon pavarësinë e Kosovës, nuk e ndërron kushtetutën e saj, në të cilën thuhet se Kosova është pjesë e Serbisë, derisa nuk na kërkon falje për krimet e bëra në Kosovë, nuk na i kthen kufomat e të pagjeturve, ose nuk na jep informata për ta, nuk na i paguan dëmet e luftës, nuk na i dorëzon kriminelët serbë të luftës, nuk na i kthen librat kadastralë e fondin pensional dhe nuk pushon së financuari strukturat e saj ilegale në Kosovë", ka deklaruar ndër të tjera lideri i "Vetëvendosjes". (Intervistën e plotë mund ta lexoni në numrin e sotëm të “Kosova Sot”)