90 vjet nga krijimi i spitalit

[Brari]

GSH

QSUT, 90 vjet nga krijimi i spitalit

» Dërguar më: 19/12/2010 - 13:27



Esmeralda Keta

Qendra spitalore universitare "Nënë Tereza" ka mbushur dje 90 vjet që nga krijimi i saj. Me rreth 50 mijë pacientë që trajton çdo vit dhe mbi 2 milionë analiza laboratorike, kjo qendër, sipas ministrit të Shëndetësisë, Petrit Vasili është një institucion që prodhon shëndet. Në ceremoninë e rastit të zhvilluar gjatë ditës së djeshme kreu i Shëndetësisë shqiptare ka deklaruar se QSUT-ja është një shembull për të gjithë vendin.
QSUT
Fillimisht si spital ka funksionuar në vitin 1920, në një godinë të vogël që ndodhej në krah të Bashkisë së Tiranës, ndërsa është zhvendosur në një godinë të vërtetë në vitin 1932, pikërisht ku ndodhet drejtoria e këtij institucioni në ditët e sotme. Që nga fillesat në godinën e vogël të vitit 1920 kanë kaluar plot 90 vjet, dhe tashmë qendra universitare spitalore "Nënë Tereza", është kthyer në një qendër reference dhe shembull të mirë për të gjithë institucionet shëndetësore në Shqipëri. Në ceremoninë e rastit, e cila është zhvilluar gjatë ditës së djeshme ministri i Shëndetësisë, Petrit Vasili, e ka cilësuar këtë institucion si më të rëndësishmin në vend, por edhe në rajon, duke e etiketuar si një prodhues të shëndetit. "QSUT-ja mbetet një nga institucionet më të rëndësishme në vend, i cili nuk e ka ndalur kurrë ritmin e të ecurit përpara. Falë vullneteve dhe aftësive të stafit në këtë institucion, janë realizuar edhe ndërhyrjet, të cilat kanë qenë të pamundura, por më pas janë kthyer në realitete dhe në shërbim për pacientët. Në këtë spital është prodhuar shëndet", - ka pohuar ministri i Shëndetësisë. Sipas tij, duhet të vlerësohen me mijëra persona, të cilët kanë dhënë ndihmën e tyre për të arritur deri në këtë moment kur e gjithë popullata gjen shërbim të specializuar dhe mjekë të kualifikuar. Ndërkohë që drejtori i QSUT-së, Saimir Ivziku ka pohuar se ky institucion në të ardhmen do të jetë në krah të pacientit duke i ofruar të gjitha shërbimet e nevojshme. "Dua të falenderoj të gjithë ata që kanë kontribuar në sukseset e këtij institucioni. Kjo edhe me investimet që po kryhen në këtë qendër, duke i ofruar pacientit aparatura të fjalës së fundit" - ka nënvizuar Ivziku.


-